“M. P. Literary Edition de Seattle, U. S., convoca a pensadores, intelectuais, docentes e escritores a participar na I Convocatoria para unha Antoloxía do Pensamento Contemporáneo, que se rexerá polas seguintes bases:
1. Poderán participar todas as persoas maiores de 18 a anos de calquera lugar do mundo. Non se aceptarán obras pertencentes a autores falecidos antes de presentar a súa obra á presente convocatoria.
2. As obras, que serán de contido libre e en forma de ensaio ou narración curta, terán unha extensión máxima de 450 palabras (uns 1690 caracteres aproximadamente), presentándose en formato word, letra New Roman, tamaño 12.
3. Aceptaranse igual obras inéditas como publicadas, sempre que os dereitos sexan titularidade do autor, non se achen comprometidos e non participen ó mesmo tempo noutras convocatorias.
4. As obras enviaranse exclusivamente por email ó enderezo de correo electrónico: literaryedition@gmail.com, indicando no asunto “Pensamento Galaico Contemporáneo”.
5. O prazo de presentación iníciase coa publicación das presentes bases e remata o día 23 de abril de 2015, hora de Galicia.
6. É imprescindible que os participantes revisen ben o texto antes do seu envío, de maneira que non exista erro ningún, omisión ou falta.
7. Poderán presentarse obras escritas na Fala do extremeño val de Jálama, en Buecés de Bembibre, en Toreniense de Toreno, no de Fornela e o Ancarés, en charro de Villafranca, na Fala do Val de Finolledo e as do Val de Valcarce e a Merindade de Aguiar; en galego normativo, reintegracionista, Barallete, o de Sanabria (A Seabra), Eonaviego e Asturiano occidental, en galego do Bierzo, nas distintas variantes de non normativo incluíndo as da rexión Norte de Portugal e de Arxentina, así como en español, sempre que o autor acredite ser de orixe galega.
8. Cada participante enviará a súa obra nun arquivo anexo, que incluirá o texto, título, nome do autor e versión lingüística na que participa.
9. O Xurado é soberano, o seu xuízo é inapelable e goza da prerrogativa de determinar calquera suposto, así como a facultade de interpretar as bases que rexen a convocatoria, e en ningún caso manterá comunicación cos participantes. Se a estimación de xurado non se cumpren as expectativas, a convocatoria poderá declararse deserta.
10. A participación neste Concurso implica o coñecemento e a aceptación das presentes bases e condicións (en diante, as Bases) e/ou de calquera aclaración e/ou modificación das mesmas. As decisións do Organizador verbo de todos e cada un dos aspectos da Convocatoria e/ou selección notificadas serán definitivas e irrecurribles. O xurado é soberano para dirimir calquera cuestión que se puidese suscitar.
11. As persoas que interveñan neste Concurso, pola súa soa participación aceptan sen reservas e de pleno dereito todas e cada unha das disposicións previstas nas presentes bases e condicións. O incumprimento de calquera das bases supón a descalificación automática e inmediata.
12. A mera participación supón que o autor certifica os seguintes aspectos:
o seu consentimento á divulgación da obra presentada, permitindo o uso e difusión do seu nome,
a garantía, por parte do candidato, a total indemnidade para os convocantes, da autoría e orixinalidade da obra presentada, e de que esta non é copia nin modificación total ou parcial de ningunha outra obra propia ou allea,
o aval por parte do candidato, da total indemnidade para os convocantes da natureza inédita en todo o mundo da obra presentada e da titularidade en exclusiva e sen carga nin limitación algunha de todos os dereitos de explotación en col da mesma e fronte a terceiros, sen acharse sometida a ningunha outra convocatoria pendente de resolución.
Unha vez incurso no certame, o autor comprométese a non retirar a obra ata a comunicación do fallo.
13. Aínda que M. P. Literary Edition traballará arreo pro abranguer todas as obras presentadas, só garantirá a participación na antoloxía das seiscentas primeiras recibidas, polo que insta aos participantes a ser dilixentes no envío.
14. Todas as persoas que concorran na presente convocatoria, pola súa soa participación aceptan sen reserva e de pleno dereito, todas e cada unha das disposicións previstas nas presentes bases e condiciós.
15. Non se devolverán os traballos presentados, sendo destruídos logo do prazo en caso de non ser seleccionados.
16. Os resultados comunicaranse persoalmente aos interesados e polas canles habituais, polo que se aconsella encarecidamente que revisen a exactitude dos datos, e que periodicamente repasen o correo spam.
