Este xoves 2 de abril dentro do ciclo de conferencias O traballo literario a través dos escritores o crítico literario, profesor e responsable do Obradoiro de Lectura do Espazo Literario Caixanova, Ramón Nicolás, impartirá unha conferencia co título Detrás dun escritor sempre hai un lector. O acto será ás 20 horas no Centro Social Caixanova de Vigo e a entrada é libre.
Arquivo da categoría: Presentacións de libros
Vilagarcía: presentación dun libro de Calros Solla
Este venres 3 de abril ás 20:30 h presentarase no Auditorio Municipal de Vilagarcía (Pontevedra) o libro Monte do Seixo. O santuario perdido dos celtas do escritor Carlos Solla. O acto é de entrada libre.
A Coruña: presentación do libro de Goretti Sanmartín
Hoxe luns 30 de marzo ás 20:30 no local da Asociación Alexandre Bóveda (rúa dos Olmos, 16-18, 1º, A Coruña) preséntase o libro Nos camiños do entusiasmo. Calidade da lingua e planificación de Goretti Sanmartín. O acto contará coa participación da autora, de Xosé Manuel Sánchez Rei e do editor, Manuel Bragado. A entrada é libre.
Lugo: presentación do Atlas histórico da Galiza
Mañá xoves 26 de marzo o profesor José Manuel Barbosa Álvares presenta o Atlas Histórico Da Galiza en Lugo, na Librería Trama (Avenida da Coruña, 21), a partir das 20 horas. O acto é de entrada libre.
Lugo: presentación de Ámote vermella de Claudio Rodríguez Fer
O libro Ámote vermella de Claudio Rodríguez Fer, ilustrado por Sara Lamas, preséntase hoxe 23 de marzo en Lugo nun acto que contará coa presenza do autor e do editor, Manuel Bragado. Será a partir das 19 horas na Sala Isaac Díaz Pardo da Facultade de Veterinaria de Lugo.
En “Ámote vermella” o poeta Claudio Rodríguez Fer e a pintora Sara Lamas berran contra o exterminio atroz das mulleres desfeitas pola represión, contra o seu esquecemento inxusto e o silencio cómplice no que se mantivo a estas vítimas do fascismo, ao tempo que chaman en solidariedade con todas as comunidades do mundo que padecesen calquera ditadura do terror. O poeta Claudio Rodríguez Fer conclúe a súa triloxía poética sobre a memoria histórica iniciada con Lugo blues e proseguida con A loita continúa (Xerais 2004). Neste poemario elexíaco recupérase a memoria e o rostro das mulleres libertarias asasinadas en Galicia, como Josefa Barreiro González, nai humilde ou Dolores Blanco Montes, a voz das conserveiras e atadeiras do Morrazo. Outrosí faise con Juana Capdevielle, secuestrada tras ser fusilado o seu marido, Francisco Pérez Carballo, gobernador republicano da Coruña, e asasinada e enterrada en Rábade o 18 de agosto de 1936. Elexía pronunciada na lembranza de Amada García, fusilada en Ferrol o 27 de xaneiro de 1938, tras despedirse do seu pai, do seu marido e do seu fillo, acabado de nacer. Homenaxe que se estende ás mestras represaliadas (como María Vázquez Suárez, Mercedes Romero Abella ou a ourensá Erundina Álvarez Pérez), ás matronas republicanas, ás decenas de mulleres descoñecidas que agocharon a fuxidos e pagaron coa súa vida por isto ou a todas as mulleres que tolearon de dor durante aqueles anos da represión. Ámote vermella é un berro emocionante contra o exterminio atroz daquelas vidas desfeitas, contra o esquecemento inxusto e o silencio cómplice no que se mantivo a estas vítimas do fascismo, ao tempo que constitúe un chamado en solidariedade con todas as comunidades do mundo que padecesen calquera ditadura do terror.
Ferrol: presentación do libro Los lobos del centeno
O mércores 25 Marzo ás 20 horas no Ateneo Ferrolán preséntase o libro Los lobos del centeno de Francisco Narla, unha novela de terror ambientada na Galicia da primeira metade do século pasado con referencias a mitos e lendas do país coma os lobishomes, as meigas ou a Santa Compaña. Esta é a primeira novela do galego Francisco Narla, piloto de liñas aéreas no deserto do Mojave, aínda que antes xa escribira relatos e ensaios técnicos.
Por fin en galego o libro de memorias de María Casares: Residente privilexiada
A editorial Trifolium pon estes días nas librerías de todo o país a versión galega de Residente privilexiada, o libro de memorias da actriz María Casares (1922-1996). Nacida na Coruña, María Casares tivo que exiliarse en Francia co seu pai, Santiago Casares Quiroga, tralo levantamento militar fascista de 1936. Ao longo de cinco décadas desenvolveu unha fecunda carreira no teatro; no cinema a súa presenza foi moito menos continuada, mais tivo ocasión de traballar con algúns dos máis grandes directores franceses coma Robert Bresson, Alain Resnais ou Jean Cocteau. O Centro Galego de Artes da Imaxe celebra a publicación da súa memorábel autobiografía e réndelle homenaxe mañá xoves coa proxección do filme Les dames du Bois de Boulogne.
Noia: presentación do libro O violinista de Malá Strana
O novo libro de Xerardo AgraFoxo, O violinista de Malá Strana, preséntase este venres 13 de marzo ás 20:30 horas no Coliseo Noela de Noia nun acto organizado pola Asociación Cultural Barbantia, a Editorial Galaxia e o Concello de Noia. Estarán presentes o autor, o director da Editorial Galaxia, Víctor Freixanes, o coordinador de Barbantia, Alberto Piñeiro, e a escritora Rosa Aneiros, e haberá ademais unha actuación do Grupo de Danzas Noela. A entrada é libre.
Murakami presenta en Santiago a edición galega do seu novo libro
Hoxe mércores 11 de marzo ás 20 horas no Casino de Santiago o escritor xaponés Haruki Murakami presenta a súa novela Do que estou a falar cando falo de correr, editada por Galaxia. Traducida por Mona Imai e Gabriel Álvarez Martínez, esta obra chega ás librerías antes en versión galega que en castelán. No acto participarán tamén Ubaldo Rueda, director do Casino, e Víctor F. Freixanes, director de Galaxia. Deixamos a seguir o texto de presentación editorial do libro e o autor:
Haruki Murakami é un dos autores que máis venden e con máis predicamento en todo o mundo na actualidade. Neste libro aborda as súas experiencias como corredor de maratóns ao tempo que reflexiona sobre a súa condición de novelista. Haruki Murakami, nado en Quioto no ano 1949 antes de dedicarse á literatura rexentaba un club de jazz, que deixou aos trinta anos, en 1979, para dedicarse por completo á literatura e á paixón de correr. Desde aquela, deu ao prelo obras admiradas en moitos países e en moitas linguas como “Tokio blues”, “Kafka na beiramar” ou “Tras o solpor”, tamén publicada na nosa editorial e con éxito unánime de público e crítica.
Santiago: presentación de libro e concerto de Miro Casabella
Mañá xoves 12 de marzo no local da Asociación Cultural O Galo (Patio de Madres, 15, Baixo, Santiago) presentarase o libro Miro Casabella e a Nova Canción Galega, de Xan Fraga, editado pola Editorial Galaxia. No acto participará o autor e o propio Miro Casabella, que logo amenizará a velada cun concerto acústico no que fará un repaso dos seus éxitos e nos sorprenderá con novas versións e temas do seu amplo repertorio. Será a partir das 21:30, con entrada libre.
