Láncara: entrega do XI Premio Ramón Piñeiro-Facer País a Agustín Fernández Paz
Arquivo da categoría: Premios e concursos (outros)
Concurso Dragal nas redes sociais
Con 
motivo da celebración de @ForoUNIREDE, o II Foro da web 2.0 de Galicia, ponse en marcha o sorteo de 1 exemplar de cada novela da triloxía Dragal (A Herdanza do Dragón, A Metamorfose do Dragón e A Fraternidade do Dragón) nas redes sociais, coa dedicatoria personalizada da autora, Elena Gallego Abad (@elenagallegoab).
Para participar é preciso subir unha imaxe alusiva á Triloxía, o mundo máxico dos dragóns ou calquera outro elemento do universo Dragal (fotografía, debuxo, montaxe Instagram) á páxina de fans da Fraternidade Dragaliana no facebook ou tweets co hashtag #dragongalego dirixidos a @elenagallegoab e @ForoUNIREDE
Todas as imaxes recibidas nesta páxina ata as 13:55 horas do sábado 27 de outubro serán expostas ao longo da intervención que Elena Gallego Abad realizará en @ForoUNIREDE. Antes de finalizar a charla, con remate previsto ás 14:00 horas, o público asistente á xornada escollerá as dúas imaxes subidas á rede que, pola súa relación coa Triloxía, orixinalidade e/ou calidade artística, teñan maior popularidade, cando menos unha delas acompañada por texto en lingua galega. Unha terceira imaxe será elixida polos votos emitidos polos internautas ás fotografías subidas á páxina de fans.
A persoa ou persoas gañadoras recibirán como premio, por orde de selección, un exemplar do primeiro, un exemplar do segundo ou ben un exemplar do terceiro libro da Triloxía Dragal dedicados pola autora.
Poderán participar no sorteo todas aquelas persoas físicas que, sen límite de idade, sexan seguidoras da páxina de fans da Fraternidade dende a súa conta no Facebook, ou sexan seguidoras/es de @elenagallegoab e @ForoUNIREDE dende unha conta propia en Twitter.
O anuncio dos gañadores farase público durante a propia presentación e publicarase nas redes sociais xunto coas imaxes da súa autoría, notificándoselles mediante o envío dunha mensaxe directa para confirmar a aceptación do premio antes do luns 29 de outubro (ata as 20:00 horas), debendo especificar un correo electrónico de contacto.
Os premios do presente sorteo en ningún caso poderán ser obxecto de cambio, alteración, compensación a petición do gañador ou cesión a terceiros. No suposto de que algún dos gañadores non acepte o premio, non o recolla ou non cumpra co establecido nas presentes bases, considerarase deserto.
Reservas e limitacións:
Calquera comunicación falsa de datos persoais dará dereito á organizadora do sorteo á descalificación do participante, que non poderá dispoñer do correspondente premio. A organizadora queda eximida de calquera responsabilidade no suposto de existir algún erro na captura ou transcrición dos datos facilitados polos participantes, que poidan impedir a súa identificación. A organizadora poderá verificar a identidade dos premiados mediante copia do DNI ou outra documentación válida.
A organizadora resérvase o dereito a descalificar e eliminar da páxina de fans calquera fotografía ou tweet que conteña un contigo ameazante, falso, mal interpretable, abusivo, difamatorio, obsceno e/ou escandaloso, viole os dereitos das persoas á privacidade ou á publicidade ou inclúa marcas comerciais de terceiros.
Os datos persoais facilitados para participar no sorteo usaranse exclusivamente para o seu desenvolvemento a xestión da entrega do premio e para calquera outra finalidade prevista nas presentes bases. A participación no sorteo supón a aceptación das mesmas.
María Reimóndez organiza un concurso en Twitter arredor a súa novela En vías de extinción
1. Organizadora 
do sorteo: María Reimóndez.
2. Ámbito temporal do sorteo: dende o 15 de outubro ás 10 da mañá ata o 14 de novembro ás 15 horas.
3. Participantes do sorteo. Poderán participar todas as persoas que teñan unha conta en Twitter propia e sexan seguidoras/es da páxina de Twitter: @ViasDeExtincion (www.twitter.com/ViasDeExtincion).
