(Galaxia)
Arquivo da categoría: Narrativa
O inspector Leo Caldas pasa da novela ao cine con Gerardo Herrero
(Galiciaé)
Neira Vilas, un clásico
Publicación do texto íntegro de A esmorga, de Eduardo Blanco Amor
(Galaxia)
Víctor F. Freixanes: “A volta do novelista pródigo”
Entrevista
a Víctor F. Freixanes en El País:
“El País (EP): Que ten que mellorar? As políticas culturais, a demanda social dos produtos culturais ou as estratexias das industrias culturais?
Víctor F. Freixanes (VF): Temos un problema coa política, na que, con algunha excepción, non hai sensibilidade ningunha cara o cultural, e mesmo cando estaban os outros, algúns esperabamos máis. Temos un problema financeiro: a sociedade civil que antes amparaba proxectos, agora está asfixiada ou desapareceu do mapa. Temos un problema coa lingua, que ten que ver coa política: o Goberno é moi reticente á recuperación do idioma galego, e estar paralizado é dar marcha atrás. Temos tamén un cambio xeracional de hábitos de consumo, a gratuidade na Rede… Coinciden todos os factores para ter unha tormenta perfecta. As solucións irían por apelar a unha economía de guerra, ter imaxinación, unha concentración parcelaria dos proxectos, achegarse a novas redes e novos temas, e capitalizar as redes do exterior.
EP: Á idea de que o galego se impoñía parécea suceder a de que a cultura galega está subvencionada.
VF: Do do galego teñen a culpa os que utilizaron a demagoxia para arrapañar 4.000 votos, e agora están arrepentidos. Sobre o da cultura, en Francia, en Alemaña, en calquera país saben que son necesarias políticas culturais esixentes e con visión de futuro, con compromiso das administracións. En Estados Unidos falan de liberalismo e logo impiden que outros entren no seus mercado exteriores, e xa non digamos no interiores. As editoriais vivimos non polas axudas, que non chegan ao 9% da facturación, senón porque temos unha sociedade que reclama os nosos libros, edítanse seis títulos diarios en galego, cunha media de 1.500 exemplares. A visión da cultura como un Monte Medulio é reaccionaria, hai que baixar ao corpo a corpo no medio dos romanos. A cultura galega estivo moito tempo na trincheira, e ao final iso é acabar no gueto das subvencións.”
Convocado o IV premio de relatos Mulleres Progresistas
Convócase 
o IV Premio de relatos da Asociación de Mulleres Progresistas de Vigo, coas seguintes:
BASES
– Poderán concursar tódalas Mulleres que o desexen de calquera nacionalidade ou cultura. Cada participante poderá presentar un número máximo de dous relatos.
– O tema será libre.
– As obras serán orixinais e inéditas. Irán escritas en galego normativo, cunha extensión mínima de 15 páxinas e máxima de 30, a dobre espacio e por unha soa cara, en fonte 12, Arial ou Times New Roman. Se calquera dos contos presentados ao Premio de Relatos Mulleres Progresistas aparecese publicado ou recibise un premio ou mención noutro concurso no prazo da convocatoria quedará automaticamente descalificado.
– Cada relato presentarase con pseudónimo e baixo plica cerrada na que figuren os datos da concursante (nome, apelidos, domicilio e teléfono). Caso de presentar dous relatos terán que levar cadanseu seudónimo e cadansúa plica.
– Os traballos presentaranse con cinco copias impresas en papel e unha copia en soporte informático (diskette ou CD), preferiblemente en formato Word.
– O xurado determinará cinco finalistas, entre as que se elixirán os tres premios do certame:
1º Premio: 500 Euros, figura e diploma 2º Premio: 250 Euros e diploma 3º Premio: 150 Euros e diploma
– Presentación pública das bases en data 20 de outubro de 2010.
– O prazo de admisión para a recepción dos traballos péchase o 31 de decembro de 2010. Poderán presentarse persoalmente ou por vía postal. Posteriormente a esa data só serán admitidos os traballos en cuxo mataselos conste que foron enviados dentro do prazo. Os relatos serán presentados na Asociación de Mulleres Progresistas de Vigo, Policarpo Sanz, 12-14-2º- VIGO 36202. Non se aceptarán obras chegadas ao correo electrónico da Asociación.
