Asociación de Escritoras-es en Lingua Galega | ::Axenda cultural AELG::

Os Paseos pola Coruña literaria – Outono 2016 son unha iniciativa da AELG desenvolvida coa colaboración e patrocinio do Concello da Coruña.

HORARIO:
– Sábado 24 de setembro (12:00-13:30 h.)
– Sábado 15 de outubro (12:00-13:30 h.)
– Sábado 29 de outubro (12:00-13:30 h.)
– Sábado 12 de novembro (12:00-13:30 h.)

DURACIÓN:
Unha hora e media.

INSCRICIÓN (PREVIA E OBRIGATORIA)
ONDE:
Na conserxaría do Centro Ágora (Lugar da Gramela 17. 15010 A Coruña) ou chamando ao 981 189 888 (a partir das 9:00 h, en calquera dos casos), nas seguintes datas:
– Paseo do sábado 24 de setembro con Xosé Duncan: inscrición desde o venres 9 de setembro.
– Paseo do sábado 15 de outubro con Lucía Aldao: inscrición desde o luns 3 de outubro.
– Paseo do sábado 29 de outubro con Eli Ríos: inscrición desde o luns 17 de outubro.
– Paseo do sábado 12 de novembro con Xulio López Valcárcel: inscrición desde o mércores 2 de novembro.

PREZO:
De balde, con inscrición previa.

REQUISITOS:
Inscrición previa (55 prazas, en cada paseo). Maiores de 16 anos.

PASEOS POLA CORUÑA LITERARIA 2016

Hai moitas formas diferentes de pasear a cidade. Nesta ocasión, seguirémolo facendo a través de paseos pola Coruña da man das propias autoras e autores que escribiron obras ambientadas na nosa cidade: Xosé Duncan, Lucía Aldao, Eli Ríos e Xulio López Valcárcel.

O sábado 24 de setembro retomamos estes paseos que xa comezamos en 2014 e que tanta demanda tiveron entre a cidadanía.

Os 4 seguintes paseos que imos realizar son:

– Sábado 24 de setembro (12.00-13.30 h): paseo con Xosé Duncan.

– Sábado 15 de outubro (12.00-13.30 h): paseo con Lucía Aldao.

– Sábado 29 de outubro (12.00-13.30 h): paseo con Eli Ríos.

– Sábado 12 de novembro (12.00-13.30 h): paseo con Xulio López Valcárcel.

24 de setembro: Xosé Duncan.
Unha viaxe desde A Coruña de hoxe até a Negruña do século XXIV
A historia de Negruña non é máis que a da idade adulta da Coruña. Perdida a inocencia do século XX e castigada polas decepcións do XXI, a cidade aprendeu a marcar os seus propios ritmos, a ditar as súas propias normas. Durante a nosa andaina, asistiremos á convocatoria de emprego no Arquivo do Reino de Galicia, presenciaremos como os mariñeiros enfermos son recluídos no Castelo de Santo Antón e formaremos parte da reunión clandestina dos Fillos do Gas no Campo dos Menhires, da xestación desa revolta coa que os desposuídos queren castigar esa cidade que renegou deles.

15 outubro: Lucía Aldao
1º de Poeta
Eu son Lucía. Unha rapaza dos Mallos. Coma quen di, “una pava cualquiera”. E ademais, poeta. Porque nos Mallos me criei, e aínda hai quen me tose, a pesar do que me aconteceu por causa miña.

29 outubro: Eli Ríos
Viaxe exprés das orixes á actualidade
Neste camiño mergullarémonos no berce da cidade e da literatura a través da literatura oral. As lendas, contos, textos… que forman o imaxinario das palabras.

12 novembro: Xulio L. Valcárcel
No ecoar dos pasos
“No ecoar dos pasos” será unha volta, unha recuperación da memoria doutro tempo a través da vida e da obra de autores/as que moraron nese espazo da Cidade Vella: Emilia Pardo Bazán, Manuel Murguía, Rosalía de Castro, Francisca Herrera, Miguel González Garcés…

Desde a web de Rosalía Fernández Rial:
““Para hibridar o imaxinario cómpre xogar á corda coas fronteiras. Sempre coa intensidade precisa, a golpe de ilusión. Xusto aí, no non-lugar aprenderemos a fusionar a lingua infinda da arte literaria con todas as demais, sen restrición ningunha. Vés brincar?”
Difundimos a mensaxe cal Anunciación dun circo literario, artístico. Entre a distorsión musical dos megáfonos ambulantes e os brincos da poesía acróbata, lanzamos un convite para perder o medo a danzar. C’mon, C’mon! Voilà!
Esta semana conquistamos a metade xusta dese proceso colectivo cun obxectivo común: HIBRIDAR O IMAXINARIO.
Tras varias sesións de esforzo compartido, catarse dramática e intensidade laboral, estamos en condicións de afirmar que atopamos unha nova vía de traballo. Unha metodoloxía interdisciplinar, cooperativa, cognitiva e integral. Un exercicio de experimentación que cuestiona os lindes entre os eidos do literario, o musical, o plástico e o escénico, trasladándoos a unha outra dimensión creativa e vital.
Cómpre ser prudentes e agardar ao desenvolvemento completo do Obradoiro antes de extraer conclusións definitivas e difundilas. Mais por agora atrevémonos a adiantar o máis sincero dos agradecementos ás entidades e participantes que están a facer isto posible, pois a singradura percorrida non podía ser máis produtiva, esperanzadora e feliz.
Seguiremos informando.”