Arquivo da categoría: Actividades AELG

VIII Curso de Formación Continua: O álbum infantil

Publicado o por

A Asociación de Escritoras e Escritores en Lingua Galega colabora, mediante o patrocinio da Secretaría Xeral de Política Lingüística, coa Universidade de Santiago neste curso de postgrao.
O VIII Curso de Formación Continua: O álbum infantil ten como finalidade formar e informar o alumnado participante dunha temática, as Literaturas Infantís e Xuvenís dos ámbitos lingüísticos ibéricos, xeralmente excluída dos planos de estudo das licenciaturas e diplomaturas e, con todo, dunha transcendencia fundamental en ámbitos básicos como a formación lectora e a expresión escrita no mundo das Tecnoloxías da Información e Comunicación (TIC). Tenta analizar estas literaturas dende un enfoque comparativo para dar a coñecer que axentes literarios se presentan máis débiles en cada ámbito lingüístico. Nesta edición, o tema específico a tratar é O álbum infantil.

INFORMACIÓN

Directora: Blanca-Ana Roig Rechou (Universidade de Santiago de Compostela).
Coordinación e Secretaría: Marta Neira Rodríguez (Universidade de Vigo) e Isabel Soto López (Universidade de Santiago de Compostela).
Carga lectiva: 60 horas (2 créditos de libre configuración, non acumulativos).
Datas de realización
* Parte virtual: Do 1 ao 30 de xullo de 2011.
*Parte presencial: Do 5 ao 8 de setembro de 2011.
Lugar
* Parte virtual: Inauguración: 30 de xuño de 2011 ás 17:00 horas. Facultade de Filoloxía (Campus Norte). Salón de Graos.
* Parte presencial: Biblioteca Novacaixagalicia. Rúa Frei Rosendo Salvado, 14-16. 15701. Santiago de Compostela.
Requisitos de acceso: Profesionais do ensino, alumnado das facultades de Ciencias da Educación, da Comunicación (Xornalismo, Audiovisual, Publicidade), Maxisterio, Xeografía e Historia, Humanidades, Filoloxías, Tradución e Interpretación, profesionais de bibliotecas e calquera interesado.
Matrícula
* Preinscrición: Do 1 de febreiro ao 1 de maio de 2011.
* Formalización: Do 15 de maio ao 15 de xuño de 2011.
Prezo: 90 euros.
Prazo de pagamento: Un único prazo para matrícula.
Número de prazas: 135.
Máis información en:
* Biblioteca Novacaixagalicia. Telf. 981 59 34 67, bibliofundacion@caixagalicia.es.
* Universidade de Vigo. Marta Neira Rodríguez, marta.neirarodriguez@ceu.es.
* Universidade de Santiago. Blanca Ana Roig, blanca.roig@usc.es, www.usc.es/cptf.
* Asociación de Escritoras e Escritores en Lingua Galega, oficina@aelg.org.
Organizan:
* Universidade de Santiago de Compostela. Departamento de Filoloxía Galega.
* Asociación de Escritoras e Escritores en Lingua Galega.
Colaboran
* Centro Ramón Piñeiro para a Investigación en Humanidades.
* Biblioteca Novacaixagalicia.
* Editoriais: Kalandraka, Faktoría K e OQO.
* Rede temática As literaturas infantís e xuvenís do marco marco ibérico e iberoamericano.
* Asociacións: ANILIJ e ELOS.
* Centro de Investigación de Procesos e Prácticas Culturais Emerxentes.

PROGRAMA PARTE VIRTUAL

1. As literaturas infantís e xuvenís no marco ibérico. Bibliografía básica.
2. O álbum infantil.
2.1. Estudo teórico sobre o álbum.
2.2. Selección de obras para o mediador.
2.3. Comentarios sobre álbums de todos os ámbitos lingüísticos do marco ibérico e iberoamericano e Os inolvidábeis.
3. Ferramentas de comunicación: foros, charlas e correo electrónico co alumnado e profesorado.
4. AVALIACIÓN a partir dun comentario sobre o material proporcionado (entregarase ao recoller o material do curso presencial).

