Entrevista 
a Marica Campo en Galicia Hoxe:
“Marica explica que o libro “incide na miña teima de contar historias de mulleres e, tamén, en certa maneira, recolle as problemáticas das mulleres inmigrantes. As dificultades para escoller. Os problemas collen novas formas, pero seguen a existir. A xornalista, en cambio, que en principio ten máis marxe de elección, segue cun home ó que xa non quere, por costume”… Ante o actual panorama da lingua e da cultura, con dificultades para a edición, medios en galego que pechan, e ataques ó idioma, di que “os detractores do galego din que somos uns estómagos agradecidos. En realidade, escribir en galego non é rendible. Os que escribimos en galego facémolo porque acreditamos no país e na lingua, e como dicía Nonoveyra a forza do noso amor non pode ser inútil. Eu son optimista”, di.”
Arquivos da etiqueta: Marica Campo
A Coruña: recital poético-musical na exposición “Cada paso conta”
O martes 22 de xuño,
ás 20:00 horas, na Casa Casares Quiroga (Panadeiras, 12) da Coruña, haberá un recital poético-musical, organizado por Acción contra el Hambre Galicia. Nel participan Marica Campo, Francisco Fernández Naval, Olga Patiño e Emma Pedreira, e os compoñentes do grupo folk Citania: Teresa Méndez (violín) e Brais Morán (guitarra). Este acto está enmarcado na exposición CADA PASO CONTA: pintura, fotografía, escultura, poesía, ilustración, artesanía, na que máis de 70 artistas doan as súas obras para loitar contra a desnutrición infantil. A entrada será libre até completar capacidade.
Marica Campo gaña o VI Premio a artigos xornalísticos normalizadores Concello de Carballo
O VI Premio a artigos xornalísticos normalizadores Concello de Carballo 2010, dotado con 1.200 euros e a publicación nos once medios de comunicación colaboradores, foi para o artigo «A procura do tesouro», da escritora lucense Marica Campo. O xurado tamén lle concedeu un accésit ao artigo «Por unha Galiza neofalante», de Marcos Abalde Covelo.
Ao certame presentáronse 39 traballos que, segundo o xurado, no seu conxunto «supoñen unha extraordinaria radiografía da visión sociolingüística do noso país».
Servizo de Normalización Lingüística
Concello de Carballo
Sarria: Francisco X. Fernández Naval recollerá o X Premio de Poesía Fiz Vergara Vilariño
«Este sábado 22 de maio ás 19:30 horas no hotel NH Alfonso IX de Sárria. Participarán os gañadores das 10 edicións do premio: Marica Campo, Xesús Pereiras, Estevo Creus, Martín Veiga, Miguel Mato, Emma Pedreira, Neira Cruz, Olalla Cociña, Baldo Ramos e Francisco X. Fernández Naval.
Acompañados polo dúo de violonchelo e violín formado por Rosalía Vázquez e Iván Novo.
Intervirán na entrega do premio:
-Os membros do xurado Olalla Cociña e Cesáreo Sánchez Iglesias (Presidente da AELG)
-O artista plástico Jorge Varela
-O concelleiro de cultura de Sárria, Xermán Arias, o vicepresidente da Deputación Provincial de Lugo, Antón Bao e a presidenta de Ergueitos, María Casar.
Pecharemos o acto co espectáculo de María Lado e Lucía Aldao “moita poesía, pouca diversión”»
Marica Campo e Elena Medel no ciclo “Poetas di(n)versos”
Este martes 18, ás 20:30, na Casa da Cultura Salvador de Madariaga. Coordina e presenta o evento Yolanda Castaño.
Marica Campo naceu en 1948 no Val do Mao (Incio – Lugo) e foi profesora de galego no ensino secundario ata a súa xubilación voluntaria en 2008. Autora de poesía, narrativa, teatro e literatura infanto-xuvenil, é tamén colaboradora habitual nos xornais A Nosa Terra e El Progreso. Como narradora estreouse con Confusión e morte de María Balteira (1996) e, con Memoria para Xoana (2002), acadou o Premio de Narrativa do Concello de Vilalba e o da Asociación de Escritores en Lingua Galega 2003. Cara ao público infantil, ten igualmente cultivado tanto a prosa coma o verso, e por esta última faceta foi merecedora do Premio “Fundación Neira Vilas” e mais do da AELG de Literatura Infantil. Como poeta, ademáis de textos soltos en multitude de publicacións periódicas e volumes colectivos, é autora dos poemarios Tras as portas do rostro (1992), Pedinche luz prestada (2001) ou Sextinario: trinta e seis mais tres (2007), que lle valeron galardóns coma o “Fiz Vergara Vilariño” ou o da AELG no apartado de Poesía. É autora de numerosas letras para grupos musicais galegos (Fuxan os ventos, A Quenlla, Uxía, etc), e incansable colaboradora dunha morea de iniciativas educativas e socioculturais a prol da lingua e literatura galegas.
