O
martes 20 de decembro, ás 17:30 horas, no Salón de Actos do Espazo Xove (Rúa Celso Emilio Ferreiro, 27) de Ourense, Celsa Barja dará un recital poético especialmente dedicado á Asociación de Familiares de Enfermos de Alzheimer de Ourense (AFAOR), dentro das actividades previstas nese recinto polo Día Internacional da Solidariedade. No acto, en que estará acompañada pola música de Israel Elíaz, poranse á venda exemplares do seu poemario Espindo un bico, destinando o 50% da mesma á AFAOR.
Arquivo da categoría: Poesía
Muxía: V recital Poetas da Costa da Morte
Crónica posterior en Que pasa na Costa.
O Incio: Homenaxe a Lois Pereiro
Ourense: recital poético de Celsa Barja
O domingo 18 de decembro, ás 16:00 horas, no Xeriátrico “Nuestra Señora de la Esperanza” (Rúa Laxas, 41), de Ourense, Celsa Barja dará un recital poético, baixo o título Espindo un bico para vestir lembranzas, para a Asociación de Familiares de Enfermos de Alzheimer de Ourense (AFAOR). Recitaránse poemas de Espindo un bico, así como outros compostos para a ocasión, inéditos, e colaborarán recitando residentes do devandito xeriátrico. O cantautor Israel Elíaz acompañará coa súa música.
Día Lugrís, 17 de decembro
“A 
Coruña e Vigo son a mesma cidade. Así nolo di co seu talento a pintura de Urbano Lugrís. Dous pontóns de amarre no mesmo océano. Para significar unha vez máis esta revelación, o vindeiro sábado 17 de decembro celebrarase –simultaneamente- en Vigo e na Coruña a Acción Urbano. Xornada cívico-bohemia, en honra do gran mestre. O Orzán, o Berbés e un único manifesto en botella polos camiños do mar a prol da creatividade e da arte galega. Sábado 17 de decembro. Percalinópolys e Xouba City (isto é A Coruña e Vigo na terminoloxía do pintor) unidas outra vez pola vida, pola bohemia, polo talento abisal de Urbano Lugrís, profeta do atlantismo. O fato de enxarmantes da Coruña autedonimámonos IN NAVE CIVITAS (por suposto ti es membro de honra). Imaxinamos un acto en catro tempos:
1. Ás 20:00 horas: Obradoiro submarino. Xuntanza no palco da música de Méndez Núñez para decorar paraugas con debuxos de peixes. Así, se chove, facemos da necesidade virtude. Saída da manifestación atlántica presidida, con toda pompa e esplendor, polo son dos gaiteiros Os Vicentes de Elviña.
2. Camarote Lugrís. Intervención pictórica rápida na rúa Mantelería, diante do recanto que ocupaba o estudo de Lugrís.
3. Balada do Porto de Os. Estrea no Borrazás (Rúa Orzán, 165), café moi querido por Lugrís, dunha rapsodia inspirada no poema do mesmo nome, composta por Marcos Aboal e Lourenzo Castro.
4. Na Coiraza do Orzán, lectura e lanzamento -en botella- do manifesto, dirección ribeira do Berbés.” Texto de Xurxo Souto.
“Vento feliz o que de Norte a Sur enche as velas e move a olívica Nave das Ideas, con mascarón o símbolo de Venus, e tras si o ronsel labiríntico camiño desta nosa Ítaca negada. Atinado todo. Voltará Xerión.
Nesta Atlántida lugrisiana encantada (Hic habitat felicitas) que devolvedes, busco agora tabernas de poesía e Terra, ergo a cunca de louza como un Grial de Arturo e brindar por vós, por Nós polo Trasmundo estixio, eterno navegar o noso. Sempre torques áureo: do cabo do principio ó cabo do fin, busca da unión, da cosmogonía circular. Reclamaremos bardos e druidas, Pondal, Manuel Antonio, Cebreiro, Laxeiro, Seoane, Ramón de Trasalba, Manuel de Outeiro… Lugrís, memoria feita luz, estrelas no ceo do noso Oriente.
E mentres, neste mencer limpo pola Marola escoitaremos unha alborada senlleira de Emilio Corral. Aturuxo cravado no Ceo e no Mar.” Texto de Felipe-Senén.
