Desde Nós Diario:
“O xurado da oitava edición do Premio Xosé Neira Vilas de Novela Curta vén de outorgar o galardón, após as deliberacións da tarde da segunda feira 30 de outubro, que concluíron cunha decisión unánime, á obra Nove Lúas, de Lionel Rexes Martínez. A sesión decorreu no Pazo de San Roque e o xurado estivo conformado por dous membros da Fundación Xosé Neira Vilas, Juan Andrés Fernández e Rosalía Morlán, e polo crítico literario e profesor universitario Armando Requeixo.
A obra salienta, precisaron desde o xurado, pola súa estrutura narrativa armada arredor das relacións dos personaxes e de como deben afrontar as opcións vitais e laborais en contextos de gran dificultade. “Sobre o pano de fondo da guerra civil, destaca a vontade de estilo que impregna todo o relato”, argumentan.
O galardón entregarase esta próxima sexta feira, 3 de novembro, nun acto público na Casa do Romano, sede da Fundación Xosé Neira Vilas en Gres (Vila de Cruces, Deza), coincidindo coa conmemoración do Día da Lectura e, con este motivo, farase unha lectura pública da poesía de Neira Vilas e a súa compañeira, Anisia Miranda.
O premio está dotado con 1.000 euros e a publicación do traballo seleccionado en Edicións Embora. O obxectivo do certame, dirixido ao público infantil e xuvenil, é estimar a creación literaria, fomentar a lectura en lingua galega e proporcionar obras de calidade ao público máis novo que lle permitan achegarse ao mundo da novela.”
Arquivos da etiqueta: Lionel Rexes
Vilamor, Mondoñedo: presentación de Patria de Maeloc, de Luciano Ares Díaz
Foz: actividades do 17 de agosto na Feira do Libro 2023
O Valadouro: “O noso teatro”, encontro teatral organizado por Manuel Lourenzo e Xesús Pisón
A actividade do 11 de agosto en Ferreira do Valadouro quedou adiada até novo aviso.
Lionel Rexes gaña o Premio de Teatro Infantil da Agrupación Cultural O Facho
Desde Crónica 3:
“Coa obra Están chovendo flores, o escritor alfocés resultou gañador do certame de textos teatrais convocado polo colectivo coruñés.
É a primeira vez que este narrador, autor das novelas A raíña das velutinas (Xerais, 2017) e A montaña do poeta (Xerais, 2022), escolle a escrita teatral para a creación literaria, e iníciase no xénero cunha comedia con intriga dividida en tres actos, pensada para un público do ámbito da Educación Primaria.
O xurado valorou desta obra, especialmente, a adecuación ao público ao que vai dirixida, a calidade da lingua empregada, o tratamento dos espazos e o xogo humorístico.
A Agrupación Cultural O Facho é unha entidade con seis décadas de historia, especialmente vinculada ao fomento do teatro galego, que mantén ao mesmo tempo unha intensa actividade en defensa da lingua e a cultura; ao longo da súa traxectoria chegou a contar co seu propio grupo de teatro.
O acto de entrega do premio terá lugar na Coruña o próximo día 26.”
Lionel Rexes gaña o premio de novela Lueiro Rey con A montaña do poeta
Desde La Voz de Galicia:
“Era a segunda vez que se presentaba ao Premio de novela curta en galego Manuel Lueiro Rey, e volveuno a gañar. En 2016 fíxoo con A raíña das velutinas; agora, no 2021, coa obra A montaña do poeta. Unha hora despois de coñecer a feliz noticia, Lionel Rexes explicaba a este diario que se trata dunha historia inspirada en feitos do pasado cunha trama que transcorre na actualidade. O punto de partida é unha casa abandonada de Alfoz que daquela frecuentaba o poeta Noriega Varela e na que, casualidades da vida, Rexes foi atopar un ciclomotor que lle roubaran hai uns anos. O relato pronto cobrará forma de libro grazas a este premio literario. A edición da novela é parte do premio. A outra son tres mil euros que o Concello do Grove entregaralle ao gañador nun acto que se desenvolverá no consistorio, se a pandemia o permite.
O fallo do Lueiro Rei fíxose público esta tarde, logo de reunirse o xurado formado por Armando Requeixo Cuba, Ánxela Rodríguez Rodríguez, Carmen Ferreira Boo, Manuel Antonio Piñeiro Fernández e Héctor Cajaraville Araújo.”
A Laxe (Valadouro): Ponte Literaria 2018, o 24 de agosto
O
24 de agosto, a partir das 18:30 h., no local social da parroquia da Laxe (sito na recta de Tanín), no Valadouro, terá lugar unha nova edición da experiencia participativa Ponte Literaria, que artellan, desde o verán de 2015, un grupo de persoas vinculadas á literatura.
Tratouse, no inicio, dunhas lecturas a carón das diferentes pontes do Valadouro, mais na actualidade, considerouse que un encontro baixo teito pode favorecer a presenza dun maior número de participantes e ao mesmo tempo, resultar máis cómodo para o público.
Para participar, só é preciso estar no lugar indicado á hora sinalada, mais a organización gustaría de coñecer o número de intervencións con antelación.
