A Coruña: conferencia do profesor Ángel González Fernández
Gañadores dos Premios AELG 2009
Na celebración da Cea das Letras, un dos actos máis importantes na vida da Asociación de Escritores en Lingua Galega, foron entregados os premios á mellor obra publicada no 2008 nas modalidades de ensaio, literatura infantil e xuvenil, poesía, narrativa, tradución, teatro, traxectoria xornalística e blog literario, así como á institución que salientara na defensa e difusión da nosa cultura.
Os galardóns, concedidos por escritores/as para escritores/as, levan camiño de se afianzar como uns dos de máis prestixio no noso panorama literario.
Da conxunción de votos emitidos nunha primeira quenda polos asociados/as á AELG -coa participación dos socios/as de Gálix para elixir a mellor obra de Literatura Infantil e Xuvenil e dos membros do Colexio de Xornalistas para a modalidade de Traxectoria xornalística-, elaborouse unha listaxe de obras finalistas correspondentes a cada xénero dos mencionados, sobre a que os socios e socias emitiron de novo o seu voto nunha segunda quenda para elixir as obras gañadoras dos Premios AELG. Unha vez computados os votos, os gañadores do Premio AELG ás mellores obras publicadas no 2008 son:
Ensaio: Miguel Anxo Murado, pola súa obra Fin de século en Palestina (Galaxia)
Literatura Infantil e Xuvenil: Xabier P. DoCampo, pola súa obra O libro das viaxes imaxinarias (Edicións Xerais de Galicia)
Poesía: Xulio L. Valcárcel, pola súa obra A melancolía dos corpos (Ediciones de la Sociedad de Cultura Valle-Inclán)
Narrativa: Inma López Silva, pola súa obra Memoria de cidades sen luz (Galaxia)
Tradución: Gonzalo Navaza, pola tradución da obra As flores do mal, de Charles Baudelaire (Galaxia)
Teatro: Teresa Moure, pola súa obra Unha primavera para Aldara (Deputación Provincial de A Coruña)
Mellor traxectoria xornalística: Ana Romaní
Blog Literario: Marcos Valcárcel, polo seu blog As uvas na solaina
Institucións: Sección de Literatura do Liceo de Ourense
Escritora Galega Universal: Elena Poniatowska
Discurso de Cesáreo Sánchez Iglesias: Vídeo
Lectura e entrega dos Premios AELG 2009: Vídeo
(Vídeos retransmitidos en streaming durante a Cea das Letras no portal Blogaliza)
Elena Poniatowska, Escritora Galega Universal
Elisabet Ríos Liste, Premio de Poesía Concello de Carral
Elisabet Ríos Liste, coa súa obra Nós escoitando o badalo de Marienplatz resultou gañadora do Concurso de Poesía Concello de Carral do presente ano. O xurado, formado polos poetas Luis González Tosar, Lucía Novás e Paulino Peña Álvarez, baixo a presidencia da Concelleira de Cultura, Mª José García Fariña, e asistidos en calidade de secretario polo técnico municipal de Cultura e coordinador do premio, Carlos Lorenzo Pérez, escolleu o libro de Elisabet Ríos entre as 42 obras presentadas ao certame, salientando a súa calidade, frescura e innovación.
O premio de Carral está dotado con 2000 euros e a publicación da obra na colección de poesía de Edicións Espiral Maior. O acto de entrega do premio terá lugar o 29 de maio, na Biblioteca de Carral.
Mañá entréganse os Premios AELG 2009
Achégase a data de celebración dun dos actos máis importantes na vida da Asociación de Escritores en Lingua Galega: os Premios AELG, uns galardóns que, concedidos por escritores/as para escritores/as, levan camiño de se afianzar como uns dos de máis prestixio no noso panorama literario. No transcurso da Cea das Letras, que se celebrará mañá sábado 9 de maio no Hotel Porta do Camiño de Santiago de Compostela, recoñecerase a mellor obra publicada no 2008 en cadanseu xénero: Ensaio, Literatura Infantil e Xuvenil (en colaboración con Gálix), Poesía, Narrativa, Tradución (en colaboración coa Asociación Galega de Tradutores), Teatro e Traxectoria Xornalística (que premiará o/a autor/a coa mellor traxectoria xornalística do 2008, e para cuxa elección se contará cos votos dos/as membros do Colexio de Xornalistas). Na edición deste ano incorporase o premio ao Mellor Blog Literario. Igualmente premiarase á Institución que, segundo os escritores e escritoras galegos, fixera unha labor destacada en prol da nosa cultura, premio que nesta ocasión lle corresponde á Sección de Literatura do Liceo de Ourense, personificada na figura de Marcos Valcárcel.
Á cea asistirá a escritora e xornalista Elena Poniatowska, galardonada coa distinción Escritora Galega Universal.
