O 
martes 29 de novembro, ás 20:00 horas, na Fundación Paideia Galiza (Praza de María Pita, 17) da Coruña, Fernando Díaz-Castroverde recollerá o Premio Repsol 2011, galardón que obtivo coa súa obra Microbios e outros paquidermos, publicada recentemente por Galaxia.
Arquivos anuais: 2011
Pontevedra: presentación de Guía de petróglifos de Galicia
O luns 28 de novembro, ás 20:00 horas, no Café Moderno de Pontevedra, terá lugar a presentación do libro Guía de petróglifos de Galicia, de Antonio de la Peña Santos e Buenaventura Aparicio Casado, publicado por Edicións do Cumio. O acto, organizado polo Ateneo de Pontevedra, será presentado por Javier Costas Goberna.
Convocada a XIV edición do Certame de narración curta Ánxel Fole, 2011
A 
Concellería de Cultura, Turismo e Promoción da Lingua do Concello de Lugo convoca a XIV Edición do Certame de Narración Curta Ánxel Fole en lingua galega, de acordo coas seguintes bases (poden descargarse en neste arquivo: Bases Premio Ánxel Fole 2011 Concello de Lugo)
1ª.– Poderán concorrer todos os autores e autoras que o desexen.
2ª.– Cada autor ou autora poderá presentar un máximo de dúas obras orixinais e inéditas escritas en galego. Enténdese por obra inédita a que non foi difundida publicamente en ningún soporte, nin publicada de ningún xeito a través da internet.
3ª.– O tema dos traballos será libre. A extensión dos textos non superará os 36.000 caracteres con espazos incluídos ou os 20 folios mecanografados a dobre espazo por unha soa cara e por triplicado. Poderán presentarse en soporte dixital (CD / DVD ou lapis de memoria).
4ª.– Os traballos presentaranse no departamento de Cultura, Turismo e Promoción da Lingua do Concello de Lugo (Praza Maior, 1, C. P. 27001), baixo un lema ou pseudónimo que figurará no soporte elixido, no que non haberá ningún dato que identifique o seu autor/a. En sobre pechado, sinalado no exterior co mesmo lema ou pseudónimo, incluiranse os datos do autor: nome e apelidos, enderezo, poboación, código postal, teléfono e correo electrónico no seu caso, fotocopia do DNI ou pasaporte e título da obra presentada.
5ª.– O xurado estará formado por persoas competentes na materia e designadas pola Concellería de Cultura, Turismo e Promoción da Lingua do Concello de Lugo.
6ª.– O premio ou premios poderán declararse desertos sempre que sexa por decisión unánime do xurado.
7ª.– O prazo de presentación pecharase o día TRINTA DE DECEMBRO DE DOUS MIL ONCE (30/12/2011).
8ª.– Se no período de tempo transcorrido entre a presentación dun relato e o ditame do xurado ese relato obtén outro premio, o autor débello comunicar a este Concello, retirándoo do Certame Ánxel Fole. En calquera caso, entenderase que a obtención dun premio anterior por un determinado relato implica a renuncia automática ao premio Ánxel Fole que lle puidera ser atribuído por descoñecemento desa circunstancia.
9ª.– O Concello de Lugo poderá publicar os relatos premiados, considerándose os dereitos de autor incluídos no premio. Os autores poderán tamén, con posterioridade á primeira edición do Concello, publicar libremente os relatos, facendo mención do premio recibido.
10ª.– A participación no certame supón a aceptación total destas bases.
11ª.– Unha vez ditaminado o premio, os orixinais non premiados xunto coas súas correspondentes plicas serán destruídos.
12ª.– Os premios establecidos son:
– Primeiro premio: 1.500,00 €
– Segundo premio: 1000,00 €
– Terceiro premio: 500,00 €
—————————————————————————————————————————————–
Concello de Lugo
Concellería de Cultura, Turismo e Promoción da Lingua
Praza Maior s/n, 27001, Lugo
982297334
cultura@concellodelugo.org
Henrique Monteagudo: ‘Del Riego, rebeldía contra o malfado’
Artigo 
de Henrique Monteagudo 
sobre Francisco Fernández del Riego en El País:
“Estou convencido de que a madureza da cultura galega pasa por deixar de recreármonos nunha veneración acrítica por persoeiros indiscutibles e superarmos unha excesiva dependencia dos ritos de conmemoración. Incluso ás veces penso que a este país lle viría ben un ano sábatico sen efemérides nin aniversarios, centrados en celebrar as iniciativas innovadoras e os talentos emerxentes. Ben sei, o futuro constrúese sobre a memoria, pero ás veces corremos o risco de que o fardelo do pasado nos pese de máis e nos impida avanzar cara ao porvir. O devandito é unha excusatio non petita porque vou conmemorar unha figura, precisamente co gallo do seu cabodano. Pero vouno tentar facer como coido que a el lle gustaría, rememorando a súa traxectoria coa ollada no presente e no mañá. Os feitos de don Paco non son pasado morto, son leccións que nos falan vivamente nestes tempos de tribulación e desacougo, advertíndonos que non podemos abandonar a esperanza, pero tampouco abandonarnos a ela. (…)
Co seu exemplo de lealdade temesiña ao ideal dunha cultura galega rica e moderna nunha Galicia autogobernada, de resistencia incoercible nos transos máis difíciles da nosa historia recente, de xenerosidade, bonhomía e amplitude de miras, Del Riego déixanos un legado especialmente valioso para afrontarmos a dura singradura que temos por diante. (…)”
Carballo: presentación de libros sobre a Costa da Morte
O 
venres 25 de novembro, a partir das 17:00 horas, na Librería Brañas (Gran Vía, 79) de Carballo, preséntanse as súas cinco últimas publicacións, enfocadas á divulgación do patrimonio cultural da Costa da Morte, do Seminario de Estudos Comarcais da Costa da Morte:
– O hórreo atlántico e fisterrán. Cabazos e cabaceiras da Costa da Morte e Barbanza, de Xosé María Lema e Carlos F. Concheiro.
