Gondomar: tertulia con Aurora Marco, sobre Mulleres na guerrilla antifranquista galega

O venres 9 de marzo, ás 20:30 horas, na Aula de Cultura Ponte de Rosas (Avenida da Feira, 10, baixo) de Gondomar, dentro do ciclo Tertulias do Instituto de Estudos Miñoranos, Aurora Marco falará de Mulleres na guerrilla antifranquista galega, presentada por Pilar Barreiro.

Castro de Rei: EntoleARTE. Proxecto de creación artística multidisciplinar no antigo manicomio de Castro

Desde a Rede Museística, a Área de Cultura e Turismo e a de Benestar Social e Deporte da Deputación de Lugo, convocamos a todos os creadores que desde as diferentes artes, técnicas e ideas (nas diferentes modalidades de plástica, música, literatura e artes escénicas) desexen participar neste proxecto de creación artística multidisciplinar denominado ENTOLEARTE e que se vai desenvolver no edificio do antigo Hospital Psiquiátrico San Rafael, en Castro de Rei (Lugo).  Este edificio, agora baleiro de residentes, o antigo manicomio de Castro, que aínda conserva a memoria da súa propia historia e a dos que durante case sesenta anos foron os seus ocupantes ben merece unha reflexión e unha posta en común desde a óptica das diferentes sensibilidades artísticas. Por iso, desde a Rede Museística da Deputación de Lugo convocamos aos creadores que desexen intervir neste experimento fugaz antes de que o edificio se dedique a outros usos. O proxecto vaise desenvolver entre o sábado 10 de marzo e o sábado 14 de abril de 2012, de acordo co programa que se anexa en PDF.
NOTA IMPORTANTE: Todos/as os/as interesados/as en participar activamente neste proxecto deben inscribirse previamente no Museo Provincial de Lugo ou chamando ao teléfono: 982 242 300 /982 242112 (atenden: Raquel e Paula). Máis información: info@museolugo.org
Servizo de autocar gratuíto desde Lugo: Todas as persoas interesadas en facer uso deste servizo deben comunicalo á hora de realizar a inscrición. Saída desde Lugo (Museo Provincial): 11:15 horas / Hora regreso a Lugo: 18:00 horas.

Pontevedra: presentación-debate de Verbas no ar, de Iria Morgade

O venres 9 de marzo, ás 19:30 horas, na Libraría Paz (Rúa da Peregrina, 29) de Pontevedra, terá lugar unha presentación-debate sobre a novela Verbas no ar, de Iria Morgade, obra gañadora do VII Premio Biblos. Este encontro pretende crear un lugar de debate, de encontro de ideas e de reflexión. O encontro comezará cunha breve proxección documental, seguido dun pequeno diálogo coa novela.

Lugo: inauguración da exposición Colmeiro. Paisaxe que sabe a pan

O venres 9 de marzo, ás 20:00 horas, no Salón Rexio do Círculo das Artes de Lugo (Praza Maior, 23), e co apoio da Área de Cultura e Turismo da Deputación de Lugo e da Área de Cultura, Turismo e Promoción da Lingua do Concello de Lugo, inaugúrase a exposición Colmeiro. Paisaxe que sabe a pan, comisariada por Carlos López Bernárdez. A mostra, que estará aberta ao público entre os días 9 ao sábado 24 de marzo, en horario de 15:00 a 22:00 h. complétase coa publicación dun catálogo con textos de Aurelia Balseiro, Antonio Bonet Correa e Carlos L. Bernárdez.

Santiago: presentación de Sherezade. Novos relatos de pensamento creativo, de Carlos L. Medrano

O venres 9 de marzo, ás 20:00 horas, na Libraría Couceiro (Praza de Cervantes, 6) de Santiago de Compostela, preséntase Sherezade. Novos relatos de pensamento creativo, de Carlos L. Medrano, publicado en 3C3 Editores No acto intervirán, xunto ao autor, Pilar Ponte Patiño e Antonio Puentes Chao.

Chantada: presentación de O penalti de Fuco, de Afonso Eiré

O venres 9 de marzo, ás 20:30 horas, no Círculo Recreativo e Cultural (Casino) de Chantada, preséntase a novela O penalti de Fuco, de Afonso Eiré, publicado en Baía Edicións. No acto, xunto ao autor, participan Xosé Manuel Rodríguez Aguiar, Kiko Novoa e Patricia Gómez Uzal.

Lugo: conferencia de Teresa Moure na inauguración de A arte de ser muller nun mundo por compartir 4.0

O xoves 8 de marzo, Día Internacional da Muller, inaugúrase ás 20:00 h., na Sala de Exposicións do Pazo de San Marcos (sede da Deputación de Lugo) A arte de ser muller nun mundo por compartir 4.0, que baixo a organización da Vicepresidencia Primeira da Deputación de Lugo, e até o 8 de abril, desenvolverán un amplo programa de actividades artísticas multidisciplinares nos catro museos que conforman a Rede Museística Provincial de Lugo. Trinta e unha mulleres e un home, artistas, compartindo un obxectivo a prol da igualdade de xéneros: facer máis visíbel a muller dentro do mundo da arte. Dentro dos actos previos á inauguración, terá lugar, ás 19:00 horas, unha conferencia de Teresa Moure no Refectorio do Museo Provincial de Lugo, baixo o título Muller e literatura.