Elena Medel naceu en Córdoba no ano 1985, aínda que vive dende 2006 en Madrid, onde traballa como editora en El Olivo Azul. Deuse a coñecer gañando, aos dezaseis anos, o “Premio Andalucía Joven” co sorprendente Mi primer bikini (2002) -un poemario escrito con quince anos e publicado aos dezasete- que esgotou a súa primeira edición en só tres meses e que hoxe vai xa pola terceira. Pouco despois editou Vacaciones (2004), e posteriormente Tara (2006), o seu último libro de poemas ata o de agora, que acadou xa unha segunda edición e que a confirmou de revelación a aposta segura da literatura española moza. É autora tamén dos cadernos poéticos Un soplo en el corazón (2007) e En los demás (2008), así como de relatos incluídos en antoloxías coma Cuentos eróticos de San Valentín (2007) ou Matar en Barcelona (2009). A súa obra ten sido parcialmente traducida ao alemán, árabe, esloveno, inglés, italiano, polaco e portugués, así como incluída en numerosas antoloxías. O seu interese pola poesía galega levouna a publicar traducidos ao castelán -en publicacións periódicas e antoloxías- poemas de diversos autores contemporáneos. Ten participado en festivais poéticos de Europa, América, Oriente Medio ou o Norte de África. Xunta a tamén escritora Alejandra Vanessa coordina o proxecto de axitación cultural La Bella Varsovia.
(A Coruña Cultura)
A Coruña: recital de “Poesía e Ciencia na Mostra de Ciencia e Cinema
Dentro da Mostra de Ciencia e Cinema hoxe mércores ás 20:30 terá lugar no Teatro Rosalía de Castro un recital poético co título POESÍA + CIENCIA no que participarán Marica Campo, Emma Couceiro, Estibaliz Espinosa, Alfredo Ferreiro, Manuel Rivas e Xavier Seoane. O acto estará presentado por Lucía Aldao e contará coa actuación musical de Guadi Galego, Guillermo Fernández e Xabier Díaz. A entrada é de balde.
A Coruña: poesía, ciencia e música unidas na Mostra de Ciencia e Cinema
Dentro do variado programa de actividades da II Mostra de Ciencia e Cinema, o vindeiro mércores 28 de outubro o Teatro Rosalía de Castro da Coruña será o escenario do recital Poesía + Ciencia, no que participarán Marica Campo, Emma Couceiro, Estibaliz Espinosa, Alfredo Ferreiro, Manuel Rivas e Xavier Seoane. Os autores e autoras citados lerán obras propias e alleas que se achegan a temas, procedementos e personaxes propios da cultura científica. Lucía Aldao conducirá un acto que contará ademais coa actuación musical de Guadi Galego, Guillermo Fernández e Xabier Díaz. Será a partir das 20:30, con entrada libre até completar a capacidade do recinto.
Máis información: o evento en Facebook
Viveiro: presentación de No cubil da Lúa
Baía Edicións presenta en Viveiro No cubil da Lúa, do mestre e poeta mariñán Xoán Neira. Será o sábado día 15 de agosto , ás 21:00 horas, na Feira do Libro de Viveiro (Xardíns Noriega Varela) e no acto participarán ademais do autor, a poeta, narradora, ensaísta e dramaturga Marica Campo acompañados dunha representación de nenas e nenos da vila, que recitarán poemas do libro, ilustrado polo galego-cubano Juan Darién.
En No cubil da Lúa conflúen poesía, plástica e animais coñecidos do noso medio, xuntos en 14 poemas que achegan a nenos e nenas outros tantos animais que viven en liberdade e dormen baixo o amparo da Lúa, descritos con fermosas e evocadoras figuras que perfilan poéticamente os seus lazos singulares.
A AELG promove “Encontros literarios”
A Asociación de Escritores en Lingua Galega (Aelg) promove a celebración duns encontros literarios, impartidos por escritoras socias desta entidade e dirixidos fundamentalmente a mulleres. Coa celebración destes encontros, patrocinados polo Servizo Galego de Igualdade da Xunta de Galicia, a Aelg propón un novo achegamento á educación literaria, que pon o acento na adquisición de hábitos lectores, na utilización de novos criterios para a selección de obras de lectura e no goce do texto, como antesala dun achegamento máis complexo e reflexivo ao eido literario.
Os centros onde se celebrarán os encontros, e as escritoras participantes son:
8 de maio, de 18,00 a 20,00 horas no Salón de Actos da Casa da Cultura de Xinzo de Limia, con María Canosa
29 de maio, de 16,30 a 18,30 horas no Centro Sociocultural de Samos, con Marica Campo.
18 de xuño, de 17,30 a 1930 horas na Biblioteca de Oza dos Ríos, con Emma Couceiro.
Sarria: Presentación do libro gañador do VIII Fiz Vergara Vilariño
Hoxe venres 12 de decembro ás 19:00 horas na Casa da Cultura de Sarria preséntase a obra gañadora da última edición do Premio de Poesía Fiz Vergara Vilariño, “Libro de Alicia” de Olalla Cociña. A autora estará presente no acto, no que tamén participarán a gañadora da primeira edición do premio, Marica Campo; o director da editorial Espiral Maior, Miguel Anxo Fernán Vello, a presidenta da Asociación Cultural Ergueitos, María Casar, e o Concelleiro de Cultura de Sarria, Xermán Arias. Haberá ademais unha actuación musical do dúo composto por Sylvie de Luca (piano) e Maria Ruíz (frauta).