– Dicionario de escritores e escritoras da Costa da Morte, de Xosé María Rei Lema.
– Textos literarios sobre a Costa da Morte, de Xosé María Rei Lema.
– Iconografía xacobea nas igrexas e santuarios da Costa da Morte, de Xosé María Lema e Eva María López Añón.
– Romarías da Costa da Morte, de Xan Fernández Carrera e Manuel Vilar Álvarez.
Vía Que pasa na Costa.
Santiago: presentación de Contos Estraños
O sábado 26 de novembro, no Tatooine Santiago Rock (Rúa República Arxentina, 48) de Santiago de Compostela, Contos Estraños presenta o seu proxecto editorial e tamén o primeiro número da súa colección Contos Estraños, co seguinte programa:
– 21:00-21:30 h. Presentación do proxecto.
– 21:30-22:30 h. Charla cos autores, preguntas e propostas, sinaturas.
– 22:30-04:00 h. Festa de disfraces.
Santiago: entrega do V Premio Voz da Liberdade 2011 a María Xosé Queizán
Noia: festa anual da A. C. Barbantia, e entrega dos premios Sereos
O 
sábado 26 de novembro, ás 12:00 horas, na Casa da Cultura Avilés de Taramancos de Noia, a Asociación Cultural Barbantia, en colaboración con La Voz de Galicia, a Deputación da Coruña e o Concello de Noia presenta un novo número do suplemento cultural A Voz de Barbantia e o Anuario de estudos do Barbanza 2011. Ao remate do acto, no que participan Manuel Cartea, Xesús Laíño, Javier Rodríguez e Rafael García Guerrero, entregaranse os Sereos, Premios Barbantia da Cultura, que este ano recaeron na Casa da Gramática, Paola García Paz e Eva Veiga.
Ribadeo: presentación de Átonos, de Rosalía Fernández Rial
O 
venres 25 de novembro, ás 20:30 horas, na Casa das Letras de Ribadeo, preséntase o poemario Átonos, de Rosalía Fernández Rial. No acto estará acompañada con música de fondo do piano de Serxio Moreira, mentres recita os seus propios versos.
Reivindicación dos libreiros galegos ante as dificultades económicas
“Os 
libreiros de toda Galicia conmemorarán este 25 de Novembro o Día das Librarías, data de “celebración” en todo o Estado e que estes profesionais, que están a experimentar un momento de “dificultades” económicas pola baixada nas vendas, pretenden aproveitar para reivindicar o seu papel na transmisión cultural á sociedade. Así o destacou Xurxo Patiño, presidente da Federación de Libreiros, quen destacou a achega do sector como “eixe fundamental” no proceso educativo, cultural e pedagóxico dos cidadáns galegos. Deste modo e fronte ao “ocaso” que ven algúns pola proliferación das novas tecnoloxías, “cada vez fálase máis do libro” e se “le máis”, con índices de lectura que “pouco a pouco van mellorando” e no que os libreiros cumpren o seu papel de “intermediario” entre “esta enorme selva de papel” e o cidadán. Así mesmo, o 25 de Novembro debe ser unha xornada de “reivindicación” das librarías como “comercio de proximidade” fronte ás grandes superficies comerciais, que “baleiran” os barrios da vida que deben ter ao tempo que se conta “o que se constrúe e non o que se destrúe”. “Temos moitas cousas que facer aínda”, insistiu Patiño, se ben admitiu que o nivel de vendas está a ser “máis baixo” que o ano pasado e que moitos establecementos presentan dificultades, motivadas pola perda de capacidade adquisitiva das familias, que deixaron a algunha libraría nunha situación “incómoda”. Así mesmo, os atrasos no pagamento da ‘gratuidade solidaria’ por parte da Consellería de Educación supuxo algunha quebra polas dificultades “para afrontar pagamentos” a distribuidores, aínda que “por sorte, xa está en camiño de solucionarse” (cun 70% xa pagado). (…) Con motivo do Día das Librarías, o próximo día 25 haberá descontos de ata o por cento nos establecementos, que ampliarán o seu horario ata as 22.00 horas. Así mesmo, están confirmadas máis de 25 actividades por todas as cidades galegas, como lectura pública de obras.” Vía Galicia Hoxe.
