O libro de Suso de Toro Sete palabras será presentado este venres 29 de xaneiro ás 20:30 no auditorio de Rianxo. No acto estarán presentes o autor; o secretario de Barbantia, Xosé Ricardo Losada; o académico, investigador e Premio Barbantia da Cultura Galega 2009, Xosé Luís Axeitos; o director de Xerais, Manuel Bragado; e mais o alcalde de Rianxo, Pedro Piñeiro.
Arquivo da categoría: Presentacións de libros
Teo: presentación dun libro de Humberto Busto
C3 Editores presenta este venres 29 de xaneiro o libro Achegas do alén Miño: Pascoaes, Coimbra e Machado na Galiza de Humberto Busto. No acto intervirán Anxo González Fernández –catedrático de Filosofía da USC e prologuista da obra–, Martiño Noriega –alcalde de Teo–, Antonio Puentes Chao –director editorial de 3C3– e o propio autor. Será a partir das 20:15 na Librería O trasno viaxeiro (Cacheiras, Teo).
Culleredo: presentación dun poemario de Xabier Correa Corredoira
O escritor Xabier Correa Corredoira presenta o seu libro de poemas Os días adiados na Biblioteca da Poesía “Uxío Novoneyra” de Vilamelania-Vilaboa o mércores 27 ás 20 horas, acompañado polo seu editor Miguel Anxo Fernán-Vello e a guitarra eléctrica de Pocho Taxes.
A Coruña: Lourenzo Fernández Prieto presenta o seu novo libro
O próximo mércores 20 de xaneiro ás oito do serán preséntase na sala de prensa da Fundación Caixa Galicia (Cantón Grande, 21-24) o libro Facendo Historia con memoria de Lourenzo Fernández Prieto. No acto intervirán Ernesto Sánchez Pombo –xornalista–, Manolo Martínez Barreiro –analista político e autor do limiar–, X. Amancio Liñares Giraut –director editorial de 3C3– e o propio autor.
Culleredo: presentación dun libro de Luz Campello
O vindeiro mercores 20 de xaneiro ás 20 horas na biblioteca “Uxío Novoneyra”
de Vilamelania-Vilaboa preséntase o libro Do corazón da terra de Luz Campello, veciña de Culleredo. Estará acompañada do seu editor, Alfonso Blanco Torrado, e polo concelleiro de cultura de Culleredo, Celestino Poza.
Ferrol: presentación de libro na Galería Sargadelos
Mañá martes 19 ás 20.00 horas na Galería Sargadelos de Ferrol presentarase o libro da editorial Embora titulado A formación da axenda política galega de acuicultura mariña, de Manuel Guillermo Antón Villamil. Presenta o escritor e Pablo Villamar.
Ferrol: presentación d’ O paraíso das sombras, de Cesáreo Sánchez Iglesias
O xoves 14, ás 20:00 horas, terá lugar a presentación d’ O paraíso das sombras, de Cesáreo Sánchez Iglesias. Será na Galería Sargadelos de Ferrol, onde acompañarán o autor Eva Veiga e Tucho Calvo.
A Coruña: presentación de Once máis 15
Edicións do Cumio presenta este venres 15 no Fórum Metropolitano da Coruña o espectáculo poético-musical Once máis 15, libro-CD froito da unión entre once poetas galegos de todos os tempos e quince grupos da escena musical actual. Versos que van dende Rosalía e Curros ata Antón Lopo e Daniel Salgado convértense en cancións por virtude dun elenco variado de músicos no que conviven a electrónica, o pop, o rock de diversa inspiración e case todos os estilos imaxinables.
O libro recolle as versións orixinais dos poemas, aquelas que serviron como punto de partida para as composicións dos músicos, así como pequenas biografías dos autores. Por parte dos músicos, a edición aporta imaxes das bandas e textos que os presentan.
No concerto no Fórum, dentro do ciclo Espazo Aberto, presentará o proxecto coas actuacións de Elanor, Xurxo Mares e Miguel Alonso. O concerto será o venres 15 de xaneiro ás 20 h e o prezo das entradas será de 3 euros.
Ferrol: presentación dun libro sobre fotografías antigas da cidade
Hoxe luns 4 de xaneiro ás 20.30 horas preséntase na Galería Sargadelos de Ferrol o libro titulado Ferrol a fotografía antigua (1858-1904), coa participación de Guillermo Escrigas (autor) e Miguel Toval (editor).
Ferrol: presentación do libro-disco Tic-tac de Pablo Díaz
O libro-disco Tic Tac do músico coruñés Pablo Díaz e con ilustracións de Marc Taeger será presentado este sábado 2 de xaneiro en Ferrol. O libro está editado por Kalandraka e conta coa colaboración de trinta músicos, entre eles Xabier Díaz, Guadi Galego, Carmen Rey e Ruote, ademais das achegas de Santiago Auserón e Xurxo Souto no prólogo e no epílogo, respectivamente.
