Arquivo da categoría: Premios narrativa: convocatorias

Convocado o Concurso Literário As Nossas Letras

Publicado o por

“Os autores do blogue Desperta do teu sono…!! temos a bem organizar um concurso literário de narrativa no que poderão participar todas aquelas pessoas que nos enviem um texto. As bases são as seguintes:

– 1. O tema é livre mas em qualquer caso terá a ver com a Galiza ou com qualquer manifestação material ou imaterial do seu ser.
– 2. Com este Concurso Literário, pretende-se proporcionar à participação livre e criadora de escritores, como condições de união entre os povos da Lusofonia e nomeadamente para fomentar a solidariedade com a Galiza.
– 3. Podem concorrer ao presente Concurso todas aquelas pessoas que estiverem de acordo com estas bases ficando assente que os direitos de autor são cedidos gratuitamente à organização, no acto de concorrer.
– 4. O texto terá de ser original e nunca antes ter sido premiado em qualquer outro concurso literário. Em caso de não se cumprir este requisito o prémio será anulado em caso de o ter conseguido.
– 5. Serão admitidas a concurso as produções escritas em Língua Portuguesa seguindo as Normas do Acordo Ortográfico em vigor.
– 6. O tamanho há de ser de um mínimo de duas folhas e um máximo de seis em formato A4 de um só lado. Cada concorrente só poderá submeter a concurso um máximo de dous trabalhos.
– 7. Deverá ser enviados só um exemplar de cada trabalho, digitados em tipo Times New Roman 12, a um espaço e meio, de um só lado do papel, no formato A4.
– 8. Cada trabalho há de ser enviado ao e-mail asnossasletras@gmail.com identificando o autor com:
* 8.a Nome completo do autor e Pseudónimo. O texto publicará-se com o pseudónimo mas o envio com o nome é obrigatório.
* 8.b Número de Identidade ou DNI.
* 8.c Título.
* 8.d Morada ou residência incluíndo a localidade e o País.
* 8.e Telefone e e-mail.
– 9. O prazo de recepção dos trabalhos começa o 15 de Junho de 2011 e termina a 31 de Julho de 2011 (conta a data do de chegada do e-mail).
– 10. Todos os textos chegados serão publicados no blogue para que possam ser lidos publicamente mas só serão publicados todos aqueles textos que reunam uma qualidade mínima entendendo-se que a partir do momento em que ficam publicados estão a participar no concurso.
– 11. As votações serão virtuais e dependerão do público leitor ficando o resultado à vista de todos. Estas hão de se fazer indicando o co-e do votante e o seu nome completo sem qualquer comentário.
– 12. Haverá um único prémio consistente em um exemplar do livro Bandeiras da Galiza e uma bandeira do Reino de Galiza. O prémio será enviado ao endereço do ganhador com os dados indicados por ele.
As características da bandeira são: Medidas: 150 x 90 cm / Material: tela poliéster. Inclui dois anéis metálicos laterais para seu içado.
– 13. Os trabalhos não serão devolvidos, ficando propriedade da promotora do certame, que deles fará o uso legal que considerar útil ao fim a que se destinam, nomeadamente uma Coletânea em forma de e-book a publicar neste blogue.
– 14. Os autores de trabalhos não distinguidos e participantes no concurso com a publicação dos textos no e-book, poderão obtê-lo descarregando de graça e livremente de internet desde a sua publicação no blogue.
– 15. Quaisquer omissões ou situações imprevistas serão resolvidas pelos responsáveis do blogue. Perante as resoluções não haverá recurso.”

109 obras compiten nos tres premios Xerais 2011, que se fallarán o vindeiro 11 de xuño

