“A 
escritora Marilar Aleixandre, como mantedora literaria dos Premios Xerais 2012, alertou no seu discurso, O círculo de luz: escrita, conflito e lume, ao papel da lectura e dos libros que iluminan, aqueles que «foron escritos con lume e gardan ascuas entre as súas páxinas», aqueles que «traban en nós, como di Kafka, os que cravan o seu ferrete». Aleixandre defendeu a lectura de «libros que sexan literatura, que teñan lume dentro», sendo xeralmente aquelas obras que «teñen no seu cerne un conflito dentro». A autora de Teoría do caos e de A cabeza de Medusa salientou que «o conflito, a desventura, o infortunio son os vimbios cos que se tecen, non só as novelas chamadas de adultos, senón tamén as xuvenís». «Creo que Rosalía concordaría en que escribir é chamar as cousas polo seu nome e, en moitas ocasións, levar a contraria», engadiu. «As escritoras, os escritores temos por ferramenta a palabra, a palabra xusta, usada como puga de toxo, como ferrete, como machada, como facho que alumea ou incendia. Temos tamén por ferramenta a imaxinación, que nos permite soñar que as causas perdidas serán un día gañadas». Citando a Rosalía de Castro e Castelao, rematou dicindo porque estes autores «imaxinaron ser posible escribirmos en galego, podemos celebrar hoxe estes novos libros. Convócovos a ler libros que arden, a escribir libros que prendan lume».
O texto completo do discurso pode baixarse en pdf aquí.” Vía Xerais.
Arquivo da categoría: Premios e concursos (outros)
O Dicionario Xurídico Galego leva o premio Lois Peña Novo
“O
Dicionario Xurídico Galego, editado por Xerais, foi recoñecido este ano pola Fundación Lois Peña Novo co premio que leva o nome deste galeguista. Canda a este traballo, tamén levaron premios Luís Villares, maxistrado de Lugo, e o policía local de redondela Gonzalo Amoedo. Estes galardóns, que se entregarán o vindeiro 27 de xuño no castelo de Soutomaior, recoñecen o traballo a prol da normalización do galego “nas administracións públicas, na vida institucional de Galicia e na sociedade en xeral”.” Vía Cultura Galega.
Dúas letras, de Eloy Varela e Fina Casalderrey, gran triunfadora en Cans
“(…) A 
película asinada polo director Eloy Varela e con guión de Fina Casalderrey, Dúas Letras, foi a gran triunfadora esta fin de semana no a cada día máis prestixioso Festival de Cine de Cans, onde obtivo tres galardóns e onde a súa protagonista, Teresa Fraga, nai de Fina Casalderrey, se alzou co premio á mellor interpretación feminina. Concretamente, o xurado recoñeceu ‘Dúas Letras’ cos seguintes tres premios:
– Premio do xurado dos veciños de Cans á mellor curtametraxe de ficción. Segundo recolle a acta do premio: “porque é unha historia do mundo rural moi próxima coa que todos nos sentimos identificados. Tamén pola súa delicadeza ao presentar o sufrimento dunha nai que espera as cartas do seu fillo e porque todos coñecemos a historia dunha carta que estivemos esperando e nunca chegou”.
– Premio do público á mellor curtametraxe de ficción, dotado co Can de Pedra e 1.000 euros.
– Premio do xurado á mellor interpretación feminina, dotado co Can de Pedra e 200 euros a Teresa Fraga. Segundo sinalou o xurado: “por ser un traballo veraz e emotivo. Nunca unha carta non escrita foi tan ben lida”. (…)” Vía Galaxia.
Pedro Benavente leva o III Premio Rosalía de Castro de Lingua e Cultura
“O 
veterinario Pedro Benavente, orixinario de Sabiñánigo (Huesca), foi seleccionado pola Deputación da Coruña para levar o III Premio Rosalía de Castro de Lingua e Cultura. O xurado do galardón apuntou o importante traballo de Benavente a prol da recuperación da lingua e da cultura agraria no noso país. Entre outras iniciativas, o galardoado é coautor, co académico Xesús Ferro Ruibal, do Libro da vaca no que repasa a terminoloxía vencellada a este animal no noso país. O xurado apuntou tamén o exemplo de integración na nosa cultura que supón Benavente. O galardoado desenvolveu un intenso traballo no campo de lexicografía con obras como O dicionario Xerais lido por un veterinario, Algunhas achegas ao dicionario na Real Academia Galega–Instituto da Lingua Galega, e participou na elaboración do Dicionario de sinónimos da lingua galega.” Vía Cultura Galega.
30 anos de Premio Blanco Amor
Reportaxe 
en Praza:
“Fene organiza este ano este certame de novela nacido en 1981, nos albores das corporacións democráticas, como un proxecto cultural “mancomundado” e itinerante. Os concellos galegos colaboran dende aquela de forma unitaria para sacar adiante un galardón que serve para “tomarlle o pulso literario” ao país e que gañaron autores como Suso de Toro, Víctor Freixanes, Séchu Sende, Xavier Alcalá ou Ursula Heinze.
