“Por 
segundo ano consecutivo, o próximo 28 de outubro os amigos de Ramiro Fonte xuntarémonos en Pontedeume para lembrar ao amigo e ao poeta cunha sinxela homenaxe que consistirá na colocación dunha placa cos seus versos —a segunda dunha serie coa que pretendemos trazar un roteiro entre os lugares da súa vila que foron senlleiros para el— e un xantar de amigos ao que nos sentiríamos moi honrados de que asistises. Para axustar a reserva de comensais co restaurante, agradeceriámosche que nos confirmases a túa asistencia antes do día 15 de outubro. Así mesmo, é a nosa intención editarmos nos vindeiros meses unha plaquette composta por poemas e textos en prosa en recordo de Ramiro á que tamén queremos convidarche a participar. A túa contribución sería para nós moi valiosa.
Para calquera aclaración, podes dirixirte por correo a: alejandro.cainzos@pontedeume.dicoruna.es ou aos seguintes teléfonos: 981 432598 Biblioteca (Alexandre Caínzos) ou 650 420669 (Colás Placer)”.
Dolores Vilavedra: Saudade dos tempos nos que o futuro estaba ben trazado
Artigo 
de Dolores Vilavedra en Praza:
“(…) Nada é casual: que tres autores tan distintos coincidisen en profetizar mundos posibles, ben dominados pola tecnoloxía, ben macrometáforas nacionais espidas do alento utópico que ata antonte as caracterizaba entre nós, debe querer dicir algo, alén da mensaxe explícita que cada unha desas novelas parece querer transmitir. Se cadra, codifican un certo sentimento de orfandade ou unha saudade indisimulable dos tempos en que a salvación da patria era posible porque había unha patria que salvar, dos tempos en que os camiños do futuro estaban ben trazados. (…)
En todo caso, o balance apunta a un exceso de doutrina: Será que a nosa literatura estase a contaxiar da bipolaridade do discurso público? Será que mesmo as voces alternativas que se queren alternativas caen no maniqueísmo imperante? Ás veces, semella que a roda da literatura retrocedese trinta anos. As aparencias enganan, non se fíen: que unha novela estea protagonizada por unha lesbiana non ten que significar necesariamente que a nosa sexa unha literatura máis madura, entendendo por tal aquela que apela ás diversas formas da complexidade, aquela que se ofrece a acompañarnos nunha viaxe, non a que se constitúe en porto seguro. (…)”.
Parlamento das Letras: Paula Carballeira
Entrevista 
de Armando Requeixo a Paula Carballeira no seu blogue, Criticalia:
“(…) – Armando Requeixo (AR): ¿Que cres que lle falta aínda ás nosas letras e que lle sobra definitivamente?
– Paula Carballeira (PC): Eu creo que as nosas letras aínda son novas e que lles falta tempo para asentarse entre as letras doutros países con igual consideración. Fáltalles coñecemento e recoñecemento entre @s lector@s. Creo que lles sobran as miradas nostálxicas ao pasado e que debería haber máis miradas ao presente e ao futuro. (…)
– AR: ¿Cal é a túa valoración do noso presente literario?
– PC: Penso que o noso presente literario é moi valioso. Temos diversidade, temos calidade e temos autores novos e autoras novas que achegan a súa maneira de ver as cousas, o que é moi necesario para ter unha literatura viva. Coido que imos ter que traballar cada vez máis para que toda esa calidade e diversidade chegue aos lectores e ás lectoras, da mesma maneira na que creo que temos que ir eliminando a barreira autor/a – lector/a e fomentar encontros e debates onde intercambiar ideas e unirnos na construción dunha cultura forte. (…)”.
Certame Cores con Palabras 2012
BASES DO CERTAME. Poderán concorrer ao certame Cores con Palabras todas aquelas persoas maiores de 55 anos que presenten obras pictóricas ou poéticas orixinais. Cada participante poderá presentar un máximo de dúas obras por categoría que serán inéditas e de temática libre.
CATEGORÍA PICTÓRICA. As técnicas que se poden utilizar son pintura acrílica, óleo ou técnica mixta sobre lenzo ou táblex. As súas dimensións serán, como mínimo, 25 F ( 81×65 cm) e, como máximo, 100F (165×130 cm). As obras deberán levar marco ou bastidor e presentaranse coa embalaxe protectora suficiente para o seu traslado.
