Arquivo da categoría: Conferencias

A Coruña: conferencia de Xurxo Souto

Publicado o por

Dentro da programación do obradoiro de canción popular A Coruña Son mañá xoves 26 de febreiro Xurxo Souto impartirá unha conferencia co título O influxo afro-americano na canción galega. Durante o relatorio haberá ocasión de escoitar diferentes exemplos que reflicten a pegada dos sons atlánticos na música popular galega. O acto terá lugar no auditorio do Fórum Metropolitano de cinco a oito da tarde, con entrada libre.

O músico e escritor Xurxo Souto é autor entre outros dos libros O retorno dos homes mariños, Contos da Coruña e Os tres trebóns. Desde outubro de 2005 é Director de Programas da Radio Galega, emisora na que conduce o espazo musical Aberto por reformas.

A Coruña: conferencia de Henrique Rabuñal

Publicado o por

O escritor Henrique Rabuñal intervén este venres 27 ás 12:00 no Congreso Marinhas del Valle coa conferencia Jenaro Marinhas del Valle leal e erguido. O acto terá lugar no Centro Social Caixanova da Coruña (avda. Da Mariña esquina r/Fama). Henrique Rabuñal é especialista na obra do dramaturgo coruñés e autor do libro Jenaro Marinhas del Valle, a vida escura, editado por Laiovento.

A Coruña: conferencia de Felipe Senén sobre o entroido

Publicado o por

O xoves 19 de febreiro no Salón de Actos da Biblioteca González Garcés da Coruña (Rúa Miguel González Garcés, 1) pronunciará unha conferencia Felipe Senén sobre o tema O entroido en Galicia: máscaras, ritos e símbolos, na que explorará as diferentes maneiras de celebrar o entroido que teñen as diferentes vilas galegas e o xeito en que nelas se mesturan contidos populares e cultos. O acto comezará ás 20 horas e a entrada é libre.

A Coruña: conferencia de Bernardo Penabade

Publicado o por

Mañá mércores 18 de febreiro o coordenador do Arquivo Documental do Concello de Burela e profesor de Ensino Secundario Bernardo Penabade Rei intervirá dentro do ciclo Língua, Literatura e Naçom cunha charla titulada Unha nova política linguística municipal. Será a partir das oito do serán, no local da Fundación Caixa Galicia no Cantón Grande da Coruña. Organiza a Agrupaçom Cultural O Facho.

Vigo: conferencia de Francisco Castro

Publicado o por

Mañá xoves 12 de febreiro o escritor Francisco Castro impartirá unha conferencia titulada A mirada literaria. Como ven os escritores no Centro Social Caixanova de Vigo, ás oito do serán, dentro do ciclo O traballo literario a través dos escritores. O acto será presentado polo crítico Ramón Nicolás. A entrada é libre.

Café literario con Xesús Alonso Montero

Publicado o por

Hoxe remata o ciclo Miradas alleas. Como nos viron, como nos ven, organizado pola Secretaría Xeral de Comunicación. A partir das 19 horas no Casino de Santiago o escritor Xesús Alonso Montero falará da presenza de Galicia na obra de Azorín. Presenta e clausura este primeiro ciclo Fernando Salgado, secretario xeral de Comunicación.

Café literario con Carlos G. Reigosa

Publicado o por

Hoxe martes 10 de febreiro ás 19 horas no Casino de Santiago (Santiago de Compostela) o escritor Carlos G. Reigosa mergullarase na obra de Gabriel García Márquez e a súa relación literaria con Galicia nunha nova entrega do ciclo Miradas alleas. Como nos viron, como nos ven. Presentará o acto Arturo Larena, delegado da Axencia Efe en Galicia. A entrada é libre.

Café literario con Francisco Fernández Naval

Publicado o por

O venres 6 de febreiro ás 19 horas no Casino de Santiago o escritor Francisco Fernández Naval falará sobre Julio Cortázar dentro do ciclo Miradas alleas. Como nos viron, como nos ven. A entrada é libre. O ciclo continuará a semana que vén con cafés literarios a cargo de Juan Carlos Fernández Iglesias, Carlos G. Reigosa e Xesús Alonso Montero.