Desde Sermos Galiza:
“O padroado da Fundación do Pedrón de Ouro concedeulle o Pedrón de Ouro 2016 ao Coro Galego Cántigas da Terra da Coruña e o Pedrón de Honra á filóloga Carmen Mejía Ruiz, presidenta da Asociación Internacional de Estudos Galegos. (…)
Doutora e profesora titular de Filoloxía Románica na Universidade Complutense de Madrid, Carmen Mejía exerce a docencia sobre literatura galega, historia da lingua galega, literaturas románcicas e da materia “Literatura e Identidade na península Ibérica”. As súas liñas de investigación son, entre outras, a poesía peninsular comparada, as linguas en contacto e o conflito de identidades culturais minoritarias. É a directora de Madrygal. Revista de Estudios Gallegos, publicada en Madrid. No Congreso celebrado en Bos Aires en 2015 foi nomeada presidenta da Asociación Internacional de Estudos Galegos. (…)
O acto de entrega dos Pedrón de Ouro e Pedrón de Honra terá lugar o próximo 22 de maio nun acto literario no que actuarán de mantedores o musicólogo Baldomero Iglesias, “Mero”, e a profesora da Universidade de Vigo, Ana Acuña, que se celebrará na Casa Museo de Rosalía, en Padrón, ás 12:30 horas.”
Arquivo da categoría: Premios e concursos (outros)
Camilo Nogueira, recoñecido co Premio Trasalba
Desde
Sermos Galiza:
“O economista, enxeñeiro, ensaísta e político galego Camilo Nogueira Román (Lavadores, Vigo, 1936) recibirá o próximo 26 de xuño o Premio Trasalba que todos os anos concede a Fundación Otero Pedrayo a unha personalidade destacada no galeguismo. O escritor Suso de Toro, que en 1991 publicou o libro de conversas Camilo Nogueira e outras voces, será o encargado de pronunciar a correspondente laudatio, e a Fundación, como vén sendo habitual, publicará un libro-homenaxe ao premiado.
A Fundación valora a personalidade de toda unha vida entregada á causa de Galiza, da súa identidade nacional e cultural, salientando de xeito especial a vocación e compromiso europeísta de Camilo Nogueira, na mellor tradición dos homes da xeración Nós e, máis en concreto, de Ramón Otero Pedrayo.
A xeración Nós comprometeuse moi decididamente na dimensión europea e europeísta de Galicia como nación. Castelao, Vicente Risco, Otero Pedrayo, entre outros, pronunciáronse moi conscientemente por este vencello histórico, que enmarca Galiza na construción do grande universo europeo mesmo desde as primeiras concepcións da Europa moderna. Como ensaísta, ademais de como político, Camilo Nogueira desenvolveu e desenvolve unha intensa actividade nesta dirección, con libros como Europa, o continente pensado (2008) e Galiza na Unión (2008). (…)”
Premio de Honra dos María Casares para a Revista Galega de Teatro
Desde
Sermos Galiza:
“A Asociación de Actores e Actrices de Galicia (AAAG) vén de anunciar que lle concede este ano á Revista Galega de Teatro o Premio de Honra Marisa Soto, galardón que recoñece a longa traxectoria desta histórica publicación. (…)
A directiva da AAAG, encargada de outorgar este galardón, recoñece así o labor da Revista Galega de Teatro como ferramenta imprescindible de difusión da actividade teatral. “Este é un recoñecemento inescusable que tardamos en facer desde a Asociación e quixemos concederllo neste ano tan especial, no que celebramos a vixésima edición dos nosos premios”, sinala Vicente Mohedano, presidente da AAAG. Para Mohedano, a RGT é un exemplo dentro do xornalismo cultural do país que sempre “creou debate” ao redor das artes escénicas, “informou sobre a realidade do sector” e “alimentou a crítica”. “Estes tres elementos son esencias para o desenvolvemento dun sistema teatral que precisa de iniciativas tan importantes e tan comprometidas como é a Revista Galega de Teatro”, sentencia Mohedano. (…)”
Lugo: Gala dos Premios Mestras e Mestres da Memoria
A
AELG pretende facer máis visíbel ante a sociedade a literatura de tradición oral levando a Lugo a súa Gala dos Premios Mestras e Mestres da Memoria que, co lema «Lugo, Capital Galega da Literatura de Tradición Oral», terá lugar o 19 de marzo, ás 19:00 horas, na Casa do Saber (Vicerreitorado da USC-Lugo, Praza Pío XII, 3), na xornada previa ao Día da Narración Oral.