Publicado o por

Os xurados dos Premios Xerais declararán as obras finalistas na súa primeira reunión, que se celebrará o venres, 3 de xuño. Os premios serán fallados o sábado 11 de xuño na illa de San Simón. Edicións Xerais de Galicia, unha vez pechado o prazo de admisión de orixinais dos seus premios literarios 2011, nomeou aos membros dos tres xurados:
– O xurado da XXVIII edición do Premio Xerais de Novela, dotado con 25.000 euros e no que concorren corenta obras, está formado por: Francisco Pérez Lorenzo (xornalista), Pemón Bouzas (escritor e xornalista), Paula Gómez del Valle (fotógrafa e profesora), Jorge da Cunha (notario), Berta Dávila (escritora) e Fran Alonso (secretario do xurado), en representación de Xerais, con voz e sen voto.
– O xurado da V edición do Premio Fundación Caixa Galicia de Literatura Xuvenil, dotado con 10.000 euros e no que concorren vinte e tres obras, esta formado por Isabel Bilbao Freire (representante da Fundación Caixa Galicia), Susana Piñeiro Paz (profesora), María Dolores Tobío Iglesias (profesora), Sabela Vilar Estévez (estudante de 4º da ESO), Andrea Ramos Queixas (estudante de 3º da ESO) e Xosé Manuel Moo Pedrosa (secretario do xurado), en representación de Xerais, con voz e sen voto.
– O xurado da XXVI edición do Premio Merlín de Literatura Infantil, dotado con 10.000 euros e no que concorren corenta e seis obras, está formado por: Rodrigo Chao Blanco (ilustrador), Julia González González (mestra de primaria e bibliotecaria), Antonio Reigosa Carreiras (escritor e gañador do Premio Merlín, 1998), Ángeles Roca López (bibliotecaria), Gracia Santorum López (profesora de secundaria e blogueira), e Helena Pérez Fernández (secretaria do xurado), en representación de Xerais, con voz e sen voto.

Convocado o I Concurso de Microcontos do Concello de Valdoviño

Publicado o por

O Concello de Valdoviño a través da Concellaría de Cultura e da Biblioteca Municipal convoca o I Concurso de Microcontos, que rexerán as seguintes bases:

1.- Poderá participar neste concurso calquera persoa residente na comunidade autónoma galega, sempre que o texto presentado esté escrito en língua galega e se cumpran os requisitos esixidos na presente convocatoria.
2.- Establecense as seguintes categorías de participación:
A) De 8 a 11 anos.
B) De 12 a 17 anos.
C) Adultos.
3.- Os temas de referencia dos textos serán:
– os bosques (a ONU declarou o 2011 como o Ano Internacional dos Bosques)
– a música (o Decreto 4/2011 de 13 de xaneiro declara o ano 2011 como Ano da Música de Galicia)
4.- A extensión máxima será de 300 palabras incluído o título.
5.- Os traballos presentaranse por quintuplicado, debendo ser inéditos e non premiados noutros concursos.
6.- O modo de presentación dos traballos será: sobre grande no que conste a categoría e o pseudónimo do autor. No interior deste sobre introducirase :
– O traballo a presentar asinado co pseudónimo.
– Un sobre de menor tamaño, pechado, que leve dentro os datos do autor (nome, apelidos, enderezo, DNI e teléfono) e escrito no exterior o pseudónimo do autor.
7.- O prazo de entrega rematará o mércores 18 de maio ás 14:00 horas. O lugar de entrega será a Biblioteca de Valdoviño sita en Casa de Cultura, Gándara de Abaixo , s/n. Valdoviño C. P. 15552.
8.- Os premios consistirán en vales canxeables por libros en librerías da comarca polos seguintes importes:
* Categoría A: MELLOR MICROCONTO : 40’00 euros / MENCIÓN ESPECIAL : 30’00 euros.
* Categoría B: MELLOR MICROCONTO : 50’00 euros / MENCIÓN ESPECIAL : 35’00 euros.
* Categoría C: MELLOR MICROCONTO : 100’00 euros / MENCIÓN ESPECIAL : 45’00 euros.
9.- Os orixinais premiados quedarán en propiedade do Concello de Valdoviño. Os orixinais non premiados serán destruídos. A participación no concurso conleva a autorización expresa dos autores a que os seus textos podan publicarse e difundirse a través da páxina web do Concello; así mesmo, o Concello de Valdoviño reserva os dereitos para unha posible edición local polo que os autores cederán os correspondentes dereitos de publicación.
10.- O xurado darase a coñecer no mes de maio a través da páxina web do Concello e no taboleiro de anuncios da Casa de Cultura e estará formado por persoas de recoñecida capacidade para xulgar este concurso. Este xurado quedará facultado para resolver calquera incidencia que puidera producirse e non estea contemplada nas bases. Terá en conta o valor literario, o correcto emprego da língua galega e a capacidade de transmisión da mensaxe escrita. As decisións do xurado serán tomadas en única votación por maioría de votos e o seu fallo será irrevocable podendo declarar desertos os premios se estiman que os textos non teñen calidade suficiente. O xurado resérvase o dereito de non admitir a concurso os microcontos que atenten contra os dereitos á intimidade, honra e a propia imaxe ou que conteñan connotacións sexistas, discriminatorias, difamatorias ou calesquera que atenten contra a dignidade.
11.- O fallo do xurado farase público o día 24 de maio e será publicado na páxina web do Concello. Os premios serán entregados en acto público o domingo 29 de maio coincidindo co peche de actos celebrados co gallo das Letras Galegas 2011 .
12.- A participación no concurso implica a aceptación das presentes bases.