17. Os titulares das obras seleccionadas ceden á organización os dereitos de uso e patrimoniais, podendo o autor publicar libremente o traballo en calquera outro medio.
18. O premio consistirá na publicación do traballo presentado baixo o nome do autor, incluíndose na Antoloxía do Pensamento Galaico Contemporáneo.”
Arquivo da categoría: Filosofía
Entrevista a Luís García Soto sobre Barthes filósofo
Desde
o Diario Cultural da Radio Galega:
Entrevista a Luís García Soto arredor do seu recente Premio Ramón Piñeiro de ensaio coa obra Barthes filósofo. Pódese escoitar completa aquí.
Luís García Soto: ´A filosofía axúdache a entender o mundo pero a Lomce maltrátaa´
Entrevista de P. Pérez a Luís García Soto en Faro de Vigo:
“(…) – Faro de Vigo (FdV): Por que escolleu a figura de Roland Barthes para este ensaio?
– Luís G. Soto (LGS): Eu fai anos fixen a miña tese en Doutoramento en Filosofía sobre este autor. Sempre publiquei cousas para especialistas e con isto quixen facer algo diferente. Pregunteime: ¿como lle presentaría a Barthes ás novas xeracións? Quixen mostrar en conxunto a obra de Barthes e a súa filosofía e explicalo da forma máis sinxela que puiden, coma se llelo explicase aos meus alumnos. Ademais en España hai moi pouco publicado sobre este autor.
– FdV: E como explicaría entón a importancia e trascendencia deste escritor e filósofo?
– LGS: A súa celebridade é porque con Umberto Eco é un dos fundadores da semiótica moderna. A semiótica é o estudio dos signos, de todo este mundo dos medios da comunicación, das imaxes… Barthes estudiou a literatura como un campo e, por outro, o mundo da imaxe. Ten por exemplo, un texto moi denso e moi duro, sobre a imaxe da moda. (…)
– FdV: Barthes era filósofo tamén… Pero, ¿está a filosofía agora en ameaza de extinción?
– LGS: Interese non está perdendo. Aínda que nos dous últimos anos o número de alumnos da Facultade de Filosofía baixou un pouquiño, de media nos últimos cinco e seis anos está por riba dos 50 alumnos, unha cifra máis que respetable porque tampouco sería óptimo que chegara aos 100 alumnos.
– FdV: Está ben tratada a Filosofía no ensino?
– LGS: A Lomce maltrata a asignatura de Filosofía porque pasa de ter presenza en Primeiro e en Segundo con duas materias obrigatorias, que ademais é opcional en Selectividade con Historia. Pero a nova lei mantén a obrigatoriedade en Primeiro pero a de Segundo empeza a ser optativa. Hai unha minoración. E a filosofía axúdache a entender como é o mundo. É moi formativa e necesaria nos sistemas educativos. En países emerxentes como Brasil ou a India danlle moita importancia á Filosofía nos seus sistemas educativos.”
Luís García Soto gaña o Premio Ramón Piñeiro de Ensaio
Desde Galaxia:
“Vigo, luns 19 de xaneiro de 2015, 13.30 h.
A obra Barthes filósofo, da que é autor Luís García Soto, resultou gañadora do Premio Ramón Piñeiro de Ensaio 2014, que organizan conxuntamente a Secretaría Xeral de Política Lingüística da Xunta de Galicia e Editorial Galaxia coa colaboración de Gas Natural Fenosa. A xuntanza do xurado realizouse hoxe, día 19 de xaneiro de 2015, ás 11 horas, no Centro Ramón Piñeiro, en Santiago de Compostela.
O premio desta décimocuarta edición está dotado con 3.000 euros e o ensaio ha ser publicado pola Editorial Galaxia durante este ano.
O xurado valorou especialmente que este ensaio faga unha interpretación, desde Galicia, da obra de Roland Barthes, importante autor cuxo legado está presente na cultura do século XXI. O autor interpreta a produción multidisciplinar de Roland Barthes como a dun auténtico filósofo. Argumentando a través da análise de cada unha das obras de Barthes, o ensaio debulla esta tese, en clave semiolóxica, na procura dun diálogo con quen le.
