Queremos Galego comeza a recoller apoios para levar ao Parlamento a ILP Lingua Vital

Publicado o por

Desde Queremos Galego:
“A plataforma de defensa da lingua Queremos Galego puxo hoxe en marcha a recollida de sinaturas para levar ao Parlamento de Galiza a Iniciativa Lexislativa Popular Lingua Vital, unha proposta de lei deseñada por centos de entidades sociais que buscan garantir a presenza do galego en todos os espazos e para todos os usos. A iniciativa precisa xuntar 10.000 sinaturas para ser debatida na cámara galega. As persoas que queiran sumarse poden informarse dos puntos e as datas de recollida de sinaturas na páxina web linguavital.gal.
“O galego está en emerxencia, mais a situación pode reverterse”, asegurou o voceiro de Queremos Galego, Marcos Maceira, “co compromiso das organizacións sociais e dos poderes públicos, dándolle vida e futuro, con uso e presenza en todos os espazos”. Maceira recordou, no evento de presentación da campaña de recollida de sinaturas, que a ILP Lingua Vital parte do traballo que veñen desenvolvendo dende hai meses centos de organizacións e entidades sociais de todos os ámbitos para consensuar unha lexislación a favor do galego que ofreza garantías para que a lingua estea sempre presente, haxa oferta e se poida usar en calquera situación.
“Precisamos unha lei que asegure que quen xa fala galego poida facelo sempre”, explicou Maceira, “e que quen queira sumarse, nacese onde nacese, poida facelo sen obstáculos e sen límites”. “Unha lei para unha lingua con vida”, rematou, “unha Lingua Vital”.
Así, a proposta de lei abre as portas ao galego en todos os espazos e para todos os usos, e derroga ou modifica as leis e normas que o frean, incluído o decreto do plurilingüismo no ensino. Entre outros aspectos, a lei defende que o galego sexa lingua vehicular, de acollida e de integración no ensino; garante os dereitos lingüísticos, para poder vivir en galego e atopalo na saúde, na xustiza, na administración ou no comercio; asegura súa presenza na cultura, no audiovisual e nos medios de comunicación; e reclama o lugar do galego no mundo, en todos os territorios onde é lingua propia, coa oficialidade na UE e a integración na lusofonía.
Apoio nos concellos
A ILP xa comezou a debaterse en plenos municipais e foi aprobada en Pontevedra e en Brión cos votos dos grupos municipais do BNG e do PSOE, que asumiron a súa presentación nos plenos e aos que as entidades queren agradecer o apoio. Será debatida esta semana en Moaña e no Concello de Santiago, a través do BNG, Compostela Aberta e o grupo non adscrito.”

Décimo aniversario do Centro de Estudos Galegos da Universidade de Perugia

Publicado o por

Nado en 2016 grazas a un convenio entre a Xunta de Galicia e a Università degli Studi di Perugia, o Centro de Estudos Galegos (CEG) distinguiuse non só pola súa marcada vocación científica, plasmada na publicación de volumes e artigos, senón tamén polo seu compromiso coa docencia e a difusión da lingua, a literatura e a cultura galegas fóra do ámbito académico, a través de actos públicos e colaboracións institucionais.
Ao longo destes anos celebráronse proxeccións de películas, concertos, exposicións, espectáculos teatrais, presentacións de libros, recitais poéticos e conferencias de escritores e intelectuais.
Precisamente para celebrar o décimo aniversario da súa creación, o CEG organizou unha serie de iniciativas que terán lugar o xoves 29 e o venres 30 de outubro. A celebración comezará o xoves 29 de outubro ás 16.00 na Sala delle Adunanze do Departamento de Letras, cos saúdos institucionais de Valentín García Gómez, secretario xeral da Lingua da Xunta de Galicia, Ignacio Peyró, director do Instituto Cervantes de Roma, e Gianluca Grassigli, director do Departamento de Letras. Ás 16.30, Marco Paone e Carlo Pulsoni repasarán os dez anos do Centro no encontro «Memoria e percorrido». Ás 17.00 será a quenda da literatura, cun encontro co escritor Manuel Portas arredor da súa novela Lourenço, giullare, no que participará a tradutora Gloria Castelli.
A homenaxe continuará ás 21.00 na Abbazia di San Pietro, en Borgo XX Giugno 74, co concerto de Catuxa Salom, Mulleres Piratas, e a participación de Clara Borghesi. Unha viaxe polo folclore galego e as sonoridades electrónicas, enriquecida pola voz narrativa e interpretativa de Borghesi, nun diálogo entre música, poesía e teatro. A entrada ao concerto será libre ata completar o aforo.
O venres 30 de outubro, as actividades continuarán na Sala delle Adunanze. Ás 10.30, Carlo Pulsoni moderará a mesa redonda «Os estudos galegos en Italia», coa participación de Attilio Castellucci, Rachele Fassanelli, Simone Marcenaro e Marco Paone. Ás 12.00 tomarán a palabra as novas xeracións da investigación, con presentacións e experiencias de persoas tituladas que dedicaron os seus traballos de fin de estudos ao ámbito dos estudos galegos na Universidade de Perugia.”