Os libros arden mal. Homenaxe á cidade da liberdade é un acto que combina literatura, música e memoria da man de Manuel Rivas (narrador), Marcos Meléndrez (cantante de tangos), Gastón Rodríguez (guitarra) e Pulpiño Viascón (voz, gaita e serrucho). Está prevista a participación doutros músicos convidados. Será o sábado a partir das 20:30 no Teatro Rosalía de Castro da Coruña, con entrada libre e de balde.
O mércores 20 de maio ás 20.30 h no Teatro Jofre de Ferrol faise un pase de estrea da película O clube da calceta, dirixida por Antón Dobao a partir dunha novela de María Reimóndez. Os interesados deben confirmar a súa asistencia no teléfono 981536630.
O presidente da Xunta, Alberto Núñez Feijóo, asinou hoxe o decreto de estrutura da Xunta, o cesamento dos anteriores conselleiros e o nomeamento dos novos membros do goberno. Da Consellería de Cultura e Turismo farase cargo o diplomático Roberto Varela, que dende 2004 desempeñaba a función de Cónsul en Nova York encargado de asuntos culturais. Neste enderezo poden ver unha entrevista con Roberto Varela feita en decembro de 2007 por Isaac Cordal, Roi Fernández e Berio Molina para o documental Balor, a little Galician accent but good.
No DOG do martes 17 de febreiro saíu publicada a convocatoria de AGADIC de bolsas de creación para impulsar o talento audiovisual galego. As axudas van dirixidas a creadores individuais para a escrita de guión e tamén para a produción de curtas e longametraxes dixitais. O prazo de entrega das solicitudes remata o luns 16 de marzo. A convocatoria simplifica os trámites administrativos, pois o proceso de xustificación limítase á entrega do guión e/ou da produción subvencionada e non esixe a xustificación de gastos. Existen catro modalidades de axudas: para a escrita de guión (máximo 12.000 euros), para curtametraxes en soporte digital (máximo 6.000 euros), para curtametraxes experimentais (máximo 10.000 euros) e para longametraxes en soporte dixital (máximo 30.000 euros). Máis información, na web da Axencia Audiovisual Galega.
O mércores 21 de xaneiro ás 19:00 terá lugar na sede da Real Academia Galega (Tabernas, 11) a presentación do documental Na frente unha estrela, realizado por Rivadulla Corcón sobre a figura de Manuel Curros Enríquez. Convidan a RAG e a Concellaría de Cultura da Coruña.
A Academia Galega do Audiovisual convoca a sétima edición dos Premios Mestre Mateo, estando aberto o prazo de recepción dos traballos ata o 2 de xaneiro de 2009. Podes descargar as bases aquí. (Academia Galega do Audiovisual)
Actos de homenaxe no centenario do nacemento de Jenaro Marinhas del Valle
PROGRAMA
Día 11 de novembro de 2008
Na Facultade de Filoloxía da Universidade da Coruña
12:00
“Apresentación dos actos previstos. Primeira aproximación a D. Jenaro Marinhas del Valle”. Interveñen: María Xosé Bravo, Mª Pilar García Negro, Pablo G. Mariñas, X. María Monterroso Devesa e Teresa López.
13:00
Perfil humano-literario de Jenaro Marinhas, por Henrique Rabuñal.
“Experiencias en dirección e escenificación de obras teatrais de Jenaro Marinhas”. Interveñen: Lino Braxe e Francisco Rodríguez.
Día 21 de novembro
Na Casa Museo Casares Quiroga (Panadeiras, 12)
18:00
“O feminino e a protesta na obra de teatro Ramo Cativo”. Interveñen: Kathleen March e Tareixa Campo.
19:00
Mesa redonda: Continuidade dos presupostos avangardistas no teatro de Jenaro Marinhas, por Laura Tato.
Claves expresivas do teatro de Jenaro Marinhas, por Cilha Lourenço
O público na constitución dun teatro nacional: o pensamento de Jenaro Marinhas, por Carlos Viscainho.
