Convocada a II edición de Premio de Ensaio Curto “Alexandre Bóveda”
A 
A. C. Alexandre Bóveda, coa colaboración da Concellaría de Cultura do Concello da Coruña, convoca a II edición do Premio de Ensaio Curto “Alexandre Bóveda”:
BASES
PRIMEIRA. A A. C. Alexandre Bóveda convoca a II edición do Premio de Ensaio Curto “Alexandre Bóveda”, co obxecto de honrar a figura do insigne galeguista, ben como premiar un traballo que signifique unha contribución ao pensamento e a reflexión sobre a Galiza actual.O tema para desenvolver na presente convocatoria será, como no seu día xa fixera Alexandre Bóveda, a análise económica de Galiza, en calquera das súas facetas.
SEGUNDA. Poderá participar calquera persoa que o desexar.
TERCEIRA. Estabelécese o seguinte premio, que será único: Edición da obra gañadora cunha tiraxe de 1000 exemplares, máis unha obra única e orixinal feita ex profeso para o premio por un/ha nomeado/a artista galego/a e o diploma de honra.
CUARTA. Os traballos deberan ser inéditos e terán unha extensión mínima de 50 folios e máxima de 70. Os orixinais presentaranse mecanografados a espazo e medio por unha soa cara, grampados ou encadernados. Os traballos terán de estar escritos en galego. Os participantes terán a obriga de comunicaren a concesión de calquera outro premio que obtiver a obra presentada a concurso para a súa exclusión na presente convocatoria.
QUINTA. Enviaranse cinco copias dos orixinais sen asinar e cun lema que figurará tamén nun sobre á parte. Nese sobre tamén se incluirán nome e apelidos, enderezo e telefone da persoa concursante, ben como a fotocopia do carné de identidade.
SEXTA. Os traballos remitiranse ao seguinte enderezo: Asociación Cultural Alexandre Bóveda (R/ Olmos 16-18, 1º. C. P. 15003, A Coruña. Tamén se poderán entregar persoalmente na devandita dirección, en horario de 16.30 a 20.30h., de luns a venres. No sobre debe ir indicado 2º Premio de Ensaio Curto “Alexandre Bóveda”.
SÉTIMA. O prazo de presentación de orixinais será do día 1 de setembro ate ao día 29 de outubro.
OITAVA. O xuri estará composto por persoas representativas do mundo da cultura galega. O seu fallo será inapelábel.
NOVENA. A entrega do premio terá lugar na cidade da Coruña o día 18 de decembro, co gallo da cea de socios e socias da A. C. Alexandre Bóveda. A persoa galardoada será avisada cunha semana de antelación. A ausencia inxustificada da persoa premiada no acto entenderase como expresión de que declina o seu dereito ao galardón concedido, renunciando por tanto a calquera reclamación ulterior deste. O premio pode ficar deserto.
DÉCIMA. A persoa gañadora autoriza a Asociación Cultural Alexandre Bóveda a poder publicar, en edición escrita, o traballo que resultar galardoado. A Coruña, febreiro de 2010.
O comité organizador está composto por:
Presidenta: Dna. María Xosé Bravo San José, Concelleira de Cultura do Concello da Coruña.
Director do Certame: D. Roberto Catoira Viñán, Presidente da A. C. Alexandre Bóveda.
Vogal: Dna. Ana Mourelle Quintáns, Vicepresidenta da A. C. Alexandre Bóveda.
Vogal: D. Miguel Mato Fondo, Vogal da A. C. Alexandre Bóveda.
O xuri está formado por:
Presidente: Anxo Calvo (profesor titular e Doutor do Departamento de Economía Financieira e Contabilidade da USC).
Vogais: María do Carme Sánchez Carreira (profesora do departamento de Economía Aplicada da USC), Francisco X. Sanjiao (profesor titular de Economía Aplicada da USC) e Miguel Pardo (xornalista económico).
Como secretario da Asociación, con voz e sen voto: D. Xosé Manuel Sánchez.
Toda a información pódese descargar nas Bases do II Premio de Ensaio Curto.
Chus Pato: “Vocación de voz”
Entrevista
a Chus Pato en Galicia Hoxe:
“Galicia Hoxe (GH): A literatura para un escritor é á vez profesión e hobby?
Chus Pato (CP): É unha chamada á que hai que estar atenta e require unha atención continua. Ademais de ser unha chamada, é unha vocación de voz.
GH: O escritor sempre ten un libro debaixo do brazo?
CP: Non o sei, eu normalmente si. Creo que un escritor pode estar rañando a barriga moitas veces, coma todo o mundo.”