PROGRAMA PARTE PRESENCIAL

Luns 5 de setembro
9:30-10:00. Recollida de material.
10:00-10:30. Inauguración: Directora do curso e Director da Biblioteca Novacaixagalicia.
10:30-11:30. Informe sobre docencia e investigación 2011 na LIX a partir dos Informes de Literatura (CRPIH). Eulalia Agrelo e Isabel Mociño (AELG/USC). Presenta: Pilar Bendoiro Mariño (AELG/USC).
11:30-12:00. Pausa.
12:00-13:30. Avós, de Chema Heras Varela e Rosa Osuna. Comentario e conversa con Blanca-Ana Roig (AELG/USC).
16:30-18:30. Editorial Kalandraka e Faktoría K. A modernización do álbum. Carmen Ferreira Boo (AELG/USC).
Presenta: Mar Fernández Vázquez (AELG/USC).
18:30-19:00. Pausa.
19:00-20:30. Encontro con Gémeo Luís e João Pedro Mésseder. Ilustrador e escritor portugueses. Presenta: Sara Reis da Silva (Universidade do Minho).

Martes 6 de setembro
10:00-11:30. Fóra dos programas universitarios, pero tan dentro das aulas: o álbum ilustrado en Infantil, Primaria e Secundaria. Tipos e usos. Alexia Dotras (Universidade de Coimbra). Presenta: Pedro Lucas (Biblioteca Novacaixagalicia).
11:30-12:00. Pausa.
12:00-13:30. Editorial OQO e o álbum. Representante da Editorial. Presenta: Isabel Soto (AELG/USC).
16:30-18:30. Entre texto, imaxe e soporte: elementos de análise dun álbum. Carina Rodrigues (Universidade de Aveiro). Presenta: Beatriz Prado (Biblioteca Novacaixagalicia).
18:30-19:00. Pausa.
19:00-20:30. E ti de quen vés sendo? Taller creativo de tipofotos. José Mª Mesías e Xana Morales (Universidade da Coruña). Presenta: Álvaro Álvarez (Biblioteca Novacaixagalicia).

Mércores 7 de setembro
10:00-12:00. Informes dos investigadores da Rede. Presenta: Blanca-Ana Roig (AELG/USC).
– Biblioteca Virtual Miguel de Cervantes. Ramón Llorens (Universitat d’Alacant).
– Centros e grupos de investigación no ámbito castelán. Jesús Díaz (Universidad de La Laguna).
– Etxepare Euskal Institutua (Etxepare Instituto Vasco). Mari Jose Olaziregi (Euskal Erriko Unibertsitatea e Directora do Instituto).
12:00-12:30. Pausa.
12:30-13:30. Informes dos investigadores da Rede. Presenta: Blanca-Ana Roig (AELG/USC).
– A Casa da Leitura. Ana Margarida Ramos (Universidade de Aveiro).
– Associació Rosa Sensat e Consell català del Llibre Infantil i Juvenil. Caterina Valriu (Universitat de les Illes Balears).
– Asociacións de investigadores en LIX. Veljka Ruzicka Kenfel (Universidade de Vigo).
– Institucións e LIX en Iberoamérica. João Ceccantini (Universidade Estadual Paulista) e Laura Guerrero (Universidad Iberoamericana Ciudad de México).
16:30-18:00. A imaxe do texto. Códigos e observacións. Miguel Calatayud. Presenta: María Jesús Agra (USC).
18:00-18:30. Pausa.
18:30-20:30. Libros para soñar: os contos de Kalandraka. Grupo da Editora.

Xoves 8 de setembro
10:00-11:00. Presentación do libro O álbum infantil. Século XXI. Interveñen: Manuel Bragado, Pedro Lucas Domínguez, Blanca-Ana Roig e Mónica Álvarez.
11:00-13:00. Mateo e Paula Carballeira. Como contar un álbum propio. Presenta: Marta Neira.
13:00-13:30. Clausura e entrega de Certificacións de participación. Reitor ou representante do Reitor, Director do Departamento de Filoloxía, Presidente da AELG, Director da Biblioteca Novacaixagalicia.