4. Premio. A autora regalará dous libros seus –O club da calceta e Usha– ao tweet gañador, que será escollido por unha persoa entre o público que asista á presentación da novela En vías de extinción en Pontevedra. A man inocente escollerá o tweet de unha caixa na que se atoparán impresos individualmente todos os tweets.
O premio do presente sorteo en ningún caso poderá ser obxecto de cambio, alteración, compensación a petición do gañador ou cesión a terceiros.
5. Mecanismo do concurso: Os participantes deberán seguir os pasos establecidos nestas bases, contestando á pregunta feita (Que foi o que máis che gustou de En vías de extinción?) cun tweet acompañado do hashtag #paraGaia
A elección do tweet gañador levarase a cabo na presentación de En vías de extinción en Pontevedra o 15 de novembro.
O anuncio da/o gañadora farase público durante a propia presentación e publicarase tralo remate da presentación no Twitter e na páxina web www.enviasdextincion.net.
6. Comunicación da/o gañadora. O resultado do sorteo notificarase ao participante gañador/a mediante o envío dunha mensaxe directa para confirmar a aceptación do premio antes do luns 19 de novembro (ata as 15 horas), onde deberá especificar un correo electrónico onde contactala/o.
No suposto de que a/o gañadora non acepte o premio, non o recolla ou non cumpra co establecido nas presentes bases, o premio quedará deserto.
7. Reservas e limitacións. Os datos deberán ser facilitados pola/o participante de forma veraz. Calquera comunicación falsa de datos persoais dará dereito á organizadora do sorteo a descalificar á gañador/a para participar e poder dispoñer do correspondente premio. A organizadora queda eximida de calquera responsabilidade no suposto de existir algún erro na captura ou trascripción dos datos facilitados pola/os propias/os participantes que poidan impedir a súa identificación. A organizadora poderá solicitar á premiada/o identificación mediante fotocopia de DNI ou outra documentación válida para verificar a súa identidade. A organizadora resérvase o dereito a descalificar calquera tweet que non cumpra os seguintes requisitos. Vostede afirma e garantiza, con respecto a cada tweet que envíe, que estes non mostran o seguinte: contigo ameazante, falso, mal interpretable, abusivo, difamatorio, obsceno e/ou escandaloso, non violan os dereitos das persoas á privacidade ou á publicidade, e non inclúen marcas comerciais de terceiros.
8. Protección de datos. Os datos persoais que vostede facilite para participar no sorteo usaranse exclusivamente coa finalidade de: poder realizar o desenvolvemento e xestión do sorteo, xestión da entrega do premio e para calquera outra finalidade prevista nas presentes bases.
9. Aceptación e publicación das bases. A participación no sorteo supón a aceptación das presentes bases.
IX Premio Luísa Villalta a iniciativas normalizadoras
1. OBXECTIVOS
O Servizo de Normalización Lingüística da Universidade da Coruña, o Servizo de Normalización Lingüística da Universidade de Santiago de Compostela e a Área de Normalización Lingüística da Universidade de Vigo, en colaboración coa Secretaría Xeral de Política Lingüística, convocan o IX Premio Luísa Villalta a Iniciativas Normalizadoras cos seguintes obxectivos:
– Desenvolver iniciativas innovadoras, relacionadas coa planificación e a normalización lingüística, creadas por persoas e/ou grupos que pertencen ao ámbito universitario.
– Elaborar propostas que presenten rigorosidade planificadora e normalizadora para incentivar, deste xeito, a investigación nos ámbitos da sociolingüística e da planificación lingüística.
– Promover a reflexión e a implicación da comunidade universitaria galega a respecto da situación da nosa lingua dentro das súas institucións e no contorno en que se desenvolven as súas actividades.
– Aproveitar as potencialidades técnicas e científicas e os recursos humanos existentes nas tres universidades, así como outros recursos externos a elas.
2. PARTICIPANTES
O concurso está dirixido a todos os membros da comunidade universitaria galega (Universidade da Coruña, Universidade de Santiago de Compostela e Universidade de Vigo), así como aos seus respectivos centros adscritos. Poderanse presentar todas aquelas persoas que o desexaren de xeito individual ou en grupos. Coa constitución de equipos preténdese favorecer a participación dos colectivos que teñen entre os seus obxectivos pular pola normalización do galego, como as comisións de normalización lingüística, as asociacións estudantís etc. Dadas as características do concurso fica excluído de participar todo o persoal que traballe nos servizos lingüísticos destas tres institucións.
