Arquivo da categoría: Lusofonía

Bonito pra chover 2025. Festival de arte e cultura brasileira en Santiago de Compostela. Recital poético-musical, o 23 de outubro

Publicado o por

A AELG colabora co Bonito pra chover, contando co apoio de CEDRO.

Bonito pra chover é un Festival de arte e cultura brasileira en Santiago de Compostela, con diversas actividades que terán lugar durante o mes de outubro de 2025.

Do 20 ao 26 de outubro de 2025 Santiago acollerá a fusión de culturas galega e brasileira: o II Festival Bonito Pra Chover. O festival é unha homenaxe a Galiza, adoptada como casa propia. O presente a compartir será a arte que desborda o Brasil chegando á Galicia. Como na primeira edición no 2024, en outubro Compostela vai ter chuvia de poesía, música, cine, imaxes diversas, sabores e encontros que o Bonito Pra Chover traerá á cidade. O festival rende homenaxe á riqueza cultural que entrelaza acentos e historias das dúas bandas do océano. Bonito Pra Chover reflicte esta pluralidade. En 2024 estiveron presentes distintos estados do Brasil: Ceará, Roraima, Rio de Janeiro e Tocantins. Nesa segunda edición, ampliamos e a maiores recibimos representantes de Bahia e Minas Gerais. O Bonito Pra Chover trae a Galicia un Brasil que non se ve nos titulares, senón que pulsa en cada recuncho, coas súas cores, voces e sabores. Serán distintas expresións e ámbitos culturais, dende a música á poesía ou o cinema, nesa semana iremos cantar, bailar, recitar e ver o cinema brasileiro. Tamén provaremos a súa gastronomía, compartindo coa Galicia un Brasil diverso. Así que agardamos encher Santiago de arte para mergullalo nos matices culturais do Brasil. Máis que un evento, Bonito Pra Chover é unha oportunidade para coñecer. Unha invitación ao intercambio entre culturas irmás, un abrazo cálido que estende as mans de Galiza ao Brasil e viceversa. O programa variado e atractivo trae unha axenda inescusable para quen queira sentir, escoitar e degustar esta unión cultural. Estamos seguros de que cada evento ha ser unha celebración dese encontro feito de artistas, pobos e desexos.

Para máis detalles sobre o evento, horario completo e información adicional sobre os artistas, visite a web e siga o Instagram.

A Asociación de Escritoras e Escritores en Lingua Galega (AELG) colabora no recital poético-musical que terá lugar o 23 de outubro de 2025, ás 18:00 horas, na Casa do Taberneiro (Rúa San Pedro, 15), en Santiago de Compostela, con entrada libre até completar capacidade.

O programa previsto é o seguinte:

Leituras de textos do poeta brasileiro Eliakin Rufino: Cesáreo Sánchez Iglesias Diana Kurich Luiza Fernandes

– Música ao vivo con: Bartira Fortes Léo Pinheiro Viny Brasil

O resto de actividades do Festival poden consultarse nesta ligazón.

Alva Martínez Teixeiro imparte en Porto Alegre o curso de posgraduado ‘A poesia brasileira e portuguesa de autoria feminina, desde a segunda metade do século XX até aos nossos dias’, do 18 ao 25 de outubro

Publicado o por

Do 18 ao 25 de outubro, Alva Martínez Teixeiro, Profesora Distinguida Senior da Universidade da Coruña e membro da AELG, impartirá, en Porto Alegre, o curso de posgraduado «A poesia brasileira e portuguesa de autoria feminina, desde a segunda metade do século XX até aos nossos dias». As diferentes sesións focarán os tópicos da relectura da tradición grega e do aggiornamento da lírica amorosa galego-portuguesa e camoniana, na obra poética de, entre outras autoras, Sophia de Mello Breyner Andresen, Dora Ferreira da Silva, Hilda Hilst, Maria Teresa Horta, Ana Hatlherly, Elisa Andrade Buzzo Krone ou Catarina Nunes de Almeida.

O convite foille cursado na súa condición de ‘Professora Estrangeira Associada’ (2022-2027) do ‘Programa de Pós-Graduação em Letras (PPGL)’ da ‘Escola de Humanidades, da ‘Pontifícia Universidade Católica de Rio Grande do Sul (PUCRS)’. Este programa de Mestrado e Doutoramento da PUCRS foi escollido a ‘Melhor Pós-Graduação do Brasil – Letras (Excelência Internacional)’, na última ‘Avaliação Quadrienal’ da ‘Coordenação de Aperfeiçoamento de Pessoal de Nível Superior – Ministério de Educação do Brasil (CAPES)’, sendo beneficiario do prestixioso ‘Programa de Excelência Acadêmica (PROEX)’ que financia os gastos asociados á estadía para dictar este curso regrado e para realizar diversas actividades de investigación.

Mural da Escola de Humanidades da Pontifícia Universidade Católica de Rio Grande do Sul (PUCRS), da autoría de Renan Santos (co apoio do ‘Instituto de Cultura’)

Crónica fotográfica do Encontro da Federación Galeusca 2025 en Santiago de Compostela

Publicado o por

Estas son algunhas das fotografías do Encontro da Federación Galeusca 2025, organizado pola AELG, coa participación da AELC e da EIE, co apoio de CEDRO, a Deputación da Coruña e o Concello de Santiago. Tivo lugar o 19 e 20 de setembro de 2025 en Santiago de Compostela. A crónica fotográfica completa (obra de Distrito Xermar) pode verse aquí.