Toda a información pode ser consultada aquí.

A Coruña: Vento Lois, recitado poético aberto en homenaxe a Lois Pereiro

Publicado o por

Vento Lois é a primeira das iniciativas coas que a Asociación de Escritoras e Escritores en Lingua Galega pretende contribuír á visualización da obra do escritor Lois Pereiro durante este ano 2011 en que, por decisión da Real Academia Galega, vai ser o autor homenaxeado o próximo 17 de maio, Día das Letras Galegas.
A primeira das iniciativas, que incluímos dentro dunha programación global e colaborativa que será coñecida como Vento Lois, terá lugar na Coruña o vindeiro domingo 20 de marzo, co seguinte programa:
* 12:30 h.: Convocatoria social aberta ao redor da poesía de Lois Pereiro na coruñesa Praza de María Pita en dirección ao Teatro Rosalía de Castro, un encontro que pretende ser unha manifestación poético-festiva popular amenizada con música.
* 13:00 h.: Lectura de poemas de Lois Pereiro ou de creación propia recreados no mundo poético e época do autor, que terá lugar no propio Teatro Rosalía de Castro.

Esta actividade está aberta a toda a cidadanía, co que animamos a todas e todos a colaborar no recoñecemento que a figura de Lois Pereiro merece! Participa coa túa presenza, instrumentos musicais, carteis… O Teatro Rosalía convértese nunha asemblea poética onde ler, desde o patio de butacas e os palcos, poemas ou fragmentos da obra de Lois, ou sobre Lois.

Crónica posterior en Xornal, La Opinión, La Voz de Galicia.

Libro homenaxe a Lois Pereiro en edición dixital

Publicado o por

Esta é a segunda proposta colaborativa que desde a Asociación de Escritoras e Escritores en Lingua Galega estamos a organizar para contribuírmos á visualización e actualización da obra literaria e pensamento de Lois Pereiro.
É o noso propósito elaborarmos un LIBRO HOMENAXE A LOIS PEREIRO para o que solicitamos dos Socios/as da AELG que nos enviedes colaboracións inéditas e orixinais que poderían responder a un duplo formato:
* Poemas inéditos inspirados en Lois Pereiro (acéptanse versións elaboradas)
* Obra gráfica (ilustración, fotografía, poesía experimental, etc.) inspirada en poemas de Lois Pereiro.
Da conxunción de todas as colaboracións, a AELG promoverá unha edición en soporte electrónico en formato epub de descarga gratuíta accesíbel desde a nosa web.
O prazo límite para recibirmos os vosos orixinais no noso enderezo electrónico de contacto habitual (oficina@aelg.org) será o 10 de abril.

Cerqueda, Malpica: nova edición das Polafías

Publicado o por

O domingo 13 de marzo, a partir das 17:00 h., no Complexo-Restaurante Aldeola, en Cerqueda (Malpica), con entrada libre, nova edición das Polafías: a Asociación de Escritores en Lingua Galega aproveitará para realizar unhas gravacións da tradición da literatura oral e da música tradicional da parroquia de Cerqueda. Gravaranse romances de cego, coplas, comparsas, regueifas, contos, lendas así como o repertorio de catro xeracións de pandereteiras da parroquia. Esta actividade está coorganizada coa Asociación de Veciños Monte d’Arxa (AVMD) e a Asociación Cultural Raigañas (ACR), co patrocinio da Deputación Provincial da Coruña e o Complexo-Restaurante Aldeola. Crónica posterior en Galicia Confidencial.

Trinta obras finalistas compiten polos Premios AELG 2011

Publicado o por

Os socios e socias da Asociación de Escritoras e Escritores en Lingua Galega escolleron os finalistas da duodécima edición dos premios á mellor obra publicada no 2010 nas modalidades de ensaio, poesía, narrativa, tradución, teatro, blog literario, literatura infanto-xuvenil e traxectoria xornalística. Nestes dous últimos casos tamén participan na elección os asociados de Gálix e os membros do Colexio de Xornalistas respectivamente.
As obras gañadoras daranse a coñecer na Cea das Letras, un dos actos máis importantes na vida da Asociación de Escritores en Lingua Galega, que terá lugar o vindeiro 30 de abril no hotel Porta do Camiño de Santiago de Compostela. Así pois, da conxunción de votos emitidos nunha primeira quenda resultaron finalistas:

– Blog Literario
1. Ferradura en tránsito, de Xosé Manuel Eyré.
2. O levantador de minas, de Alfredo Ferreiro.
3. Trafegando ronseis, de Gracia Santorum e Xosé Anxo Fernández Alonso.