3. CARACTERÍSTICAS DA INICIATIVA
O premio consta de dúas modalidades:
a) Premiarase o deseño dunha campaña normalizadora que desenvolva unha iniciativa orixinal que teña como obxectivo fomentar o uso do galego no ámbito universitario.
A iniciativa poderá presentar enfoques diferentes dependendo de cales foren os ámbitos de aplicación, os obxectivos que se perseguiren, os destinatarios a que for dirixida a acción etc. Neste sentido, é posible ben deseñar unha campaña dinamizadora para un centro en concreto de calquera dos existentes nas tres universidades galegas, de modo que se oriente cara a un ámbito de coñecemento específico (informática, dereito, ciencia, deporte etc.) ou ben deseñar unha campaña dinamizadora para as tres universidades galegas que se poida desenvolver simultaneamente ou non.
En todas as campañas poderá procurarse a implicación de institucións, asociacións e organismos alleos ás universidades que teñan como unha das súas responsabilidades o fomento da lingua galega así como doutras entidades que se puideren implicar dalgún xeito no proceso normalizador.
A campaña que se propuxer debe ter uns destinatarios concretos, débese saber onde se pretende actuar, e sobre todo que se espera obter con ela, cales son os obxectivos. Para iso o documento en que se recolla deberá contar, cando menos, coas seguintes epígrafes:
– O punto de partida onde figure a situación do galego no ámbito en que se centrar: referencias ao status legal da lingua nese ámbito, utilización de diagnoses e análises previas se as houber, grao de coñecemento do medio sobre o que se vai traballar, ter en conta o traballo previo de tipo normalizador feito no mesmo ámbito etc.
– Os obxectivos que se perseguen: explicación do que se pretende e reflexión sobre a súa conveniencia, nomeadamente sobre os obxectivos que se perseguen e sobre a importancia que tería de se cumpriren estes así como sobre a repercusión que poderían acadar.
– A metodoloxía: análise dos procedementos e estratexias que se van seguir para acadar os obxectivos que se perseguen, cunha breve reflexión sobre a metodoloxía escollida e a súa conveniencia.
– As actividades que se pretenden desenvolver: descrición das actividades concretas que se han desenvolver e especificación da súa relevancia dentro dos obxectivos que pretende conseguir a campaña.
– A planificación temporal da campaña: configuración dun calendario de execución da campaña o máis detallado que for posible.
– As persoas implicadas e persoas a que implica: relación de persoas as que vai dirixida a campaña, así como as diferentes actividades (no caso de variaren), así como a relación de persoas ou axentes normalizadores que se han implicar no seu desenvolvemento.
– A estimación orzamentaria para o desenvolvemento da campaña: deberase presentar unha estimación orzamentaria o máis axustada posible á realidade, co que se poden incluír memorias económicas con base nuns orzamentos previos.
b) Premiarase unha idea para a promoción do galego que explique razoadamente unha proposta cuxo obxectivo for fomentar o uso do galego no ámbito universitario. A entrega desta iniciativa constará obrigatoriamente dun pequeno informe razoado sobre a idea que se presenta, a súa motivación, os seus obxectivos e a súa incidencia social. Poderá acrecentarse este informe con calquera material e/ou soporte que complemente, reforce ou desenvolva a iniciativa xa fundamentada previamente.
Os criterios que rexerán nesta modalidade son os seguintes:
– As posibilidades reais de se pór en práctica e a súa capacidade de incidencia social.
– A coordinación entre distintos axentes dinamizadores: colaboración entre distintos departamentos, servizos, institucións etc., e sobre todo que se poida contar co apoio dun amplo tecido social.
– A multidisciplinaridade e o carácter transversal do proxecto.
– A novidade e a orixinalidade da iniciativa.
Para alén destes criterios básicos, valoraranse tamén o aproveitamento dos recursos humanos e económicos e a calidade lingüística que presentaren os materiais no seu conxunto, tanto no informe obrigatorio como naqueles materiais e/ou soportes que complementaren a proposta.
4. TRAMITACIÓN
As solicitudes presentaranse a través do Rexistro Xeral das tres universidades e dirixiranse ao Servizo de Normalización Lingüística da Universidade da Coruña, ao Servizo de Normalización Lingüística da Universidade de Santiago de Compostela ou á Área de Normalización Lingüística da Universidade de Vigo.
