Arquivo da categoría: Homenaxes
Día Lugrís, 17 de decembro
“A 
Coruña e Vigo son a mesma cidade. Así nolo di co seu talento a pintura de Urbano Lugrís. Dous pontóns de amarre no mesmo océano. Para significar unha vez máis esta revelación, o vindeiro sábado 17 de decembro celebrarase –simultaneamente- en Vigo e na Coruña a Acción Urbano. Xornada cívico-bohemia, en honra do gran mestre. O Orzán, o Berbés e un único manifesto en botella polos camiños do mar a prol da creatividade e da arte galega. Sábado 17 de decembro. Percalinópolys e Xouba City (isto é A Coruña e Vigo na terminoloxía do pintor) unidas outra vez pola vida, pola bohemia, polo talento abisal de Urbano Lugrís, profeta do atlantismo. O fato de enxarmantes da Coruña autedonimámonos IN NAVE CIVITAS (por suposto ti es membro de honra). Imaxinamos un acto en catro tempos:
1. Ás 20:00 horas: Obradoiro submarino. Xuntanza no palco da música de Méndez Núñez para decorar paraugas con debuxos de peixes. Así, se chove, facemos da necesidade virtude. Saída da manifestación atlántica presidida, con toda pompa e esplendor, polo son dos gaiteiros Os Vicentes de Elviña.
2. Camarote Lugrís. Intervención pictórica rápida na rúa Mantelería, diante do recanto que ocupaba o estudo de Lugrís.
3. Balada do Porto de Os. Estrea no Borrazás (Rúa Orzán, 165), café moi querido por Lugrís, dunha rapsodia inspirada no poema do mesmo nome, composta por Marcos Aboal e Lourenzo Castro.
4. Na Coiraza do Orzán, lectura e lanzamento -en botella- do manifesto, dirección ribeira do Berbés.” Texto de Xurxo Souto.
“Vento feliz o que de Norte a Sur enche as velas e move a olívica Nave das Ideas, con mascarón o símbolo de Venus, e tras si o ronsel labiríntico camiño desta nosa Ítaca negada. Atinado todo. Voltará Xerión.
Nesta Atlántida lugrisiana encantada (Hic habitat felicitas) que devolvedes, busco agora tabernas de poesía e Terra, ergo a cunca de louza como un Grial de Arturo e brindar por vós, por Nós polo Trasmundo estixio, eterno navegar o noso. Sempre torques áureo: do cabo do principio ó cabo do fin, busca da unión, da cosmogonía circular. Reclamaremos bardos e druidas, Pondal, Manuel Antonio, Cebreiro, Laxeiro, Seoane, Ramón de Trasalba, Manuel de Outeiro… Lugrís, memoria feita luz, estrelas no ceo do noso Oriente.
E mentres, neste mencer limpo pola Marola escoitaremos unha alborada senlleira de Emilio Corral. Aturuxo cravado no Ceo e no Mar.” Texto de Felipe-Senén.
Ponteceso: actos das Xornadas No confín do outono pondaliano
A 
Fundación Eduardo Pondal de Ponteceso organiza as Xornadas No confín do outono pondaliano. Dentro do seu programa, que pode ser descargado aquí, destacan as seguintes actividades literarias:
Mércores 14 de decembro:
– Diana Varela Puñal e Xulio Valcárcel: Presentación do libro de poesía infantil dixital As trovas de Midas, publicado en Galebook, e obradoiro de poesía. No CRA Nosa Señora do Faro de Ponteceso. En horario lectivo.
Sábado 17 de decembro:
– Rafael Lema Mouzo: Cova céltica Os vapores cormeños. Na lareira da Fundación Eduardo Pondal. Ás 17:30 horas.
Domingo 18 de decembro:
– Centenario do nacemento de Álvaro Cunqueiro. No salón de actos da Fundación Eduardo Pondal. Ás 12:45 horas. Tamara Lema e Esteban Rey: Escenificación do conto de Álvaro Cunqueiro: Felpeto.
