Arquivos da etiqueta: Mamá quero ser Ziggy Stardust

Iria Misa: “Toda a industria pornográfica actual está pensada para captar os adolescentes e mantelos enganchados á pantalla o maior tempo posíbel”

Publicado o por

Entrevista de Tensi Xesteira a Iria Misa en Nós Diario:
“(…) – Nós Diario (ND): O libro Mamá, quero ser Ziggy Stardust supuxo un antes e un despois na súa carreira literaria. Que lle deu esta historia?
– Iria Misa (IM): Si que teño esa sensación. Cando escribín esa novela fun consciente de que dera un paso máis e decateime de que tiña unha boa historia. Antes de que saíse xa espertaba moito interese e aí sentín o agarimo que colle a xente cando unha obra lle gusta moito. Deume moitas satisfaccións, aínda que atopou dificultades e reticencias dalgúns sectores porque trataba o tema da realidade trans en crianzas. Pero o libro funcionou tan ben e fun a tantos coles que houbo momentos nos que mesmo me sentín como unha rockstar. Recibíanme dunha maneira os nenos nos coles… O libro, ao final, trata de algo que nos pasa a todos, porque todos nalgún momento nos sentimos diferentes e queremos que nos entendan. Foi un antes e un despois na miña carreira, un libro significativo.
– ND: Comeza o seu libro máis recente, Só para adultos, cunha cita de Leticia Dolera que di que é urxente tratar a relación do porno cos rapaces. Por que esta cita e por que tan de cheo no libro? Que sentido lle quería dar?
– IM: Cando lin este chío de Leticia Dolera decateime de que ela estaba a traballar en algo similar ao que a min me roldaba pola cabeza, que era como a rapazada se estaba empezando a relacionar no sentido sexual. Eu comezaba a percibir que estaban sucedendo cousas moi diferentes ao que nós poderiamos agardar ou ao que viviramos cando adolescentes. E impactoume moito porque o dixese tan claro. Porque eu tiña claro que algo estaba sucedendo pero aínda non dera co motivo nin coas palabras, e ela puxo o foco. Por iso quixen abrir o libro con esa cita. (…)”

Iria Misa le un fragmento de Mamá, quero ser Ziggy Stardust

Publicado o por

Desde a AELG recollemos a lectura dun fragmento de Mamá, quero ser Ziggy Stardust por parte da súa autora, Iria Misa, no marco da iniciativa #envozpropia de Edicións Xerais, aquí.

Rechiade e unídevos baixo cancelos comúns como #CorentenaLiteraria, #Euquedonacasa, #LerGalegoSempre, #Acasainfinita, #DescobreACulturaGalega, #CulturaGalegaCuradora e/ou #CulturaNaRede.

Premios Fervenzas Literarias para Os mellores libros do 2018

Publicado o por

Desde Fervenzas Literarias:
“Tras pechar o día 15 de xaneiro o prazo de votacións temos, un ano máis, os resultados onde as lectoras e os lectores de Fervenzas Literarias decidiron o que ao seu xuízo foi o mellor do 2018.
Queremos agradecervos a todas e a todos as doce edicións nas que levades escollendo, a través dos vosos votos, os mellores libros do ano.
Desde Fervenzas Literarias queremos recoñecer a vosa participación e o voso interese en colaborar para formar estes listados de libros. Moitísimas grazas, xa que sen ese tempo que dedicades en votar sería totalmente imposible este traballo.
E agora os resultados… Os nosos parabéns aos premiados e premiadas!!!

– Mellor libro de narrativa para Besta do seu sangue, de Emma Pedreira.
– Mellor libro de poesía para Todo isto antes era noite, de Lucía Aldao.
– Mellor libro de ensaio/investigación para Vivir a galope, de María Xosé Queizán.
– Mellor libro de teatro para Eroski Paraíso, de Chévere.
– Mellor álbum de banda deseñada para O puño e a letra, de Yolanda Castaño.
– Mellor libro traducido para público adulto para A cámara do sangue e outros relatos, de Angela Carter, traducido por María Reimóndez.
– Mellor libro de literatura xuvenil para A balada dos unicornios, de Ledicia Costas.
– Mellor libro de literatura infantil para Mamá, quero ser Ziggy Stardust, de Iria Misa.
– Mellor libro traducido de literatura infantil e xuvenil para Pippi Mediaslongas embarca, de Astrid Lindgren, traducido por David A. Álvarez.
– Autor do ano para Emma Pedreira.
– Ilustrador do ano para Víctor Rivas.
– Mellor capa de libro para adultos para Besta do seu sangue, de Emma Pedreira.
– Mellor capa de libro de literatura infantil e xuvenil para A balada dos unicornios, de Ledicia Costas, feita por Andrés Meixide.
– Mellor editorial do ano para Xerais.
– Mellor crítico/a literario/a para Armando Requeixo.
– O mellor acontecido para Culturgal 2018.
– O peor acontecido para o falecemento de Xabier P. DoCampo.
– Mellor Libraría para Cartabón.
– Mellor medio de comunicación para Sermos Galiza.
– Mellor blog/web literaria para A Sega.”