Desde 
o blogue de Dores Tembrás:
“Arrinca este outono, dentro do programa de lecer do Ágora, un curso que leva por título: De literatura e outras artes.
Había tempo que quería traballar neste sentido. Prestar atención ao contacto de determinadas obras da literatura universal con outras disciplinas artísticas como cine, pintura, arquitectura… Coido que dita conexión permite contextualizar a palabra e aprofundar nas características que singularizan determinados movimentos. O que me interesa é reparar nos fíos, máis ou menos explícitos, entre disciplinas.
Como dialogan a literatura e outras manifestacións da vangarda histórica? Cal é a relación entre o personaxe de Ana Karenina de Dostoievski e a protagonista da última adaptación que se levou ao cine? E entre De sobremesa e a pintura prerrafaelita? Ou entre a cerámica de Sargadelos e a obra de Luís Seoane?
Dende clásicos do século XIX, pasando pola vangarda, ata autores recén publicados, o percorrido sinalará conversas, apuntará fontes comúns e espazos transitados pola interdisciplinaridade.
O prazo de matrícula será os días: 9, 10 e 11 de setembro na conserxería do Ágora (9:00 a 14:00 e 16:00 a 20:00 h.).”
Arquivo da categoría: Obradoiros
Betanzos: obradoiro de guión Os primeiros pasos cara o Goya, por Ángel de la Cruz, todos os luns de outubro
Arteixo: Obradoiro de Papiroflexia na Libraría Á lus do candil, o venres 6 de setembro
Máis información no teléfono 881-969745 ou no correo: luscandil@gmail.com. Prazas limitadas.
Gondomar: curso de creación literaria impartido por Elvira Riveiro
“Dende
o Instituto de Estudos Miñoranos andamos a darlle voltas a novas iniciativas culturais para ofrecerllas ás persoas asociadas ou non, na nosa teima de potenciar, divulgar e participar na creación da cultura de noso. Andamos agora a argallar varios cursos dos que vos iremos informando sucesivamente. Para comezar pretendemos darlle forma a un Curso de Creación Literaria (poesía e prosa) que se desenvolvería os xoves de 18:30 a 19:30 horas na nosa sede (Aula de Cultura Ponte de Rosas, situada en Avda da Feira,nº 10 (Gondomar).
O curso empezaría o xoves 19 de setembro, cunha duración de 8 sesións.
O custo da matrícula sería de 20 euros e admitiríase un máximo de 25 participantes.
O curso sería impartido pola escritora Elvira Riveiro.Xa que logo, animámosvos a reservar praza canto antes mediante correo a oficina@minhor.org, chamada telefónica ao 986360575 (luns a venres de 18:00 a 22:00 horas), ou persoalmente na sede en horario de 18:00 a 22:00 horas.”
Cee: actividades destacadas do sábado 17 e domingo 18 na Feira do Libro
Chega á súa fin a Feira do Libro de Cee, que se celebra na Praza da Constitución (con horarios de 11:00 a 14:00 e de 18:00 a 22:00 horas). Destacamos destes derradeiros días as seguintes actividades literarias:
Sábado 17
– 12:30 h. Diante do Museo Fernando Blanco, presentación da obra A noite branca, de Francisco X. Fernández Naval, editada por Xerais, que estará acompañado por Víctor Manuel Castiñeira Castro.
Domingo 18
– 12:30 h. Na Praza da Constitución, Un anaquiño de contos con Beatriz Maceda: Man. O alemán de Camelle, e obradoiro de materiais creativos.
Cee: actividades destacadas do mércores 14 na Feira do Libro
Dentro dos actos da Feira do Libro de Cee, que se celebra na Praza da Constitución (con horarios de 11:00 a 14:00 e de 18:00 a 22:00 horas), destacamos as seguintes actividades para o mércores 14:
– 11:30 h. Na Praza da Constitución, Un anaquiño de contos con Rocío Leira, autora da obra Universo Pitágoras, editada por Biblos, que realizará un obradoiro matemático para nenos.
