Desde Fervenzas Literarias:
“O escritor Carlos Casares terá un roteiro na cidade de Ourense para contribuír ao coñecemento e ao diálogo co autor e a súa obra. Estará composto por 20 placas de cerámica que fan un percorrido pola vida e a obra do escritor ao que se lle dedica este ano o Día das Letras Galegas.
Concibido polo profesor Afonso Vázquez-Monxardín e apoiado pola Fundación Carlos Casares, polo Concello de Ourense e pola Consellería de Cultura e Educación, este roteiro literario constitúe unha oportunidade para atoparse con Casares, para dialogar cos principais fitos da súa vida e mais da súa escrita, no marco do municipio que o viu nacer no verán de 1941. As 20 placas do roteiro Carlos Casares complementaranse cun total de 2.500 folletos explicativos da vida e da obra do escritor, unha das figuras clave da literatura galega do século XX.
Cada unha das placas -18 no núcleo urbano e outras en Castro de Beiro e no Seminario, facendo alusión a etapas da súa vida- está ineludiblemente vencellada aos fitos culturais da cidade e aos seus persoeiros: aparecen Risco, a xeración dos “artistiñas”, Blanco Amor ou as tertulias do Liceo “un lugar que consideraba a súa segunda casa”, en palabras de Alfonso V. Monxardín, autor do roteiro. O primeiro percorrido deste roteiro será o vindeiro 18 de febreiro coa presenza dun cento de profesores.
Porén, o roteiro servirá para potenciar o destino Ourense como cidade literaria en conexión con outras realidades (termal, patrimonial, gastronómica…), un reclamo turístico máis nunha cidade que xa conta con outro roteiro literario, o de A Esmorga de Eduardo Blanco Amor.”