CATEGORÍA POÉTICA. Os poemas deberán estar escritos en lingua galega. O tema, rima e métrica serán libres, cunha extensión máxima de 30 versos.
DOCUMENTACIÓN. Xunto coas obras, en cada categoría achegarase o boletín de inscrición debidamente cuberto, cos datos identificativos do autor, título da obra etc. así como unha fotocopia do carné de identidade do autor.
DATA E LUGAR DE PRESENTACIÓN DAS OBRAS. As obras poderanse entregar do 18 ao 24 de outubro do presente ano, ben mediante mensaxeiro, ben persoalmente en horario de 9:00 a 14:00 horas no: CENTRO DE ANIMACIÓN E ARTES PLÁSTICAS TOGARIÑOS (Avenida de Vigo, 25, baixo, 36680, A Estrada, Pontevedra). Os gastos de entrega e recollida das obras serán por conta de cada participante. A responsabilidade civil subsidiaria recaerá nos participantes.
EXPOSICIÓN. Entre todas as obras presentadas, levarase a cabo unha selección en cada categoría das 50 obras de maior calidade, técnica e orixinalidade que pasarán á fase final do certame e formarán parte, ademais, do libro Cores con palabras que se publicará con motivo dunha exposición final nunha sala reservada para o efecto.
XURADO. A composición do xurado darase a coñecer o día da entrega de premios e estará composto por destacados persoeiros do mundo da plástica e poética galega, así como por membros da organización.
PREMIOS. Establécense 3 premios por categoría (1.º, 2.º e 3.º) que serán entregados o día da inauguración da exposición e que consistirán nunha placa conmemorativa e diploma acreditativo, así como unha reprodución do Códice Calixtino. A presentación ao certame supón a total conformidade dos participantes coas presentes bases e a organización resérvase o dereito de interpretalas ante calquera dúbida.
INFORMACION COMPLEMENTARIA. Centro Togariños Teléfonos: 986 57 25 46, 671 90 00 78 e 667 09 19 52.
As bases pódense descargar tamén aquí: Togariños Certame de Pintura 2012.
Santiago: II Foro Internacional de Espazos para a Cultura. A araña na rede
A 
Cidade da Cultura organiza do 7 ao 9 de novembro de 2012 o II Foro Internacional de Espazos para a Cultura. O encontro, que nesta segunda edición leva como subtítulo A araña na rede, dispón de 155 prazas destinadas a profesionais de todos os ámbitos culturais, que poden inscribirse como data tope ata o próximo mércores 31 de outubro. Nesta ligazón o público interesado encontrará o boletín de inscrición e toda a información necesaria para participar.
Convocado o XIII Premio de Poesía Fiz Vergara Vilariño
1. O
Concello de Sarria e a Agrupación Cultural Ergueitos convocan o XIII Premio de Poesía FIZ VERGARA VILARIÑO.
2. As obras presentadas deben estar escritas en lingua galega.
3. A extensión mínima será de 400 versos. Os orixinais deberán ser inéditos e non premiados en ningún outro certame.
4. Os traballos presentaranse por quintuplicado, mecanografados a dous espazos e baixo plica. Enviaranse por correo certificado a: XIII Premio de Poesía FIZ VERGARA VILARIÑO, Concello de Sarria, Rúa Maior 14, 27600 Sarria, até o 31 de xaneiro de 2013.
5. Estableceuse un único premio indivisíbel dotado con 6000 euros, suxeito á normativa fiscal vixente. O xuri poderá deixar deserto o premio se considera que as obras presentadas non acadan unha mínima calidade.
6. O xuri estará composto por persoas de prestixio no mundo da creación ou a crítica literaria. Actuarán como Secretaria a Presidenta da Agrupación Cultural Ergueitos e como Presidente o Concelleiro de Cultura de Sarria, os dous con voz e sen voto. A decisión do xuri será inapelábel e será dada a coñecer no primeiro cuatrimestre de 2013.
7. A obra premiada será propiedade do seu autor, agás a primeria edición que será publicada pola Editorial Espiral Maior. En posteriores edicións farase constar a condición de premiada no XIII Premio de Poesía FIZ VERGARA VILARIÑO.
