Arquivo da categoría: Premios e concursos (outros)

Finalistas do Premio Frei Martín Sarmiento 2011

Publicado o por

Desde o Blog de Gálix:
“Velaquí o listado dos finalistas da VIII edición do Premio Frei Martín Sarmiento:

1ª Categoría (1º e 2º de EP):
– Abraham Carreiro: As espiñas do porco espiño, Ed. A Nosa Terra.
– María Corleone: María, Ed. Everest.
– Miguel Vázquez Freire: Xurxiño quere ser…, Baía Edicións.

2ª Categoría (3º e 4º de EP):
– Carlos López Gómez: A peripecia de Roi, Ed. Edelvives.
– Antonio Yáñez Casal: Xoa, Ed. Xerais.
– Pinto & Chinto: Contos para nenos que dormen deseguida, Ed. Kalandraka.

3ª Categoría (5º e 6º de EP):
– Teresa González Costa: A filla do ladrón de bicicletas, Ed. Xerais.
– Leticia Vila Sexto: Os tratantes de papagaios, Ed. Galaxia.
– Manuel Darriba: Brais e os demais, Ed. Galaxia.

4ª Categoría (1º e 2º de ESO):
– Elena Gallego: Dragal, Ed. Xerais.
– Andrea Maceiras: Violeta Tamurana, Baía Edicións.
– Francisco X. Fernández Naval: Suso Espada “Nota Roja”, Ed. Everest.

5ª Categoría (3º e 4º de ESO e Bacharelato):
– Manuel Núñez Singala: Menú de enganos, Ed. Galaxia.
– Marcos Calveiro: Settecento, Ed. Xerais.
– Francisco Castro: O segredo de Marco Polo, Ed. Galaxia.

6ª Categoría (adultos):
– Xulia Alonso: Futuro imperfecto, Ed. Galaxia.
– Manuel Portas: Denso recendo a salgado, Ed. Xerais.
– Carlos G. Reigosa: A lei das ánimas, Ed. Galaxia”.

Mini e Mero reciben o Premio Ramón Piñeiro-Facer País

Publicado o por

Mini e Mero, músicos, poetas, mestres e investigadores do patrimonio cultural galego, foron galardoados co Premio Ramón Piñeiro-Facer País na súa décima edición. Xosé Luís Rivas Cruz, Mini, e Baldomero Iglesias Dobarrio, Mero, actuais compoñentes do grupo A Quenlla, formaron parte tamén de Fuxan os ventos. O xurado, integrado por representantes de 18 asociacións culturais da comarca de Sarria (Lugo) analizou e considerou 29 propostas. O premio foi instituído en 2002 pola Asociación Cultural Val de Láncara para recoñecer o labor senlleiro de persoas e entidades a prol de Galicia. O acto de entrega terá lugar en Láncara (Lugo) o vindeiro 15 de outubro. Os 18 membros do xurado, representantes doutras tantas asociacións culturais da comarca de Sarria, avaliaron o constante labor dos premiados, Mini e Mero, “a prol da creación e recreación do cancioneiro galego e de diferentes manifestacións do noso patrimonio inmaterial, participando de modo individual ou con diferentes grupos no proceso de dignificación e recuperación das máis diversas facetas da expresión musical, incoporando ao seu repertorio creacións de poetas clásicos e modernos xunto con obras propias que gozan de xeral aceptación”. Recoñeceron asemade “o compromiso profesional de Mini e Mero como educadores a prol da galeguización do ensino e dunha escola creadora e non alleante no medio rural” e salientaron “a constante e desinteresada colaboración que os premiados prestan a colectivos culturais tanto de Galicia como da diáspora, levando a mensaxe de loita e solidariedade coas xustas reivindicacións do noso pobo”. Subliñaron por último “a súa activa participación nas actividades de recuperación da memoria histórica”. Nesta décima edición a candidatura de Mini e Mero competiu con outras 28, propostas polas distintas asociacións que colaboran con “Val de Láncara” na organización e concesión do Premio Ramón Piñeiro-Facer País. Reseñado en Xornal, La Voz de Galicia, Cultura Galega.

Bases do VIII Certame Literário Feminista do Condado

Publicado o por

A Assembleia de Mulheres do Condado convoca o VIII Certame Literário Feminista do Condado, coas seguintes bases:

“Mais um ano saímos a rua com o Certame literário, nesta ocasiom atinge a sua oitava ediçom. Publicamos a seguir as bases, nom sem antes animar-vos a todas a participar.

