Arquivo da categoría: Obradoiros
Pontevedra: Obradoiro de creación literaria Canto como conto. As cores da música na lingua, impartido por Cristal Méndez (Maga de Voz)
Destacado
O Obradoiro de creación literaria Canto como conto. As cores da música na lingua, é unha iniciativa da Escola de Escritoræs da AELG, co patrocinio e colaboración do Concello de Pontevedra.
Este obradoiro, impartido por Cristal Méndez Queizán (Maga de Voz), coa intervención nunha das sesións de Marga do Val, está dirixido a persoas que utilizan a voz e a expresión oral (poetas, contacontos, actrices e actores, locutores, cantantes etc. ) e que procuran unha comunicación máis auténtica, profunda e persoal co público.
Con metodoloxía práctica e individualizada, e de orientación “somática”, aborda a estreita relación entre música, canto, fala, emoción e sensación, revisando a complexa convivencia entre a linguaxe verbal e a musical.
Deste xeito, incide na linguaxe das sensacións revalidando os elementos comunicativos preverbais da voz (sons “animais”, interxeccións, timbres e efectos) que conectan cunha comunicación emotiva, xenuína e rica en matices.
– 15 prazas dispoñíbeis para persoas maiores de 18 anos.
– A inscrición, gratuíta e obrigatoria, farase mediante correo electrónico en oficina@aelg.org indicando o nome, apelidos e o nome do obradoiro. As prazas asignaranse por orde cronolóxica de chegada das solicitudes.
– O obradoiro desenvolverase na Aula da Escola de Escritoras-es da AELG (Seminario 7), no Pazo da Cultura de Pontevedra (Rúa Alexandre Bóveda, s/n).
Calendario
– Días: sábados 12 e 26 de abril; e 3, 10 e 24 de maio de 2025.
– Horarios: de 10:30 a 13:30 h.
Información sobre protección de datos
A/O responsábel do tratamento é a Asociación de Escritoras e Escritores en Lingua Galega. A finalidade do tratamento é a prestación do servizo que se detalla na solicitude ou actividade organizada. A base legal do tratamento é o cumprimento dunha obriga contractual na prestación dun servizo. Os seus datos conservaranse unicamente durante os prazos de prescrición legalmente aplicábeis. Pódense comunicar os seus datos a terceiras/os organizadoras/es ou colaboradoras/es da actividade. No caso de solicitar certificado de asistencia, os seus datos comunicaranse ao/á impartidor/a da actividade. Pode acceder, rectificar, suprimir os seus datos e nos casos determinados opoñerse ao tratamento, limitar o seu uso ou portar a outra/o responsábel. Tamén pode solicitar a tutela da Axencia Española de Protección de Datos ou presentar unha reclamación ante a mesma.
Pontevedra: XXVI Salón Internacional do Libro Infantil e Xuvenil
Allariz: presentación e obradoiro de escrita creativa con Rolando e un fío resistente, de Alba de Evan e Xabier Domínguez
Vigo: curso/obradoiro de escritura creativa por Xavier Queipo
Vigo: presentación do vindeiro obradoiro de escritura creativa da man de Xavier Queipo
A Coruña: obradoiro de escrita creativa con Rolando e un fío resistente, de Alba de Evan e Xabier Domínguez, o 28 de decembro
A Coruña: palestra de Felipe Senén no 19º Ciclo Coros Galegos Cántigas da Terra 2024
Vigo: obradoiros de Improvisación oral en verso, con Branca Trigo, e Narración Oral/Contacontos, con Silvia Penas, Marta Ortiz, Dani Blanco e Débora Vukusic
Gondomar: obradoiro Práctico de Poesía “Soña tifóns unha neanderthalensis na boca da pantera”, impartido por Antón Blanco Casás
Desde o Instituto de Estudos Miñoráns:
“O Instituto de Estudos Miñoráns, coa colaboración do Concello de Gondomar, organiza o obradoiro literario “SOÑA TIFÓNS UNHA NEANDERTHALENSIS NA BOCA DA PANTERA” impartido por Antón Blanco Casás, gañador do XVI Certame de poesía Victoriano Taibo. O obradoiro, de carácter gratuíto, constará de seis sesións presenciais que se desenvolverán os sábados 25 de xaneiro, 15 de febreiro e 15 de marzo de 2025 en sesións dobres de mañá (de 11 a 14 h) e tarde (de 16 a 19 h) na sede do IEM en Gondomar. O prazo de inscrición comezará este xoves 5 de decembro e permanecerá aberto ata completarse as prazas dispoñibles.
Preténdese que as/os asistentes poidan crear novas composicións ou incluso mellorar as que xa teñen, mediante o análise e uso das técnicas que levaron a Antón a vencer na última edición do xa senlleiro certame miñorán.
O grupo PUGA do IEM espera que o obradoiro sirva tanto para a promoción do uso do idioma galego mediante a poesía así como a creación dunha canteira de poetas da que poidan saír futuras/os participantes e gañadoras/es do Certame de poesía Victoriano Taibo.
As inscricións faranse preferentemente no formulario da ligazón seguinte https://forms.gle/xrKMtgrCrTv8dKS59 ou no código QR anexo. O proceso é moi sinxelo e pode facerse dende o propio móbil.”
