Mañá xoves 14 de maio ás 20:15 na sede de Portas Ártabras (Rúa Sinagoga, 22, baixo) na Cidade Vella da Coruña presentarase o libro Para seguir bailando de Francisco X. Fernández Naval, editado por Xerais.
O acto é de entrada libre e contará coa intervención de Tucho Calvo, Manuel Bragado e mais o autor.
Nos próximos días chegará ás librerías galegas o novo libro de Xelís de Toro, Riofero, editado por Xerais. O escritor compostelán vén de abrir unha páxina web na que podemos escoitar algúns fragmentos da novela e cancións vencelladas ao texto e descargar o primeiro capítulo en PDF. Xelís de Toro creou tamén un blog onde “poder publicar, falar e discutir de temas que agromen a partir dos temas do libro, ou mesmo o tema da literatura e que non se encontren noutros lugares”. Neste vídeo colgado en YouTube Xelís de Toro fala do seu libro e das razóns polas que se decidiu a crear o seu propio espazo na rede:
A Editorial Galaxia publicou no seu blog un relato de Xavier Alcalá, Bonchul, que aparecera en 1997 no Boletín Galego de Literatura editado pola Universidade de Santiago. O conto pode descargarse premendo nesta ligazón.
Mañá, 23 de xaneiro, ás 20:00 na libraría Librouro de Vigo, presentarase a novela O Globo de Shakespeare (Xerais), de Santiago Jaureguizar. No acto o autor conversará sobre a obra con Manuel Bragado, director da editorial. Esta novela foi merecedora do Premio Terra de Melide 2008.
«O Concello de Noia presentou onte un conto inédito de Antón Avilés de Taramancos titulado O cabalo de vidro. Este texto foi escrito polo poeta noiés na década dos 50 durante a súa etapa na Coruña e foi achado hai uns anos no fondo dun baúl. En 2004 chegou a mans da profesora Aurora Marco, que foi a promotora da publicación. […]» (Galicia Hoxe)
O 2 venres de xaneiro, ás 20:30 na Casa da Cultura de Xinzo de Limia, terá lugar a presentación do libro A vida que non é (Tambre), de Rafael Laso Lorenzo. No acto intervirán Ignacio Chao Castro (editor), Antón Riveiro Coello (escritor) e o autor.
O sábado 20 de decembro, ás 18:00 no Salón de Ámbito Cultural de El Corte Inglés, terá lugar a presentación da novela gañadora do IV Premio Biblos-Pazos de Galicia Bailarei sobre a túa tumba, de Berta Dávila. Tamén será presentada a súa tradución ao castelán.
A Biblioteca Pública da Coruña “Miguel González Garcés” convida á presentación do libro Cachiños do meu cerne (Toxosoutos), de Fuco Paz Souto. A presentación correrá a cargo de J. Javier Pintor Elizalde no Salón de Actos da Biblioteca o xoves 18 de decembro ás 20:00.
O día 4, ás 13:30 en Culturgal (Palexco), terá lugar a presentación do libro co guión do filme Os mortos van á présa, de Ángel de la Cruz. Estará el e algunha actriz ou actor, e proxectarase un avance do filme.
O xoves 4 de decembro, ás 20:00 no Palexco, no marco do Culturgal, terá lugar a presentación na Coruña da novela Memoria de cidades sen luz, de Inma López Silva.