“O interesante do Blanco Amor é que é un galardón civil e unha boa maneira de tomarlle o pulso literario á sociedade galega”. Así define a crítica literaria e profesora da USC Dolores Vilavedra a relevancia do Premio de Novela Blanco Amor que neste 2012, organizado polo Concello de Fene, celebra a súa trixésima edición. Dende 1981, escritores como Daniel Cortezón, Víctor Freixanes, Ursula Heinze, Suso de Toro, Francisco Castro, Xosé Carlos Caneiro ou Alfredo Conde fixéronse cun galardón singular, itinerante e mancomunado. Un premio cuxa nómina de gañadores, segundo a filóloga e escritora Inma López Silva, ofrece a posibilidade de analizar a narrativa galega do tramo final do século XX e comezos do XXI. “Permíteche estudar os últimos anos da nosa literatura”, sinala López Silva, quen se converteu na segunda gañadora feminina (a primeira foi Ursula Heinze) do certame en 2007. (…)”
As silenciadas, de Pablo Ces, baseado nun traballo de Aurora Marco, gaña o Mestre Mateo 2011 ao mellor documental
O 
documentario As silenciadas, de Pablo Ces, baseado na investigación Mulleres na guerrilla antifranquista galega, de Aurora Marco, recibiu o premio ao mellor documental nos Premios Mestre Mateo 2011.
Premio Trasalba 2012 para a pedagoga Antía Cal
“A
Fundación Otero Pedrayo concedeu á pedagoga Antía Cal Vázquez o Premio Trasalba 2012, un galardón que se entrega anualmente o último domingo do mes de xuño a unha persoa vinculada co galeguismo e a difusión da cultura galega. O equipo de goberno da fundación decidiu por unanimidade conceder este premio pedagoga, nacida na Habana en 1923 nunha familia de emigrantes orixinaria de Muras (Lugo). Ademais do seu traballo profesional en favor da lingua e a cultura galegas, a Fundación valorou o seu “feminismo activo”, o seu compromiso social, a contorna galeguista no que desenvolveu a súa actividade, a modernidade das súas estratexias de ensino e “a apertura de miras coa que soubo deseñar o seu proxecto educativo”.” Vía El Progreso.
As silenciadas, documentario de Pablo Ces baseado na obra de Aurora Marco, nominado nos Premios Mestre Mateo 2011
O 
documentario As silenciadas, de Pablo Ces, baseado na investigación Mulleres na guerrilla antifranquista galega, de Aurora Marco, está nominado na categoría Documental nos Premios Mestre Mateo 2011, que se entragarán o sábado 28 de abril na Coruña. As silenciadas obtivo o premio Memória i Justícia Universal no III Festival Internacional de Cine de Dereitos Humanos de Santa Coloma de Gramanet en decembro de 2011.
Manuel Núñez Singala e Elena Gallego, premios Frei Martín Sarmiento
“Fallouse 
o 
VIII Premio Frei Martín Sarmiento para as categorías de 1º e 2º da ESO e de 3º e 4º da ESO. Gañaron, respectivamente, Dragal, de Elena Gallego (Xerais) e Menú de enganos de Manuel Núñez Singala (Galaxia).” Vía Gálix.
Víctor Freixanes, premiado co Rosa dos Ventos polos alumnos dun instituto de Bos Aires
“Os 
alumnos de quinto curso de bacharelato do instituto Santiago Apóstolo de Bos Aires puxeron en marcha este ano un premio de carácter anual que homenaxea a quen distíngase para achegar a cultura galega nas dúas beiras do Atlántico. Este ano os alumnos de máis idade do centro educativo da capital arxentina escolleron a Víctor Freixanes como primeiro merecedor deste galardón. As razóns do premio, que será entregado o xoves 19 de abril nas instalacións do Centro Galicia, foron xustificadas polos estudantes co argumento de que Freixanes é «un guieiro que acubilla o respecto polo labor desenvolvido nesta beira do Atlántico a prol da cultura galega». Lembraron as veces que o escritor participou en actividades da comunidade escolar «apoiando os traballos do centro educativo» e introducindo na súa realidade «a importantes figuras académicas e políticas da cultura» galega. Ademais de recoller o premio outorgado polos alumnos do Santiago Apóstolo, un instituto que se denomina galego-arxentino, Víctor Freixanes participa como director de Galaxia na Feira do Libro de Bos Aires, que comezou o pasado luns. Por primeira vez, unha editorial galega representa ao sector español nas mesas de debate. Neste caso, Freixanes participará nunha mesa redonda baixo o título A experiencia dos protagonistas, dedicada ás novas tendencias da industria editorial. (…)” Vía La Voz de Galicia.
