Entrevista 
de Daniel Salgado a Manuel Rivas en El País:
“Todo é silencio, na rúa da man de Edicións Xerais o 14 de outubro, traza a historia da economía ilegal na Galicia da segunda metade do século XX. Pero faino suspendendo a trama no aire. “Gustaríame dicir, con John Ford”, argúe o escritor, “que todo é ficción mais todo é verdade”. A metamorfose que levou do estraperlo de rubio de batea ao narcotráfico conectado, internacionalmente, a varias bandas acontece nun lugar imaxinado, Brétema. “Non é un libro documental, como os grandes grandes traballos de Perfecto Conde ou Felipe Suárez sobre o tema, ou o traballo xornalístico de Elisa Lois ou Julio Fariñas”, argúe, “pero eu quería escribir unha boa historia, e iso implica verosimilitude”. Non hai referentes concretos en Todo é silencio e, porén, nada é mentira: “O mesmo escenario está prendido da realidade”.”
Arquivo da categoría: Narrativa
Santiago: presentación de Onde houbo lume, de Marica Campo
O 
xoves 30 de setembro ás 20:00 h. preséntase na Libraría Couceiro de Santiago (na Praza de Cervantes) Onde houbo lume, de Marica Campo, publicado por Biblos, unha novela con once historias en feminino.
Ferrol: ciclo de As miñas lecturas favoritas e Clube de Lectura en Galego
A 
Biblioteca 
Municipal de Ferrol, sita na céntrica Praza de España, pon en marcha hoxe un novo ciclo de animación á lectura titulado: As miñas lecturas favoritas, destinado a lectores adultos. A actividade, que se desenvolverá ao longo de seis luns entre os meses de setembro e decembro, enmárcase dentro da programación posta en marcha pola Concellería de Cultura e do programa Letras Vivas, promovido pola Consellería de Cultura coa finalidade de promover os hábitos lectores, así como o libro e a lectura en galego. As sesións celebraranse ás 19.30 h., con entrada libre e gratuíta, e nelas preténdese tamén promover o diálogo naqueles lectores con inquedanzas culturais e ganas de ler. Para iso, contarase con prestixiosos nomes da literatura galega como Marilar Aleixandre (27 de setembro), Francisco Fernández Naval (4 de outubro), Santiago Jaureguizar (18 de outubro), Marina Mayoral (8 de novembro), Yolanda Castaño (22 de novembro) e Carmen Blanco (20 de decembro).
Por outra banda, desde o mércores 13 de outubro, e en mércores alternos entre as 19:00 e as 20:30 h., Henrique Dacosta coordinará o Clube de Lectura en Galego.
Lugo: presentación da revista oral O Pazo das Musas
O 
xoves 30 de setembro, a partir das 20:00 h., preséntase no Refectorio do Museo Provincial de Lugo outra edición da revista oral de periodicidade trimestral, editada polo Museo Provincial (Rede Museística da Deputación de Lugo), O Pazo das Musas. O sumario está formado por:
– Música: Arranxo musical sobre Chove en Santiago (Federico García Lorca) para a obra de teatro Km. 526 de Paloma Lugilde. Intérpretes: Carlos Díaz, Xabi Díaz e Paloma Lugilde (3’).
– O cruceiro do adro da igrexa de Trobo, Begonte (Lugo), por Fernando Arribas Arias (5’).
– Música: Meu Amor (Poema-correspondencia entre os pais de Luz Pozo Garza na guerra civil). Arranxo musical para a obra de teatro “Km 526” de Paloma Lugilde. Intérpretes: Carlos Díaz, Xabi Díaz e Paloma Lugilde (3’).
– Lectura: Fume (texto e imaxes), por Antón Fortes (5’).
– Presentación e proxección da curtametraxe Leo de Fernando Cortizo (15’), por María Hernanz, directora de arte de Artefacto Producciones.
– Música: Nanas de la Cebolla (Poema de Miguel Hernández). Música e interpretación: Carlos Díaz (3’).
– Lectura: Caderno de Animalista (texto e imaxes), por Antón Fortes (5’).
– Presentación do proxecto: Queres que cho conte?, por Paloma Lugilde (5’).
– Lectura: O rato do souto e o rato da casa (Proxecto: Queres que cho conte?). Voces: Paula Buján, Paloma Lugilde, Carlos Díaz e Sabela M. Eiriz. Ilustracións: Sabela M. Eiriz e Mar Eiriz. Música: Carlos Díaz. Comentario sobre os contos: Antonio Reigosa (10’).
– Música: Nana dos avós. Música e interpretación: Carlos Díaz (3’).
– Lectura: O piollo e a pulga (Proxecto: Queres que cho conte?). Voces: Paula Buján, Paloma Lugilde, Carlos Díaz e Sabela M. Eiriz. Ilustracións: Sabela M. Eiriz e Mar Eiriz. Música: Carlos Díaz. Comentario sobre os contos: Antonio Reigosa (10’).
– Música: Xulieta na auga. Música de Carlos Díaz para a obra de teatro O Público de Paloma Lugilde. Intérprete: Carlos Díaz (3’).
