Desde Nós Diario:
“O Espazo Cultural Manuel María da cidade da Coruña, recentemente aberto ao público, serviu de escenario para a entrega do premio correspondente á quinta edición do Certame Manuel María de Proxectos Teatrais. A iniciativa está organizada pola Fundación e Casa-Museo Manuel María coa colaboración das Deputacións da Coruña e Lugo, o Centro Dramático Galego (CDG), as Mostras de Teatro de Ribadavia e Cariño e 34 concellos galegos. Nesta edición, o xurado outorgou o galardón por unanimidade á proposta Semente de dramón, presentada conxuntamente polas compañías Ancoraxe Escénicas e Compañía Morraoconto sobre o texto de Manuel María Semente de dramón dos medios de comunicación, baixo a dirección de Sara Rey e Rafa R. Martínez.
A montaxe “revisita a farsa de Manuel María botando man de referentes actuais, tanto estéticos como conceptuais, que afondan no bombardeo informativo ao servizo dunha sociedade na que a masa dilúe as individualidades e o capitalismo acaba sendo esa Pantasma Famenta que nos devora na súa arela globalizadora”.
O tribunal –presidido por Quico Cadaval e composto por Paula Carballeira, Cristina Domínguez e con Alberte Ansede, Presidente da Fundación Manuel María, exercendo de secretario con voz mais sen voto– valorou o uso dunha linguaxe artística contemporánea e de ferramentas escénicas como música, cancións e coreografías.
Así mesmo, salientou que “as dúas compañías asociadas, fascinadas pola actualidade da mensaxe do autor, indagan no “como”, “onde” e “quen” controla o relato nos mass media, servíndose dunha linguaxe artística anovadora e contemporánea”.
Este certame bienal para compañías profesionais galegas combina unha axuda financeira de 19.200 euros para produción (4.200 euros da Fundación e 15.000 euros do CDG) cunha ampla xira garantida de 40 representacións por vilas e cidades galegas. Na entrega do premio, recollido por Sara Rey, Laura Pouso e Miguel Gendre, Alberte Ansede destacou que a difusión é o mellor recoñecemento para o teatro, mentres que Francisco Javier Núñez, director do CDG, louvou a colaboración entre compañías. O espectáculo estrearase nun prazo máximo de 10 meses e estará en cartel cando menos até finais de 2028.”