– Ensaio
1. A man que caligrafando pensa: do plástico-escritural e da manuscrita novoneyriana, de Carlos Paulo Martínez Pereiro.
2. Elucidacións na sombra. Análise e interpretación de dúas pezas de Carvalho Calero, de Manuel Castelao.
3. O clamor da rebeldía. Rosalía de Castro: ensaio e feminismo, de María Pilar García Negro.

– Literatura Infanto-xuvenil (AELG-Gálix)
1. Contos para nenos que dormen deseguida, de Pinto & Chinto.
2. O pintor do sombreiro de malvas, de Marcos Calveiro.
3. O segredo de Marco Polo, de Francisco Castro.
4. Suso Espada. “Nota Roja”, de Francisco X. Fernández Naval.

– Mellor traxectoria en xornalismo cultural 2010 (AELG-Colexio de Xornalistas)
1. Anxo Tarrío.
2. Daniel Salgado.
3. Fran P. Lorenzo.
4. Iago Martínez.
5. Ramón Nicolás.

– Narrativa
1. O coitelo en novembro, de Marilar Aleixandre.
2. Obediencia, de Antón Lopo.
3. Periferia, de Iolanda Zúñiga.
4. Settecento, de Marcos Calveiro.
5. Todo é silencio, de Manuel Rivas.
6. Xuvia-Neda, de Vicente Araguas.

– Poesía
1. Bater de sombras, de Francisco X. Fernández Naval.
2. Estremas, de Ana Romaní.
3. Retro(visor), de Antía Otero.

– Teatro
1. Canibalismo, de Marcos Abalde Covelo.
2. Cínicas, de Teresa Moure.
3. Flores de Dunsiname, de Manuel Lourenzo.

– Tradución
1. Bilbao-New York-Bilbao (Kirmen Uribe), na versión de Isaac Xubín.
2. Lóbrego Romance. Pálida Pantasma. As Lendas Espectrais de Malvadia (Jack Mircala), por Isabel Soto.
3. Randea do alento (Herta Müller), de Marga do Val.

Na segunda fase, xa en andamento, os asociados decidirán as obras gañadoras.

Alén destas categorías, os Premios AELG constan doutros dous galardóns outorgados pola Asemblea de Socios e Socias da AELG: o premio para a Institución que se caracterizase pola súa contribución á divulgación da literatura galega, que este ano será para a Fundación Penzol; e mais o Premio AELG 2011 Escritor Galego Universal, outorgado pola Asemblea ao escritor Antonio Gamoneda, galardón que o distingue como autor que combina a excelencia literaria co compromiso ético que o converte en referente na defensa da dignidade humana.

A nova recóllese en Cultura Galega, Xornal, Galicia Hoxe, A Nosa Terra, La Opinión, Xerais, Fervenzas Literarias, Galaxia.

Día de Rosalía (24 de febreiro): lectura simultánea de textos rosalianos

Publicado o por

O xoves 24 de febreiro, Día de Rosalía, a Asociación de Escritoras e Escritores en Lingua Galega organiza unha Lectura simultánea de textos rosalianos en varias cidades e vilas do país, como xa fixera o pasado 2010. Durante estes actos lerase tamén un manifesto que defina explicitamente o noso reclamo da actualidade da obra e pensamento rosaliano e a súa transmisión didáctica ás novas xeracións a través tamén da implicación da escola, así como a nosa demanda dun Panteón de Galegos Ilustres que de verdade sexa de titularidade pública e de uso laico, aberto a todas as persoas que a queiran honrar como unha das personalidades fundadoras da nosa nación, xunto aos demais ilustres que alí descansan, para reforzo e orgullo da nosa memoria colectiva.

