Catro autores optan ao Premio Max al Mejor Autor Teatral en Gallego: Ánxeles Cuña Bóveda por Dame veleno, eu tamén soñar; Cándido Pazó por A piragua; Jorge Rey por Fidra; e Roberto Salgueiro por Valentino Rufini e âkil pillabán de viaxe a Milán (a van sen un can). O 22 de febreiro comeza a segunda rolda de votacións da que sairá o gañador nesa categoría. Máis información: sitio web dos Premios Max.
Arquivo da categoría: Teatro
Aberta a primeira fase de votación dos XIV Premios María Casares de Teatro
A Asociación de Actores e Actrices de Galicia (AAAG) ven de abrir o proceso que culminará na elección dos gañadores dos Premios de Teatro María Casares, que este ano chegan á súa decimo cuarta edición nunha gala que se celebrará no Teatro Rosalía Castro da Coruña o vindeiro 24 de marzo. Unha edición que terá, ademais, un carácter moi especial, xa que coincide coa celebración do 25 aniversario da constitución da AAAG. [Ler noticia completa]
Salón do Libro Infantil e Xuvenil: axenda do mércores 10 de febreiro
Mañá, Mércores 10 de Febreiro, “Os Bolechas” chegan ao Auditorio do Pazo da Cultura da man de Caramuxo Teatro. Cunha duración de 45 minutos, está recomendado para público a partir de 3 anos. As funcións previstas para a mañá son concertadas cos colexios e contan cun aforo de 409 asistentes para as 10.00 horas e de
395 nenos e nenas para as 12.00 horas. A sesión da tarde é aberta a todos os públicos e as entradas estarán á venda na billeteira dende unha hora antes do comezo, sendo o seu custo de 3 euros, salvo para os menores de 12 anos, que terá un desconto do 50%.
Na Sala de Exposicións do Pazo da Cultura ás 17.30 horas, o contacontos Carballo con botas de Papaventos amenizará por terceira xornada das “Tardes na sala”.
O XI SALÓN DO LIBRO INFANTIL E XUVENIL DE PONTEVEDRA organiza no serán do mércores, 10 de febreiro de 2010, ás 19.00 horas, no Café Moderno (Fundación Caixagalicia) a presentación do proxecto “Contos do Camiño”
de OQO Editora, que empregará os contos populares de distintos países como fío condutor. Os relatos narrados, a música e as imaxes permitiranlles aos máis pequenos peregrinaren polas distintas rutas xacobeas e afondaren asemade nos valores da convivencia entre culturas.
A programación do Salón no Café Moderno continúa o ciclo “Os autores e as cidades”, que ás 19:30 horas contará coa conferencia NY coma cidade con luz, de Inma López Silva.
As actividades previstas na programación do XI Salón do Libro Infantil e Xuvenil de Pontevedra inclúen ademais:
-10:00 – 10:40 e 11:45 – 12:25
Obradoiro Escrita, con Tagen Ata
Obradoiro Ilustración, con Anxo Fariña
Obradoiro “A Cidade Enorme”. OQO Editora
CONTACONTOS: Celso Fernández, Pavís Pavós e Queliña
TEATRO: Migallas
-10:00 / 11:15.- OBRADOIROS URBANOS: Nenos Policía por un día
-10:00 e 12:00 Caramuxo teatro – Os Bolechas (Auditorio do Pazo – función concertada cos centros escolares)
-10:40 – 11:10: visita ao Salón
-11:00 – 11:30: visita ao Salón
– 11:30 – 13:00: OBRADOIROS URBANOS: Nenos Policía por un día
-12:25 – 12:45: visita ao Salón
-12:45 – 13:30: visita ao Salón
-17.30: Tardes na Sala: “Carballo con botas” (Papaventos)
-18:30: Caramuxo teatro – Os Bolechas (Auditorio do Pazo para todos os públicos)
-19:00: Presentación do proxecto “Os contos do camiño”. OQO editora (Casa das Campás)
-19:30 CONFERENCIA Ciclo Os autores e as cidades (Caixagalicia): “NY como cidade con luz” – Inma López Silva
Santiago: o CDG estrea As actas escuras de Roberto Vidal Bolaño
O Centro Dramático Galego estrea este venres día 15 ás 21.00 horas no Salón Teatro de Santiago As actas escuras, obra de Roberto Vidal Bolaño que chega por primeira vez aos escenarios da man do director Xúlio Lago dezaoito anos despois da súa escrita. A función poderá verse en Santiago até o 7 de febreiro, os venres e sábados ás 20:30 e os domingos ás 18:00.
A Coruña: presentación do Teatro incompleto de Henrique Rabuñal
Hoxe xoves 19 ás 8 da noite terá lugar no estudio Casahamlet na Coruña (Rúa Alfonso VII) a presentación do libro Teatro incompleto (Laiovento) de Henrique Rabuñal co que o autor celebra os seus 25 anos na literatura galega. O volume, ilustrado por Sindo Cerviño, incorpora oito pezas teatrais. No acto participarán Francisco Pillado e Manuel Lourenzo e actores e actrices do estudio Casahamlet que lerán algúns dos textos.
Manuel Lourenzo: “O teatro galego continúa a ser, en certa maneira, clandestino”
Manuel Vidal Villaverde entrevista a Manuel Lourenzo en Galicia Hoxe.
Morreu Daniel Cortezón
O pasado domingo faleceu no Hospital Xeral de Lugo o dramaturgo e prosista galego Daniel Cortezón Álvarez, nacido en Ribadeo (Lugo) o 6 de febrero de 1927. Entre as súas obras debemos destacar os títulos Xelmírez ou a gloria de Compostela, As covas do rei Cintolo, Pedro Madruga e Prisciliano ou a novela A vila sulagada, gañadora do primeiro premio Blanco Amor.
Culleredo: estrea da obra Colgados de Gustavo Pernas
O próximo venres 9 de outubro en Culleredo terá lugar a estrea absoluta da nova obra de Gustavo Pernas Cora, o “logomono” Colgados con dirección de Anxela G. Abalo. Os “logomonos” son monólogos ao revés, monólogos mutantes interpretados polo propio autor. A obra será representada ás 20:30 no edificio de Servizos Múltiples do Burgo de Culleredo.
Culleredo: comeza o ciclo de teatro coa obra Glass city
O vindeiro venres 2 de outubro ás 20:30 horas comeza o ciclo de Teatro de Outono de Culleredo dedicado a Roberto Vidal Bolaño, coa presentación da compañia Teatro do Noroeste que porá en escena o musical Glass city (Cidade de cristal), de Eduardo Alonso. A entrada é gratuita.
Santiago: a compañía Bicodobrelo Teatro estrea a obra Matilde
A compañía compostelana Bicodobrelo Teatro, gañadora do 2º premio de teatro nos galardóns GZcrea 08, estrea a obra Matilde, unha adaptación da obra de Mario Benedetti Pedro y el capitán, levada a cabo pola propia compañía. Trátase dunha obra de teatro con dous únicos personaxes, un torturador e unha suposta presa política, que manteñen un diálogo imposible nun marco indefinido, pero que podería aplicarse a diversos lugares e momentos históricos. A obra está composta por catro actos e os seus correspondentes interludios, que non se limitan a ser meros espazos de transición, senón que serven de porta de entrada para un complexo marco artístico multidisciplinar no que se combinan a música en directo, a pintura e incluso a danza.
A función terá lugar no Teatro Principal de Santiago de Compostela o venres 25 de setembro ás 21:00. A entrada é de balde ata completar aforo.