O xurado, que concedeu o premio por maioría, estivo formado por Luís Alonso Girgado, Patricia Arias Cachero, Antón Figueroa, Olivia Rodríguez González e Carlos Lema, como secretario con voz e voto. (…)”
Crónica videográfica das IV Xornadas de Literatura e Ensino: mesa redonda O pensamento escríbese con -As (o ensaio no século XXI)
O sábado 18 de outubro
, no Auditorio da Biblioteca da Cidade da Cultura de Galicia, tiveron lugar as IV Xornadas de Literatura e Ensino, baixo o título A Xeración Nós-outr@s, organizadas pola Asociación Socio-Pedagóxica Galega en colaboración coa Asociación de Escritoras e Escritores en Lingua Galega.
Esta á e crónica videográfica do acto, onde se poden ver as seguintes intervencións:
– Presentación da mesa redonda O pensamento escríbese con -As (o ensaio no século XXI), con Mercedes Queixas.
– Intervención de Rebeca Baceiredo.
– Intervención de Montse Dopico. Tamén pode consultarse a versión escrita aquí.
– Intervención de María Reimóndez.
– Coloquio da mesa redonda O pensamento escríbese con -As (o ensaio no século XXI). Con Rebeca Baceiredo, Montse Dopico e María Reimóndez.
Delmiro Rocha: “Como promesa a democracia non chegará nunca, ficará sempre por vir”
Entrevista
de Montse Dopico a Delmiro Rocha en Praza:
“Afirmar a democracia é afirmar o que virá. Mais iso non ten que levarnos á mera espera pesimista. Porque supón apertura radical cara ao outro, cara á alteridade que vén e que xa comeza a estar. Non é, así, aferrarse á utopía. Senón facer no aquí e no agora o que parecía imposible. Neste sentido móvense as reflexións do ensaísta e profesor Delmiro Rocha no seu libro Quizais. Filosofía ético-política do porvir, (Euseino?). Unha deconstrución da democracia desde o pensamento de Derrida.
– Montse Dopico: Tes publicados outros dous libros sobre Derrida. Quizais xorde como traballo académico. En que contexto? Cal era o seu obxectivo?
– Delmiro Rocha: O contexto académico é o marco obxectivo dos tres libros. Non obstante, diferéncianse en temáticas, distribución, nivel de afondamento e linguas. A estratexia, ou polo menos a intención estratéxica, consiste en ter un pé dentro da institución e outro fóra. Traballar á marxe. Quizais redáctase integramente no contexto dun doutorado para a obtención do Diploma de Estudos Avanzados, polo menos na súa primeira versión, a cal non dista gravemente da publicada.
O obxectivo consistía en investigar o proceso de substantivación do adverbio “quizais” no tramo de pensamento que discorre de Nietzsche a Derrida coa intención de desvelar como determinaba o pensamento ético-político de Derrida. Como adoita acontecer nestes casos, máis que chegar a unha conclusión definitiva abriuse para min unha forma de ler a Derrida que non se detiña nos terreos máis ou menos delimitados do ético-político senón que se estendía á obra enteira do filósofo e as súas inmediacións. Ao final, pasaron xa uns anos, converteuse nun xeito de ler a filosofía, por suposto, pero tamén a literatura, un filme, os medios de comunicación, a mirada, en definitiva, do outro que nos observa e nos fiscaliza. (…)”
Betanzos: presentación de O labirinto da saudade, de Luís G. Soto
Compostela: Fran Conde e Samuel Solleiro no ciclo Escrita(s) 2014
O 
xoves 25 de setembro, entre as 19:00 e as 22:00 horas, en Almáci(gas) (Travesa de Basquiños, 14) de Santiago de Compostela, terán lugar dúas conferencias no ciclo Escrita(s) 2014, baixo o título Pode falar o subalterno ou certo grao de cólera contra a narrativización imperialista da historia, dirixido por Claudio Pato.
Nesta ocasión, Fran Conde falará sobre Deleuze&Guattari <> Lacan. Esquizoanálise <> psicanálise lacaniá, e Samuel Solleiro sobre Do futurismo á música industrial: fascismo e vangarda no corazón do bosque.
Rebeca Baceiredo: “Inocular fascismo é a forma de evitar que o pobo se dea á subversión”
Entrevista
de Montse Dopico a Rebeca Baceiredo en Magazine Cultural Galego:
“Rebeca Baceiredo gañou o premio da AELG na modalidade de ensaio con A revolución non vai ser televisada (Euseino edicións). Recupero para Magazine Cultural Galego unha entrevista que lle fixera sobre esta obra para Praza Pública.