O obxectivo principal da Gala é a entrega dos IV Premios Mestras e Mestres da Memoria, que se concede a dous informantes de literatura popular, por toda unha vida de dedicación exemplar á transmisión oral de saberes e valores da nosa cultura popular tradicional.
A proposta da Sección de Literatura de Tradición Oral, aprobada na Asemblea xeral de Socios-as, foi a de outorgar os premios de 2016 a Dolores Macías Pose e Mini e Mero.
No acto, ademais dos premiados, intervirán o grupo de gaiteiros Lúa chea de San Xoán, o acordeonista Eloi Mato, Matilde Vilariño e Francisco Almuíña.
Entrada libre até completar aforo.
Bases do Premio de Ensaio e Creación Audiovisual Xohana Torres 2016
Bases do Concurso E ti, que vés lendo?, da Federación de Librarías de Galicia
“- Obxecto do concurso
A Federación de Librarías de Galicia (en diante a Federación), organiza e encárgase do desenvolvemento do sorteo de 4 vales de 20 € cambiables por libros en librarías da Federación que participen neste.
– Nome da promoción
“E ti, que vés lendo?”
– Datas e ámbito do concurso
A participación no sorteo iniciarase o 1 de marzo e finalizará o día 30 de xuño de 2016.
O sorteo celebrarase mensualmente o día 2 do mes seguinte.
O sorteo realizarase asignando un número na base de datos a cada inscrición. Realizando o día do sorteo un proceso automático que elixe aleatoriamente entre os números que conforman a base de datos os números dos gañadores.
– Participantes
A convocatoria está aberta a calquera persoa física, con exclusión das persoas xurídicas e calquera tipo de asociación.
Considerarase participante a toda aquela persoa que seguindo as instrucións de participación do concurso, estea en posesión dun código alfanumérico enviado por correo electrónico dende a Federación.
Para a obtención do devandito código previamente hase de suxerir a recomendación dun libro cubrindo o cadro de inscrición e recibido un correo electrónico co devandito código alfanumérico.
Cada concursante poderá participar un número ilimitado de veces. O código alfanumérico, que recibe cada participante de forma automática, só será valido para o concurso activo nese mesmo mes.
– Descrición e mecánica da promoción
Os gañadores do concurso recibirán un correo electrónico notificándolles que obtiveron o vale mensual correspondente sorteado e dándolles instrucións para poder cambiar este.
O procedemento de selección dos gañadores realizarase por medio da extracción dos seus códigos alfanumérico da base de datos onde se rexistran ao participar.
O troco do vale realizarase logo da identificación do gañador, tendo que presentar o correo electrónico en que se indica que foi gañador e o código alfanumérico na libraría na cal vai realizar o troco.
– Premio e especificacións do seu uso
O premio a entregar, consiste nun vale de 20 € cambiable por libros na libraría da Federación elixida polo gañador do sorteo.
En ningún caso o premio ou parte deste poderá ser substituído polo equivalente en metálico.
Os vales poderán ser cambiados ata o 30 de setembro de 2016. En caso de non ser cambiados antes da devandita data procederase á anulación do vale.
– Protección de datos persoais
De conformidade co establecido na Lei Orgánica 15/1999, do 13 de decembro, de protección de datos de carácter persoal, os datos persoais que vostede nos facilita serán incorporados a un ficheiro automatizado e rexistrado na Axencia de Protección de Datos denominado, CLIENTES cuxo responsable é a Federación de Librarías de Galicia. Os seus datos serán utilizados para a xestión deste concurso, así como para facer comunicacións comerciais de publicacións de interese.
Ao participar neste concurso autoriza a utilización dos seus datos persoais para o fin indicado.
Poderá exercer en calquera momento, os dereitos de acceso, rectificación, cancelación e oposición previstos pola Lei, dirixíndose á Federación de Librarías de Galicia, domiciliada en República do Salvador, 28 Entresollado, 15701 de Santiago de Compostela.
Se vostede, non desexa que os seus datos sexan incorporados ao citado ficheiro para a recepción de información nos termos indicados envíe un correo electrónico á Federación, ao seguinte correo libreiros@librarias.org
– Dereito de exclusión
Quedan excluídos deste concurso todos os membros da Federación de Librarías de Galicia, os seus empregados, e todas as persoas que colaboren neste concurso.
