Arquivo da categoría: Entrevistas

Entrevista a Elena Gallego en México: “Dragones, magia e historia gallega en Dragal“

Publicado o por

Entrevista a Elena Gallego en El Informador (México):
“Lo que inició como un manuscrito para fomentar la lectura en su hijo Adrián, terminó en trilogía. Y no sólo eso, sino que ahora Dragal, de la periodista española Elena Gallego Abad (Teruel, 1969), será retomado para una serie televisiva y un videojuego, dentro de un proyecto transmedia.
A los 16, Adrián era fanático de la magia y los dragones, pero no le interesaba la cultura local de Galicia, donde su madre se afincó en la infancia, así que Gallego Abad tomó esos elementos -dragón, alquimia e historia-, para escribir un manuscrito y atraerlo hacia la literatura y las tradiciones.
“A tu hijo el patrimonio que le puedes dejar aparte de una casa o una cuenta en el banco es que sepa quién es. Lo más importante que tenemos es nuestra identidad”. (…)
A la autora le preocupa que la última generación esté perdiendo identidad. “Estamos homogeneizando todo con las redes sociales, con las películas de las grandes productoras”. (…)
“Mi juego es que los chicos vuelvan a nuestra historia, a leer, pero al mismo tiempo si consigo que un chico hable con su padre o con su abuelo y descubra la historia de su propio dragón y de su pueblo”, el texto habrá cumplido su cometido. (…)”

Cuestionario Proust: Helena Villar Janeiro

Publicado o por

Desde o blogue de Ramón Nicolás, Caderno da crítica, este Cuestionario Proust a Helena Villar Janeiro:

“1.– Principal trazo do seu carácter?
– A amabilidade e a tolerancia.
2.– Que calidade aprecia máis nas persoas?
– A lealdade.
3.– Que agarda das súas amizades?
– Que sexan honestas e non me traizoen.
4.– A súa principal eiva?
– “Teño medo dunha cousa que vive e que non se ve”.
5.– A súa ocupación favorita?
– Saír ao campo provista dun cestiño no tempo dos cogomelos. En calquera época andar cunha cámara tratando de atopar algo orixinal que fotografar.
6.– O seu ideal de felicidade?
– Para min vivir en paz e co cariño dos meus. Para a sociedade, un estado xusto.
7.– Cal sería a súa maior desgraza?
– A perda dun ser querido.
8.– Que lle gustaría ser?
– A soprano que sempre crin levar dentro.
9.– En que país desexaría vivir?
– A pesar de que sufro vendo o que nel hai de anómalo, en Galicia.
10.– A súa cor favorita?
– Azul.
11.– A flor que máis lle gusta?
– A rosa.
12.– O paxaro que prefire?
– Polo canto, o xílgaro. Pola beleza, o paporrubio.
13.– A súa devoción na prosa?
– Cervantes e Cunqueiro.
14.– E na poesía?
– Rosalía e Juan Ramón.
15.- Un libro?
– Follas novas.
16.– Un heroe de ficción?
– Non me interesan os heroes de papel.
17.– Unha heroína?
– Tampouco a heroínas.
18.– A súa música favorita?
– O Requiem de Mozart.
19.– Na pintura?
– Van Gogh.
20.– Un heroe ou heroína na vida real?
– Martin Luther King.
21.– O seu nome favorito?
– Helena, por unha tradición familiar que se conserva.
22.– Que hábito alleo non soporta?
– O chafardeo maledicente.
23.– O que máis odia?
– A inxustiza.
24.– A figura histórica que máis despreza?
– Francisco Franco.
25.– Un feito militar que admire?
– Ningún.
26.– Que don natural lle gustaría ter?
– Dominar a emotividade.
27.– De que maneira lle gustaría morrer?
– Na miña casa e rodeada dos meus.
28.– Cal é o seu estado de ánimo máis habitual?
-O bo humor.
29.– Que defectos lle inspiran máis indulxencia?
– A presunción se non é prepotente. A xente necesita autoestima.
30.– Un lema na súa vida?
– Ánimo, que todo podería ser peor.”

Cuestionario Proust: María do Carme Kruckenberg

Publicado o por

Desde o blogue de Ramón Nicolás, Caderno da crítica, este Cuestionario Proust a María do Carme Kruckenberg:

