Arquivo da categoría: Premios poesía: ditames

Ramón Neto Otero, Premio Nacional de Poesía Xosemaría Pérez Parallé

Publicado o por

O xurado da XXII edición do Premio Nacional de Poesía Xosemaría Pérez Parallé, reunido en Fene, resolveu outorgar o premio ao libro A estación única dunha illa, presentado baixo o pseudónimo Glas-Ao. Aberta a plica, o libro resultou ser da autoría de Ramón Nieto Otero, escritor nado na na Illa de Arousa en 1975. Licenciado en filoloxía inglesa, fixo o último ano da carreira cunha beca Erasmus na Universidade Libre de Bruxelas e, dende aquela, reside na capital belga dedicado ao ensino da lingua inglesa. Ten estudos de música clásica e jazz e é un afeizoado á cultura mariñeira, practicando no mar de arousa a navegación en dorna. O libro gañador será publicado na colección de poesía Espiral Maior, a máis importante colección de poesía galega. O gañador do premio recibirá, ademais, unha peza cerámica do artista Francisco Pérez Porto, fillo de Xosemaría Pérez Parallé.

O xurado, integrado polo poeta e artista plástico Baldo Ramos, Carmen Bar, exdirectora da biblioteca de Narón e Susana Sánchez Aríns, gañadora da XXI edición do premio, mencionou especialmente a alta calidade xeral das obras presentadas, destacando particularmente as tituladas O xardín de inverno e outras augas e Noites na casa do pai.

A entrega do premio terá lugar na sede do Círculo Mercantil e Industrial-Unidade de Fene, entidade convocante do premio, o próximo sábado 21 de novembro.

Juan Carlos Mestre, Premio Nacional de Poesía

Publicado o por

Juan Carlos Mestre (Vilafranca do Bierzo, 1957) foi galardonado co Premio Nacional de Literatura 2008 na modalidade de Poesía pola obra La casa roja. Concede o premio o Ministerio de Cultura para distinguir unha obra de autor español escrita en calquera das linguas oficiais do Estado e editada en España durante 2008. Está dotado con 20.000 euros. [Ler nota de prensa completa]

Dúas obras e tres autoras comparten o Premio de Poesía Victoriano Taibo

Publicado o por

O xurado da segunda edición do Premio de Poesía Victoriano Taibo dediciu nomear gañadoras ex aequo dúas obras e tres autoras, dada a súa calidade. As nomeadas foron María Carmen Caramés, por Cuarto minguante, e Elvira Riveiro Tobío e Silvia Penas Estévez pola autoría colectiva de Biografía da multitude. O premio está dotado con 3.000 euros –que terán que repartir entre elas–, unha escultura conmemorativa realizada polo artista Fino Lorenzo e a edición da obra na colección de poesía do Instituto de Estudos Miñoranos. [Ler noticia completa en Xornal de Galicia]

Pablo Bouza gañou o XXXV Certame Literario Concello de Vilalba

Publicado o por

O poeta Pablo Bouza Suárez vén de gañar o XXXV Certame Literario do Concello de Vilalba, dotado con 3000 euros e publicación da obra, polo seu poemario Poética da memoria. O xurí estivo composto polo concelleiro de cultura de Vilalba, José María García-Leira, o académico e escritor Darío Villanueva, o xornalista Fidel Fernán e o xefe territorial de cultura en Lugo, José Carlos Rodríguez Andina. Pablo Bouza foi tamén o vencedor hai uns meses do Premio de Poesía Concello de Marín.

Pablo Bouza Suárez gaña o Certame de Poesía Concello de Marín

Publicado o por

O poeta de Fene Pablo Bouza Suárez foi o gañador da XV Edición do Certame de Poesía Concello de Marín pola súa obra A pel da pedra presentado baixo o pseudonimo de “Mazafacha. A entrega do premio tivo lugar o pasado día 17 de maio no Museo de Manuel Torres de Marín.

Elisabet Ríos Liste, Premio de Poesía Concello de Carral

Publicado o por

Elisabet Ríos Liste, coa súa obra Nós escoitando o badalo de Marienplatz resultou gañadora do Concurso de Poesía Concello de Carral do presente ano. O xurado, formado polos poetas Luis González Tosar, Lucía Novás e Paulino Peña Álvarez, baixo a presidencia da Concelleira de Cultura, Mª José García Fariña, e asistidos en calidade de secretario polo técnico municipal de Cultura e coordinador do premio, Carlos Lorenzo Pérez, escolleu o libro de Elisabet Ríos entre as 42 obras presentadas ao certame, salientando a súa calidade, frescura e innovación.

O premio de Carral está dotado con 2000 euros e a publicación da obra na colección de poesía de Edicións Espiral Maior. O acto de entrega do premio terá lugar o 29 de maio, na Biblioteca de Carral.

Javier de la Rosa, Premio Esquío 2009

Publicado o por

O escritor Javier de la Rosa foi o gañador da XXVII edición do Premio Esquío de Poesía coa súa obra Diario vespertino. O xurado outorgou ademais un áccesit ao poeta coruñés Francisco Vila. No concurso de poesía en galego o vencedor foi o ferrolano Marcelino Sixto Deibe. O xurado recoñeceu tamén os traballos presentados por Carlos García Gómez (Ferrol) e María Jesús Concejo (A Coruña).

Baldo Ramos gaña o IX Premio de Poesía Fiz Vergara Vilariño

Publicado o por

Sarria, 14 de marzo de 2009

Reunidos na casa do Concello de Sarria os membros do xurado do IX Premio de Poesía Fiz Vergara Vilariño acordamos conceder o premio ao libro presentado baixo o lema: *Palabras para un baleiro*.

Neste libro atopamos unha reflexión profunda sobre o sentido da poesía como canle para entender a vida, para interpretar vivencias inefables. Un achegamento existencialista, case filosófico, na procura dunha expresión alén da propia poesía. Unha poesía esencializada con moito sentido do ritmo.

Aberta a plica da obra seleccionada, en acto público celebrado ás 13:30 horas, resultou ser o seu autor Baldo Ramos.

Xosé Antón Neira Cruz, Lucía Aldao, Pilar Pallarés, Xermán Arias (Presidente), María Casar (secretaria).

Mario Regueira gaña o Johán Carballeira

Publicado o por

«Foi unha decisión difícil. O xurado, reunido no Concello de Bueu, dubidou durante boa parte da tarde do martes entre dúas obras. Finalmente escolleron o Blues da Crecente de Mario Regueira; porén, o debate non era tan importante en realidade, pois a outra obra que chegou ao final con opcións de gañar o premio tamén fora presentada por Regueira. O xurado salientou que o poemario “representa unha reflexión sobre o amor e as súas condicións existenciais, nun conxunto poemático sometido a unha esixencia de gran atractivo; rítmica, poesía e vida entrelazadas, o amor como sinal de unión e de liberación” […]» (Vieiros)