Hai hoxe dez anos morría o escritor ferrolán Gonzalo Torrente Ballester, unha das figuras máis destacadas da literatura española do século XX. O Concello de Ferrol, a Fundación Caixa Galicia e a Asociación “Amigos da Universidade” do Campus de Ferrol prepararon unha serie de actividades para conmemorar o aniversario que comezan pasadomañá, xoves 29 de xaneiro, cunha conferencia do escritor e membro da Real Academia de la Lengua Carlos Castillo del Pino, acompañado polo profesor da Universidade de Santiago de Compostela José Manuel Villanueva. Proseguirá o ciclo cun encontro entre Javier Cercas, autor da novela “Soldados de Salamina”, e a profesora da Universidade de Vigo, Carmen Becerra. Sete días despois, o 12 de febreiro, conversarán Julio Llamazares e Manuel Candelas. Xa en marzo poderemos escoitar aos poetas Miguel d´Ors e Xulio López Valcárcel, e para pechar este ciclo de Diálogos Literarios a Rafael Chirbes e o crítico Ángel Basanta. Será sempre no Salón de Actos da Fundación Caixa Galicia a partir das oito da tarde.
Arquivo da categoría: Homenaxes
Homenaxe Nacional a Xosé Luís Méndez Ferrín
O venres 6 de febreiro terá lugar en Vigo o acto de Homenaxe Nacional a Xosé Luís Méndez Ferrín co gallo do seu 70 aniversario. Será no Auditorio do Centro Social Caixanova de Vivo (rúa Policarpo Sanz, 26) ás 20 horas e con entrada libre, e durante o mesmo presentarase o libro A semente da nación soñada. Homenaxe a X.L. Méndez Ferrín, coeditado por Sotelo Blanco Edicións e Edicións Xerais de Galicia.
Tralo acto de homenaxe haberá unha cea no Pazo Os Escudos (Avda. Atlántida 106, Alcabre, Vigo) a partir das dez da noite. Os interesados en asistir á cea deberán ingresar 35€ por persoa na conta de Caixanova número 2080 / 0065 / 36 / 0000388555, antes do 30 de xaneiro de 2009. Para acceder á cea é requisito imprescindíbel a presentación na entrada do restaurante do xustificante do pagamento.
A Coruña: recital de Xavier Seoane e Manuel Rivas
Hoxe martes 20 ás 20:00 no local da Agrupación Cultural Alexandre Bóveda (Olmos, 16-18 – 1º) terá lugar un recital poético a cargo de Xavier Seoane e Manuel Rivas dentro do ciclo “A palabra na voz de quen a crea”, que conmemora o 25 aniversario do colectivo “De amor e desamor”. A serie de recitais proseguirá ao longo dos próximos meses. A entrada é de balde até completar aforo. (A Coruña Cultura)
Entrega do Facho de Ouro a Xosé Neira Vilas
«A Directiva da Agrupaçom acordou outorgar O Facho de Ouro ao escritor e homem de bem, D. Xosé Neira Vilas, como testemunha e reconhecimento a sua longa trajectória na defesa da dignidade e da cultura do País. O acto cívico será acompanhado dumha ceia-homenagem que se celebrará o sábado, dia 31 de Janeiro, às 21 horas no Hotel Riazor d’A Corunha.