En Valdoviño, abril de 2011.

Alcaldesa, Mª Isabel Álvarez Diéguez.

Convocado o VII Concurso de Relatos de Muller Matilde Bares polo Concello de Bueu

Publicado o por

O Concello de Bueu convoca o VII Concurso de Relatos de Muller Matilde Bares, coas seguintes bases:
“- Participantes: Poderán participar homes e mulleres maiores de idade e residentes na Comunidade Autónoma de Galicia.
– Tema: Será libre, dentro da temática de muller. Non obstante, valorarase especialmente o tratamento da igualdade de oportunidades entre homes e mulleres, a corresponsabilidade nas obrigas familiares e sociais e a violencia de xénero. Os criterios de valoración para elixir as obras premiadas serán a orixinalidade no tratamento do tema, a expresión literaria, a creatividade e a utilización dunha linguaxe non sexista.
– Prazo de presentación: As obras teñen que ser presentadas -ou enviadas por correo- desde o 8 de marzo ata o 31 de maio ao Rexistro Xeral do Concello de Bueu (Eduardo Vincenti, 8, 36930 Bueu-Pontevedra), facendo constar no sobre CONCURSO DE RELATOS DE MULLER, MATILDE BARES.
– Premio: O premio consiste nunha dotación económica de 1500 €. O premio darase a coñecer nun acto público ó que terá a obriga de asistir a persoa gañadora.
– Condicións técnicas da obra: Os relatos só se poderán presentar no idioma galego. Os relatos serán orixinais e inéditos e non premiados con anterioridade en calquera outro concurso ou certame, para tales efectos, os concursantes realizarán unha declaración xurada na que se manifeste esta cuestión e que se presentará coa documentación requirida. Os traballos presentaranse en soporte papel e informático, debidamente paxinados. Terán unha extensión non inferior a 20 folios nin superior aos 40, escritos por unha soa cara, letra Times New Roman, tamaño 12 e interliñado 1,5. Os relatos entregaranse por cuadriplicado, co título da obra, lema e sen sinatura. Ademais, achegarase nun sobre pechado o nome e apelidos, enderezo, teléfono e fotocopia do DNI da autora/or. No exterior do sobre indicarase o título da obra e lema da autora/or. Cada autor/a, poderá presentar o número de relatos que estime conveniente.
– Xurado: O xurado, designado polo CIM, estará integrado por tres membros de recoñecida relevancia no eido literario. Actuará coma secretaria do mesmo, con voz e sen voto, a directora do CIM. A decisión do xurado, que será inapelable, darase a coñecer no mes de xuño.
– Devolución das obras: A obra premiada quedará en poder do Concello de Bueu, sendo do mesmo a titularidade dos dereitos e de publicación durante un ano. Os orixinais non premiados poderán retirarse no C.I.M. de Bueu, un mes despois de que se faga pública a decisión do xurado. Os que non se recollan neste prazo, serán destruídos.
– Normas Finais:
O xurado do certame terá a competencia de resolver calquera circunstancia non prevista nas presentes bases. O concello de Bueu declina a responsabilidade que poida xurdir no caso de que o relato gañador faga referencia a persoas vivas e circunstancias reais das que non teña coñecemento, e non se faga referencia expresa á autorización dos interesados/as. Será responsable únicamente o/a autor/a. O concello de Bueu non se fará cargo dos custos económicos para a devolución das obras por correo das/os autoras/es que o soliciten. A participación neste certame supón a total aceptación das presentes bases.”