1– A temática será livre sempre que esteja relacionada directa ou indirectamente com a situaçom de opressom, dominaçom e exploraçom que padecem as mulheres no actual sistema patriarcal.
2– Poderám participar todas as mulheres que o desejarem sem limites de idade.
3– Os trabalhos serám apresentados exclusivamente em língua galega.
4– Os trabalhos devem ser inéditos.
5– O certame está aberto a qualquer género literário (romance, poesia, teatro, ensaio).
6– Os trabalhos de romance, teatro e ensaio devem ter umha extensom mínima de 20.000 caracteres. Respeito à poesia devem ter um mínimo de seis poemas.
7– O júri é constituído por três mulheres representativas da comarca.
8– O prémio estará dotado com 300 euros, podendo o júri declará-lo deserto ou dividir a quantidade citada em accésits na sua totalidade ou em parte.
9– O prazo de apresentaçom de trabalhos finaliza sexta-feira dia 30 de Setembro de 2011.
10– Os trabalhos serám apresentados por triplicado num envelope em que se fará constar na parte exterior o título e um pseudónimo da autora e, em envelope diferente, identificado com o título do trabalho e o seu pseudónimo, serám entregues os dados pessoais da autora: nome e apelidos, Bilhete de Identidade (BI), endereço, telefone de contacto. Os envelopes serám enviados por correio certificado a: Rua Ciclista Emilio Rodrigues nº 6, 2º C. C.P. 36.860 de Ponte Areias, a nome de Ilduara Medranho-AMC.
11– O trabalho ou trabalhos premiados ficarám em propriedade da Assembleia de Mulheres do Condado. Embora a autora ou autoras manterám os seus direitos sobre segundas ou posteriores ediçons de ser publicado o trabalho premiado.
12– Os trabalhos nom premiados ficarám a disposiçom das autoras durante um prazo de dous meses umha vez atribuído o prémio. Após finalizar este período de tempo, serám destruídos.
13– A interpretaçom das presentes bases som atribuiçom do júri.
14– A decisom do júri é inapelável.
15– A participaçom no prémio supóm a aceitaçom das suas bases.”

Vídeo da mesa redonda Mais tan importantes son os premios literarios?, no V Encontro de escritores/as novos/as ante vellas preocupacións

Publicado o por

Vídeo coa mesa redonda Mais tan importantes son os premios literarios?, con Ledicia Costas, Olalla Cociña e Lucía Novas, coordinadas por Francisco Castro, dentro do V Encontro de escritores/as novos/as ante vellas preocupacións, celebrado na Coruña o 6 de novembro do 2010:

A Semana Negra de Xixón premia a Diego Ameixeiras

Publicado o por

“A Semana Negra de Xixón distinguiu onte a novela de Diego Ameixeiras Dime algo sucio co premio especial que todos os anos outorga o director da mesma, Paco Ignacio Taibo II. A novela, publicada en galego por Xerais e en castelán por Pulp Books, foi presentada o pasado domingo na programación dste festival especializado na literatura negra, criminal e de xénero.” Vía La Voz de Galicia.

Bases do 25º Premio Literario Ánxel Fole, no ano 2011

Publicado o por

“A Fundación Nova Caixa Galicia Claudio San Martín e o xornal El Progreso convocan o 25º Premio Literario Ánxel Fole, conforme ás seguintes bases (pódense descargar aquí: Premio Ánxel Fole 2011):

1.- Establécese un único premio indivisíbel de seis mil euros.
2.- Poderán optar a el todas as persoas que o desexen, con traballos en galego ou en castelán, inéditos, de extensión mínima de cen folios e máxima de douscentos, mecanografados a dobre espazo e por unha soa cara, referidos a calquera aspecto da vida ou da obra de José Almoina Mateos.
3.- Os orixinais enviaranse ou presentaranse por cuadruplicado, baixo plica, na sede da Fundación Nova Caixa Galicia Claudio San Martín en Lugo (Praza Maior, 16, 27001 Lugo), ou no xornal El Progreso (rúa Ribadeo, 5, 27002 Lugo). O prazo de admisión remata o 30 de setembro de 2011. Os redactores de El Progreso non poderán concorrer a este premio.
4.- O premio decidirase en Lugo, no mes de novembro.
5.- O traballo premiado será propiedade do seu autor, aínda que a primeira edición será publicada pola Fundación Nova Caixa Galicia Claudio San Martín. En posteriores edicións deberá constar a súa condición de Premio Literario Ánxel Fole.
6.- O xurado estará formado por persoas de recoñecido prestixio, e será designado polas dúas entidades convocantes.
7.- Os orixinais non premiados non lles serán devoltos aos seus autores, nin as entidades convocantes manterán correspondencia sobre os mesmos.
8.- A interpretación destas bases corresponderalle exclusivamente ao xurado que decidirá o premio. O feito de se presentar a este concurso supón a conformidade do concursante coas presentes bases.”