– Poesía: Espiñas (Lectura de poemas de Figuras masculinas de meio-corpo, Sexto Fetiche e Espiñas), por Antón Fortes (5’).
– Opinión: Intervención do público. Entrega de diplomas aos amigos/as da revista (3’).
– Epílogo, por Aurelia Balseiro, directora do MPL (3’).
– Contraportada musical: Durme neniña (Xosé María Álvarez Blázquez). Música e interpretación: Carlos Díaz (3’).
As rulas de Bakunin, de Antón Riveiro Coello, gaña proxección internacional para a literatura galega
As 
rulas de Bakunin, novela de Antón Riveiro Coello publicada en Galaxia, e xa traducida para o portugués, o castelán e o italiano, foi seleccionada para o Panel Outono/Inverno 2010 do proxecto de Venda de Dereitos no Reino Unido do New Spanish Books, proxecto promovido polo ICEX (Instituto Español de Comercio Exterior) para fomentar a tradución da literatura publicada en España no Reino Unido. Dos 228 títulos propostos polas editoras para esta edición do panel, 11 obras foron as escollidas por un comité independente de expertos polo seu interese e atractivo para seren traducidas no Reino Unido. O Panel poderá ser consultado neste enlace.
Xabier López: “Un Goberno non acaba cunha literatura, pero todo incide”
Entrevista 
de Xosé Manuel Pereiro a Xabier López en El País:
“Xosé Manuel Pereiro (XMP): Do que fala Os libros prestados é da influencia dos libros nos lectores. Mesmo considerou que As vidas prestadas non sería mal título.
Xabier López (XL): A idea era, e a foto da portada refórzaa, que suxerise un ensaio. Cítanse uns noventa autores, pero a xeito de comodíns, para falar de xente relacionada cos libros. Os libros non deixan de ser aínda parámetros de conduta, non coa intensidade de Madame Bovary ou o Quixote, pero teñen unha influencia na xente bastante notable.
XMP: En xente da súa xeración, non inflúen máis o cine ou a televisión?
XL: E os videoxogos, pero a literatura é anterior aos libros. E falar de literatura é máis interesante que falar de DVDs. No fondo, todo é narrativa.
XMP: Como ve a literatura galega?
XL: Hai dous anos, diría que habería que deixar a resistencia e a militancia cultural. Que unha literatura normalizada non debe ter ningún condicionante, e que o feito de optar por un idioma xa é abondo. Pero as estruturas culturais resultaron ser máis fráxiles do que pensabamos. A literatura non se acaba por un goberno, pero outra cousa é a incidencia que poden ter determinadas medidas á hora de transmitir a creación á xente. Iso de que a verdade se abre paso á luz polos seus propios medios é moi relativo. Se non se venden libros de texto en galego, as editoriais non poden publicar, nin en galego nin en nada.”
Francisco Antonio Vidal: “Escribir é unha forma de manifestar as preocupacións”
Entrevista 
a Francisco Antonio Vidal en La Voz de Galicia:
“La Voz de Galicia: Esta novela saíu á luz pouco despois da presentación dun ensaio sobre os ritos e a fe, ¿que é máis complicado, escribir novelas ou obras de investigación?
Francisco Antonio Vidal: Os libros de investigación están dirixidos a un público moi concreto e teñen que servir para achegarlle información nova ao lector, senón é mellor non facelos. Isto implica un traballo intenso de mirar bibliografías, percorrer lugares, falar con xente… Pero a novela tamén implica moito esforzo. No caso de As deusas do calvario, eu decido poñerme con ela despois de ler dous libros e movo moita información e publicacións diversas para ir creando os personaxes. Cada obra, independentemente do xénero, require o seu traballo.”
Illa de San Simón: acto literario-musical Os libros arden mal
O sábado 25 de setembro a partir das 18:00 h. celébrase na Illa de San Simón unha performance literaria e musical sobre Os libros arden mal, onde Manuel Rivas estará acompañado polo cantante de tangos Marcos Meléndrez, o guitarrista Gastón Rodríguez e o gaiteiro, cantante e serruchista Pulpinho Viascón. Neste concerto escénico, palabras, música e imaxes van construíndo un espazo de re-existencia e de memoria sensorial sobre as cinzas da desolación. O punto de partida do relato e do espectáculo é un episodio real: a queima de libros das bibliotecas populares na dársena da Coruña, en agosto de 1936, e vai seguindo o rastro do fume que desprenden as fogueiras, ata que nas esquinas da historia escóitase o clamor de tangos, a melancolía indómita do mar, o serrucho que sona como un violín… As persoas interesadas en asistir deberán formalizar previamente a súa reserva para facer uso do transposte marítimo que AGADIC se habilitará para a ocasión. O barco partirá, tanto o sábado coma o domingo, ás 17:00 horas do porto de Vigo. As reservas haberán de realizarse tanto por teléfono (902 022 537) como por mail (loa@viaxesloa.com) ata cubrir a capacidade da embarcación.
Santiago: presentación de Animais, de Séchu Sende
O 
sábado 25 de setembro, a partir das 19:00 h., preséntase na Libraría Couceiro (Praza de Cervantes, 6) de Santiago de Compostela o novo libro de relatos de Séchu Sende: Animais, publicado en Através Editora.