8. Os orixinais non premiados non serán devoltos e serán destruidos. Non se manterá correspondencia cos autores/as.
9. A interpretación destas bases correspondelle ao xuri. A participación no certame implica a súa aceptación.
Fene: tertulia de Xavier Alcalá con Alfredo Ferreiro, no Ciclo de Tertulias con gañadores/as do Premio Blanco Amor
O xoves 11 de outubro, ás 19:00 horas, na Casa da Cultura do Concello de Fene, continúan os faladoiros do Ciclo de Tertulias con gañadores/as do Premio Blanco Amor, organizado pola Concellaría de Cultura e Deportes do Concello de Fene, en colaboración coa Asociación de Escritoras e Escritores en Lingua Galega. Nesta ocasión, Xavier Alcalá, gañador do Premio Blanco Amor organizado polo concello de Culleredo en 1998, coa novela Alén da desventura, falará sobre esta obra nun acto conducido por Alfredo Ferreiro.
Pontevedra: coloquio con Víctor F. Freixanes sobre Cabalo de ouros
O 
xoves 11 de outubro, ás 20:00 horas, na Asociación de Veciños San Roque (Travesía Irmáns Pazó Montes, 2) de Pontevedra, Víctor F. Freixanes falará da súa última novela, Cabalo de ouros, publicada en Galaxia.
O Batallón Literario da Costa da Morte revive na rede
“Xa 
están na rede. Aquela brava agrupación de escritores costeiros, mozos e non tan novos, mariñeiros, estudantes, funcionarios, traballadores… teñen xa un espazo na internet que convirta en eternas e accesibles as súas creacións, no espazo oficial dentro do Finisterrae, onde xa podemos atopar a publicación dos 4 números publicados do boletín Feros Corvos e o libro comunitario Nós. E todo cando se cumpren 10 anos da publicación dun libro que ficará nas nosas memorias, que recuperamos agora a través da rede. Iremos recuperándoos en QPC boletín a boletín, nome a nome, para lembrar aos Marilar Alexandre, Suso Bahamonde, Pilar Beiro, Concha Blanco, Moncho Bouzas Tobío, Fernando Cabeza Quiles, Sesé Canirot, Ana Canosa Blanco, María Canosa Blanco, Xosé María Casais, David Creus, Estevo Creus, Modesto Fraga, Gus García, Rafa García, Víctor Manuel Gómez Traba, Mónica Góñez, Serxio Iglesias, María Lado, Tomás Lijó, José Luís Louzán, Abel Mendes Bujeiro, Xoán Alberte Moure Insua, Paulina Mouzo, Alexandre Nerium, Helena Pérez García, Marcos Seoane Vázquez, Paco Souto, Miro Villar e Rafa Villar.” Desde Que pasa na Costa, a foto é de Vieiros.
Ribadeo recibiu unha doazón de máis de 6.300 libros e 900 revistas do dramaturgo e escritor Daniel Cortezón
“O
Concello de Ribadeo acaba de recibir unha doazón de máis de 6.300 libros e 900 revistas, dos fondos do dramaturgo e escritor ribadense Daniel Cortezón, seguindo así as indicacións que él fixo antes do seu pasamento hai tres anos. O alcalde, Fernando Suárez Barcia, subliña que deste xeito a biblioteca municipal de Ribadeo se converte nunha das máis importantes da provincia. O rexedor dixo que “cúmprense tres anos do pasamento de Daniel Cortezón e este persoeiro, xa en vida, deixou dito que precisamente moita da súa formación intelectual, moita da súa formación autodidacta foi adquirida das lecturas dos libros da biblioteca pública El Viejo Pancho de Ribadeo, e dixo que unha grande parte da súa colección de libros, que foi mercando, adquirindo e recollendo, quería que pasasen a engrosar os fondos da propia biblioteca El Viejo Pancho, como eterno agradecemento a Ribadeo por tela disfrutando cando era novo”. Suárez Barcia explicou que “a súa viúva fíxonos entrega xa ao longo destes últimos tempos, pero a semana pasada documentamos a través dun acta de doazón, unha primera remesa de volumes. Son 6.385 libros e 907 revistas. Moitos son en galego, en castelán, en portugués, catalá, francés sobre diferentes temáticas. Agora máis para adiante virán máis libros do que foi a obra de Daniel Cortezón e unha colección de libros das Figueiras, de Castropol, de Ribadeo, da Veiga, do que él chamaba Comunidade cultural da ría. Iso tamén virá máis para adiante”. (…)”. Desde Crónica 3.