Deberanse presentar dous sobres:
O primeiro sobre, que deberá estar pechado, incluirá a campaña de promoción do idioma ou a idea para a promoción do galego, en papel e en versión electrónica (formato word ou pdf).
No anverso deste sobre figurarán os datos que seguen:
1. Lema do traballo.
2. A denominación do premio: IX Premio Luísa Villalta a Iniciativas Normalizadoras.
3. A modalidade a que se concorre: a) deseño dunha campaña normalizadora; b) idea para a promoción do galego.
No segundo sobre, que se deberá entregar tamén pechado e baixo o mesmo lema escrito no anverso, incluirase a identidade e os datos académicos completos da/s persoa/s participante/s ou do colectivo, así como un teléfono e un correo electrónico de contacto. Deberá, asemade, achegarse unha fotocopia do DNI/NIF/CIF.
5. PRAZO DE PRESENTACIÓN
O prazo fixado para a presentación de solicitudes será até as 14:00 h. do día 9 de novembro de 2012.
6. PREMIOS
Concederase un único premio por modalidade e o xurado poderá deixar deserta unha ou as dúas modalidades de xulgar que os traballos presentados non responden aos criterios que se indican nesta convocatoria.
A dotación económica será a seguinte:
Modalidade a) Deseño dunha campaña normalizadora:
2 000 € para a persoa ou grupo de persoas que a elaboraren.
Modalidade b) Premio a unha idea para a promoción do galego:
1 000 € para a persoa ou grupo de persoas que a elaboraren.
Por outra parte, as tres universidades valorarán desenvolver a campaña que resultar gañadora ao ano seguinte ao da resolución do premio (ou ben en anos posteriores).
Os dereitos que derivaren do seu uso serán propiedade das institucións organizadoras.
No caso de que, definitivamente, a campaña gañadora se executar, as institucións organizadoras poderán consultar a persoa ou as persoas gañadoras ou requirir a súa participación voluntaria.
A dotación destes premios financiarase con cargo á aplicación orzamentaria 9855.9995.422D.480.08 (Premios. Servizo Normalización Lingüística).
7. SELECCIÓN
O xurado estará composto polas seguintes persoas:
a) Manuel Bermúdez Blanco, responsable de Área de Asesoramento do Servizo de Normalización Lingüística da Universidade de Santiago de Compostela.
b) María Dolores Candedo Gunturiz, profesora da UDC e presidenta de Nova Escola Galega.
c) Beatriz Corral Sánchez, gabinete da Secretaría Xeral de Política Lingüística.
d) Cristina Rodríguez Ricart, técnica da Área de Normalización Lingüística da Universidade de Vigo.
e) Goretti Sanmartín Rei, directora do Servizo de Normalización Lingüística.
8. RESOLUCIÓN
A resolución do xurado será inapelable e terá lugar dentro dos 20 días seguintes a que finalice o prazo de entrega de solicitudes.
A data do acto de entrega do premio publicarase oportunamente e coa debida antelación.
Certame Cores con Palabras 2012
BASES DO CERTAME. Poderán concorrer ao certame Cores con Palabras todas aquelas persoas maiores de 55 anos que presenten obras pictóricas ou poéticas orixinais. Cada participante poderá presentar un máximo de dúas obras por categoría que serán inéditas e de temática libre.
CATEGORÍA PICTÓRICA. As técnicas que se poden utilizar son pintura acrílica, óleo ou técnica mixta sobre lenzo ou táblex. As súas dimensións serán, como mínimo, 25 F ( 81×65 cm) e, como máximo, 100F (165×130 cm). As obras deberán levar marco ou bastidor e presentaranse coa embalaxe protectora suficiente para o seu traslado.
CATEGORÍA POÉTICA. Os poemas deberán estar escritos en lingua galega. O tema, rima e métrica serán libres, cunha extensión máxima de 30 versos.
DOCUMENTACIÓN. Xunto coas obras, en cada categoría achegarase o boletín de inscrición debidamente cuberto, cos datos identificativos do autor, título da obra etc. así como unha fotocopia do carné de identidade do autor.
