::Axenda cultural AELG::

“A mañá do 22 de decembro de 2025, o xurado fallou o premio do XXIV Certame Literario Relato de Aventuras Antón Avilés de Taramancos na salón de actos da Casa da Cultura.

O xurado constituído por: Chelo Martínez Pérez, concelleira de cultura; Oliva Fraga Lombardía, secretaria do xurado; Mariña Pérez Rei, escritora e profesora; Mª Dolores Arxóns Álvarez, profesora e escritora; Xavier Castro Rodríguez, profesor e escritor, e Antonio Piñeiro Fernández, profesor e escritor, reuníanse, despois das deliberacións, no salón de actos da Casa da Cultura para proceder á lectura da acta:

Por unanimidade, o xurado decidiu declarar DESERTA a convocatoria do XXIV Certame.

O xurado estimou:
1.- A súa satisfacción polo número de participantes en aumento desta volta, na que se achegou a 16 orixinais.
2.- Declarar o premio deserto, dado que os orixinais non acadaron os mínimos de calidade literaria que se esixe neste Certame.
3.- Mencionar o feito de que algunha das obras sería susceptible de melloras lingüísticas e literarias que sustentasen o interese do seu argumento.”

Desde Galaxia:
“Na Pobra do Caramiñal, a 19 de decembro de 2025, reunido o xurado do VIII Premio de Literatura Infantil Carlos Mosteiro, dirixido a rapaces e rapazas de entre 8 e 12 anos, conformado por Encarna Pego, vicepresidenta da Asociación Cultural Barbantia, Óscar Reboiras, gañador da anterior edición, e Marcos Calveiro, en representación da Editorial Galaxia, acordouse conceder por unanimidade o premio á obra presentada baixo o título Nenapinguín.
Unha vez aberta a plica, a obra resultou ser da autoría de Daniel Landesa (Vigo, 1976), narrador infantil e xuvenil e poeta, con ampla traxectoria literaria.
O xurado destaca da obra gañadora a súa calidade literaria e unha trama protagonizada por nenos que padecen diversas enfermidades, tratada cun enfoque que fuxe do sentimentalismo e do melodrama, incorporando notas de humor e diversión, malia a situación que viven os protagonistas. Trátase dunha obra apta para un abanico moi amplo do público infantil, que interpela directamente á intelixencia e á sensibilidade do lectorado.
Daniel Landesa é escritor galego, licenciado en Filoloxía Galega pola Universidade de Vigo, con traxectoria consolidada na poesía, a narrativa e a literatura infantil e xuvenil. (…)”