Arquivo da categoría: Entrevistas

Fran Alonso: “É unha impotencia”

Publicado o por

Entrevista a Fran Alonso en Galicia Hoxe:
“Galicia Hoxe (GH): Ten algún proxecto para a próxima temporada?
Fran Alonso (FA): Teño un libro de narrativa que acabo de entregar, e outro rematado dende hai un ano e pico que supoño que sairá en 2011. Como son lento escribindo, teño pouco tempo, estou nun momento no que me coinciden cousas nas que estiven traballando estes anos. De feito teño un poemario que supoño que sairá no outono. (…)
GH: A literatura para un escritor é á vez unha profesión e un hobby?
FA: Depende do concepto que teña cada un. Para min é unha profesión, e creo que os escritores deberían te-la opción de profesionalizarse sempre que quixesen. Teño a sensación de que pasan os anos e non escribo todo o que me gustaría. Hai moitos proxectos literarios que me quedan sen escribir por falta de tempo, é unha especie de impotencia que ás veces vivimos os escritores por non nos poder profesionalizar dende o punto de vista económico, porque si o estamos na medida en que temos unha obra coa que somos ou intentamos ser esixentes, temos uns requirimentos que nos fan levar un ritmo de vida dun escritor profesionalizado, e iso haino que compatibilizar cunha xornada laboral.

María Xosé Queizán: “A axilización das ideas”

Publicado o por

Entrevista a María Xosé Queizán en Galicia Hoxe:
“Galicia Hoxe (GH): Ten algún proxecto literario?
María Xosé Queizán (MXQ): Estou repasando un ensaio que vai saír en outuno, creo, e unha obra de teatro que tamén teño escrita. Probablemente me dedicarei ás miñas memorias, pero iso xa o veremos.
(…)
GH: Estivo lendo neste verán?
MXQ: Estou con Ideas sobre la complejidad del mundo de Jorge Wagensberg, un científico filósofo. Tamén estou lendo un libro de Ángel Rodríguez Gallardo sobre as vidas de Enriqueta Otero Blanco e Genes, pueblos y lenguas, de Luigi Luca Cavalli-Sforza. Pola noite leo novelas de crime e policiais.”

Marilar Aleixandre: “Estimulando o intelecto”

Publicado o por

Entrevista a Marilar Aleixandre en Galicia Hoxe:
“Galicia Hoxe (GH): A literatura para unha escritora é ó mesmo tempo profesión e hobby?
Marilar Aleixandre (MA): En certo modo si, aínda que a profesión da que vivo eu é ensinar e investigar na universidade.
GH: A escritora sempre ten un libro baixo o brazo?
MA: No meu caso, si, por exemplo neste intre o que dicía de Modiano.”

Darío Xohán Cabana: “O vicio de escribir”

Publicado o por

Entrevista a Darío Xohán Cabana en Galicia Hoxe:
“Galicia Hoxe (GH): A literatura para un escritor é ó mesmo tempo profesión e hobby?
Darío Xoán Cabana (DXC): Para min non é unha profesión porque non vivo dela. Tampouco é un hobby, xa que é unha cousa moito máis seria ca iso. É un vicio, pois unha vez que te metes nela é coma o tabaco, que non o dás deixado.
GH: O escritor sempre ten un libro baixo o brazo?
DXC: Non, un escritor é un cidadán normal e corrente coma outro calquera, ó que lle gusta tomar uns viños, dar un paseo, estar sen facer nada ou falar coa xente.”

Francisco Castro: “Internet é o mellor invento dende a imprenta”

Publicado o por

Entrevista a Francisco Castro en Xornal:
“Xornal (X): Vostede é un pioneiro no uso das redes sociais para interactuar cos lectores e como medio de promoción. Cre que a web 2.0. está a ser algo positivo para os escritores?
Francisco Castro (FC): Evidentemente. Eu ademais son moi estrito con isto, pois son un talibán das novas tecnoloxías. Creo que para os escritores, para os músicos, para os artistas de toda clase, é unha maneira de mostrar o seu propio traballo sen límites de ningunha clase. Para o caso concreto dos escritores é unha posibilidade fantástica para interactuar co lector. Estou convencido de que a rede, despois da imprenta, é o mellor invento no ámbito da cultura e da comunicación. E logo xa, por suposto, coido que é o único reduto real de liberdade que queda, á hora de opinar, á hora de posicionarse diante do mundo… Non existe ningunha clase de censura, polo menos no noso contorno, malia a que hai países onde si. Así que non podo ser máis que un defensor sen concesións dos blogs, do Facebook, do Twitter e do seguinte que veña.
X: Non opina, como moitos axentes do sector editorial, que internet está a provocar unha perda de ingresos no mundo do libro?
FC: Non, para nada. O segredo de Marco Polo nunca tería a difusión que ten se non existisen os meus mil e pico amigos do Facebook, que foron informados de cando saía a venda. Os medios de comunicación tradicionais dedícanlle o libro galego moi pouco espazo, salvo periódicos como Xornal de Galicia e poucos máis. Internet ofrece a posibilidade de chegar a todo o mundo de xeito gratuíto.”