– Lectura cívica de textos cunqueiráns. Alba Costa: Interpretación musical do texto de Álvaro Cunqueiro Teus ollos.
– Coral A Oliveira de Monte Branco (dirixida por Teresa Facal): Estrea da canción Quen poidera namorala, de Álvaro Cunqueiro (partitura cedida polo grupo Milladoiro nas FestiLetras 2011).
– Agasallo do libro O mellor de Cunqueiro, por xentileza de La Voz de Galicia.
Luns 19 de decembro:
– Os Quinquilláns: Representación teatral da obra Merlín para alumnado do CEIP As Forcadas de Corme e CRA Nosa Señora do Faro. No salón de actos da Casa dos Veciños. Ás 11:00 horas.
– Os Quinquilláns: Representación teatral da obra Merlín para alumnado do CEIP Eduardo Pondal de Ponteceso. Ás 15:30 horas.
– César Morán Fraga: Conversa e animación musical arredor da figura do escritor Álvaro Cunqueiro con escolares de 2° de Bacharelato do IES de Ponteceso. No salón de actos da Fundación Eduardo Pondal. Ás 16:30 horas.
Martes 20 de decembro:
– XXX° aniversario da oficialidade dos símbolos de Galicia. No salón de actos da Fundación Eduardo Pondal. Ás 12:00 horas. Xesús Rábade Paredes: Conferencia Os símbolos de Galicia, para alumnado de 3° de ESO do IES de Ponteceso. Coa presenza institucional da Fundación Rosalía de Castro a través da súa presidenta Helena Villar Janeiro.
Ourense: homenaxe a Marcos Valcárcel
O 
luns 12 de decembro, ás 20:15 horas, na Aula de Cultura do Liceo de Ourense, terá lugar unha homenaxe a Marcos Valcárcel por parte dos seus compañeiros e amigos desta entidade, da que foi o Director da Sección de Literatura, con motivo do primeiro aniversario do seu pasamento.
A Coruña: recital poético en homenaxe a Alfonso Abelenda
O venres 9 de decembro, ás 20:00 horas, no Hotel Hesperia (Rúa Juan Flórez, 16) da Coruña, no marco da inauguración da IV Feira de Arte Galega, terá lugar unha homenaxe poética a Alfonso Abelenda, na que participan Pablo Bouza, Miguel Anxo Fernán-Vello, Olga Patiño, Ánxeles Penas, Dores Tembrás, Xulio L. Valcárcel, Diana Varela e Eva Veiga.
A ONCE lembrará a figura de Álvaro Cunqueiro
“O 
centenario do escritor, gastrónomo e xornalista Álvaro Cunqueiro chega tamén á ONCE. O vindeiro sábado 10 de decembro, cinco millóns de cupóns repartidos por toda España levarán impresa a cara do intelectual. Ademais, nunha nota de prensa remitida pola entidade, comprométese a “achegarse á súa prolífica obra a través dos fondos da nosa biblioteca braille e sonora”.” Vía Cultura Galega.
A Pobra do Caramiñal: homenaxe a Anxo Rei Ballesteros
O 
luns 5 de decembro, ás 20:30 horas, na praza dos Catro Canos da Pobra do Caramiñal, terá lugar unha homenaxe a Anxo Rei Ballesteros, con lecturas das súas obras e cancións seguindo este programa:
– Presentación do acto a cargo de Alberto Piñeiro.
· Intervención de Manuel Teira.
· Verbas de María Xesús Armada (viúva de Anxo Rei Ballesteros).
· Lectura colectiva de textos de Anxo.
· Actuación das pandereteiras O Son das Ferreñas.
· Lectura colectiva de textos de Anxo.
· Lay Lady Lay, versión galega de Anxo Rei Ballesteros, interpretada por Xosé Anxo Tato.
· Lectura dun fragmento de Xogos de Damas e interpretación da canción Sei dunha illa na mar por Cristina G. Román.
· Lectura colectiva de textos de Anxo.
· Knockin’ on Heaven’s Door, versión galega de Anxo Rei Ballesteros, interpretada por Xosé Anxo Tato.