No Teatro Rosalía Castro
20:30
Representación: “A velada”. Teatro proscrito (Memorial Iván Toxeiro. Asociación Alexandre Bóveda)
Audiovisual “Jenaro Marinhas na lembranza”. Autores: Manolo Graña e Arturo Iglesias.
Exposición: “Jenaro Marinhas: drama e exemplo do século XX galego”. No mes de decembro a Casa Casares Quiroga acollerá unha exposición que pretende axudar a difundir a vida e a obra deste intelectual galeguista sempre comprometido coa dignificación da nosa cultura.
[kml_flashembed movie="http://br.youtube.com/v/6uckMbslq8M" width="320" height="240" wmode="transparent" /]
A Academia Galega do Audiovisual celebrará os días 14 e 15 de outubro a sexta edición das súas tradicionais xornadas de reflexión e debate Foro Academia Aberta 2008 no marco do Festival de Cine Internacional de Ourense.
Nesta edición e baixo o título “A lingua fendida. O audiovisual e o galego” analizaremos como a cuestión da lingua marca a singularidade do noso sector, pois o uso da lingua galega nas producións ten que convivir co feito de que moitas veces dirixímonos aos mercados españois e internacionais.
Contaremos con recoñecidos profesionais galegos que nos axudarán a analizar como é esa relación dende o punto de vista sociocultural, artística e económica e tamén atenderemos a cales deben ser as características da lingua do audiovisual.
Tamén coñeceremos outras realidades semellantes á nosa. Contaremos con importantes profesionais de Quebec, Gales, Euskadi e Catalunya que nos contarán cal é a problemática actual de cada industria.
Así mesmo, aproveitando que o ano pasado cumpríronse 25 anos da dobraxe en Galicia, celebraremos unha mesa redonda na que actores e actrices da dobraxe contarannos a historia íntima do seu traballo e xuntos lembraremos as dobraxes “míticas” da Televisión Galega. Como colofón teremos un recordo especial a María Romero e ao recentemente falecido Xoán Guisán, pioneiros desta profesión en Galicia.
Podedes descargar o programa na web do Foro Academia Aberta 2008, máis o formulario de inscrición.
Impulsado polo Centro Galego de Arte Contemporánea (CGAC), o ciclo “Tábula Rasa. Novas Prácticas Transdisciplinarias” desenvolveráse no museo os días 2, 3 e 4 de outubro, arredor de prácticas artísticas transversais e produtos creativos híbridos, é dicir, que fusionan varias disciplinas a un tempo.
Dentro deste marco e precisamente abrindo o ciclo, “Tender a man” é a proposta que Yolanda Castaño nos trae ao CGAC este xoves: un espectáculo poético multimedia baseado nos textos da poeta e na música de Sulxeitos. Esta formación de dilatada experiencia na escena musical galega, a cabalo entre o jazz e a electrónica e integrada por Isaac Garabatos e Jesús Andrés Tejada, dotará de ambientación sonora aos versos de Castaño, en especial aos provintes do seu último libro, Profundidade de Campo (Premio Espiral Maior, 2007).
Pero non será todo. Ademáis, outras experiencias de colaboración con outros e outras artistas iránse fiando ao longo dos 50 minutos de duración do evento. Así, os versos atopan novos camiños de comunicación apoiándose en distintas montaxes das que participan, por exemplo, os grafismos de Enrique Lista inspirados na mencionada obra poética, as pinturas de Isabel Pintado baseadas no poema “Contos de fadas” ou a montaxe de vídeo sobre o texto “Highway to heaven” a cargo de Manu Viqueira. Outras pezas a varias voces, con efectos de son, luz, videopoesía ou performance enriquecerán o conxunto. Unha oportunidade de achegarse á poesía máis actual por camiños diferentes, cómplices das novas tecnoloxías e das máis expresivas linguaxes creativas.
O título do espectáculo fai referencia á soedade do traballo da escrita, por iso “Tender a man” a outros e outras creadoras pode dar lugar a estas interesantes e ricas novas prácticas transdisciplinarias.