A Federación resérvase o dereito de rexeitar como gañadores do Concurso aos participantes:
Cando se identifiquen con datos falsos ou haxa indicios que razoablemente puidesen levar a pensar que os datos son falsos. Para estes efectos, poderase esixir aos participantes a verificación dos seus datos se o considera oportuno.
Cando, de calquera forma fraudulenta ou artificial, manipulen a súa participación no Concurso.
Cando se incumpran as presentes bases en calquera forma.
– Dereitos de imaxe
A Federación resérvase o dereito de publicación e reprodución da imaxe e datos dos gañadores, en calquera medio ou soporte, coa finalidade de difusión do concurso e o seu resultado.
– Modificacións do concurso
Se causas de forza maior fixesen necesario aprazar, modificar, ou anular o concurso farase constar nas presentes Bases, polo que invitamos a consultalas con posterioridade á participación.
A Entidade Organizadora resérvase o dereito de suspender, aprazar, cancelar ou modificar a duración do concurso en calquera momento, sempre que existan causas que así o xustifiquen.
A Federación resérvase o dereito a evitar que, sobre este concurso, se establezan sistemas de especulación ou de negocios. A tal fin, poderán exercitar as accións legais que considere oportunas.
– Exoneración de responsabilidade
A Federación queda exonerada de calquera responsabilidade que puidese derivar do incumprimento ou cumprimento defectuoso polos participantes no Concurso das presentes bases.
A Entidade Organizadora non se responsabiliza das posibles perdas, deterioracións, roubos, atrasos ou calquera outra circunstancia a terceiros que poidan afectar ao desenvolvemento do presente concurso.
Así mesmo, a Federación non asumirá a responsabilidade por eventuais danos e prexuízos (incluíndo o dano emerxente e o lucro cesante, pero sen limitarse a eles) sufridos polos premiados ou terceiros en relación co regalo ou a participación no concurso, a salvo das irrenunciables por lei.
– Impostos
O regalo entregado encóntrase suxeito ao disposto polo Real Decreto 439/2007 do Imposto sobre a Renda de Persoas e toda a súa normativa regulamentaria así como calquera outra lexislación que resulte de aplicación.
– Aceptación e consulta das bases
O mero feito de participar neste concurso implica a aceptación das presentes Bases sen reservas, así como o criterio da Entidade Organizadora en canto á resolución de calquera cuestión derivada desta.”
Rosalía e Manuel María vense en Outeiro de Rei
Artigo
de Xoán Costa en Sermos Galiza:
“Outeiro de Rei acolleu a segunda edición do concurso de recitado Rosalia Sempre Viva. Centenares de persoas gozaron e reivindicaron cos versos de Manuel María e Rosalía. (…)
Era o segundo ano que se celebraba o concurso. Dividido en catro categorías, para estudantes de infantil, primaria e secundaria, en sesións de mañá e tarde, un a un ou en grupo, mais de 150 participantes trouxeron até Outeiro poemas de Rosalía porque os de Manuel María xa estaban alí. De Manuel, os mais recitados foron os que reivindican un idioma de noso, seguidos dos dedicados a Saleta; de Rosalía, a emigración, a falta de xustiza social, a reivindicación da muller ocuparon os primeiros postos. (…)
Gañaron, na categoría 1 (Infantil, 1º e 2º de Primaria), o CPI de Xanceda (Mesía) cun recitado colectivo do poema O lobo de Manuel María; na categoría 2 (3º, 4º, 5º e 6º de Primaria) Lucía Ónega Santos, do CEIP Menéndez Pelayo de Lugo, co recitado do poema Galiza de Manuel María; na categoría 3 Irea Ferreiro López, do IES Fermín Bouza Brey de Vilagarcía de Arousa co poema Por que? de Rosalía; e na categoría 4 (Bacharelato) María Camilla Beltrán Guzmán, do IES Leiras Pulpeiro de Lugo, co poema Verbas á miña nai de Manuel María.
Ademais, o xurado outorgou catro mencións honoríficas: ao grupo de alumnas/os do CEIP Menéndez Pelayo de Lugo polo poema O arco da vella de Manuel María, ao CEIP Laverde Ruiz de Outeiro de Rei polo recitado do poema A lúa de Manuel María, a Carmen Peñalver Dequit, alumna do IES Xoán Montes de Lugo, polo poema Fun o domingo de Rosalía e a Teresa Elvira López Martínez, do IES Aquis Querquenis de Bande, co poema Negra sombra de Rosalía. (…)”
A tradución de Ramon Nicolás de Bisa Bea, Bisa Bel entra na Lista de Honra de IBBY 2016
Desde
Galaxia:
“A pasada fin de semana fíxose público por parte de IBBY, a Lista de Honra correspondente ao ano 2016 e no que a tradución que Ramón Nicolás fixo para o libro de Ana Maria Machado, Bisa Bea, Bisa Bel, foi recoñecida para entrar nesta prestixiosa listaxe.