– 12:30 h. Diante do Museo Fernando Blanco, presentación da obra Contos de soños e sombras, de César Ariza Piñeiro, editada por Urco Editora, que estará acompañado por David Cortizo.
Escola de Escritoræs: Obradoiro en Compostela a cargo de Alicia Fernández
O 
novo obradoiro da Escola de Escritores/as da AELG leva como título Da memoria ao poema e, impartido por Alicia Fernández, será unha iniciación á creación poética, convidando a escribir desde a lectura, o ensaio literario (proba, erro) e o pracer.
Traballarase a partir dunha escolma de poemas de diferentes autores e falarase de técnicas para a escrita, exemplificando sempre e recorrendo a outros soportes como o audiovisual. Tamén se fará algún recital de poesía e visitaranos un poeta novo para contarlles aos asistentes a súa experiencia sobre a escrita e resolverlles as dúbidas básicas (por que escribo?, cando?, onde?…).
Programa:
– As palabras como punto de partida.
– O ritmo e o ton.
– O adxectivo, a precisión.
– As ideas, a memoria.
– Que contar e como contalo.
– A imaxinación.
– A voz.
– Encontro cun poeta.
– Recital poético.
Duración:
10 sesións, os sábados, de 12:00 a 14:00, a partir do 14 de setembro.
Inscrición:
Por rigorosa orde de solicitude. Inscrición gratuíta grazas ao patrocinio da Concellaría de Normalización Lingüística do Concello de Santiago de Compostela.
A partir do día 7 de agosto e até o 12 de setembro, no teléfono 981 54 24 09 ou enviando esta folla de inscrición ao correo electrónico dlg@santiagodecompostela.org ou entregándoa no Departamento de Lingua Galega na Casa do Concello.
Número de prazas: 25, para persoas adultas.
Lugar de celebración: Sala de didáctica da FUNDACIÓN-MUSEO EUGENIO GRANELL (Praza do Toural).
Alicia Fernández Rodríguez naceu en Escairón (O Saviñao) no ano 1987. Licenciada en Filoloxía Galega pola USC.
Participa en numerosos recitais e cursos de iniciación á poesía para nenos. Os seus poemas foron publicados en revistas literarias como A Caramuxa, Xistral, Dorna, A ciegas ou Revista das Letras, e nos libros colectivos Sempre mar. Cultura contra a burla negra (2003), Letras Novas (2007) e Guía viva de ortodoxos y heterodoxos en la poesía contemporánea gallega (2012).
No 2005 foi editado por edições Tema o seu poemario Botar o mar polos ollos.
Gañadora, sendo aínda adolescente, de premios de poesía como o Francisco Fernández del Riego, Francisco Añón, Díaz Jácome, Ánxel Casal ou Minerva, entre outros, galardóns que, co tempo, non lle impediron desenvolver unha voz propia e escintilante, con textos que cativan o lector pola súa intensidade emocional e pola súa ousada transparencia formal. Poemas que arrincan desde un lugar remoto da consciencia para revelar as entrañas do monstro e as súas longas poutas, sempre asexantes.
Participou no IV Encontro de Nov@s Escritor@s organizado pola AELG en 2009 coa conferencia Canonizar as amigas coa que fixo un repaso daquelas poéticas que máis inflúen na súa propia escrita, incidindo especialmente na chamada poesía feminina dos 90 (pero tamén nalgunhas/algúns autoras/es dos 80) ao tempo que mostra un suxestivo abano da poesía galega máis recente, na que ela mesma se insire (Alba Vidal, Fran Cortegoso, Andrea Nunes, Mario Regueira, Xiana Arias, Gonzalo Hermo, Oriana Méndez, Xabier Xil Xardón, María Comesaña, Brais González).