– O fallo do xurado publicarase o día 8 de Marzo do 2011, Día Internacional das Mulleres, puidendo quedar desertos calquera ou todos os premios se os relatos recibidos non reúnen unha calidade mínima. O xurado estará formado por Mulleres do mundo das letras e a cultura, sendo inapelable a súa decisión. Dentro do xurado estará unha representante da Asociación de Mulleres Progresistas.
– O xurado é o encargado de interpretar exclusivamente as bases deste concurso. Así mesmo, a presentación das obras supón a total aceptación das presentes bases.
– Os traballos non premiados non serán devoltos, sendo destruídos con posterioridade ao fallo do xurado.
– Se o nivel dos relatos presentados é adecuado, designaranse diferentes mencións especiais que, xunto cos finalistas e os premios serían publicados nun volume. Para elo, as autoras ceden os dereitos desa primeira edición a Mulleres Progresistas. Tras esta publicación, as autoras poderán dispoñer libremente dos seus relatos.
Santiago: presentación de O coitelo en novembro, de Marilar Aleixandre
O 
xoves 4 de novembro, a partir das 20:00 h., na Libraría Couceiro (Praza de Cervantes, 6) de Santiago, preséntase o libro de Marilar Aleixandre O coitelo en novembro, publicado en Xerais. No acto, acompañando á autora, participarán Víctor F. Freixanes e Manuel Bragado.
Manuel Rivas: “Pódese estudar a sociedade desde a súa historia delictiva”
(Diario de Pontevedra, a través de Xerais)
Manuel Rivas: “Máis que a cocaína, o tema da novela é a loita polo poder”
Entrevista 
de Santiago Jaureguizar a Manuel Rivas en El Progreso:
“El Progreso (EP): Todo é silencio é a crónica dunha loita de poder e pola ostentación dunha riqueza conseguida rapidamente?
Manuel Rivas (MR): Si, máis cá cocaína, o tema desta novela é o poder. Había xente que se encontrou con que podía gañar diñeiro con algo que non era pecado, porque contrabando sempre houbo coas mulleres que pasaban a fronteira preñadas e volvían paridas.
EP: Foi un problema de escala, de empezar a facer o mesmo pero ao grande?
MR: Máis ben de que se rompeu a escala. Houbo un capitalismo máxico. Foi como eses días milagrosos nos que o barco volve a porto cheo de lubina ou robaliza, pero ese día milagroso eran todas as noites. Deuse algo que aparece no Manifesto comunista, onde se fai referencia aos capitalistas como o mago tolo, que ten superpoderes e non sabe que facer con eles. Sen embargo aquí había plan, os narcos foron infiltrándose nos concellos e nas cámaras de comercio, mesmo había plan para entrar na Xunta. Xa non lles chegaba con mercar coches mellores cós de Alberto de Mónaco ou de entrar como clientes importantes nos bancos suízos.
EP: Está vostede escribindo a historia do século XX en Galicia nos seus libros, mesmo en Os libros arden mal fala do país falando da Coruña. É algo premeditado?
É certo que hai unha continuidade. Os libros arden mal é un libro sobre o fascismo político, ideolóxico e cultural. Acaba coa pregunta «Que prezo ten isto?». Esa é a pregunta contemporánea e o que liga esa novela con Todo é silencio. Pero non é premeditado. É como o andar de Charlot, que non sabe onde vai, pero que ten un sentido. Agora teño tres historias na cabeza e hai unha relacionada con esta novela.
Pontevedra: presentación de Periferia, de Iolanda Zúñiga, e apertura de blog sobre a obra
O xoves 28 de outubro, ás 20:00 h., na sede da Fundación Caixa Galicia (no Edificio Café Moderno) de Pontevedra, preséntase Periferia, de Iolanda Zúñiga, a novela gañadora do Premio Xerais 2010. No acto acompañarán á autora Antón Sobral e Manuel Bragado. En relación con esta obra, a autora ven de abrir un blog, Planeta Periferia, onde vai incorporando anotacións e comentarios sobre a súa propia novela e o proceso de creación, así como da banda sonora que acompaña ao texto.