A lista de honra de IBBY é un exclusivo recoñecemento que premia, coa súa inclusión e posterior exposición en distintos lugares do mundo (por exemplo durante a Feira de Boloña) os mellores libros e traducións, dentro do ámbito da Literatura Infantil e Xuvenil, do mundo.
Parabéns, xa que logo, para Ramón Nicolás, por este importantísimo recoñecemento.”
Tolerância gráfica no Certame Manuel Murguía, por Alfredo Ferreiro
Desde
O levantador de minas, de Alfredo Ferreiro:
“Na próxima edição, a celebrar em 13 de maio de 2016, o Certame de Narracións Breves Manuel Murguia de Arteijo atingirá os vinte e cinco anos. Nasceu em 1992, numa época em que a cultura galega experimentava uma rápida institucionalização. Os prémios literários surgiam e diversas instituições e agentes culturais alicerçavam, por toda a parte, o que deveria ser, enfim, um incipiente sistema literário.
Naquele tempo, Henrique Rabunhal Corgo era um ativo professor e escritor arteijão que conseguiu instituir e consolidar, à par da prévia promoção da escrita entre os alunos do município, um prémio de narrativa breve com o nome do patriarca dos estudos galegos, Manuel Murguia, que por acaso teria nascido na paróquia arteijã de Pastoriça. São anos de grande efervescência cultural, e uma etapa em que as escritoras e os escritores da geração de 80 atingem a maturidade — assim como acontece com a CRTVG, com a AELG, com o ensino do galego, com os apoios das fundações à arte e à literatura, etc.― e uma parte muito relevante das plumas do país aderem o movimento reintegracionista em graus diversos, na sequência das teorias do professor Ricardo Carvalho Calero. Não se produziu ainda, portanto, o grande acordo político de fim de século para impor uma norma unificada.
Graças a que nasceu antes da rija e vigente institucionalização ortográfica, um espírito eminentemente criativo, essencialmente artístico assoprou na orelha do recém-nascido certame o alento da liberdade, e deste modo chegou aos nossos dias, mantendo esta coerência inicial, como um espaço para a inspiração sem censura. Presentemente, encetado o quarto lustro do século XXI, muitas dúvidas sobre o sucesso das políticas culturais assaltam os preocupados com a língua; porém, a atitude fundamental do certame de Arteijo, em contraste com os vaivéns do sistema literário, revela-se estável e proveitoso. E isto obedece a que o prémio nunca esqueceu o seu alvo, a criação literária, deixando às escritoras a máxima liberdade e não se constituindo em baluarte de uma concreta política linguística, mais ou menos duradoura. Hoje, este prémio pode afirmar não ter marginalizado nenhuma obra em razão do modo gráfico em que nasceu, facto que inocula no âmbito literário, e por extensão na sociedade toda, um sentimento de irmandade de que todos os galeguistas nos devemos orgulhar, e que mesmo podemos tomar como exemplo de gestão cultural. (…)”
Alfredo Ferreiro: “Admitir varias normativas do galego no certame garante a liberdade creativa”
Entrevista
a Alfredo Ferreiro en La Opinión:
“O certame Manuel Murguía xa ten novo coordinador no seu 25 aniversario. Trátase de Alfredo Ferreiro, un escritor nado en A Coruña, que viviu en Carral e que agora está en Arteixo. Ferreiro explica que o certame manterá a súa “tolerancia” coas diferentes normativas do galego. (…)
– La Opinión (LO): Pensa que o certame Manuel Murguía xa alcanzou un alto grao de recoñecemento?
– Alfredo Ferreiro (AF): Hai unha gran cantidade de xente de certo prestixio entre os gañadores. Joel Gômez, Xavier Alcalá, Isidro Novo, Rosa Aneiros, etc. Hai un montón de xente coñecida.
– LO: Que destacaría sobre o certame?
– AF: Quero explicar que o certame ten tolerancia coas diferentes normativas [do galego]. Non ten obxectivos gráficos, senón literarios. Admitir varias normativas garante a liberdade creativa.”