Os lugares que temos confirmados até agora son:

1. Santiago de Compostela: Panteón de Galegos/as Ilustres, San Domingos de Bonaval, 19:00 horas.

2. A Coruña: Kiosko Alfonso, 19:00 horas.

3. Vigo: Casa Galega da Cultura, 20:00 horas.

4. Lugo: Museo provincial, 19:30 horas. No acto a desenvolver no refectorio do Museo, con entrada libre, participará profesorado e alumnado do CEIP Benigno Quiroga Ballesteros, CPR María Auxiliadora, IES Manuel Leiras Pulpeiro e IES Nosa Señora dos Ollos Grandes, xunto con Pilocha que interpretará a capela poemas de Rosalía de Castro.

5. Betanzos: Salón azul do Edificio do Liceo, 20:00 horas. Colabora a A. C. Eira Vella.

6. Ferrol: Galería Sargadelos, 19:00 horas.

7. Ourense. Libraría Torga, 18.00 horas (en colaboración con Gremio LiterAuria).

8. Pontevedra. Libraría Michelena, 20:00 horas.

– Os actos están abertos a todo o público que queira asistir, ainda que solicitamos que envíen previamente un correo electrónico a oficina@aelg.org para confirmar que poema vai ler cada asistente, e evitar así eventuais repeticións.

A seguir expoñemos un resumo das ideas que se desenvolverán no manifesto a ler este día:
1. Demandar para San Domingos de Bonaval a permanencia do Panteón de Galegos Ilustres. Reafirmamos como irrenunciábel que sexa de titularidade pública e de uso laico.
2. Denunciar a regresión na política de investimentos en todos os sectores da cultura por parte do Goberno da Xunta de Galicia, que está a destruír o construído nos últimos trinta anos por varias xeracións de creadores e creadoras, e por toda a sociedade galega no seu conxunto.
3. Apoiar, máis unha vez, todo aquel profesorado que ten manifestado o seu compromiso para co mantemento da docencia en lingua galega e en contra da infravaloración e marxinalidade a que o goberno actual o ten sometido no ámbito do ensino.
4. Demandar, finalmente, que a Consellaría de Educación, máxima autoridade responsábel da xestión educativa, recolla no calendario escolar oficial anual a data do 24 de febreiro como o Día de Rosalía.

A nova recóllese en varios medios: Xornal, Galicia Hoxe, Fervenzas Literarias, o propio día 24 en Galicia Hoxe, El Progreso. O día 25 de febreiro aparecen estas mencións en Galicia Hoxe e Xornal.

Ferrol: presentación de Lidia Senra Rodríguez. A historia dun liderado entrañable, de Tareixa Ledo, tras o acto de lectura de textos de Rosalía

Publicado o por

O xoves 24 de febreiro, ás 19:00 h., na Galería Sargadelos (Rúa Rubalcava, 30-32, esquina Rúa María) de Ferrol, terá lugar o acto de Lectura simultánea da textos rosalianos organizado pola Asociación de Escritoras e Escritores en Lingua Galega, presentado por Rosa Méndez e no que lerán un poema de Rosalía: Elia Rico Lagarón, Xosé Leira e Rosa Martínez Dios.
Ás 20:00 h., preséntase o libro de Tareixa Ledo Regal, Lidia Senra Rodríguez. A Historia dun liderado entrañable, publicado en Laiovento. No acto acompañará a autora Teresa Martínez, da Asociación Cultural Fuco Buxán.