Convocado o Premio de Novela por Entregas de La Voz de Galicia

Publicado o por

“Ata o vindeiro día 1 de xuño de 2011 estará aberto o prazo para presentar orixinais ao Premio de Novela por Entregas de La Voz de Galicia, certame do que sairá a obra que se publicará ao longo do mes de agosto na edición impresa do xornal mais na súa páxina web. Ademais da extraordinaria difusión que acadará o texto gañador, o seu autor recibirá os 6.000 euros cos que está dotado o galardón. O premio chega á súa undécima edición, que está aberta á participación de todas as persoas que presenten unha novela inédita que non opte a outros concursos, que estea escrita en idioma galego e que se compoña de 31 capítulos. Cada un destes deberá ter a mesma extensión, fixada en 3.500 caracteres con espazos, para a súa publicación durante os 31 días do mes de agosto.
Os aspirantes deberán remitir catro copias dos orixinais, impresas a dobre espazo e por unha soa cara, co enderezo 11.º Premio de Novela por Entregas de La Voz de Galicia, Avenida da Prensa, parcelas 84 e 85. Polígono Industrial de Sabón, 15142, Arteixo, A Coruña, polo sistema de plica pechada, introducindo nela os datos do autor que permitan poñerse en contacto no caso de resultar finalista ou gañador. Os orixinais que non sexan reclamados nun prazo dun mes dende o momento do fallo serán destruídos. A organización do premio designará o xurado, cuxa decisión será inapelable e que se fará pública antes do 25 de xullo, tanto no xornal como na súa web.
Os premios distinguiron, sucesivamente, a Marilar Aleixandre, Miguel Suárez Abel, Xosé Antonio Perozo, Ángel de la Cruz, Carlos Freire, Santiago Lopo, Concha Blanco, Emilio Alonso, Alberto Ramos e An Alfaya. Anteriormente, nas Páxinas Literarias aparecera O xabaril branco, de Tucho Calvo.”

Convocado o Certame Literario das Letras Galegas

Publicado o por

O Concello de Vilalba, a través da concellaría de Cultura, convoca unha nova edición do Certame Literario das Letras Galegas, no que se repartirán 780 euros en premios entre os gañadores das distintas modalidades. Haberá dous premios abertos a todos os mozos de 15 a 18 anos de toda a comarca de Terra Chá: o Manuel Mato Vizoso para o mellor traballo en prosa galega e o Xosé María Chao Ledo, para o mellor poema inédito en galego. Ambos están dotados con 210 euros e diploma. No ámbito do municipio vilalbés, na categoría de dez a 15 anos, estarán os premios Xosé Lois García Mato en prosa, dotado con 120 euros, e García Hermida, de 100 euros, en verso. Para os menores de dez anos, convócanse os premios Carmiña Prieto Rouco e Lois Pereiro, en prosa e poesía, respectivamente. O prazo para presentar as obras finaliza o 6 de maio, ás 14:00 horas. Os traballos deben remitirse ao consistorio (Praza da Constitución, 1. C. P. 27800, Vilalba), cun pseudónimo e un sobre pechado aparte cos datos persoais do autor.

Bases do Premio de Narrativa Breve Repsol 2011

Publicado o por

“A Fundación Repsol, en colaboración coa Consellería de Educación e Ordenación Universitaria da Xunta de Galicia, no desexo de contribuír ao desenvolvemento da literatura galega, convoca a quinta edición do Premio de Narrativa Breve Repsol, de acordo coas seguintes