· Amparo Cerecedo cantará Adios ríos, adios fontes.
· Pequena sorpresa musical …
· Actuación das pandereteiras O Son das Ferreñas.
Ourense: VIII Xornada de homenaxe a Eduardo Blanco-Amor, polo Centro PEN de Galicia
A Coruña: homenaxe a Nicomedes Pastor Díaz no seu bicentenario
“Hai 
agora cen anos a Real Academia Galega rendía homenaxe a Nicomedes Pastor Díaz (Viveiro, 1811-Madrid, 1863) cunha ofrenda na súa vila natal e dedicándolle ao intelectual o número 50 do seu emblemático Boletín. Naquel exemplar de setembro de 1911 escribían enormes eloxios ao poeta e político de Viveiro Manuel Murguía, entón presidente da RAG, e Uxío Carré Aldao. Tamén se recuperaban para os lectores da época discursos e poemas de Pastor Díaz, mesmo unha curiosa peza en francés titulada Vie et mort. Un século despois, a Academia mantén viva a súa memoria e volverá lembrar ao autor de Alborada. Nesta ocasión a homenaxe non terá lugar no Viveiro de Pastor Díaz, senón na sede da Real Academia Galega na Coruña (Rúa Tabernas, 11). A Academia contará tamén coa colaboración da Universidade, que se sumará aos actos programados para o 1 de decembro. A xornada arrancará ás 17:00 horas cunha ofrenda floral na rúa Nicomedes Pastor Díaz, na que intervirán o sucesor de Murguía na presidencia da Academia, Xosé Luís Méndez Ferrín; o reitor da Universidade da Coruña, Xosé María Barja, e a poeta Luz Pozo Garza. Ás 18:00 h. terá lugar o acto central da homenaxe na sede da RAG, na coruñesa rúa Tabernas. Luís Caparrós, vicerreitor da UDC e editor da poesía de Pastor Díaz, analizará o seu labor poético, faceta literaria na que afondarán tamén o investigador Emílio Xosé Ínsua e o académico Henrique Monteagudo. O doutor Fausto Galdo, pola súa banda, lembrará a relación do intelectual coa súa vila natal e, por último, o académico e historiador Xosé Ramón Barreiro Fernández dará conta da intensa actividade política do deputado Pastor Díaz.” Vía La Voz de Galicia e Cultura Galega.
Sela, Arbo: Homenaxe a Evaristo de Sela
“Evaristo 
González Fernández (Sela, 1917-Vigo, 1994) foi catedrático de grego de ensino medio e, entre outros labores, traduciu ao idioma galego as dúas grandes obras da literatura clásica: A Iliada e a Odisea, publicadas a finais dos anos 90 polo Consello da Cultura Galega e distribuidas por Editorial Galaxia na colección Clásicos Greco-Latinos, que dirixiu durante anos o profesor Manuel Díaz. O pasado domingo 27 de novembro, na aldea da Granxa, na parroquia de Sela, concello de Arbo, á beira do río Miño, no sur de Galicia, amigos e veciños lembraron ao autor nunha sentida homenaxe que congregou a numeroso público. Ademais dos organizadores do acto, a Asociación Cultural Evaristo de Sela (Agapito Valado e Manuel Álvarez), falaron o profesor Xesús Alonso Montero, o catedrático de grego da Universidade de Santiago, Juan José Moralejo; o escritor e director de Galaxia, Víctor F. Freixanes; o alcalde de Arbo, Xabier Simón, e a filla do homenaxeado, Stella Maris González. Rapaces e rapazas do concello leron poemas de Evaristo de Sela e os versos de Homero en lingua galega, traducidos por aquel. “É un acto de xustiza, en memoria dun home autodidacta, nado na aldea, que co seu esforzo estudou os clásicos grecolatinos e, en tempos moi difíciles, quixo poñer na lingua dos seus os versos do gran poeta grego”, explicou na súa intervención Alonso Montero.” Vía Galaxia.