DATA E LUGAR DE PRESENTACIÓN DAS OBRAS. As obras poderanse entregar do 18 ao 24 de outubro do presente ano, ben mediante mensaxeiro, ben persoalmente en horario de 9:00 a 14:00 horas no: CENTRO DE ANIMACIÓN E ARTES PLÁSTICAS TOGARIÑOS (Avenida de Vigo, 25, baixo, 36680, A Estrada, Pontevedra). Os gastos de entrega e recollida das obras serán por conta de cada participante. A responsabilidade civil subsidiaria recaerá nos participantes.
EXPOSICIÓN. Entre todas as obras presentadas, levarase a cabo unha selección en cada categoría das 50 obras de maior calidade, técnica e orixinalidade que pasarán á fase final do certame e formarán parte, ademais, do libro Cores con palabras que se publicará con motivo dunha exposición final nunha sala reservada para o efecto.
XURADO. A composición do xurado darase a coñecer o día da entrega de premios e estará composto por destacados persoeiros do mundo da plástica e poética galega, así como por membros da organización.
PREMIOS. Establécense 3 premios por categoría (1.º, 2.º e 3.º) que serán entregados o día da inauguración da exposición e que consistirán nunha placa conmemorativa e diploma acreditativo, así como unha reprodución do Códice Calixtino. A presentación ao certame supón a total conformidade dos participantes coas presentes bases e a organización resérvase o dereito de interpretalas ante calquera dúbida.
INFORMACION COMPLEMENTARIA. Centro Togariños Teléfonos: 986 57 25 46, 671 90 00 78 e 667 09 19 52.
As bases pódense descargar tamén aquí: Togariños Certame de Pintura 2012.
Kalandraka leva o Premio Nacional ao Mellor Labor Editorial
“A 
editora pontevedresa Kalandraka acaba de ser recoñecida co Premio Nacional ao Mellor Labor editorial, que convoca anualmente o Ministerio de Cultura. O xurado do galardón destacou “o compromiso coa literatura infantil, destacando o cuidado dos textos, xunto coa calidade da ilustración e a dedicación a xéneros máis complexos como a poesía”, e sinalou que “é por isto, un referente en España e no estranxeiro”. O galardón, sen dotación económica, pretende “distinguir o conxunto do labor editorial dunha persoa física ou xurídica que destacase pola súa aportación sobresaínte e innovadora á vida cultural española”. É a primeira vez que unha firma galega se fai con este galardón, que xa recibiron en anos anteriores firmas tan consolidadas no panorama estatal como Siruela, Gredos, Alianza ou Visor, entre moitas outras. Segundo recoñece Xosé Ballesteros, director da editora, “sendo sincero non sabía nin que se reunía hoxe o xurado, a chamada pilloume totalmente de improviso”. No entanto, sinala que “estamos moi contentos por varias razóns, a primeira polo premio en si. Considerámolo como o recoñecemento a un labor colectivo, non só dos que traballamos na editora senón tamén dos autores e ilustradores do noso catálogo e tamén da xente da imprenta. Resulta unha satisfacción saber que os libros galegos son recoñecidos noutros lugares. Tamén é unha alegría que o premio recaia nunha editora galega, porque sempre semella que estamos na periferia da edición. E logo, é unha satisfacción porque é a primeira vez que o galardón vai a unha editora de literatura infantil e xuvenil”.” Desde Cultura Galega.
Coñécense os finalistas da 9ª edición do Premio Literario Martín Sarmiento
Déronse a coñecer os finalistas da novena edición do Premio Literario Martín Sarmiento:
1ª categoría: 1º e 2º de Educación Primaria:
– María Solar: Vou ter un irmán!!!, Galaxia.
– Pinto & Chinto: A maceira que daba calquera cousa menos mazás, Everest.
– Manuel Guisande: Rodribico e a noite, Baía.
2ª categoría: 3º e 4º de Educación Primaria:
– Silvestre Gómez Xurxo: Ti non xogas!, Xerais.
– Antón Cortizas: Rosalía e os equinodermos, Tambre.
3ª categoría: 5º e 6º de Educación Primaria:
– Anxo Fariña: A chave da Atlántida, Xerais.
– Abraham Carreiro: Xoeliki, Sotelo Blanco.
4ª categoría: 1º e 2º de ESO:
– Ledicia Costas e Pere Tobaruela: Mortos de ningures, Everest.