Camiño Noia: “O conto galego é menos misóxino que os dos outros países”
Entrevista
a Camiño Noia en La Voz de Galicia:
“La Voz de Galicia (LVG): ¿Ten singularidades propias o conto galego?
Camiño Noia (CN): Algunha, mais a maioría son comúns cos do resto do mundo. Por exemplo, son menos misóxinos que os doutros países porque foron as mulleres quen controlaron a tradición oral. Contos en que o malo, noutros sitios, era a muller, aquí o son os homes. As mulleres, que maioritariamente eran as contadoras, ao contar o conto facían unha especie de censura, como a discriminación positiva de hoxe en día.
LVG: ¿Son transgresores?
CN: A tradición oral é moi transgresora. Todos os estamentos de cando se formou a tradición, é dicir, os poderes terreais, saen mal parados. Os contos falan do mal comportamento destas persoas.”
Francisco Fernández Naval: “Nunca o poder lle fixera tanto mal ao galego na autonomía”
Entrevista
a Francisco Fernández Naval en Galicia Hoxe:
“Galicia Hoxe (GH): A poesía, Chisco, é para ti unha arma de amor e combate, un reto á vida e mais á infamia…?
Francisco Fernández Naval (FFN): Para min, a poesía segue sendo o argumento principal do home diante da vida, unha forma de coñecemento dos misterios a través da intuición e da metáfora, o único xeito de nos aproximar ao que non comprendemos. Amais diso, tamén é unha arma e un xeito de estar no mundo.
GH: Poeta, narrador, ensaísta… En que terreo estás máis a gusto…?
FFN: Empecei escribindo versos, logo pasei ao teatro, que deixei pola narrativa. Gústame ler poesía e, ás veces, necesito escribila, pero tamén me gusta contar e que me conten historias. Quixera seguir traballando os dous xéneros, sen ter que renunciar a ningún e nestes últimos anos regresei con gusto ao teatro.
GH: Hai unha obra de grande calado que está a agardar aínda pola túa escrita?
FFN: Non o sei, sobre todo porque non sei cal é o gran calado dunha obra ou dunha historia. Eu procuro, sobre todo, que os libros que escribo teñan dimensión humana, que comuniquen algo, que procuren complicidades nos lectores.”
Domingo Villar: “O inspector Leo Caldas bótalle o ollo ao Morrazo”
Entrevista en Xornal.
Pablo Bouza gaña o XXXVI Certame Literario do Concello de Vilalba
O poeta de Fene Pablo Bouza Suárez vén de gañar o XXXVI Certame Literario do Concello de Vilalba, dotado con 3000 euros e a publicación da obra, polo seu poemario Na intimidade do azougue, mentres que Martiño Maseda conseguiu o segundo premio coa súa obra Nos labirintos das almas, dotado con 1000 euros e a súa publicación. O xurado estivo composto polo concelleiro de cultura de Vilalba, José María García-Leira, o académico e escritor Darío Villanueva, o xornalista Fidel Fernán e o xefe territorial de cultura en Lugo, José Carlos Rodríguez Andina, actuando como secretario Xulio Xiz. O poeta de Ferrolterra repite, desta maneira, o éxito da pasada edición, en que tamén gañara o certame.
Xosé Neira Vilas: “Ao final, un ten que quedar no lugar onde lle tocou nacer”
Entrevista 
a Xosé Neira Vilas en La Opinión:
“La Opinión (LO): Residiu en Cuba dende 1961 ata 1992. Pódese dicir que o libro (Presenza galega en Cuba) é un traballo de toda unha vida?
Xosé Neira Vilas (XNV): O libro é resultado dunha acumulación de moitos artigos sobre músicos, pintores, políticos, pescadores, naturalistas, libreiros, etc., que chegaron a Cuba dende a terra galega. Pasei 27 anos investigando a emigración na illa, en como os homes galegos refacían a súa vida e formaban unha familia. Ademais, fun un divulgador da cultura de Galicia en Cuba e publiquei moitos traballos na prensa sobre a miña terra nai.
LO: Como foi a vida do emigrante galego en Cuba?
XNV: Para todo emigrante, a vida nun país estranxeiro é dura ao principio. Fóronse facendo un oco como taxistas, camareiros e sobre todo, pescadores. Algúns, pero os poucos, fixéronse ricos co tabaco e outros convertéronse en filántropos. Máis de 120 galegos formaron parte do exército cubano na Guerra de Independencia. Todos se cubanizaron moi rapidamente.”
Xosé Neira Vilas na súa homenaxe en Palas de Rei
Xurxo Borrazás: “As miserias humanas”
Entrevista a Xurxo Borrazás en Galicia Hoxe.
