(Xornal)
Arquivos da etiqueta: Rosalía de Castro
AELG: comunicado ás/aos socios/as sobre o Acto cívico e reivindicativo en lembranza do traslado dos restos mortais de Rosalía de Castro
Acto cívico e reivindicativo en lembranza do traslado dos restos mortais de Rosalía
Prezada/o Socia/o,
Como vimos informando, a Asociación de Escritores en Lingua Galega (AELG) promove, coa colaboración de diversos colectivos, como as asociacións culturais O Galo, Medulio, Auriense, MaioLongo, Solfa e a Asociación Cultural de Meira, e fundacións como Manuel María e Bautista Álvarez, entre outras organizacións culturais que se irán sumando, para o vindeiro 15 de xullo un acto cívico e reivindicativo en lembranza do traslado dos restos mortais de Rosalía de Castro, que tivo lugar o 25 de maio de 1891. Tedes toda a información actualizada aquí.
Indicámosvos mediante a presente que é indispensábel que, de quererdes facer o traxecto Padrón-Santiago en tren, fagades reserva de praza contestando a esta mesma mensaxe, indicando o número de prazas a reservar. Tamén o podedes facer no telf. da AELG 981 133 233, de luns a venres, de 08.00 a 15.00.
Desde a AELG agradecemos que Rosalía estea presente e visíbel ao longo do percorrido, polo que cómpre facérmonos acompañar de iconografía rosaliana (chapas, camisetas, fotos, libros da autora, etc.) que a converta a todos os ollos na auténtica protagonista da xornada, así como de flores coas que realizar a ofrenda floral no Panteón de Galegos Ilustres.
Agardando poder contar coa túa presenza, recibe un ben cordial saúdo,
O Consello Directivo da AELG.
AELG: Acto cívico e reivindicativo en lembranza do traslado dos restos mortais de Rosalía de Castro
A Asociación de Escritores en Lingua Galega (AELG) vai celebrar o vindeiro 15 de xullo un acto cívico e reivindicativo en lembranza do traslado dos restos mortais de Rosalía de Castro, que tivo lugar o 25 de maio de 1891.
Organizado pola AELG, o cortexo cívico conta co apoio e colaboración de diversos colectivos, como as asociacións culturais O Galo, Medulio, Auriense, Maio Longo, Solfa e a asociación cultural de Meira, e fundacións como Manuel María e Bautista Álvarez, entre outras organizacións culturais que se irán sumando ao longo destas semanas.
Un tren, identificado como Follas Novas, partirá da estación da Matanza, ao carón da casa de Rosalía, o xoves día 15 de xullo ás 16,30 horas, para facer o traxecto Padrón-Compostela. Previamente, haberá unha concentración na colexiata de Santa María de Iria, no cemiterio de Adina, onde o presidente da AELG, Cesáreo Sánchez, informará do sentido dos actos, á vez que se lerá un poema de Rosalía de Castro.
Na estación de Compostela agardará a comitiva restante, actuando a banda municipal. Xa en Santiago, o cortexo sairá pola rúa do Hórreo cara a Praza do Toural, primeira parada da comitiva, onde haberá unha lectura de tres poemas de Cantares Gallegos (“A gaita gallega”, “Castellanos de Castilla” e “Eu cantar, cantar, cantei”), para continuar pola Praza da Universidade e pola Praza de Cervantes, onde se lerán outros poemas de Rosalía.
Finalmente, en San Domingos de Bonaval celebrarase unha audición do Ángelus, de Massenet, e unha lectura de poemas de Follas Novas, intercalando actuacións do diversos grupos musicais e artistas participantes, para rematar o acto coa lectura dun comunicado reivindicativo da figura de Rosalía de Castro, cando se cumpren 125 anos da súa morte.
A Coruña: homenaxe a Rosalía no teatro do seu mesmo nome
Mañá xoves 10 de xuño, ás 21.00, no Teatro Rosalía de Castro da Coruña, terá lugar a homenaxe a Rosalía de Castro “AO RASO COAS LEBRES. Versos de Rosalía de Castro”.
FOI un empeño de Casahamlet, desde os seus inicios en 1998, o facer unha triloxía escénicasobre os tres grandes poetas do Rexurdimento. E así estreou ESCURO ENIGMA EU SON (Pondal, 2002), QUEN PUDERA CONVOSCO VOAR (Curros, 2008) e agora presenta AO RASO COAS LEBRES (Rosalía, 2010), un recital-concerto que tenta mostrar a lucidez e rebeldía dunha muller que, adiantándose ao seu tempo, desvela a situación do pobo e da cultura galega, comezando pola lingua, que ten nela a primeira usuaria con forza suficiente para inaugurar un tempo novo marcado pola consciencia e polo orgullo, así como pola contundencia fronte ás agresións. Talvez non houbo nin chegará a haber en moito tempo unha voz tan escoitada con respecto e emoción polo seu pobo.