Vigo: Os Bos e Xenerosos. Francisco Fernández del Riego

Publicado o por

A Asociación de Escritoras e Escritores en Lingua Galega celebra anualmente a súa homenaxe Os Bos e Xenerosos, que supón un acto de estudo e recoñecemento dunha figura ou colectivo que, pola súa dilatada actividade de intervención social, contribuíse á difusión da nosa cultura.
No 2011 chegamos á súa oitava edición, que se dedicou, por decisión unánime dos escritores/as Socios/as, a Francisco Fernández del Riego, polo seu silencioso e incansábel traballo que mantivo aceso o facho da cultura galega en tempos moi difíciles.
Será o sábado, 19 de febreiro, na Casa da Cultura Galega de Vigo, ás 12.00, segundo o seguinte programa:

* Presentación e benvida a cargo de Francisco Domínguez, director da Fundación Penzol.
* Intervención de Cesáreo Sánchez, presidente da AELG (pódese ler o texto aquí).
* Lectura da acta de concesión de homenaxe por Mercedes Queixas Zas, secretaria xeral da AELG.
* Laudatio a cargo do escritor Víctor F. Freixanes (pódese ler o texto aquí).
* Visionado dun vídeo que recolle o esencial da vida e obra de Francisco Fernández del Riego.
* Entrega da placa conmemorativa á familia de Francisco Fernández del Riego.
* Visionado dun vídeo dos fondos documentais da AELG: Francisco Fernández del Riego respondendo á pregunta, “Por que son escritor?“.
* Lectura de textos de Francisco Fernández del Riego a cargo de Malores Villanueva e Francisco Castro.
* Peche do acto por Cesáreo Sánchez.

O acto conta coa colaboración da Fundación Penzol, Editorial Galaxia e Concello de Vigo (Casa Galega da Cultura). Deixamos aquí o convite do acto.

Crónicas posteriores en Galaxia, Galicia Hoxe, La Voz de Galicia, Faro de Vigo e Xornal.

A Coruña: recital poético en homenaxe a Perfecto Estévez

Publicado o por

O xoves 17 de febreiro, ás 20:00 h., na Biblioteca de Estudos Locais (Rúa Durán Loriga, 10) da Coruña, terá lugar un recital poético en homenaxe a Perfecto Estévez. A Asociación de Escritoras e Escritores en Lingua Galega en colaboración coa Concellaría de Cultura da Coruña quere mostrar así o seu agradecemento a Perfecto Estévez, deseñador referencial do noso país, e que ten colaborado coa AELG en tempos difíciles. O acto, presentado por Dores Tembrás, contará coa presenza de:

– Lois Diéguez
– Francisco X. Fernández Naval
– Yolanda Castaño
– Xulio L. Valcárcel
– Marica Campo
– Diana Varela
– Cesáreo Sánchez

Haberá unha actuación musical de César Morán e Xosé Taboada.

Na Casa da Cultura Salvador de Madariaga, tamén en Durán Loriga, 10, pódese visitar a Exposición homenaxe a Perfecto Estévez organizada pola Concellaría de Cultura da Coruña.

Conclusións da Asemblea Xeral de socios/as da Asociación de Escritores en Lingua Galega de 2011

Publicado o por

Damos a coñecer as Conclusións e o Pronunciamento sobre a Cidade da Cultura da Asemblea Xeral de Socios/as da Asociación de Escritores en Lingua Galega realizada o sábado 5 de febreiro:

CONCLUSIÓNS DA ASEMBLEA XERAL DE SOCIOS/AS DA AELG

“Denunciamos a regresión na política de investimentos en todos os sectores da cultura, por parte do Goberno da Xunta de Galicia, o que está a destruír o construído nos últimos trinta anos por varias xeracións de creadores e creadoras e por toda a sociedade galega no seu conxunto. Estase a desfacer programaticamente o aínda mínimo tecido industrial na cultura e a necesaria profesionalización na mesma e faise desaparecer de facto a promoción da cultura de base, que é a seiva nutricia do tecido cultural galego, sendo de feito os que crean e demandan o consumo cultural.
Denunciamos a retirada de apoios á cultura e, nomeadamente, aos creadores e creadoras máis novos, por parte da Dirección Xeral de Xuventude, como nova forma de censura económica, impedindo deste xeito a posibilidade de dar continuidade aos encontros e o debate entre os que son o futuro da cultura galega, como se viña facendo en anos anteriores.
Denunciamos a retirada pola Consellería de Economía e Industria do apoio á creación de carácter cultural e de investigación da mesma, o que imposibilita a dotación permanente de contidos para a rede e o avance nas novas tecnoloxías aplicadas á cultura, coutando o desenvolvemento do propio proceso creativo nas diferentes manifestacións da nosa literatura.
Denunciamos que se levou a cabo unha escandalosa e radical diminución dos orzamentos da Consellería de Cultura e en consecuencia dos investimentos económicos desta Consellería nos escritores/as e o seu labor de creación, que nos devolve aos mesmos apoios que se achegaban desde a Administración galega á AELG hai vinte anos. Ao mesmo tempo o Xacobeo converteuse nunha mediocre promotora de festexos sen incidencia no tecido cultural ou no patrimonio cultural do país.
Constatamos que todas estas actuacións estruturais xeraron un crecente paro nos diversos sectores da cultura e, en concreto, no dos escritores como creadores/as de contidos para as diversas manifestacións da actividade cultural, sexa o libro, o teatro ou o sector audiovisual.
Reafirmámonos no expresado publicamente nos dous últimos anos polo Consello Directivo da AELG, contra o novo estatus do galego no ensino, minorizado aínda máis e limitado ao negar a posibilidade de impartir en galego materias vinculadas a áreas e espazos de prestixio na sociedade actual, como é a ciencia e a tecnoloxía. Apoiamos todo aquel profesorado que ten manifestado o seu compromiso para co mantemento da docencia nesta lingua, desde o convencemento da súa validez como ferramenta pedagóxica e necesidade como procedemento de apoio á arredada normalización lingüística.
Defendemos, desde a AELG, que todo o diñeiro que se gasta na cultura é un investimento produtivo, no convencemento inequívoco de que Galiza existe como un pobo, como unha nación diferenciada, porque ten unha cultura propia, un idioma propio, unha literatura que sobrepasa mesmo a dimensión editorial actual do país. Cada euro que se gasta en cultura ou na industria cultural e, en concreto, na consolidación e medre do tecido industrial editorial, non é unha subvención, é un investimento en alza no futuro de Galiza como pobo. Negar diñeiro á cultura é crear paro. O país empobrece cultural, económica e socialmente e negándosenos como galegos e galegas.

En Compostela, a 5 de febreiro de 2011.”

PRONUNCIAMENTO DA ASEMBLEA XERAL DE SOCIOS/AS DA AELG SOBRE A CIDADE DA CULTURA

“Demandamos, desde a AELG, unha moratoria na construción de novos edificios até que non haxa condicións económicas axeitadas e un proxecto de uso sostíbel que responda ás necesidades de Galiza e da cultura galega.
Demandamos que os edificios construídos, ademais de estaren ao uso da cultura galega, sexan desposuídos de pretensións de iconografía megalómana falsamente artística que infrautiliza estes edificios e non responde ás necesidades dun programa de uso racional para ser aproveitado pola cidadanía.
Demandamos asemade que os usos da biblioteca pública deste espazo público galego sexan estrutural e maioritariamente en galego e sobre a cultura galega, sen desbotarmos a súa relación con outras culturas do mundo, como xa é parte da historia e da tradición da nosa cultura ao longo dos séculos.
Demandamos do goberno galego actual, máximo axente responsábel, que procure a autofinanciación dos edificios construídos e mais das súas actividades, non debendo detraer da Consellería de Cultura nin un euro dos seus fondos, escandalosamente minguados polo goberno galego nos dous últimos anos.
Rexeitamos o acollemento da obra de Cela na biblioteca da Cidade da Cultura e pedimos unha auditoría do uso dos fondos públicos entregados á mesma nos últimos vinte anos.
Finalmente, a Asemblea Xeral de Socias e Socios da AELG, reunida no Museo do Pobo Galego, en Compostela, o día 5 de febreiro de 2011, quere deixar claro á cidadanía que a utilización dos edificios do Gaiás, de uso público e construídos con diñeiro público por parte desta asociación, nunca lexitimará o proxecto de orixe nin aqueles que o queiran levar a usos contra a cultura galega ou á confusión sobre o que é cultura galega ou literatura en galego.”

Foron recollidas deste xeito nos seguintes medios: Galicia Hoxe, Xornal, Cultura Galega e La Voz de Galicia.