«1.– Principal trazo do seu carácter?
– Calar até poder dicir todo o que teño dentro.
2.– Que calidade aprecia máis nas persoas?
– A sinceridade.
3.– Que agarda das súas amizades?
– Pouco e moito.
4.– A súa principal eiva?
– A falta de paciencia.
5.– A súa ocupación favorita?
– Ler.
6.– O seu ideal de felicidade?
– Que sexa soportábel a vida.
7.– Cal sería a súa maior desgraza?
– O que me está pasando que me impide vivir en liberdade.
8.– Que lle gustaría ser?
– A razón.
9.– En que país desexaría vivir?
– Nunha aldea de Galiza, nun bosque pequeno e verde onde vivir Galiza plenamente.
10.– A súa cor favorita?
– O azul forte propio dos mariñeiros.
11.– A flor que máis lle gusta?
– A rosa da cor do viño tinto.
12.– O paxaro que prefire?
– O reiseñor.
13.– A súa devoción na prosa?
– Os escritores que acompañaron o tempo da xeración do 27.
14.– E na poesía?
– A xeración do 27.
15. Un libro?
– A poesía de Federico García-Lorca.
16.– Un heroe de ficción?
– Ningún.
17.– Unha heroína?
– Ningunha.
18.– A súa música favorita?
– Primeiro Bach e despois o jazz.
19.– Na pintura?
– Velázquez.
20.– Un heroe ou heroína na vida real?
-Calquera ser decente e de verdade.
21.– O seu nome favorito?
– Rosalía.
22.– Que hábito alleo non soporta?
– A mentira.
23.– O que máis odia?
– A mentira mal intencionada que vai deixando a xente ao pé da escaleira.
24.– A figura histórica que máis despreza?
– Hitler.
25.– Un feito militar que admire?
– Ningún.
26.– Que don natural lle gustaría ter?
– O de conseguir superar a preguiza.
27.– De que maneira lle gustaría morrer?
– Durmindo coma a miña avoa.
28.– Cal é o seu estado de ánimo máis habitual?
– A tristura.
29.– Que defectos lle inspiran máis indulxencia?
– Ningún.
30.– Un lema na súa vida?
– Vivir a pesar de.

* O meu agradecemento a Mercedes Queixas pola xenerosa colaboración prestada.”

Cuestionario Proust: Claudio Rodríguez Fer

Publicado o por

Desde o blogue de Ramón Nicolás, Caderno da crítica, este Cuestionario Proust a Claudio Rodríguez Fer:

“1.– Principal trazo do seu carácter?
– O amor.
2.– Que calidade aprecia máis nas persoas?
– Autenticidade con dignidade.
3.– Que agarda das súas amizades?
– Nada.
4.– A súa principal eiva?
– Lembrar case todo.
5.– A súa ocupación favorita?
– Amar.
6.– O seu ideal de felicidade?
– A utopía libertaria integral e total.
7.– Cal sería a súa maior desgraza?
– Particularmente, o mal dos seres queridos ou o seu desamor. Socialmente, o fascismo.
8.– Que lle gustaría ser?
– Benfeitor xeral.
9.– En que país desexaría vivir?
– No que estean as persoas que amo.
10.– A súa cor favorita?
– A da pel e a dos iris amados.
11. – A flor que máis lle gusta?
– A flor encarnada.
12.– O paxaro que prefire?
– O paxaro que canta.
13.– A súa devoción na prosa?
– Do mundo, Dostoievski, Tolstoi, Borges. De Galicia, Fole, Valente, Carmen Blanco…
14.– E na poesía?
– Do mundo, Whitman, Breton, Neruda. De Galicia, Luz Pozo Garza, Valente, Olga Novo…
15. Un libro?
– Depende: por exemplo, en poesía, Poemas de Emily Dickinson; en ficción, Historias de cronopios e de famas de Julio Cortázar; en ensaio, Un cuarto de seu de Virginia Woolf…
16.– Un heroe de ficción?
– Alexis Zorba, de Kazantzakis.
17.– Unha heroína?
– Antígona, de Sófocles.
18.– A súa música favorita?
– A barroca, a romántica, o blues, o jazz, a celta, a latinoamericana, o rock, a dos cantautores…
19.– Na pintura?
– A máis colorista e imaxinativa, como en xeral a surrealista, dende o Bosco a Granell.
20.– Un heroe ou heroína na vida real?
– Calquera antifascista anónimo, como o meu pai.
21.– O seu nome favorito?
– O da miña nai, Alicia, ou o da miña filla, Mariña.
22.– Que hábito alleo non soporta?
– A envexa que leva á traizón.
23.– O que máis odia?
– O autoritarismo en calquera das súas formas.
24.– A figura histórica que máis despreza?
– Calquera ditador que encarne a tiranía.
25.– Un feito militar que admire?
– Militar, ningún; miliciano, a resistencia antifascista e máis aínda a resistencia antimilitarista.
26.– Que don natural lle gustaría ter?
– O de paliar o sufrimento alleo.
27.– De que maneira lle gustaría morrer?
– Sen facer sufrir a ninguén mais tamén sendo útil a unha causa xusta.
28.– Cal é o seu estado de ánimo máis habitual?
– O vitalista.
29.– Que defectos lle inspiran máis indulxencia?
– Os derivados do amor incontrolado.
30.– Un lema na súa vida?
-O que citei xa sendo moi novo no meu primeiro libro, Poemas de amor sen morte: «Amo ergo sum».

