O premio Ramón Piñeiro Facer País, organizado pola Asociación Cultural Val de Láncara, recoñecerá por noveno ano consecutivo o labor de persoas ou entidades que destacasen pola promoción, defensa e vertebración de Galicia en calquera manifestación cultural, económica ou de creación ao longo de “toda unha vida” ou con “meritoria” constancia no tempo. Este premio, que carece de dotación económica, consiste na entrega ao gañador dunha obra de arte dalgún creador galego nun acto solemne que se celebrará no municipio de Láncara, podendo propor candidaturas todas as asociacións culturais de Galicia e aquelas creadas na emigración ata o próximo día 15 de agosto. Unha vez recibidas as candidaturas, a asociación convocante realizará unha listaxe con todas as propostas recibidas e convocará un xurado composto por membros de asociacións da comarca de Sarria, Val do Neira e Corgo mais un representante do CEIP Ramón Piñeiro do concello de Láncara. Eles decidirán o gañador deste premio, que se entregará ao redor do 27 de agosto coincidindo co aniversario do pasamento do intelectual Ramón Piñeiro. As propostas deberán enviarse á Asociación Cultural Val de Láncara (Láncara número 59. C.P. 27367 Láncara-Lugo) ou por correo electrónico a: arroxo@edu.xunta.es (á atención de Carlos López Sierra). As edicións anteriores deste certame recoñeceron o labor e a traxectoria do intelectual Isaac Díaz Pardo, o actor Luís Tosar, o grupo Milladoiro, o político Xosé Manuel Beiras, o escritor Xosé Neira Vilas, A Nosa Terra, o intelectual Avelino Pousa Antelo e a escritora Luz Pozo Garza. Con este premio, que recoñece de maneira real e desde abaixo o traballo daquelas personalidades destacadas nos traballos de defensa e promoción de Galicia e a súa cultura, o municipio de Láncara convértese no escenario da cultura galega durante os actos de entrega. A nova aparece recollida en A Nosa Terra, Xornal e El Progreso.
Arquivo da categoría: Premios e concursos (outros)
Xosé Luís Méndez Ferrín gaña o Premio Fernández Latorre
“O Padroado da Fundación Santiago Rey Fernández-Latorre, constituído en Xurado para fallar o LII Premio Fernández Latorre, instituído en memoria do fundador de La Voz de Galicia, acordou conceder por unanimidade o premio Fernández Latorre na súa edición do 2010, dotado con 10.000 euros, a Xosé Luís Méndez Ferrín, escritor e presidente da Real Academia Galega. O xurado desta 52ª edición (composto por Santiago Rey Fernández-Latorre, presidente da fundación; Roberto Blanco Valdés, Sergio Cancelo Mallo, Luciano Vidán Martínez, vogais; José Francisco Sánchez Sánchez, vogal e director da fundación; José María Arias Mosquera, José Arnau Sierra, Manuel Fernández de Sousa Faro, Manuel Jove Capellán, José Carlos Martínez Pérez e José Luis Méndez López, patróns de honra da fundación; Xosé Luís Vilela Conde, director de La Voz de Galicia, e Manuel Areán Lalín, vicepresidente da fundación, que actuou tamén como secretario) tivo en conta a súa longa e fecunda traxectoria literaria, que o ten convertido na figura fundamental das letras galegas do último medio século, non só pola súa faceta narrativa e poética, senón tamén pola súa vasta produción periodística e polos seus traballos de investigación e de crítica. Salientou ademais o seu compromiso constante e irrenunciable coa lingua e a cultura galegas, polas que Méndez Ferrín ten traballado con afouteza durante toda a súa vida e que ten inspirado a súa obra literaria, o seu labor docente e investigador e a súa actividade pública. A entrega do galardón terá lugar no último trimestre do ano nunha velada que se desenvolverá no Museo Santiago Rey Fernández-Latorre.” Máis información aquí.