Mallou, Carnota: obradoiro de relato histórico de Francisco X. Fernández Naval
Desde 
o proxecto Castro de Mallou:
“O escritor Francisco X. Fernández Naval, un dos grandes recreadores literarios da Costa da Morte e gran coñecedor da historia, a cultura e a mitoloxía de Carnota, ofrece un Obradoiro de Relato Histórico. A súa novela A Noite Branca (Premio Irmandade do Libro 2013) é unha das últimas achegas á literatura de corte histórico desde Galicia. Este será un obradoiro singular, xa que os participantes deberán escribir un relato histórico ambientado no Castro de Mallou, imaxinando entre todos a vida, a mitoloxía e o castro como un lugar vivo, habitado ou pensado polas xentes.
Pero ademáis, o Obradoiro terá unha estrutura singular, xa que os participantes combinarán as sesións de discusión e traballo literaria con Francisco X. Fernández Naval cunha xornada de voluntariado no castro, explorando todos os seus detalles, coñecendo de primeira man o traballo dos arqueólogos e contando co seu asesoramento técnico para calquera dúbida en relación á recreación histórica da Idade do Ferro na costa galega.
Cos relatos entregados, o proxecto editará un libro -en papel e electrónico- deseñado e impreso por cortesía dos alumnos e profesores do CIFP Compostela.
DATOS TÉCNICOS:
Lugar de celebración:
Local social de Mallou e Castro de Mallou
Idade mínima para participar:
15 anos
Datas:
19 de xullo, venres, ás 19 horas.
27 e 28 de xullo, ás 11 horas, no Local Social de Mallou.
O día 20 de xullo, sábado, será a xornada de voluntariado no Castro de Mallou, iniciándose ás 10 h. (traede gorra, luvas e calzado deportivo).
Duración das sesións:
2 horas (agás a xornadas de voluntariado).
Prezo:
15 €. Por este prezo, os asistentes ao obradoiro reciben o xantar do día 20 de xullo canda o resto do equipo e tres exemplares do libro editado. O pagamento do curso realizarase o primeiro día de sesións.
Como inscribirse:
A través deste formulario no web do Concello de Carnota.”
Lugo: Segundo Obradoiro de Narración Oral da Escola de Escritoras e Escritores da AELG, do 24 de setembro ao 17 de decembro
Está aberto o prazo para solicitar unha das 25 prazas do segundo obradoiro de Narración Oral da Escola de Escritores/as da AELG, que se adxudicarán por orde de solicitude, con preferencia ás persoas participantes no primeiro obradoiro, celebrado o ano pasado.
O obradoiro, financiado pola Concellaría de Cultura, Turismo, Xuventude e Promoción da Lingua do Concello de Lugo, é gratuíto, e será impartido polos escritores Antonio Reigosa e Isidro Novo. A última das sesións será unha clase maxistral de Avelino González.
Baixo o título Técnicas e exercicios prácticos de narración oral, desenvolverase ao longo de trece xornadas de dúas horas de duración do 24 de setembro ao 17 de decembro. As clases serán os martes de 18:00 a 20:00 horas no Centro Social Municipal Uxío Novoneyra (rúa Quiroga Ballesteros) e a inscrición gratuíta poderá formalizarse entre o 9 de xullo e o 15 de setembro no Rexistro Xeral do Concello de Lugo (Edificio Administrativo do Concello de Lugo, na Ronda da Muralla s/n). O número de prazas é de 25 e adxudicaranse por rigorosa orde de inscrición, con preferencia para as/os participantes no primeiro ciclo do curso.
Durante a presentación aos medios, Carmen Basadre, Concelleira de Cultura, sinalou que “visto o éxito da primeira edición decidiuse continuar xa que entendemos que a oralidade constitúe un dos piares fundamentais para transmitir a nosa cultura”. Pola súa parte, Antonio Reigosa, explicou que “o obxectivo é traballar coa oralidade para transmitir toda a cultura e buscamos chamar a atencion sobre ese soporte comunicacional para volver a poñer en uso certas maneiras de transmitir que se foron perdendo por falta de uso e que hai uns anos eran do máis habitual”.
Estudaranse contidos que abranguen unha variada escolma de materias co fin de que o alumnado acade notables coñecementos das técnicas da narrativa oral como son:
– Oralidade con música: regueifa, repentismo, rap…
– Técnicas de improvisación oral.
