Sobre a delicada arte da edición
Artigo
de Daniel Salgado en Nós Diario:
“Cada libro é único. Precisa dunha diagramación concreta, dunha cuberta singular, dun papel diferente. A súa caixa tamén varía. E cómpre acompañalo, desde o escritorio da autora até a presentación en sociedade. Máis ou menos velaí resumida a filosofía de Apiario, a editorial promovida polas poetas Dores Tembrás (Bergondo, 1979) e Antía Otero (A Estrada, 1982) que vén de celebrar o seu quinto aniversario. (…)
Esa preocupación polo obxecto conduciu ás dúas poetas á maior aprendizaxe, entende Tembrás, deste lustro á fronte da editorial: “Soubemos do delicado que é o proceso de edición, o control que precisa. Porque se non mantés ese control, todo pode torcerse”. A pé de obra, da relación coa escritora ao persoal do prelo, das artistas gráficas ás librarías, acompañan cada paso dos libros. No debe, “a cantidade de horas que invistes”, considera Otero. Con ese método sucedeu o que, a primeira vista, podía parecer improbábel: unha editorial especializada en poesía, nada no máis cru da crise, sobreviviu e foi, se non medrando, si avanzando aos poucos. (…)
Nestes cinco anos “pasaron moitas cousas”. Maiormente positivas, pero non só. “Non falaría de dificultades, pero si batemos con cuestións máis sutís”, relata Tembrás. Refírese a certas actitudes machistas, aínda que as coloca en contexto: “A sociedade é como é, e o noso proxecto ten moi en conta o feminismo. E axiña o compensou todo o pulo e o alento que recibimos das lectoras. Esoutros asuntos pasaron a ser irrelevantes”.
A xeito de balanzo provisional, Antía Otero fica co orgullo polo publicado: “Non editamos un só título que non amemos, polo que non sintamos veneración”. E Dores Tembrás imaxina como lles prestaría publicar algún día as estadounidenses Louise Glück ou Sharon Olds.”
A Xunta abriu o concurso de ideas entre a cidadanía para dotar de nome á Biblioteca Pública de Ourense
Desde
a Xunta de Galicia:
“A Xunta de Galicia abriu o concurso de ideas para dotar de nome á Biblioteca Pública de Ourense tras a súa apertura na nova sede en San Francisco. Con esta iniciativa búscase coñecer as propostas de denominación por parte da cidadanía e das entidades socioculturais de Ourense e do resto de Galicia. Delas, obterase a denominación que finalmente se propoña para nomear este destacado equipamento cultural.
Entre as propostas que concorran valoraranse especialmente aquelas que conteñan nomes de persoeiros ou colectivos relacionados co mundo do libro, das bibliotecas, da cultura e das institucións culturais en xeral, nacidos ou vinculados coa cidade das Burgas ou con Galicia.
Poderán participar neste concurso de ideas todas as persoas físicas maiores de 18 anos e as persoas xurídicas e entidades legalmente constituídas que o desexen. Para facelo, deberán achegar o seu nome completo e o seu NIF/CIF, a denominación da proposta e a motivación da mesma. Cada persoa ou entidade poderá propoñer un máximo de dous nomes.
O prazo de presentación comezou o luns 20 de xaneiro e rematará o luns 3 de febreiro ás 14,00 h. As persoas interesadas en participar deberán remitir un correo electrónico cos datos solicitados a concurso.ideas.ourense@xunta.gal.
A Xunta de Galicia, tras a valoración dunha comisión formada por persoas do ámbito cultural, dará a coñecer a denominación da Biblioteca de Ourense ao longo do mes de febreiro.”
A Coruña: presentación de Onde nacen as hedras, de Ana Varela
Estíbaliz Espinosa gaña o certame Modesto R. Figueiredo
Desde
La Voz de Galicia:
“A escritora coruñesa Estíbaliz Espinosa resultou gañadora do certame galego de narracións breves Modesto R. Figueiredo, que se fallou en Ribeira. Despois de analizar as 39 obras que concorreron a esta cuadraxésimo quinta edición, o xurado decidiuse polo seu traballo, titulado 23 xeitos de inventar unha constelación. Tamén se concederon dous accésit, que foron a parar a mans de Yolanda Ceide Calviño, por Trinta minutos antes, e Virxilio Rodríguez Vázquez, por A primeira vista.