OQO recibe o segundo Premio ao Libro Mellor Editado en 2008
Caderno de animalista, álbum da editorial galega OQO acaba de ser distinguido co segundo Premio ao Libro Mellor Editado en 2008, na categoría de Infantil e Xuvenil, que concede o Ministerio de Cultura. Caderno de animalista é a segunda entrega da colección OQart, coa que OQO Editora pretende cos nenos e nenas, e tamén os adultos, se acheguen á historia da arte dunha forma orixinal e creativa, espertando o gusto pola pintura dunha maneira lúdica e atrevida. Esta colección inaugurouse co Gran libro dos retratos de animais de Svjetlan Junakovic. Precisamente, este álbum acadou o recoñecemento do Primeiro Premio Libro Infantil e Xuvenil Mellor Editado 2007. Asemade, en 2006, outro libro de OQO Editora, Celestino Tarambainas, tamén foi distinguido co terceiro galardón nesta categoría.
A AELG promove “Encontros literarios”
A Asociación de Escritores en Lingua Galega (Aelg) promove a celebración duns encontros literarios, impartidos por escritoras socias desta entidade e dirixidos fundamentalmente a mulleres. Coa celebración destes encontros, patrocinados polo Servizo Galego de Igualdade da Xunta de Galicia, a Aelg propón un novo achegamento á educación literaria, que pon o acento na adquisición de hábitos lectores, na utilización de novos criterios para a selección de obras de lectura e no goce do texto, como antesala dun achegamento máis complexo e reflexivo ao eido literario.
Os centros onde se celebrarán os encontros, e as escritoras participantes son:
8 de maio, de 18,00 a 20,00 horas no Salón de Actos da Casa da Cultura de Xinzo de Limia, con María Canosa
29 de maio, de 16,30 a 18,30 horas no Centro Sociocultural de Samos, con Marica Campo.
18 de xuño, de 17,30 a 1930 horas na Biblioteca de Oza dos Ríos, con Emma Couceiro.
Os compositores galegos poñen música aos poetas galegos
A Concellaría de Mocidade, Solidaridade e Normalización Lingüística da Coruña e a Asociación Galega de Compositores coa colaboración do Conservatorio Profesional de Música da Coruña organizan o ciclo Música de Compositores Galegos sobre Poemas Galegos. O primeiro concerto terá lugar o domingo 10 de Maio de 2009 de 20 a 22 horas no Auditorio do Conservatorio Profesional de Música (Praza do Conservatorio, A Coruña), e contará coa participación de Alba López, soprano; María José Ladra, mezzosoprano; Ramón Carnota, guitarra, e Javier Vázquez Grela, piano. O repertorio será o seguinte:
1.ª PARTE
Miña nai,miña velliña. Texto: Manoel Cambeiro. Música: Carlos Cambeiro Alís
Pontedeume,un cantar que chove. Texto: Ramiro Fonte. Música: Miguel Brotóns
Irmaus (*). Texto: Celso Emilio Ferreiro. Música: Xoán Antón Vázquez Casas
Cantarei (*). Texto e música: Xoán Antón Vázquez Casas
Cantiga (*). Texto: Macías “o Namorado”. Música: Julio Montero
Tres cantigas sabias para dúas voces e guitarra (*): Esta é como Santa María avêo as dúas combooças que se querían mal; Como El Rey Don Affonso de Castela adoeçeu en Bitoria e poseronlle o Livro de Santa María e sanou; O pergureir’astrosso, a vella pobre e a súa ovella falante. Texto: Afonso X “O Sabio”. Música: Juan Pérez Berná sobre textos e melodías das CSM 68, 209 e 147
2ª PARTE
O beixo, Op. 81, nº 2 (*). Texto: Miguel Anxo Fernán Vello. Música: Paulino Pereiro
Corazón bolboreta. Texto: Ramón Cabanillas. Música: Juan Durán
Un repoludo gaiteiro. Texto: Rosalía de Castro. Música: Juan Durán
Cantiga n.º 2 de Cantiga Finisterrae. Texto: Miguel Anxo Fernán Vello. Música: Juan Durán
Os soños na gaiola (*). Texto: Manuel María. Música: Margarita Viso
As pezas sinaladas con (*) son estreas absolutas. A entrada é de balde até completar capacidade.
Vigo: Rafael Laso Lorenzo presenta O trasmundo de Antioquía
O próximo mércores 13 de maio ás 19:30 terá lugar na Casa del Libro de Vigo o acto de presentación do libro O trasmundo de Antioquía, do escritor Rafael Laso Lorenzo. A obra está editada por Edicións do Cumio. O acto é de entrada libre.
A Coruña: conferencia de Xosé Luís Franco Grande
O vindeiro dia 13 de Maio, mércores, o avogado e académico da R.A.G. Xosé Luís Franco Grande falará da figura homenaxeada neste ano no Día das Letars Galegas. A sua palestra titúlase Ramón Piñeiro e a política galega anterior á transición. Será a partir das oito do serán no local da Fundación Caixa Galicia da Coruña, no Cantón Grande.