BASES

1. A este premio poderán concorrer todos os autores e autoras que o desexen, excepto a persoa gañadora da edición anterior, cunha obra escrita en lingua galega, conforme á normativa establecida pola Real Academia Galega.
2. As obras, que serán orixinais e inéditas, terán unha extensión non inferior a 50 folios nin superior a 120.
3. Os orixinais, dos que se presentarán seis copias encadernadas, estarán mecanografados a dobre espazo, a razón de 32 liñas de 70 caracteres, aproximadamente. En cada un deles figurará o título da obra e o lema desta. Ademais, acompañarase un sobre pechado no que figurará o citado lema e, no seu interior, o nome, enderezo, números de teléfono fixo/móbil do autor ou autora e unha recensión biográfica recente.
4. As obras enviaranse antes do 22 de xullo de 2011, facendo constar no sobre: Premio de Narrativa Breve Repsol, ao seguinte enderezo: Complexo Industrial Repsol. Apartado 700. 15080 A Coruña.
5. Axuntarase aos orixinais unha declaración xurada asinada polo autor/a onde declare a súa autoría sobre a obra, así como a súa orixinalidade. A non inclusión de dita declaración xunto coa obra será motivo para que a obra en cuestión sexa excluída automaticamente, considerarase non remitida e non presentada e destruirase.
6. Establécese un único premio dotado con 9.000 (nove mil) euros. Esta cantidade estará suxeita á retención a conta do IRPF que legalmente corresponda.
7. O premio poderá declararse deserto sempre que o xurado considere que as obras presentadas non reúnen a calidade suficiente.
8. A contía do Premio inclúe a adquisición dos dereitos de explotación da primeira edición en galego de ata un máximo de 1.500 exemplares do texto gañador. Estes dereitos corresponderanlle en exclusiva á Fundación Repsol. A obra premiada será publicada por Editorial Galaxia nos termos que acorden a Fundación Repsol e a Secretaría Xeral de Política Lingüística. En todas as edicións que se realicen se fará constar o nome de Premio de Narrativa Breve Repsol 2011.
9. O xurado estará composto por:
— unha persoa nomeada pola Secretaría Xeral de Política Lingüística,
— unha persoa nomeada pola Fundación Repsol,
— unha persoa nomeada pola Real Academia Galega,
— unha persoa nomeada pola Asociación de Escritores en Lingua Galega, e
— unha persoa nomeada por Editorial Galaxia.
A decisión do xurado será inapelable e farase pública no mes de setembro do ano 2011.
10. A entrega do Premio terá lugar nun acto público que se celebrará na cidade da Coruña. A non ser por razóns de forza maior, a persoa gañadora deberá estar presente no acto de entrega do Premio.
11. Os orixinais non premiados serán devoltos, sempre que os/as autores/as así o soliciten por escrito, no prazo máximo de dous (2) meses a partir da data en que se faga pública a resolución do xurado. Os orixinais que non se retiren destruiranse.
12. Os datos achegados polos participantes no Premio incorporaranse a un ficheiro automatizado titularidade da Fundación Repsol, entidade con domicilio en Madrid, rúa Velázquez, 166, 28002, cuxo tratamento estará suxeito á Lei Orgánica 15/1999, do 13 de decembro, de Protección de Datos de Carácter Persoal, e a súa normativa de desenvolvemento, coa finalidade de utilizarse para a realización de cantas xestións sexan necesarias para o desenvolvemento do Premio, incluída a selección do gañador, a publicación da listaxe do gañador e a posterior entrega do premio a éste. Os participantes terán o dereito de acceder a este ficheiro e rectificar, cancelar e/ou opoñerse ao tratamento dos seus datos. Neste caso, deberán comunicalo expresamente, para o que enviarán unha comunicación escrita á antedita dirección.
13. Os participantes autorizan expresamente, sen dereito a contraprestación ningunha e con carácter indefinido, que a Fundación Repsol poida facer difusión, en calquera medio de comunicación interno e/ou externo que estime oportuno, dos seus datos persoais, consistentes no seu nome e apelidos como gañador do Premio, coa exclusiva finalidade de asegurar a divulgación, por calquera medio e coñecemento, da realización e adxudicación do Premio.
14. Os participantes autorizan expresamente, con carácter indefinido, que a Fundación Repsol poida facer difusión, en calquera medio de comunicación interno e/ou externo que estime oportuno, do nome e apelidos do gañador do Premio, sen que iso xere dereito de pago e/ou indemnización ningunha a favor dos participantes.
15. Nos aspectos non incluídos nestas bases ou naqueles que puidesen ser obxecto de interpretación, a decisión corresponderalles ás entidades organizadoras, as cales, unha vez que consultados os membros do xurado, emitirán ditame que será inapelable.
16. A participación na convocatoria do Premio Narrativa Breve Repsol 2011 implica a aceptación destas bases.

Santiago de Compostela, 2 de maio de 2011.”