Carlos Paulo Martínez Pereiro, designado membro do xurado do prestixioso ‘Prêmio de Romance Machado de Assis 2025’, no Brasil

Publicado o por

Carlos Paulo Martínez Pereiro, Profesor Emérito da UDC e integrante do Grupo de Investigación ILLA e da AELG, foi designado membro da ‘Comissão Julgadora’ do ‘Prêmio Machado de Assis de Romance 2025’ polo Presidente da ‘Fundação Biblioteca Nacional’ do Governo Brasileiro (Diário Oficial da União: https://shre.ink/CJPMdARomance2025).
As profesoras Márcia Fusaro e Márcia Moreira Pereira integran tamén a referida comisión xulgadora do prestixioso galardón, un dos máis importantes premios literarios brasileiros, a que concorreron 359 romances.
Para laurear o mellor romance brasileiro publicado en portugués no Brasil entre o 01/05/2024 e o 30/04/2025, son avaliadas a técnica narrativa, a orixinalidade temática e lingüística, así como é ponderada a contribución á cultura nacional. Os tres romances finalistas e o gañador serán divulgados até o 03/11/2025 e publicados no DOU até o 27/11/2025. O edital do premio e todas as informacións sobre o mesmo son accesíbeis no sitio electrónico da Fundação da Biblioteca Nacional (https://shre.ink/GovBrEditalPMdeARomance2025).
Ao longo dos anos, foron premiados romances de autoras e autores tan relevantes como Alberto Mussa, Ana Maria Machado, Bernardo Carvalho, Cristovão Tezza Daniel Galera, Evandro Affonso Ferreira, Flávio Moreira da Costa, Idalina Azevedo da Silva, Luciana Hidalgo, Luiz Ruffato, Marcelino Freire, Rubem Fonseca, Sheyla Smanioto ou Verónica Stigger.

[Edificio e logo da Biblioteca Nacional de Rio de Janeiro / Caricatura de Machado de Assis]

Café com Português: encontro virtual coa escritora brasileira Paula Valéria Andrade

Publicado o por

O Café com Português convida para um encontro literário com a escritora brasileira Paula Valéria Andrade.
Data: 3 de outubro
São Paulo 14h
Lisboa 18h
Galiza 19h

Participe na reunião Zoom
https://us02web.zoom.us/j/86306962776?pwd=otALAaQdX5V5BW900xbb2Usm54DHs2.1

ID da reunião: 863 0696 2776
Código de acesso: 451253

Compostela: Encontro Galeusca 2025

Publicado o por

O Encontro Galeusca 2025, organizado pola AELG, coa participación da AELC e da EIE, conta co apoio de CEDRO, a Deputación da Coruña e o Concello de Santiago.

Fundada formalmente en 2008, e con precedentes de encontros anuais históricos celebrados desde 1984, a Federación Galeusca está formada pola Asociación de Escritoras e Escritores en Lingua Galega (AELG), a Euskal Idazleen Elkartea (EIE) e a Associació d’Escriptors en Llengua Catalana (AELC). Representa 2800 autoras e autores, tanto escritoras/es como tradutoras/es.

Neste espazo de diálogo póñense en común perspectivas sobre a creación escrita nos nosos tres sistemas literarios recuperando e ampliando, deste xeito, os vínculos e as reflexións conxuntas levadas a cabo en anteriores encontros, centrándose, neste caso, en aspectos como o impacto da Intelixencia Artificial desde a perspectiva das linguas e literaturas minorizadas ou a literatura de tradición oral.

O programa previsto é o seguinte:

Venres, sexta feira, 19 de setembro de 2025
– Pola tarde. Chegada das persoas participantes a Santiago de Compostela.
– 19:15 h. Recepción na Alcaldía de Santiago, por Goretti Sanmartín.
– 20:30 h. Roteiro por Compostela, principalmente para as delegacións participantes, guiado por Daniel Asorey. O punto de saída será a Praza do Obradoiro.

Sábado, 20 de setembro de 2025
Entrada libre até completar a capacidade do espazo.

Museo do Pobo Galego (Sala de actividades da ala sur do Museo) (Google Maps) Pola mañá. Pode seguirse tamén en directo nesta ligazón.
– 11:05 h. Apertura por representantes das tres asociacións.
– 11:20 h. Relatorio inaugural sobre a traxectoria de Galeusca a cargo de Goizalde Landabaso, acompañada por Sebastià Portell (presidente da AELC) e Cesáreo Sánchez Iglesias (presidente da AELG).
– 11:40 h. Acto aberto de reflexión sobre Galeusca con representantes das tres entidades, moderado por Marta Dacosta.
– 12:45 h. Diálogo sobre Intelixencia Artificial desde a perspectiva das linguas e literaturas minorizadas, con Rubén Cela, Ania González Castiñeira e Sebastià Portell.

Museo do Pobo Galego. Pola tarde. Pode seguirse tamén en directo nesta ligazón.
– De 16:30 a 17:30 h. Mesa redonda sobre literatura de tradición oral, coordinada por Antonio Reigosa. Con Oihana Arana e Amaia Elizagoien (Euskadi), Joan Borja (Països Catalans), Alba María (Galiza) e Rita Sineiro (Portugal).
– De 17:30 a 17:50 h. Lectura pública das conclusións do Galeusca 2025, por parte das tres asociacións.

Igrexa de San Domingos de Bonaval. Pode seguirse tamén directo nesta ligazón.
– 18:00 h. Lectura da Declaración de Compostela-Bonaval.
– De 18:30 a 20:00 h. Acto de clausura coordinado por Lois Pérez, con improvisación entre regueifeiras (Alba María e Lupe Blanco), bertsolariak (Oihana Arana e Amaia Elizagoien) e glosadors (Miquel Àngel Adrover e Berta Llos). Peche musical con Ugia Pedreira.