Cuestionario Proust: Xabier P. DoCampo

Publicado o por

Desde o blogue de Ramón Nicolás, Caderno da crítica, este Cuestionario Proust a Xabier P. DoCampo:

“1.– Principal trazo do seu carácter?
– A facilidade coa que me entusiasmo cos proxectos novos.
2.– Que calidade aprecia máis nas persoas?
– A lealdade.
3.– Que agarda das súas amizades?
– Correspondencia no amor e na lealdade.
4.– A súa principal eiva?
– Teño un xenio do demo.
5.– A súa ocupación favorita?
-Ler, o cinema… E calquera traballo que se faga coas mans.
6.– O seu ideal de felicidade?
– A felicidade dos meus.
7.– Cal sería a súa maior desgraza?
– A perda do amor dos meus.
8.– Que lle gustaría ser?
– Director de orquestra.
9.– En que país desexaría vivir?
– Neste sempre, e mellor sendo a nación dona de si.
10.– A súa cor favorita?
– A vermella?
11.– A flor que máis lle gusta?
– A chorima ou a queiroga cando pintan de amarelo e de púrpura a aba dos montes.
12.– O paxaro que prefire?
– A laverca cando, na planta das patacas, cantaba, case inmóbil, aló no máis alto do ceo.
13.– A súa devoción na prosa?
– Cunqueiro, Stevenson…
14.– E na poesía?
– Cunqueiro, Pimentel, Díaz Castro, Tovar…
15.- Un libro?
– A illa do tesouro, Merlín e familia…
16.– Un heroe de ficción?
– John Silver.
17.– Unha heroína?
– Sherezade.
18.– A súa música favorita?
– A clásica, o jazz… e todas as cantoras e cantores galegos.
19.– Na pintura?
– Caravaggio, Velázquez, Picasso, Magritte, Renoir…
20.– Un heroe ou heroína na vida real?
– Calquera home ou muller que se repoña fronte á adversidade.
21.– O seu nome favorito?
– María.
22.– Que hábito alleo non soporta?
– A soberbia.
23.– O que máis odia?
– A humillación do débil e a cobiza dos poderosos.
24.– A figura histórica que máis despreza?
– Todos aqueles que fixeron e fan que un pobre pase fame para que un rico viva mellor.
25.– Un feito militar que admire?
– Sierra Maestra.
26.– Que don natural lle gustaría ter?
– Habelencia para a música e tocar o piano.
27.– De que maneira lle gustaría morrer?
– Mirando a morte cos ollos abertos.
28.– Cal é o seu estado de ánimo máis habitual?
– Cambiante.
29.– Que defectos lle inspiran máis indulxencia?
– A nugalla e a indulxencia que dita o amor.
30.– Un lema na súa vida?
– Non fagas mal a ninguén (que me dicía meu pai).”

Cuestionario Proust: Agustín Fernández Paz

Publicado o por

Desde o blogue de Ramón Nicolás, Caderno da crítica, este Cuestionario Proust a Agustín Fernández Paz.

“1.– Principal trazo do seu carácter?
– A empatía (agás cos “poderosos”).
2.– Que calidade aprecia máis nas persoas?
– O afecto. E que actúen sen dobreces.
3.– Que agarda das súas amizades?
– Afecto e comprensión.
4.– A súa principal eiva?
– A indecisión á hora de solucionar algún problema.
5.– A súa ocupación favorita?
– Unha delas: ver bo cine.
6.– O seu ideal de felicidade?
– Estar a carón das persoas que quero.
7.– Cal sería a súa maior desgraza?
– Sentirme afastado das persoas que quero.
8.– Que lle gustaría ser?
– Estou conforme co que son.
9.– En que país desexaría vivir?
– Gústame Galicia, malia todas as desfeitas.
10.– A súa cor favorita?
– Todas as cores do mundo.
11. – A flor que máis lle gusta?
– As rosas. E a do cinamomo (que en Vilalba chamabamos azahar).
12.– O paxaro que prefire?
– O xílgaro.
13.– A súa devoción na prosa?
– Franz Kafka e Álvaro Cunqueiro.
14.– E na poesía?
– José Ángel Valente
15. Un libro?
– Punto Cero.
16.– Un heroe de ficción?
– Atticus Finch, o avogado de Matar un reiseñor.
17.– Unha heroína?
– Ann Mueller-Sthal, a protagonista d´A caixa de música.
18.– A súa música favorita?
– A das voces femininas do jazz, como Billie Holiday ou Dinah Washington.
19.– Na pintura?
– Vincent van Gogh e René Magritte.
20.– Un heroe ou heroína na vida real?
– Heroe: Emilio Silva / heroína: Rosa Parks.
21.– O seu nome favorito?
– Mariña.
22.– Que hábito alleo non soporta?
– A petulancia, a soberbia.
23.– O que máis odia?
– Paga a pena odiar? Mellor, o desprezo polas persoas que medran explotando outras.
24.– A figura histórica que máis despreza?
– Hai ben delas! Pinochet e Franco andarían no listado.
25.– Un feito militar que admire?
– A actuación do exército portugués o 25 de abril.
26.– Que don natural lle gustaría ter?
– Ter bo oído para a música e tocar algúns instrumentos
27.– De que maneira lle gustaría morrer?
– Gustar e morrer na mesma frase? Da maneira que menos dor lles cause ás persoas que quero.
28.– Cal é o seu estado de ánimo máis habitual?
– De agradecemento á vida, ese galano marabilloso.
29.– Que defectos lle inspiran máis indulxencia?
– Todos os que non impliquen a dominación sobre outras persoas.
30.– Un lema na súa vida?
– «O único que queda é o amor».