A Deputación da Coruña convoca o Premio Otero Pedrayo 2010
A Deputación da Coruña é a encargada da convocatoria deste ano 2010 do Premio Otero Pedrayo, cos obxectivos de premiar un labor que constitúa unha contribución eminente á cultura galega e promocionar os valores propios de Galicia e as obras que leven ao esclarecemento e a mellora dos seus homes e institucións. Poderán optar ao premio persoas nadas ou residentes en Galicia, grupos de traballo galegos, personalidades e institucións vencelladas ao país. Pódense consultar as bases completas na convocatoria oficial.
Convocatoria do I Premio Via Galego
A Fundación Via Galego convoca este ano a primeira edición dun galardón que recoñecerá de forma específica aquelas persoas ou entidades que desenvolvan un labor para mellorar as relacións de Galiza cos outros territorios do seu sistema lingüístico, o galego-portugués. O premio Via Galego outorgarase anualmente por esta Fundación declarada de interese público e de interese galego. As candidaturas a este galardón han de enviarse ao Padroado da Fundación Via Galego por correo electrónico (viagalego@viagalego.org) ou por correo postal (Rúa do Vilar, 15-1º dereita, Santiago de Compostela) antes do 1 de setembro de 2010. Xunto coa proposta, achegarase un currículo ou folla de méritos. A Fundación garante que as candidaturas se tratarán coa máxima confidencialidade. Ademais, os membros do xurado (que será o propio padroado da Fundación) poderán tamén propor candidaturas e, se así o consideraren, optar por deixar deserto o premio. Nestes momentos conforman o padroado da Fundación Via Galego as seguintes persoas: Carlos Callón (presidente), Susana Romero (vicepresidenta), Iria Taibo (secretaria) e os vogais Xavier Alcalá, Miguel Barros, Fátima Braña, Quico Cadaval, Pilar García Negro, Carmela González Bóo, Adolfo Muíños, Bernardo Penabade, Fran Rei, Henrique Sáez Ponte e Xavier Vence. O galardón Via Galego 2010, que reviste un carácter simbólico e carece de dotación económica, darase a coñecer o día 18 de outubro, aniversario da histórica manifestación en defensa da lingua galega. Máis información aquí.
VII Premio Luísa Villalta a iniciativas normalizadoras
O Servizo de Normalización Lingüística da Universidade da Coruña, o Servizo de Normalización Lingüística da Universidade de Santiago de Compostela e a Área de Normalización Lingüística da Universidade de Vigo, en colaboración coa Secretaría Xeral de Política Lingüística, convocan o VII Premio “Luísa Villalta” a Iniciativas Normalizadoras, dirixido ao conxunto do sistema universitario galego, ben a título individual, ben á constitución de equipos caso das comisións de normalización lingüística ou asociacións estudantís. Estabelécense dous premios: un de 3000 euros ao deseño dunha campaña normalizadora que desenvolva unha iniciativa orixinal que teña como obxectivo fomentar o uso do galego no ámbito universitario, e outro de 1500 euros a unha idea para a promoción do galego que de xeito razoado explique unha proposta cuxo obxectivo for o fomento da lingua galega no ámbito universitario. O prazo de presentación dos proxectos remata o 15 de novembro. As bases poden descargarse aquí.
Santiago: Lingua de Amor entregou os premios da súa IV edición
O sábado 26 de xuño o Consello da Xuventude de Galicia realizou o acto de entrega de premios do concurso de cancións e declaracións de amor en galego, Lingua de amor, que xa vai pola súa cuarta edición.
O obxectivo principal deste concurso é dinamizar o uso da lingua galega entre a xente nova nas súas comunicacións a través da rede e nos espazos de lecer.
No acto, que tivo lugar na Biblioteca Pública Ánxel Casal, ás 12:00 h, as persoas gañadoras leron as declaracións e interpretaron as cancións en directo.
DECLARACIÓNS DE AMOR EN GALEGO A TRAVÉS DA REDE
Categoría A (de 14 a 19 anos):
1.º Premio: De mesturar a túa suor coa miña colonia, Uxía Pérez González (Vigo)
“Poderíamos fusionarnos. os nosos corpos. quizais tamén as nosas mentes. os sábados pola noite serían de cervexa e discos. de ti espido no sofá. do meu pelo na alfombra. de sexo. de mesturar a túa suor coa miña colonia. imaxínonos comendo cereais algunhas mañás. contándonos os hematomas das mordeduras nacidas nas noites de insomnio. en silencio.”
