Os Museos Científicos inician o ciclo de divulgación científica Os luns con ciencia. A primeira actividade terá como protagonista a Jorge Wagensberg, director da Área de Medio e Ciencia da Fundación “La Caixa”. Este cientifico abrirá o ciclo hoxe luns 9 de marzo ás 20:00 cunha charla titualada El gozo intelectual. A súa intervención tratará sobre o afán de saber e o pracer que este procura, expoñendo historias e reflexións do quefacer diario dun científico nos que xorden o estímulo, a conversa, a comprensión e a intuición nunha gran variedade de situacións. Presentará a Jorge Wagensberg o escritor Xavier Seoane. A cita é na Domus e a entrada é libre, até completar aforo.
Arquivos da etiqueta: A Coruña
A Coruña: conferencia de Xosé María Bello
Mañá mércores 4 de marzo na Coruña ofrecerá unha conferencia Xosé María Bello, arqueólogo e director do Museo Arqueolóxico e Histórico do Castelo de San Antón, dentro do ciclo A Torre de Hércules: Faro romano, paradigma da arquitectura da ilustración e ¿Patrimonio da humanidade?. O título da conferencia de Xosé María Bello é A Torre de Hércules, faro romano. O acto comeza ás 20:30 na Fundación Biblioteca de la Casa Consulado (Panaderas, 58 – baixo). A entrada é libre até completar aforo.
A Coruña: conferencia de Alfredo Erias
Mañá mércores na Fundación Caixa Galicia da Coruña (no Cantón Grande) Alfredo Erias Martínez impartirá unha conferencia co tema Imaxe do galego na Baixa Idade Media. Alfredo Erias Martínez é arquiveiro-bibliotecario do Concello de Betanzos, director do Museo das Mariñas e do Anuario Brigantino. De carácter polifacético, é autor de diversos libros e numerosos traballos de investigación, pintor, debuxante e gravador, ademais de editor, posto que fundou con Mª Teresa Garea no 1997 Briga Edicións. O acto comezará ás 20 horas e a entrada é libre até completar capacidade.
A Coruña: obradoiro de creación artístico-literario dende a rede
Todos os luns a partir do 2 de marzo na Biblioteca Infantil e Xuvenil de Durán Loriga vaise celebrar un obradoiro de creación artístico-literario dende a rede impartido por Antía Otero e Eduardo Estévez. Dirixido a rapaces e rapazas a partir dos 14 anos que queiran descubrir o mundo da escrita e da arte en xeral dun xeito lúdico, o obradoiro propón un achegamento aos video-poemas, os blogs, a música, a imaxe, os audiovisuais, etc. Para inscribirse deben contactar coa Biblioteca Municipal Infantil e Xuvenil (r/Durán Loriga, 10), no teléfono 981 184388 ou neste email.
A Coruña: comeza o Congreso Jenaro Marinhas del Valle
A Associaçom Galega da Língua organiza entre os dias 26 e 28 de Fevereiro o Congresso Jenaro Marinhas del Valhe, com o objectivo de aprofundar no estudo desta destacada figura, que sempre afirmou o carácter universal e lusófono da língua da Galiza, além da tradiçom galeguista a que pertence. O congresso em homenagem a Jenaro Marinhas del Valle, membro de honra da entidade reintegracionista, realizará-se na Corunha, cidade onde por direito corresponde, nos locais do Centro Social Caixanova. O congesso está em processo de reconhecimento com um crédito de livre configuraçom por parte da Universidade da Corunha [Ler nova completa]
A Coruña: conferencia de Xurxo Souto
Dentro da programación do obradoiro de canción popular A Coruña Son mañá xoves 26 de febreiro Xurxo Souto impartirá unha conferencia co título O influxo afro-americano na canción galega. Durante o relatorio haberá ocasión de escoitar diferentes exemplos que reflicten a pegada dos sons atlánticos na música popular galega. O acto terá lugar no auditorio do Fórum Metropolitano de cinco a oito da tarde, con entrada libre.
O músico e escritor Xurxo Souto é autor entre outros dos libros O retorno dos homes mariños, Contos da Coruña e Os tres trebóns. Desde outubro de 2005 é Director de Programas da Radio Galega, emisora na que conduce o espazo musical Aberto por reformas.
A Coruña: presentación do novo libro de Manuel Rivero Pérez
A Agrupaçom Cultural O Facho presenta mañá venres 20 na Coruña o libro De Roncevales a Compostela, escrito polo sociólogo e antropólogo Manuel Rivero Pérez. A obra é ao mesmo tempo unha reflexión sobre o ser humano e unha crónica de viaxes onde o autor fala da historia e da arte dos lugares polos que pasa. O acto terá lugar ás 19:30 na Fundación Ronsel (r/ Hospital, 21, baixo) da Coruña.
A Coruña: conferencia de Bernardo Penabade
Mañá mércores 18 de febreiro o coordenador do Arquivo Documental do Concello de Burela e profesor de Ensino Secundario Bernardo Penabade Rei intervirá dentro do ciclo Língua, Literatura e Naçom cunha charla titulada Unha nova política linguística municipal. Será a partir das oito do serán, no local da Fundación Caixa Galicia no Cantón Grande da Coruña. Organiza a Agrupaçom Cultural O Facho.
A Coruña: comezan as celebracións do “Ano Darwin”
Os Museos Científicos Coruñeses comezan a celebración do Ano Darwin coa presentación aos medios da programación prevista para conmemorar a efeméride mañá xoves 12 de febreiro de 2009, xusto o día no que se cumpren douscentos anos do nacemento do científico británico. Será a partir das 19:15 na Domus, e no acto terá lugar unha breve representación especialmente elaborada para a ocasión por parte de Casa Hamlet, recoñecida entidade teatral coruñesa.
A continuación, ás 20 horas, haberá un coloquio sobre a teoría da evolución realizado en colaboración coa Unidade de Divulgación e Cultura Científica e Facultade de Ciencias da Universidade de A Coruña, presentado e moderado polo director dos Museos Científicos, Xosé Antón Fraga, e no que intervirán os profesores desta institución académica Roberto Bao, Marta Vila e Pedro Galán e mais o divulgador Ernesto Carmena. A entrada é libre até completar o aforo.
A Coruña: presentación de libros de Lino Braxe e Alberte Momán
Mañá mércores 11 de febreiro ás 20:30 na Galería Sargadelos da Coruña (Rúa Real, 56) presentaranse os libros gañadores do II Premio Illas Sisargas de poesía erótica convocado conxuntamente polo Concello de Malpica e a Asociación Caldeirón desta localidade. Os libros premiados foron Baile Átha Cliath de Alberte Momán, con ilustracións de Paco Souto; e Baixo o Sol de Mesina de Lino Braxe, con ilustracións de Sol Rivas. O acto contará coa participación de Paco de Tano, Sol Rivas e os dous autores, Lino Braxe e Alberte Momán. A entrada é libre.