– Linguaxes non verbais da oralidade.
– Técnicas de lectura en voz alta.
– Fórmulas de inicio e remate dunha narración oral.
– Para contar un conto ben contado.
– Repertorio do narrador/a oral.
Durante a primeira semana de novembro levarase a cabo a Semana da Oralidade con sesión prácticas abertas ao público.
VI Xornadas de Materiais Didácticos, o 29 e 30 de novembro de 2013
Organizado por Nova Escola Galega e a Coordinadora Galega de Equipos de Normalización e Dinamización Lingüística coa colaboración da Asociación de Escritoras e Escritores en Lingua Galega.
A Idea
As VI Xornadas de Materiais Didácticos pretenden ser continuación dos anteriores congresos de materiais didácticos, pretendendo nesta ocasión baixo o lema Recursos e materiais didácticos para o ensino en Galego crear un espazo de eminente carácter práctico, a través do cal poder difundir e dar a coñecer aqueles materiais didácticos e recursos educativos que están escritos en galego e contribúeno a desenvolver actividades de normalización lingüísticas nos centros educativos ou noutras institucións socioeducativas.
Sabemos das dificultades para encontrar materiais en galego para determinadas áreas e proxectos e polo tanto parece conveniente contribuir á difusión dos existentes e aportar aquelas ferramentas que poidan resultar de axuda para difundir e construir os materiais.
Igualmente, a través do coñecemento e difusión dos materiais elaborados polo propio profesorado pretendemos recoñecer o gran labor que hai detrás da construción de recursos educativos polos propios docentes e do interesante abano de posibilidades que se abre a través do intercambio de experiencias, do emprego e da conciliación de recursos elaborados por compañeiras e compañeiros.
Obxectivos
– Difundir os materiais didácticos innovadores concibidos e promovidos polo profesorado dos diferentes niveis do ensino e tamén dende diferentes colectivos de carácter educativo (concellos, movementos de renovación pedagóxica…), coa finalidade de contribuir á normalización lingüística.
– Reflexionar acerca da relevancia e da necesidade de dispor de recursos educativos en galego para os diferentes niveis do ensino.
– Participar en obradoiros que nos axuden a crear materiais didácticos e a contribuir á súa distribución.
Os materiais
Os obradoiros son sesións participativas, onde a/o asistente ten a posibilidade de iniciarse en técnicas de deseño e selección de materiais didácticos e recursos educativos. Na xomada do sábado realizaranse simultaneamente cinco obradoiros, dous en horario de 09:15 h. a 11:30 h. e tres de 12:00 h. a 14:15 h., as e os participantes deberán sinalar os obradoiros da súa preferencia na folla de inscrición (un entre os desenvolvidos na Sesión A e outro entre os desenvolvidos na Sesión B).
Ademais de asistir ás mesas redondas, conferencias e obradoiros, querémoste convidar a que presentes aos compañeiros/as algúns dos materiais didácticos que teñas elaborado para traballar na escola e que dalgún xeito estean contribuindo á normalización lingüística.
Se estás interesado en dar a coñecer a túa experiencia ou material, convidámoste a que accedas ao enlace Ficha para difundir material e cumprimentes a ficha que aparece no mesmo e a envíes a Rocio García Pazos (rocio.garcia.pazos@gmail.com) antes do 1 de novembro.
Como presentar material
Para pode presentar o teu material é necesario que esteas inscrito no encontro. Unha vez que recibamos o conxunto de propostas organizaremos as presentacións en función das temáticas e da tipoloxia de material. Cada autor de material disporá dun tempo aproximado de 15-20 minutos para presentar o seu recurso. Para as presentacións dos materiais disporase de ordenador e de conexión a intemet. Na realización da túa presentación, agradeceriamos que prestaras especial atención ás seguintes cuestións:
> Breve presentación do material
> Caracteristicas
> Destinatarios
> Por qué en Galego?
> Breve avaliación
As presentacións terán lugar na Facultade de Ciencias da Educación.