A Coruña: presentación de Versos fatídicos (1994-2010), de Alfredo Ferreiro
O venres 
16 de decembro, ás 21:00 horas, no Taller de Litografía Milpedras (Rúa Brasil, nº 3, baixo) da Coruña, e con entrada libre até completar capacidade, preséntase o poemario Versos fatídicos (1994-2010), de Alfredo Ferreiro, publicado en Edicións Positivas. No contexto deste acto terá lugar unha intervención do Grupo Surrealista Galego.
Vigo: recital poético Os libros de Caldeirón, con Eduardo Estévez, Antonio García Teijeiro e María Lado
Santiago: Palabra e Cor, acto pictórico e literario arredor de Brais, de Guillerme Coen
O 
venres 16 de decembro, ás 20:30 horas, na Galería Citania (Rúa Algalia de Abaixo, 39) de Santiago de Compostela, terá lugar Palabra e Cor, programa pictórico e literario ao redor da novela de Guillerme Coen, Brais, publicada en Toxosoutos. Intervirán, xunto ao autor, Baldo Ramos, Manuel Figueiras e Xulio Maside.
Pontevedra: presentación de Héroes de Galiza e de España e Poemas alumeados, libros de artista sobre poemas de Luís Seoane
O 
xoves 15 de decembro, ás 20:00 horas, na Libraría Michelena (Rúa Alameda, 8) de Pontevedra, preséntanse os libros de artista Héroes de Galiza e de España e Poemas alumeados, que recollen poemas de Luís Seoane con debuxos de artistas plásticos contemporáneos, publicado por Figurandorecuerdos Edicións). No acto intervirán Paula Fernández Bañuelos, Domingos Antom Garcia Fernandes e Rosa Espiñeira Pan.
Aberta a inscrición para o obradoiro de escrita poética Eu é un outro, impartido por Xoán Abeleira
Todos 
os xoves 2 de febreiro ó 19 de abril do 2012, no Centro Psicosom (Rúa Federico Tapia, 43, 2º esquerda) da Coruña, de 19:30 a 21:00 horas ou de 20:00 a 21:30 horas (consonte a conveniencia da maioría da xente interesada), terá lugar o obradoiro de escrita poética Eu é un outro. Introdución á poesía moderna. A creación como método de coñecemento e de (pro)cura interior, impartido por Xoán Abeleira. O prezo é de 150 euros en total -50 euros ó mes -a pagar consonte as posibilidades de cada quen. O número máximo de prazas é de 15, cunha duración de tres meses (unha clase á semana, dunha hora e media de duración), con posibilidade de prolongar o curso. Máis información e reservas no teléfono 686397847 e/ou no correo xabeleira@mundo-r.com Este é o seu programa: “No obradoiro mesturaremos a teoría coa práctica poética. Por unha banda, e tomando o poeta francés Charles Baudelaire como punto de partida, percorreremos o desenvolvemento da poesía moderna universal, dende o simbolismo ata as vangardas de principios do século XX, lendo, analizando e comentando os textos claves das súas principais figuras: Charles Baudelaire, Arthur Rimbaud, Jules Laforgue, Walt Whitman, Emily Dickinson, Stéphane Mallarmé, Guillaume Apollinaire, T. S. Eliot, Ezra Pound, os poetas expresionistas alemáns, os poetas cubistas, os poetas futuristas, os poetas superrealistas, etc, ocupándonos especialmente da influencia de todos eses autores e movementos na poesía galega e española daquelas épocas. Por outra, e partindo de exemplos concretos dos tipos de técnicas, estruturas, ritmos, recursos… poéticos inventados e/ou desenvolvidos polos autores estudados, os e as participantes no obradoiro escribirán e comentarán os seus propios textos, realizados consonte os modelos analizados en clase: poemas en verso medido, poemas en verso libre, poemas en prosa, poemas cubistas, poemas expresionistas, poetas superrealistas, etc. Así mesmo, e ó fío de cada un dos autores estudados, abordaremos distintos temas vencellados co feito da creación en si (coma, por exemplo, a relación entre a arte e a meditación, a arte e o xamanismo, a arte e a psicoloxía, a arte e a indagación no inconsciente colectivo e persoal, etc), facendo especial fincapé nas distintas vías en que a creación poética, como método de coñecemento e de sanación, nos axuda a medrar no camiño da sabedoría, revelándonos a realidade última das cousas e, xa que logo, de nós.”
