O venres 5 de marzo ás 20:00 no local da Agrupación Cultural Alexandre Bóveda (Rúa Olmos, 16-18, 1º) preséntase o poemario musical En clave de sol de Rosalía Fernández Rial. A autora estará acompañada por Olga Patiño Nogueira e Emma Pedreira; o recital contará ademais coa participación do músico Brais Morán.
Mañá mércores 3 de marzo preséntase o libro Moncho Reboiras e o nacionalismo dos anos 70, editado pola Fundación Bautista Álvarez de Estudos Nacionalistas. O acto terá lugar ás 8 da tarde na Casa Museo Casares Quiroga (rúa Panadeiras 12), e contará coa presenza de Lois Diéguez Vázquez, director de Programación de Cursos e Publicacións da Fundación Bautista Álvarez; e Francisco Rodríguez Sánchez, doutor en Filoloxía Románica e autor dunha ampla obra investigadora e de ensaio en temas culturais e políticos.
O vindeiro sábado, 6 de marzo, ás 20:00 horas presentarase nas instalacións do Círculo Saviñao (rúa Pardo Bazán 17 de Escairón) O Cabo do Mundo, a cuarta novela de Xabier Quiroga. No acto acompañarán ao autor Enrique Sampil e Manuel Bragado. O Cabo do Mundo é unha das finalistas dos premios AELG na categoría de Narrativa.
Hoxe martes 2 de marzo celébrase unha nova sesión do club Sete Vidas centrada na lectura da novela da escritora viguesa Begoña Caamaño Circe ou o pracer azul (Galaxia, 2009). A cita será, coma sempre, a partir das 20.00 horas na Biblioteca Municipal de Gondomar. O encontro coa escritora terá lugar no mesmo espazo ás 21 horas.
Mañá mércores 3 de marzo na Galería Sargadelos Ferrol terá lugar a presentación do libro A ceca de Xuvia. Unha visión dende a Economía, do autor Manuel Antón, editado por Edicións Embora. O acto ten entrada libre e comezará ás 20 horas.
O escritor ourensán e membro da AELG Jorge Emilio Bóveda tira adiante o libro SERES ESTARES PARECERES. VOCES COPULATIVAS, coa editora Liberlibro. Unha escolma de artigos publicados nos xornais mundourense.com e Ourense por Barrios, entre os anos 2007 e 2009. O libro, prologado por Javier González Róiz e José Antonio Santos, será presentado en Ourense o vindeiro 10 de marzo do 2010 no Centro Cívico da Rúa Colón de Ourense.
Mañá sábado 27 de febreiro ás 12 horas na Galería Sargadelos de Ferrol terá lugar a presentación do libro PUNVER DE VOLTA, coa participación da autora Yolanda Castaño e o ilustrador Eduardo Hermida.
A Asociación Cultural Alexandre Bóveda informa que hoxe venres 26 de febreiro terá lugar a presentación do poemario Deconstruçom de Susana Sánchez Aríns. Nesta presentación participará ademais da propria autora, o editor Miguel Anxo Fernán-Vello e Roberto Catoira. Será ás 20:00 h. no salón de actos da asociación, con entrada libre. Deconstruçom, editado por Espiral Maior, foi premiado co XXI premio nacional de poesia Xosé María Pérez Paralle.
Mañá venres día 26 de febreiro, ás 15,30 horas, o poeta Cesáreo Sánchez Iglesias, presidente da Asociación de Escritores en Lingua Galega, vai presentar no C.P.I. de Maside (Ourense) o seu último libro O paraíso das sombras, nun encontro cos alumnos e alumnas do centro de ensinanza de secundaria. O autor aproveitará o acto para facer unha doazón de parte da súa biblioteca persoal á biblioteca do centro.