Preço por pessoa: 30 €. Para reservar lugar chamade a Rafael (telefone: 981.269.663-tardes; c. electrónico: lobezan@yahoo.es)» (Agrupaçom Cultural O Facho)
O grupo poético De Amor e Desamor celebra os seus 25 años
«Durante este ano, os segundos martes de cada mes, a sede da asociación cultural Alexandre Bóveda, na Coruña, acollerá un recital poético para celebrar os 25 anos do grupo De Amor e Desamor. Esta xeración xurdía na cidade coruñesa en 1984 e reunía a poetas que van desde o falecido Lois Pereiro ata Monterroso Devesa, pasando por Xavier Seoane, Manuel Rivas, Lino Braxe, Pilar Pallarés, Miguel Mato e Salinas Portugal. Estes autores publicaron entón un poemario actualmente descatalogado.[…]» (La Voz de Galicia)
O PEN Clube de Galicia concede a Marcos Valcárcel o seu premio
«As uvas na solaina é o blog personal do escritor e historiador ourensán Marcos Valcárcel. Os artigos que publica nel, así como o seu compromiso coas letras galegas, acaban de lle valer o Premio PEN 2009, que concede o PEN Clube a persoeiros da literatura galega que destacaran na defensa dos dereitos de opinión e de expresión. O premio consiste nunha figura conmemorativa que se lle entregará en breve en Santiago de Compostela. O xurado do PEN Clube quere facer coincidir o acto coa presentación dun libro de homenaxe que están a elaborar os seus amigos. (culturagalega.org)
No 59º cabodano de Castelao
«A Federación de Asociacións Galegas de Arxentina homenaxeará a Castelao cun acto en Bos Aires o próximo 20 de xaneiro. Varios representantes da colectividade galega en Arxentina acudirán á ofrenda floral que se colocará no monumento levantado en honra do escritor, político e intelectual galego, na praza que leva o seu nome na capital porteña. Actuarán a cantante Lorena Lores e a Banda de Gaitas Federal.
Mentres, aquí, na outra beira do Atlántico, a Fundación Castelao anuncia que acabará de catalogar este ano toda a obra de Castelao. Este mesmo día, coincidindo co 59 cabodano do escritor, terá lugar, como todos os anos, unha homenaxe no Panteón de Galegos Ilustres, en San Domingos de Bonaval (Compostela), onde repousan os seus restos. Será diante do sartego ás 17.30. O autor morreu o 7 de xaneiro de 1950 no hospital do Centro Galego de Bos Aires. Tamén no Rianxo natal de Castelao, o vicepresidente da Xunta, Anxo Quintana, presidirá a homenaxe, que comeza ás 11.00 cunha intervención na casa da cultura. Posteriormente, realizarase unha ofrenda floral no monumento a Castelao. […]» (A Nosa Terra)
Ourense: roteiro literario “A esmorga”
Mañá venrés día 19 de decembro, a partir das sete da tarde, a Sección de Literatura do Liceo de Ourense convoca unha nova edición do ROTEIRO A ESMORGA. O inicio terá lugar ás 19:00 horas na Avenida de Zamora, para logo irse desprazando ao longo da cidade medieval polos mesmos espazos físicos e emotivos que percorreron os personaxes da inmortal novela de Eduardo Blanco Amor.
Nesta ocasión a lectura dos textos será a cargo dos alumnos do Instituto de Educación Secundaria da Carballeira, coa que pretenden renderlle a súa pequena homenaxe ao seu profesor, verdadeiro impulsor deste roteiro, Marcos Valcárcel. O peche desta nova edición farase diante da estatua do escritor ourensán na Praza do Bispo Cesáreo, rematando cun viño galego na Sala de Tertulia do Liceo. (Liceo de Ourense)
Vilalba: homenaxe a Agustín Fernández Paz
O domingo 14 de decembro Agustín Fernández Paz será homenaxeado no Muíño de Rañego (Vilalba). Ás 12:00 terá lugar unha mesa redonda sobre a súa obra na que participarán Fina Casalderrey, Xabier P. DoCampo, Paco Martín, Xulio Xiz e Manuel Bragado. Ademais colocarase o terceiro hectómetro literario no Paseo dos Soños e celebrarase un xantar de irmandade no restaurante «A Nova Ruta» de Vilalba. Pode avisarse asistencia ao xantar no teléfono: 646413890. A organización é responsabilidade da Fundación Manuel María.
Compostela: presentación das Actas da I Xornada sobre a figura de don Juan Antonio Posse
O xoves 4 de decembro ás 20:00 terán lugar a presentación na Libraría Couceiro de Santiago as Actas da I Xornada sobre a figura de don Juan Antonio Posse, o crego liberal, con motivo do 240 aniversario do seu nacemento. Falarán: Ana Romero Masiá (catedrática IES Monte dos Postes-A Coruña), Pegerto Saavedra (catedrático Historia Moderna USC), Ramón Mariño Paz (profesor titular Filoloxía USC), Xosé Mª Méndez Doménech (membro do Seminario de Estudos Comarcais da Costa da Morte), Xosé Mª Lema Suárez (editor destas Actas) e Jacobo Llamas (director Ed. Toxosoutos de Noia).