As bases poden descargarse tamén neste arquivo: Bases Premio Narrativa Breve Repsol 2011.

XVIII edición do Certame Literario de Cambre

Publicado o por

“Co obxectivo de estimular a creación literaria e fomentar a súa difusión entre a mocidade, os Equipos de Normalización Lingüística e os Departamentos de Lingua Galega e Literatura dos dous Institutos de Educación Secundaria de Cambre, Afonso X e David Buján, as asociacións de nais e pais e a Concellería de Cultura e Contratación do Concello de Cambre, convocan esta XVIII edición do Certame Literario Cambre 2011 de acordo coas seguintes:

B A S E S

PRIMEIRA.- Poderá participar neste certame calquera moza/-o de idade comprendida entre os 12 e os 26 anos, segundo as seguintes categorías:
– CATEGORÍA A: de 12 a 14 anos.
– CATEGORÍA B: de 15 a 18 anos.
– CATEGORÍA C: de 19 a 26 anos.
SEGUNDA.- Cada participante poderá presentar unha proposta a calquera das dúas modalidades: Poesía e Narración breve. Na modalidade de poesía presentaranse tres poemas como mínimo, de tema e forma libres. Na modalidade de narración breve a extensión máxima será de cinco DIN-A4 e o tema libre.
TERCEIRA.- Os traballos estarán escritos en lingua galega e deberán ser orixinais, inéditos e non premiados.
CUARTA.- Deberán de estar escritos con ordenador, en papel de tamaño DIN-A4, espazamento entre liñas simple e tamaño de letra 12, por unha soa cara; paxinados e sen asinar. Entregaranse orixinal e catro copias nun sobre no que figure: XVIII CERTAME LITERARIO, o lema ou pseudónimo do autor ou autora, a categoría (A, B ou C) e a modalidade (narración ou poesía). Cada traballo presentado levará xunto un sobre pechado no que, por fóra, deberán figurar os mesmos datos, e no interior, unha fotocopia do DNI, e a ficha de inscrición cuberta e asinada, que contén ademais os datos de teléfono, correo electrónico e nome do centro no que estudia ou traballa.
QUINTA.- Os traballos poderán presentarse persoalmente nas administracións dos Institutos ou ben seren enviados por correo ordinario a:
Concello de Cambre – Área de Cultura e Contratación
Adro, 1 – 15660 Cambre
SEXTA.- Haberá dous premios por categoría e modalidade, aínda que o xurado poderá declarar desertos calquera deles no caso de considerar insuficiente a calidade dos traballos presentados. O importe dos premios será de:
– CATEGORÍA A: 1º Premio: 230,00 € 2º Premio: 170,00 €
– CATEGORÍA B: 1º Premio: 290,00 € 2º Premio: 200,00 €
– CATEGORÍA C: 1º Premio: 400,00 € 2º Premio: 230,00 €
SÉTIMA.- Aos premios practicaránselles as retencións legalmente estabelecidas. Con carácter previo á concesión comprobarase que os premiados estean ao corrente das súas obrigas tributarias e coa seguridade social. Non obterá a condición de premiado aquel no que concorra algunha das circunstancias excluíntes que se sinalan na lexislación en materia de subvencións. En todo caso, para a obtención do premio, a reparación de dita circunstancia terá que ser acreditada ante o concello antes do 30 de novembro de 2011.
OITAVA.- A data límite de entrega de traballos será o venres 29 de abril de 2011.
NOVENA.- A composición do xurado darase a coñecer no acto de entrega de premios, que terá lugar no instituto de secundaria David Buján de Sigrás (Cambre), o venres 27 de maio de 2011, ás 12:30 h.
DÉCIMA.- A organización do Certame resérvase o dereito a publicar os traballos premiados. Neste sentido os autores renuncian a calquera tipo de remuneración pola autoría.
UNDÉCIMA.- Os traballos non premiados poderán ser solicitados polos seus autores ata un mes despois de que se faga público o fallo do xurado. Aqueles que non sexan reclamados destruiranse pasado este prazo.
DUODÉCIMA.- O xurado e a organización do certame están facultados para tomar as decisións que consideren oportunas ante a aparición dalgún imprevisto non recollido expresamente nas presentes bases. A participación neste certame implica o coñecemento e a aceptación íntegra destas bases.”