Con este recital-concerto, CASAHAMLET pretende facer chegar ao público, un exemplo de poesía e de compromiso que teñen na nosa escritora os seus acentos máis sonoros.
A Coruña: conferencia “Rosalía de Castro: o clamor da rebeldía. A evidencia contra a conveniencia”, de Mª Pilar Pilar García Negro
Será o martes 25 ás 20 horas na Biblioteca de Estudos Locais (Durán Loriga, 10). Trátase de conmemorar como merece o 125 aniversario do falecemento da autora das letras galegas e de explicar as razóns da súa modernidade, a despeito de tantos anos de desfiguración interesada.
Vigo: mesa redonda “Rosalía de Castro, aurora e porvir”
«Neste ano 2010 no que se celebra o 125 aniversario do pasamento de Rosalía de Castro, o Consello Municipal da Muller de Vigo queremos rendirlle unha homenaxe e reivindicar a súa figura destacada como feminista, defensora da nosa cultura e da nosa língua, con tal motivo imos celebrar o seguinte acto: “Rosalía de Castro, aurora e porvir”, unha mesa redonda integrada por:
– Mª Xosé Queizán Vila: “A xustiza pola man de Rosalia de Castro verso a verso”
– Pilar García Negro: “A evidencia frente a conveniencia sexista”
– María do Cebreiro Rábade: ” O sentido ético da poesía de Rosalía de Castro”
Será o mércores 26 de maio ás 20:00 no Centro de Documentación e Recursos Feministas de Vigo (Biblioteca Pública Central. Rúa Joaquín Yáñez, 6 -2º andar), no Casco Vello de Vigo.» Organiza o CONSELLO MUNICIPAL DA MULLER DE VIGO.
Roteiro Rosalía na Coruña
Este domingo pola mañá celebrarase o roteiro Rosalía na Coruña, organizado pola Concellaría de Cultura e guiado por Diego Pardo Amado, profesor e especialista na figura de Rosalía. Sairá de diante da casa de Rosalía na Cidade Vella (r/ do Príncipe, 3, esquina edificio de Capitanía) ás 12.00 horas e terá unha duración dunha hora durante a cal se visitarán distintos puntos relacionados coa escritora galega e a súa etapa na cidade herculina. Esta actividade é a primeira da campaña de promoción da lectura A cidade que le, presentada hoxe mesmo na Coruña.
Certame de curtametraxes “Curtas para Rosalía”
A Asociación Socio-Pedagóxica Galega vén de convocar o certame audiovisual Curtas para Rosalía. Segundo explican nas bases, “o motivo central destas curtas é a figura de Rosalía de Castro. Polo tanto aquelas persoas que queiran presentar obras a este certame deberán ter en conta que a temática xeral ha de ser a persoa de Rosalía de Castro, as súas obras ou algún elemento que destaque a súa vida, traballo ou calquera outro punto de interese da escritora como tal ou do seu contorno”. O prazo de entrega remata o 16 de xuño de 2010.
Padrón: 124 aniversario do pasamento de Rosalía de Castro
Picar na imaxe para ampliala
Libro aberto, programa do mércores 8 de abril
Esta semana visita o programa Libro aberto da Televisión de Galicia o poeta, ensaísta e crítico de arte Xavier Seoane. O autor falará do seu poemario máis recente Do ventre da cóbrega, nunha entrevista gravada na Imprenta Litonor, en Santiago de Compostela.
A reportaxe semanal estará dedicada ao Premio Literario San Clemente, outorgado polos lectores máis novos. Estudantes de diferentes institutos galegos conseguiron que un autor como Haruki Murakami viaxase a España por primeira vez para recoller este galardón. Ademais, o programa inclúe unha conversa en Noia co escritor Xerardo Agrafoxo, que falará da súa última novela O violinista de Malá Strana.
Na sección de crítica literaria Xabier del Valle-Inclán falará do libro de Xosé Ramón Barreiro Fernández O carlismo galego, que agora reedita Laiovento. Despois, Luis Alonso Girgado, especializado en literatura hispanoamericana comentará a obra Purgatorio, do autor arxentino Tomás Eloy Martínez, novela editada por Alfaguara. A lectura desta semana corre a cargo de Xosé Ramón Pena, que compartirá cos espectadores un fragmento da súa obra A batalla do paraíso triste. Para rematar, unha reportaxe sobre a publicación de Cantares Gallegos nunha edición bilingüe galego-xaponés revisada e ampliada da primeria tradución que no ano 2002 fixera Takekazu Asaka, profesor de Filoloxía Románica en Toquio.
Todo isto poderemos velo o próximo mércores 8 de abril á noite (00:45) na Televisión de Galicia. Tamén poden ver o programa na na G-2 (TDT) o venres ás 15:30 horas ou a través da súa páxina web.