Para anotarse ou resolver calquera dúbida, poden contactar a través do teléfono 600378363 (tamén Whatsapp).
Participarán, entre outras/os, Manuel Lourenzo, Isaac Ferreira, Xesús Pisón, Lionel Rexes, Iolanda Aldrei, Adela Figueroa, Manuel Regal…
Leranse textos de Rita Geada, autora cubana con raíces no Valadouro.
Por cumprirse neste ano o 70 aniversario da morte de Luís Trigo Chao “O Gardarríos”, Isaac Ferreira, escritor valadourense vinculado ao teatro, lerá unha peza dramática intitulada O cerco de Vilanova, baseada na noite en que o guerrilleiro caeu asasinado na capital de Lourenzá.
O autor Lionel Rexes lerá varios fragmentos da súa novela A raíña das velutinas, escollendo para a ocasión aqueles que fan referencia a persoeiros e lugares do Valadouro.
– Condicións xerais:
Lecturas de 15 minutos como máximo.
Cada lectura non deberá exceder os 15 minutos e os textos deberán ser de autoría propia.
Tras o tempo adicado ás lecturas, terá lugar un debate literario centrado nas obras expostas.
– Doazón espontánea:
É costume que os asistentes aproveiten a ocasión para se desfaceren de todos aqueles libros que xa non desexan conservar, deste xeito, outras persoas que participen na Ponte Literaria poderán conseguir exemplares que descoñecían e que nunca leran. Trátase, en definitiva, dun intercambio ou doazón espontánea de libros.
– Público implicado:
Se non desexas participar activamente, podes asistir como público; nese caso tamén poderás expor as túas sensacións no coloquio, e por suposto favorecerte da doazón de libros.
Artellan a Ponte Literaria: Manuel Lourenzo, Isaac Ferreira, Xesús Pisón e Lionel Rexes.
Agradecementos para:
Comunidade de Montes da Laxe
Concellaría de Cultura do Valadouro
Diego Alfonsín, Premio Lueiro Rey de Novela Curta con Non o saben as estrelas
Desde
Xerais:
“O escritor Diego Alfonsín Rivero (Tui, 1980) resultou vencedor este luns do Premio Lueiro Rey de Novela Curta que concede o Concello do Grove coa novela Non o saben as estrelas, unha obra que, a xuízo do xurado, destaca pola súa «orixinalidade do seu traballo, polo seu carácter innovador e a súa capacidade para envolver o lector na historia que narra, así como pola redacción e a súa trama». O galardón, dotado con tres mil euros, recoñece a primeira obra literaria en galego de Diego Alfonsín, profesor de Lingua e Literatura española no IES Guadarrama, en Madrid, que xa recibira o Premio de Novela Miguel de Unamuno 2015 pola súa obra Lenta demolición. O xurado do Premio Lueiro Rey de Novela estaba conformado por Manuel Quintáns Suárez como presidente, Ánxela Gracián, Mario Regueira, Lionel Rexes, Manuel Bragado e Armando Requeixo.
A novela gañadora, Non o saben as estrelas, de Diego Alfonsín, será publicada por Xerais na colección Narrativa en 2018.”
O Valadouro: presentación de A raíña das velutinas, de Lionel Rexes
Ponte Nova de Vilaúde (Mor-Alfoz): Ponte Literaria 2017
O xoves 20 de xullo, a partir das 18:00 horas, no espazo de lecer da Ponte Nova de Vilaúde (Mor-Alfoz), nas inmediacións do Restaurante O Frenazo, terá lugar unha nova edición da Ponte Literaria, que chega ás terras do río Douro, desta volta mudando de localización. Desde o verán de 2015 (ano de nacemento desta experiencia literaria), os encontros viñan celebrándose na Ponte Vella de Frexulfe, mais desta volta, a cita terá lugar na Ponte Nova de Vilaúde, a escasos metros do Restaurante O Frenazo.
Neste espazo de lecer situado ás beiras do Douro, varios escritores lerán publicamente as súas creacións, baixo a atención doutros narradores, poetas, dramaturgos e articulistas, quen achegarán as súas apreciacións e opinións no coloquio programado ao remate das lecturas.
Participación activa
Quen desexe participar activamente, deberá levar un texto da súa autoría; é indiferente o xénero. O tempo máximo para cada lectura será de 15 minutos.
Aínda que non é indispensábel, a organización agradece que os participantes se anoten previamente no 600378363 (tamén Whatsapp)
Doazón espontánea
Como en cada edición, a organización desexa que os asistentes aproveiten a ocasión para se desfacer de todos aqueles libros que lles sobren na casa; para, deste xeito, continuar a pór en práctica as doazóns espontáneas iniciadas o pasado verán. Trátase de facer circular os exemplares que xa non desexamos gardar, para que outros participantes gocen deles.
Organizadores
Como cada verán, os organizadores da Ponte Literaria son: Manuel Lourenzo, Isaac Ferreira, Xesús Pisón e Lionel Rexes.
Comisión Organizadora da PONTE LITERARIA
*A Ponte Literaria é un colectivo formado hai dous anos por persoas vinculadas á literatura ou ao activismo cultural; desenvolve as súas lecturas e coloquios sempre a carón de pontes, e naceu para compartir e difundir o valor cultural da literatura.
