O 
xurado da XIV edición do Premio de Poesía Johán Carballeira, convocado polo Concello de Bueu, e constituído por Lucía Novas, Antón Lopo, Olalla Cociña e Xabier Framil Barreiro, escolleu, por unanimidade, como gañador o libro presentado por Calros Solla, Koyi Kabuto. Lume de ollos en MazinGZ. O xurado xustificou a súa resolución alegando que a obra “aposta por crear un mundo propio a partir de elementos da cultura popular contemporánea (desde o anime á televisión, pasando por internet e os petroglifos de Mogor). Cuestións de actualidade (a celulosa de Pontevedra, a ampliación da ponte de Rande, o tren de proximidade…) vehiculízanse nunha poesía enxeñosa e lúdica, descarada, con sabor a licor café e algo de resaca”. Segundo explicou o autor, a obra foi construída a tres voces. Unha é do transcritor, pois utilízase a técnica do manuscrito atopado. Outra é a do robot MazinGZ -trasunto galego de Mazinger Z-, e outra a do seu piloto, KoyiKabuto: “Quería que se acabasen confundindo as voces. No libro hai historias de amor e desamor, e de loita contra o mal. Os superheroes pelexan, nunha loita desigual, contra o mal -o goberno-, que quere acabar coa nosa lingua, a nosa cultura e o noso medio natural. Escollín a superherores porque é o que lle fai falta ó noso pobo contra os ataques á lingua e a cultura”.
Arquivos da etiqueta: Antón Lopo
A palabra exacta, biografía de Lois Pereiro, por Antón Lopo
(Galaxia)
Santiago: presentación de Obediencia, de Antón Lopo
O 
mércores 22 de decembro, ás 20:00 h., na Libraría Couceiro (Praza de Cervantes, 6) de Santiago de Compostela, presentación da novela gañadora do Premio García Barros 2010, Obediencia, de Antón Lopo, publicada en Galaxia. No acto participan, co autor, Carlos Lema e Anxos Sumai. Comentado en Galicia Hoxe, e con crónica posterior tamén en Galicia Hoxe e Xornal de Galicia.
Antón Lopo: “Hai estratexias para que o galego non teña identidade”
Entrevista publicada en El Correo Gallego con Antón Lopo, que recibe este venres 10 de decembro o Premio García Barros no Teatro Principal da Estrada pola súa obra Obediencia. Crónica posterior deste acto en Galicia Hoxe.
Antón Lopo gaña o premio Manuel García Barros coa novela Obediencia
Unha Compostela independente que domina de xeito despótico o seu contorno na Galicia no século XXII. Este é o contexto no que se desenvolve Obediencia a novela coa que o escritor e xornalista Antón Lopo acaba de se facer co XXII premio Manuel García Barros de novela, que convoca o Concello da Estrada. O xurado (composto por Inmaculada Otero, Manuel Santiago Fernández, Xosé Manuel Eyré, Carlos Lema e Valentín García) destacou a capacidade do autor para transmitir “sensación de futuro”. A obra será publicada proximamente pola editorial Galaxia.
A nova foi recollida deste xeito nos medios de comunicación: (El Correo Gallego, Galicia Hoxe, A Nosa Terra, La Opinión, Vieiros, Xornal).
Culleredo: presentación de A distancia do lobo. Biografía sobre Uxío Novoneyra, de Antón Lopo
O vindeiro mércores 12 de maio, ás 20:00 na Biblioteca da Poesía “Uxío Novoneyra” de Vila Melania (Vilaboa, Culleredo),terá lugar a presentación do libro A distancia do lobo. Biografía sobre Uxío Novoneyra (Galaxia), de Antón Lopo. No transcurso do acto tomarán a palabra Celestino Poza Domínguez (concelleiro de Cultura) e o autor.
“Comunicar cultura”, as xornadas do CCG
Durante os días 20, 21 e 29 de abril de 2010 terán lugar no Consello da Cultura Galega as xornadas “Comunicar cultura”, que contarán coa participación, entre outras, de Ramón Villares, Ana Romaní, Camilo Franco, Carlos G. Reigosa, Santiago Jaureguizar, Xosé Ramón Pena, Antón Lopo e Alfredo Ferreiro. A organización está principalmente a cargo de Xosé López, Xosé Manuel Pereiro e Rosa Aneiros. Pode consultarse o programa completo aquí.
«A comunicación ocupa un lugar central na configuración dos novos modelos de sociedade e, por tanto, tamén nas transformacións no campo cultural. Comunicación e Cultura son aspectos da mesma realidade social que dificilmente podemos separar. Nestes últimos anos a alianza entre cultura e comunicación converteuse nun eixe estratéxico para xerar produtos creativos, para fomentar o intercambio de puntos de vista e para incentivar a participación cidadá en todos os ámbitos da vida diaria. O panorama actual amosa oportunidades para que, mediante o emprego das ferramentas axeitadas, poidamos converter vellos soños de renovación no campo da comunicación e da cultura en realidades. A comunicación mediada tecnoloxicamente, como elemento transversal para a cultura, convértese nun instrumento clave nos procesos de difusión e creación para uns cidadáns cada vez máis esixentes. De feito, a cultura encóntrase no centro da maioría dos debates contemporáneos sobre identidade, tolerancia e convivencia en igualdade. Hai, por tanto, apaixonantes desafíos pensando a comunicación desde a cultura.
Estas xornadas de traballo, enmarcadas nos foros de debate que promove e organiza o Arquivo de Comunicación do Consello da Cultura Galega, queren achegar reflexións teóricas e prácticas, potenciar o coñecemento e fomentar o debate. Será un encontro aberto con voces plurais para procurar ideas neste proceso de análise e debate colectivo, con especial atención ás renovadas técnicas para comunicar cultura no ecosistema mediático do terceiro milenio. […]» (Consello da Cultura Galega)
Barcelona: actos pola Diada de Sant Jordi e do Día das Letras Galegas
As Filoloxías Galega e Portuguesa da Universitat de Barcelona organizan co gallo da Diada de Sant Jordi e do Día das Letras Galegas as seguintes actividades:
* Xoves 22 de abril de 2010 ás 18:00 (Aula 111): conversa entre os escritores Manuel Rivas e Màrius Serra “A boca da literatura: memoria, ecoloxía e lingua”; recital de Manuel Rivas “O máis estraño” (PDF).
* 10 ao 21 de maio de 2010 (Vitrinas da Biblioteca General): exposición bibliográfica “Uxío Novoneyra e a poesía experimental en Galicia” (PDF)
Máis información aquí.