O ILG esixe discriminación positiva para o galego

Publicado o por

‘Nun discurso contundente e diáfano, a directora do ILG, Rosario Álvarez, leulle a cartilla ao presidente Núñez Feixóo e ás demais autoridades, tanto da Xunta coma do parlamento, as deputacións e os Concellos. “Sen discriminación positiva e maior peso do galego no ensino, o futuro da lingua é complicado”, afirmou. Álvarez considerou no seu discurso de aceptación da Medalla Galicia para o instituto que dirixe, que o galego está a vivir un momento de gran dificultade e subliñou a orixe do problema. “Perante o desafecto de certos sectores sociais e a deserción de certas autoridades, esa crise agravarase até cegarlle o camiño do porvir”. No mesmo acto, o outro galardoado coa Medalla Galicia, o investigador en Xenética Anxo Carracedo, reclamou maior apoio ao desenvolvemento científico. Tras criticar a falta de recursos para a ciencia en Galiza, recordou a “débeda histórica” do Estado co noso país a ese nivel. “Recibimos menos apoio que outros territorios e pola contra os científicos galegos demostran día a día que saben ofrecer moito máis do que reciben”.’ Vía A Nosa Terra. Tamén en El Progreso e Galicia Confidencial.

Día de Feira VI, artigo de Armando Requeixo sobre os premios literarios

Publicado o por

Artigo de Armando Requeixo recollido no seu blog Criticalia:
“Cando hai uns días preguntei ás visitas deste blog por cales crían que eran os males que afectaban os nosos premios literarios xa me daba o corpo que talvez as opinións ían ser variadas abondo. (…)
As miñas cábalas non ían descamiñadas, pois das nove posibles respostas tiveron algún voto sete delas, o que demostra ata que punto os premios literarios de noso, tal como están concibidos, son sentidos como problemáticos.
Segundo parece, o maior problema que estes amosan (así o entende o 46% dos votantes) radica no seu excesivo número. E está é, con certeza, unha ladaíña que xa vén de vello e que, porén, non foi aínda sensatamente atendida: ¿por que contro seguen a convocarse tantos premios?, ¿é razoable que nun país do tamaño do noso, coa poboación do noso e, sobre todo, co teito lector que temos coexistan ducias e ducias de premios grandeiros, medianeiros e pequeneiros?, ¿a(s) función(s) que cumpren fanos tan esenciais que xustifican a súa proliferación?, ¿seriamos quen de proxectarnos como unha literatura ‘forte’ sen depender (tanto) deles?… Son moitas as cuestións que suscita a votación, mais, o que fica ben claro é que para a maioría tanto premio é innecesario e non estaría mal que tomasen nota as institucións e entidades convocadoras, pois se callar non é preciso que cada un dos tres centos e medio de concellos, das deputacións, das mancomunidades, das fundacións etc. etc. etc. teñan o seu galardón-leira, porque tal minifundismo, lonxe de potenciar a visibilidade da nosa escrita, ao mellor o que fai é conseguir desdebuxala, pois tanta noticia de autores premiados hoxe e mañá e pasado, aquí, alá e acolá é máis que probable que provoquen desentendemento, insensibilidade e fastío entre o común. (…)”

O Instituto da Lingua Galega recibirá a Medalla de Ouro de Galicia

Publicado o por

‘O presidente da Xunta de Galicia anunciou o nome dos galardoados este ano coa Medalla de Ouro de Galicia, a máxima distinción do Goberno galego: por unha banda, o Instituto da Lingua Galega (ILG) e, por outra, o profesor e investigador médico Ángel Carracedo. O mandatario autonómico destacou o labor dos galardoados nesta edición coa Medalla de Ouro de Galicia “na protección do legado glorioso de Galicia e na dedicación para seguir engrandecendo este legado no futuro”. Feijóo referiuse así ao “gran labor que está a desempeñar o ILG desde hai xa catro décadas polo idioma, para que este sexa un elemento de cohesión social e por ampliar o estudo, coñecemento e a investigación da nosa lingua.” Ademais incidiu no “papel determinante do ILG na restitución cordial do idioma nos primeiros anos de autonomía, facilitando o labor da Real Academia Galega e axudando a que os gobernos puideran desenvolver unha política lingüística”.’ Vía Galaxia. Tamén recollido en Galicia Hoxe, El País, Cultura Galega e Galicia Confidencial.

Manuel Rivas gaña un dos premios da Fundación Luis Tilve

Publicado o por

‘A Fundación Luis Tilve entregará o venres 15 de xullo, nun acto no Salón de Actos da Fundación Caixa Galicia de Ferrol, os seus premios anuais, entre outros, ao escritor Manuel Rivas, na categoría de Acción Solidaria, e á Estación de Bioloxía Mariña da Graña, no de Defensa do Medio e dos Bens Comúns. Rivas será galardoado polo seu “gran compromiso e sensibilidade cara un amplo abano de aspectos”, como a recuperación da memoria histórica ou a protección da lingua galega”.’ Vía Xornal de Galicia.