O neoliberalismo fascista artellou uns mecanismos de dominación cada vez máis sofisticados. Un novo xeito de escravitude converte o ser humano nun máis dos engrenaxes da máquina produtiva. Neste contexto, o control absoluto sobre os corpos e as mentes garántese a través da regulación das formas “correctas” de pensar, de sexualidade, os espazos e os tempos apropiados para ler, comer, xogar… Este é o panorama que debuxa a ensaísta Rebeca Baceiredo no seu novo libro, A revolución non vai ser televisada (Euseino edicións). Mais, como di xa o título, fica espazo para a rebelión. Sempre que os escravos decidan deixar de selo. Explícao a autora nesta entrevista.
– Montse Dopico (MD): Un dos puntos de ancoraxe do libro é, a partir da filosofía de Deleuze, a reflexión arredor da produción da subxectividade como instrumento de poder da oligarquía dominante. Por que non bastaba coa teoría marxista e, en xeral, coa dos filósofos da sospeita, para explicar a realidade actual?
– Rebeca Baceiredo: Penso que ningún filósofo pensa a partir da nada, todos recollen a tradición. Ora ben, nesa tradición existen unas liñas ou outras (e vanse enriquecendo). Entón, talvez a teoría marxista clásica facía máis fincapé na macroestrutura e ignoraba ao individuo como elemento constituínte desa estrutura, desa organización social, socioeconómica. Ter en conta a materia coa que se conforma a sociedade paréceme algo imprescindible, porque permite afiar o coñecemento desa realidade. (De todos os xeitos, tamén se intentou achegar o marxismo a Freud, pero paréceme que, se ben como análise cultural e social pode resultar interesante, falta a precisión ontolóxica que eu vexo en Deleuze).
Freud, sen embargo, puxo todo o foco no individuo e esqueceu o social, o papel da cultura na conformación (e polo tanto, nos conflitos) do suxeito. Descobre o inconsciente, di Deleuze, pero queda ás portas, porque o entende a partir dos feitos, a partir do dado: pénsao como teatro, como representación e non como produción. É dicir, enténdeo como estrutura universal e non efecto dos estímulos (inputs) recibidos. Isto fai que se exima á sociedade da súa responsabilidade: semella que o tipo de cultura non ten nada que ver no que que poboa a cabeza dos individuos (e polo tanto, pode rexer a súa conduta, dende o plano inconsciente, claro). Nietzsche, pola contra, si é unha fonte importante para Deleuze, que interpreta ontoloxicamente o seu mapa conceptual: penso que Nietzsche explica ben os estratos ontolóxicos do individuo e da mesma cultura, e deixa ao descuberto as fisuras polas que se cola a pezoña das forzas reactivas que el observou xa, pero para explicar a ‘realidade actual’ entendo que tamén hai que rozar aspectos (explicitamente) políticos e económicos. (…)”
Compostela: conferencias no ciclo Escrita(s) 2013, o venres 4 de outubro
O
ciclo Escrita(s) 2013, coordinado por Claudio Pato, terá lugar en Almáciga(s), na Travesa dos Basquiños, 14, de Santiago de Compostela. Dentro do programa (que pode ser descargado aquí: Escritas-2013), destacamos estes actos para o venres 4 de outubro:
– 18:00 h. Estética e emancipación, por Cristina López Parga. Usurpamos o concepto de reparto do sensíbel (Rancière) como condición material dun pensamento de resistencia, de emancipación e de abolición da intelectualidade. A estética é política, un modo de distribución de tempos e lugares, e a emancipación ten lugar participando nese reparto do sensíbel, como movemento resistente ao reparto excluínte dun tempo e dun espazo dado e inamovíbel.
– 20:30 h. Eskizotribo. Precísanse antropólogxs para entrevista en profundidade semiestruturada, por Paula Tomé Espiñeira. A tribo eskizo habitamos por eiquí tamén. Só recentemente empezamos a comunicarnos, a saír do armario nalgúns casos, a facer públicas costumes, historias, astronomía e tradición musical, entre outros rasgos de interese. Precísanse antropológxs con ou sen titulación para entrevista en profundidade semiestruturada. Prégase traer algunha pregunta da casa. Advertencia: Será un falso “ver desde fóra”.
