O xoves 14, ás 20:00 horas, terá lugar a presentación d’ O paraíso das sombras, de Cesáreo Sánchez Iglesias. Será na Galería Sargadelos de Ferrol, onde acompañarán o autor Eva Veiga e Tucho Calvo.
Arquivo da categoría: Poesía
A Coruña: presentación de Once máis 15
Edicións do Cumio presenta este venres 15 no Fórum Metropolitano da Coruña o espectáculo poético-musical Once máis 15, libro-CD froito da unión entre once poetas galegos de todos os tempos e quince grupos da escena musical actual. Versos que van dende Rosalía e Curros ata Antón Lopo e Daniel Salgado convértense en cancións por virtude dun elenco variado de músicos no que conviven a electrónica, o pop, o rock de diversa inspiración e case todos os estilos imaxinables.
O libro recolle as versións orixinais dos poemas, aquelas que serviron como punto de partida para as composicións dos músicos, así como pequenas biografías dos autores. Por parte dos músicos, a edición aporta imaxes das bandas e textos que os presentan.
No concerto no Fórum, dentro do ciclo Espazo Aberto, presentará o proxecto coas actuacións de Elanor, Xurxo Mares e Miguel Alonso. O concerto será o venres 15 de xaneiro ás 20 h e o prezo das entradas será de 3 euros.
Valadares: festival de performance e música
O colectivo de artistas galegos asentado en Valadares organiza un festival de performance e música para estrear o ano 2010. As actuaccións, que virán da man de artistas do colectivos e outros convidados, terán lugar o vindeiro domingo 10 de xaneiro e o seguinte sábado día 16.
Este pequeno festival, denominado Re10, nace a partires da primeira Xuntanza de Creadores Experimentais no laboratorio Alg-a, celebrada o pasado outono, onde coincidiron artistas sonoros de varios netlabels do territorio nacional, entre outros Friendly Virus, Larraskito, Mantricum ou alg-a.
Durante as dúas sesións, de entrada libre, representantes destes selos virtuais, como Berio Molina, ofrecerán unha mostra dos seus procesos de investigación sonora. As sesións de Dj’s, o teatro e a poesía (da man de María Lado e Rafa Xaneiro) e as proxeccións dos últimos traballos dos videoartistas do colectivo completaran as sesións.
A Coruña: recital poético-musical
Hoxe na Coruña, recital poético-musical dentro do ciclo Os xoves na rúa Tabernas, ás cinco da tarde e con entrada libre.
Vídeo: Recital de Uxío Novoneyra en Mazustegi (1991)
O 18 e 19 de maio de 1991 (sábado e domingo) o Fato cultural “Daniel Castelao” e a Asociación Cultural “Rosalía de Castro” celebraron o Día das Letras dedicado aquel ano a Alvaro Cunqueiro convidando a Euskadi ao gran poeta galego Uxío Novoneyra, que ofreceu recitais poéticos en Trintxerpe e Mazustegi (Bilbao). Na web que homenaxea ao poeta do Courel está disponíbel o rexistro en vídeo do acto de Mazustegi. Deixámosvos aquí a primeira entrega e ofrecémosvos a seguir as ligazóns das outras partes da gravación:
A Coruña: recital da poeta venezolana Estrella Gomes
Hoxe luns 4 de xaneiro ás 20 horas na Galería Sargadelos da Coruña terá lugar un recital presentación da poeta venezolana Estrella Gomes (Miranda, 1990). Acompáñaa no acto a escritora galega Yolanda Castaño. A entrada é libre.
Xove: presentación do poemario de Óliver Escobar
O poemario de Óliver Escobar Galician rhapsody, blues escocés presentarase o vindeiro domingo 3 de xaneiro de 2010 ás 5 da tarde no Salón de Actos do Concello de Xove. Óliver Escobar escolleu a súa vila natal para facer a presentación oficial da súa terceira obra literaria. O acto contará coa presenza dos escritores Victorino Pérez Prieto, Marica Campo, ademais do pintor Xoán Guerreiro e o profesor Bernardo Penabade. O libro é unha obra bilingüe, en galego e inglés, publicada pola editorial Morgante e a Universidade de Stirling (Escocia).
Becerreá: homenaxe a Yolanda Castaño
O vindeiro domingo celébrase a XVIII noite poética A Pipa 09 de Becerreá que nesta edición homenaxeará á escritora Yolanda Castaño. A cita é o domingo 27 de decembro de 2009 ás 19 h. na Casa da Cultura de Becerreá, con razón ao seguinte programa:
1. Cerimonia de Entrega de Premios do XVIII Certame Literario A Pipa 09 da Alta Montaña Luguesa, por Yolanda Castaño e os/as representantes das institucións colaboradoras. Presentan Amparo Becerra e Rafa Ramos.
2. Presentación e conversa coa escritora homenaxeada Yolanda Castaño, a cargo de Marta de Sinllán e Afonso Becerra de Becerreá.
3. Proxección dos vídeopoemas titulados “O vídeo da Egoísta” e “(RE)SER(VADO)”.
4. Recital dunha escolma de poemas na voz da súa autora, Yolanda Castaño.
5. Cóctel e brinde.
Gondomar: Elvira Riveiro no club de lectura Lendo contigo
Mañá sábado, 19 de decembro, ás 12:00 horas, na Biblioteca Pública de Gondomar, a poeta Elvira Riveiro participará na última sesión do ano 2009 do Club de Lectura Compartida Lendo Contigo, destinado a nais e pais e nenos e nenas de 8 a 11 anos. O libro proposto nesta ocasión é PAlAbrAs brAncAs, publicado pola editorial Xerais e finalista do Premio Merlín de Literatura Infantil 2007. PAlAbrAs brAncAs é un poemario moi especial, escrito unicamente coa vogal “a”, un marabilloso encontro con palabras que xogan a agasallarnos todos os “as” posibles.