O rexedor ribeirense, Manuel Ruiz, foi o encargado de entregarlle o galardón, un cheque por importe de 1.000 euros, á escritora da Coruña, nun acto que contou coa presenza de Xosé Ramón Fandiño, o presidente da Fundación Pedrón de Ouro, que é a promotora deste certame considerado un dos referentes da literatura galega contemporánea. Os autores dos outros dous textos que foron distinguidos recibiron 400 euros. (…)
David Otero, que exerceu como secretario do xurado, leu a acta no salón de plenos da casa consistorial ribeirense. Xunto a el, encargáronse de revisar e valorar os textos presentados o propio Fandiño; o escritor ribeirense Antonio Piñeiro; Pablo Rubén Eyré, en representación do Pen Club de Escritores de Galicia; Agustín Agra, pola Asociación de Escritoras e Escritores en Lingua Galega; e José Carou, membro tamén do Pedrón de Ouro.
A entrega de galardóns contou coa asistencia de María Xosé Rodríguez, que se sumou en representación da familia de Modesto Figueirido. (…)”
Bases do 9º Premio Meiga Moira de literatura infantil e xuvenil, 2020
Ourense: presentación de Tempo de xeada e orballo e Xonxa, Lupe e outras valentes, de Agustín Lorenzo Fidalgo
O
27 de xaneiro, ás 19:30 horas, na Librería Eixo (Rúa Cardenal Quevedo, 36) de Ourense, terá lugar a presentación de Tempo de xeada e orballo e Xonxa, Lupe e outras valentes, de Agustín Lorenzo Fidalgo. No acto estará acompañado por Rochi Nóvoa Vázquez.
Bases do III Premio Viadutos de Novela, 2020
“PRIMEIRA. Poderá concorrer calquera persoa maior de 18 anos, na data de entrada en vigor da convocatoria, que presente a súa obra en lingua galega conforme as normas ortográficas vixentes.
Os textos presentados serán inéditos e totalmente orixinais. Non puideron ser sido publicados ou divulgados, en todo ou en parte, por calquera medio físico ou electrónico, nin premiados, en data anterior á resolución do xurado.
Os textos han ter unha extensión mínima de cen (100) páxinas, tamaño DIN A4, fonte Calibri, tamaño doce (12), interliñado dobre (2), impresas polas dúas caras, e numeradas. Os textos levarán no encabezamento o pseudónimo da autora ou autor e o título da obra.
SEGUNDA. De cada obra achegaranse seis copias en papel impreso a dobre cara e debidamente encadernadas, e outra en soporte dixital (pendrive) nun documento de procesador de textos.
Co texto en papel e en formato dixital, xuntarase un sobre pechado co nome do relato e o pseudónimo elixido escrito por fóra. No seu interior incluiranse os seguintes datos: nome e apelidos da autora ou autor, enderezo postal, correo electrónico, teléfonos de contacto, copia do DNI, pasaporte ou tarxeta de residente.
TERCEIRA. Os textos enviaranse por correo postal, nun sobre ou paquete pechado sen remite ou calquera indicación que permita identificar a súa autoría. Só figurará PREMIO VIADUTOS DE NOVELA 2020, e o enderezo de destino:
Premio Viadutos de Novela 2020
Departamento de Xuventude
Edificio Multiusos da Xunqueira
Paseo da Xunqueira s/n,
36800 Redondela.
A recepción de orixinais remata o día 31 de marzo de 2020.
CUARTA. Concederase un único premio en metálico, indivisible, por unha contía de 3.000 euros.
QUINTA. O Xurado, nomeado polo excelentísimo Concello de Redondela, estará composto por cinco persoas relacionadas co mundo da cultura, lingua e literatura galegas. Unha delas en representación da Editorial Galaxia. Actuará como secretaria/o, con voz e sen voto, persoal técnico da Concellería de Xuventude do Concello de Redondela. O premio adxudicarase á obra que por unanimidade, ou no seu defecto por maioría de votos, o xurado considere merecedora do mesmo. O xurado poderá declarar o premio deserto, para tal caso a decisión terá que adoptarse por unanimidade. A decisión do xurado, que será inapelable, darase a coñecer durante o mes de xullo de 2020.
SEXTA. A obra premiada será editada e comercializada pola Editorial Galaxia na súa colección Literaria. Segundo Convenio asinado co Concello de Redondela, a Editorial Galaxia en calidade de entidade colaboradora terá o dereito de publicación da primeira edición e reimpresións, así como os dereitos preferentes de publicación en lingua galega. Todo iso sen menoscabo dos dereitos morais e patrimoniais da gañadora ou gañador do premio.
Sobre calquera controversia atenderase ao regulado na Lei da propiedade intelectual vixente.
SÉTIMA. Os orixinais non premiados poderanse recuperar pasado un mes desde o veredicto do xurado. Transcorrido o prazo, serán destruídos.
A participación neste premio implica a completa aceptación das presentes bases e da decisión do Xurado, que será inapelable.”
Conversa de Teresa Moure con Rexina Vega sobre Ninguén dorme
Vigo: presentación de Voces da Galicia bárbara, de Antonio Rodríguez Baixeras
