Hoxe luns 30 de Novembro ás 20.00 na Galería Sargadelos de Ferrol preséntase o libro Historia social da guerra da independencia en Galicia, de Xosé R. Barreiro Fernández. Acompañará ao autor o director de Xerais, Manuel Bragado.
Arquivos da etiqueta: Ferrol
Ferrol: charla-coloquio sobre Ramón Piñeiro
A Galería Sargadelos Ferrol organiza un acto conmemorativo do día das Letras Galegas hoxe mércores 13 de maio ás 20.00h, que contará coa participación de dous profesores e escritores de Ferrol, Henrique Dacosta e Bernardo Maiz, que levarán a cabo unha serie de reflexións sobre a figura de Ramón Piñeiro. A charla-coloquio será de entrada libre.
Ferrol: presentación do novo número dos Cadernos Ateneo Ferrolán
O próximo venres 8 de maio presentarase no Ateneo Ferrolán o número 19 da colección Cadernos Ateneo Ferrolán, A construción naval na Ría de Ferrol. O acto é de entrada libre e comezará ás 20 h.
Ferrol: presentación dun libro de Fusa Guillén
Mañá martes 5 de maio na Galería Sargadelos de Ferrol presentarase o libro O segredo do faiado, da escritora Fusa Guillén e editado por Embora. O acto comezará ás 19:30 e a entrada é libre.
Ferrol: conferencia de Fermín Bouza
O sábado 4 de abril as 20 horas no Ateneo Ferrolán Fermín Bouza pronunciará unha conferencia titulada “As eleccións galegas de 2009: unha análise sociolóxica do seu significado político”. Presenta o acto Xosé Leira. Fermín Bouza (Santiago de Compostela, 1946), Catedrático de Socioloxía (Opinión Pública) na Facultade de Ciencias da Información da Universidade Complutense de Madrid. Traballa sobre Opinión Pública, Comunicación Política e Socioloxía Electoral. Tamén escribe textos literarios, particularmente en galego (o seu libro de poemas Labirinto de Inverno foi Premio da Crítica Española). Mantén o blog Voto con Botas.
Ferrol: exposición de Vítor Mejuto
Hoxe inaugúrase na Galería Sargadelos de Ferrol unha exposición de pinturas de Vítor Mejuto. O acto comeza ás 20 horas e estará presentado por Ramón Loureiro.
Ferrol: conferencia de Alfredo Martín e Eduardo Pardo de Guevara
Este xoves, 12 de marzo, preséntase en Ferrol o libro Auge y decadencia. Desarrollo económico, cultural y educación en Ferrolterra durante el Antiguo Régimen de Alfredo Martín García, que impartirá para a ocasión unha conferencia acompañado por Eduardo Pardo de Guevara, director do Instituto de Estudios Galegos Padre Sarmiento. Será no Ateneo Ferrolán a partir das 20 horas.
Ferrol: recital e obradoiro con Eduardo Estévez
Mañá venres 27 de febreiro ás 17:30 na Galería Sargadelos de Ferrol haberá unha sesión aberta do obradoiro literario de Fene para celebrar a aparición en papel do libro Os veos da paisaxe de Eduardo Estévez preparada por Antonio Piñeiro en Edicións Bourel. Esta edición consta de 80 exemplares cosidos e pegados a man acompañados por cinco fotografías orixinais da serie Os veos da paisaxe, algunhas das cales están expostas este mes na propia Galería Sargadelos xunto co traballo de Igor Lugrís, Poesía para ver, poesía para ler. Na sesión de hoxe o editor Antonio Piñeiro falará sobre o que significa unha editora de libros artesáns e contará como é que se fai un obxectos coma este. A seguir, Eduardo Estévez fará un pequeno recital con textos do libro e despois as persoas presentes que queiran poderán participar dun exercicio de escrita a partir das imaxes da exposición.
Ferrol: presentación do novo libro de Xaquín Marín
A Galería Sargadelos de Ferrol será mañá o escenario da presentación do libro O lecer de Isolino de Xaquín Marín, que foi lanzado pola editorial Embora. Na presentación intervirá o autor acompañado por Xesús Ferro Ruibal. O acto comezará a partir das oito do serán e a entrada é libre.
Ferrol: presentación de libro na Galería Sargadelos
Este venres 13 de febreiro presentarase na Galería Sargadelos de Ferrol o libro Para que serve a historia de Galicia escrito polo Profesor de Historia Antigua da USC José Carlos Bermejo Barrera. O acto comezará ás 20 horas e a entrada é libre.