2.º Premio: Necesidade, Hugo Eiroá Dayán (Burela)
“Se me faltas ti, e as ganas de comer, morro.”
3.º Premio: Querer con pronome, Jessica Amado Dosil (Outes)
“Cheísta de corazón, nunca sei se “che quero” ou “te quero”.
Eu, para asegurarme,
quéroche e quérote.
En tódalas variedades dialectais posibles, meu sol.”
Categoría B (de 20 a 35 anos):
1.º Premio: Imposto (r), Alcira Otero Cruz (Miño)
“Solicito algo máis que un borrador, unha cita previa. Insisto por internet, por teléfono e ata na túa oficina. Síntome obrigada a declarar: ingreso alterada, reteño o medo, gasto saliva e deduzo desprezo. Só desexo IRPF, unha Íntima Relación, Por Favor!
Marca cun X o resultado:
A ingresar [ ] A devolver [ ]”
2.º Premio: Sábesme a g(h)loria, Antonio Iglesias Mira (Arteixo)
“Cuando nos bicamos
tu e eu
somos realmente bilingües.”
3.º Premio: Amoreando amores, Carme Otero Cruz (Santiago de Compostela)
“Amor sabor amorodo
amoricoque amoreído
amorío amortecedor
será amoral, amorfo ou amortizable tanto amor?”
CANCIÓNS DE AMOR EN LINGUA GALEGA
1.º Premio: Para beber auga e viño, Pablo González Costas (Cangas)
2.º Premio: Terra de amor, Xesús Xosé Iglesias González (Salvaterra do Miño)
3.º Premio: Fala galego, Marcos Fernández Vázquez (Ourense)
Ademais, todas estas persoas recibiron un lote de libros en galego, cedidos polas concellerías de Participación Cidadá e Cultura do Concello de Santiago de Compostela, o Consorcio de Santiago e a asociación xuvenil Don Bosco.
(Da páxina web de Lingua de amor).
Xosé Ramón Barreiro recibe o premio Trasalba defendendo a identidade galega
Xosé Ramón Barreiro, premio Trasalba 2010
O historiador e académico Xosé Ramón Barreiro, presidente da Real Academia Galega (RAG) ata o pasado mes de xaneiro, é o galardoado co Premio Trasalba 2010, que concede anualmente a Fundación Otero Pedrayo como recoñecemento á aportación de distintas figuras á cultura galega. O premio, que ten carácter honorífico, entregarase na festa literaria que se celebra este domingo na casa grande de Cimadevila, en Trasalba (Ourense).
Este é un galardón que pretende recoñecer a súa traxectoria ao servizo da cultura galega, na liña histórica que representa a memoria de Otero Pedrayo e a Xeración Nós, atendendo aos seus méritos como intelectual galeguista e, moi principalmente, como renovador da historiografía galega.
Máis información aquí.
Concurso Biblio-Clip
Realización de curtas (dun máximo de 35 segundos) inspirados nas bibliotecas e na lectura. Prazo de envío das produccións: do 17 de maio ata o 01 de setembro. Publicación da persoa gañadora e dous finalistas: a partires do 1 de outubro do 2010. Entrega de premios: 24 de outubro do 2010. Consulta as bases aquí.
As Bibliotecas Municipais da Coruña convocan o concurso de BIBLIOCLIPS para amosar o feito lector entre os cidadáns cunha visión diferente, persoal e lúdica das bibliotecas públicas. O concurso consiste na realización dun Spot Publicitario dunha duración máxima de 35 segundos de visionado, inspirados na biblioteca e a lectura. A curta poderá estar ou non gravada nun espazo bibliotecario. En calquera caso, valorarase a orixinalidade e a capacidade de expresar calquera punto de vista relacionado co tema do concurso, así como as posibilidades de emisión dos traballos presentados.