– Agustín Fernández Paz: Fantasmas de luz, Xerais.
5ª categoría: 3º e 4º de ESO e Bacharelato:
– Carlos Laredo Verdejo: Lena e o lobishome, Tambre.
– Xosé Henrique Rivadulla Corcón: O noso amor será eterno, Xerais.
6ª categoría: adultos:
– Manuel Rivas: Todo é silencio, Xerais.
– Antón Riveiro Coello: Laura no deserto, Galaxia.
O Centro PEN de Galicia entrega os premios Rosalía de Castro
“O 
Centro PEN de Galicia entregou este venres 28 de setembro os premios literarios Rosalía de Castro, que se celebran de modo bienal. A entrega tivo lugar no marco dunha velada literaria que se celebrou no Pazo de Fonseca, en Santiago. Esta é a novena edición dunhas distincións pensadas para honrar tanto a lingua e a literatura galegas como as de países ou linguas próximos. Esa característica reflíctese nos premios deste ano, que o xurado outorgou ao portugués Jose Viale Moutinho, á vasca Miren Agur Meabe, á bonaerense María Esther Vázquez e ao barcelonés Enric Casasses. O acto foi presidido polo conselleiro de Educación, Jesús Vázquez Abad; o reitor da Universidade de Santiago, Juan Casares Long, e o presidente do PEN-Galicia, Luís González Tosar, ademais do alcalde de Santiago, Ángel Currás Fernández, entre outras autoridades.O conselleiro destacou que a literatura galega actual conta con diversas “obras sólidas e imaxinativas, sempre na vangarda e frecuentando o mellor que se fai fóra, sen mimetismos nin servidumes impostos pola moda”, pero fixo fincapé na obriga que ten a Administración de apoiar “todo o que signifique unha maior presenza exterior dos nosos autores e dos seus libros”.” Desde Galiciaé.
I Certame de relatos curtos Muller e empoderada!
A
Asociación Nós Mesmas convoca o I Certame de relatos curtos Muller e empoderada!. Poderán participar persoas residentes en España. Cada participante podrá presentar ata dous relatos que deberán ser orixinais e inéditos. Os relatos valerá en cualquera modalidade: Drama, comedia, monólogos, musicais, etc. O relato deberá ser realizado en ordenador, os formatos válidos son .doc, .odt ou .pdf; terá unha lonxitude máxima de 4 caras de Din A4, a dobre espazo en tamaño 12 puntos e en tipografía Times New Roman. O prazo remata o 7 de outubro. As bases completas pódense descargar aquí.
Cultura e Educación institúe a través do Centro Dramático Galego o Premio Roberto Vidal Bolaño ao Espectador
“A
Consellería de Cultura e Educación instituíu a través do Centro Dramático Galego (CDG) o Premio Roberto Vidal Bolaño ao Espectador como iniciativa destinada a fomentar a actitude participativa entre o público teatral. O novo galardón, de carácter anual e vinculado á temporada de exhibición do Salón Teatro, publicou a súa primeira convocatoria. O seu obxectivo é recoñecer as achegas dos asistentes aos espectáculos programados no espazo escénico compostelán sede do CDG. Un xurado integrado polos propios traballadores da compañía pública valorará o interese, de todas as suxestións, opinións ou comentarios que os espectadores fagan chegar a través das fichas que poderán cubrir e depositar na caixa que para tal fin se situará á saída de cada unha das representacións. Deste xeito, e segundo o texto da convocatoria, ao final de cada temporada teatral xulgarase “a suxestión máis atinada, a máis brillante, a máis audaz, a máis reflexiva, a máis construtiva…” Ademais do obxectivo de estimular a participación activa do público, a Consellería de Cultura e Educación presenta o Premio Roberto Vidal Bolaño como instrumento que contribúa a afondar o diálogo entre xestores e públicos destinatarios finais do traballo escénico, de maneira que as apreciacións destes últimos incidan favorablemente no traballo desenvolvido polos responsables culturais e en beneficio da cultura galega en xeral.
O espectador ou espectadora que reciba o galardón conseguirá un abono anual para asistir de balde a todas as funcións do Salón Teatro da seguinte temporada, así como un lote das obras completas de Roberto Vidal Bolaño. As suxestións poderán comezar a depositarse por escrito a partir do inicio da temporada de representacións 2012-2013, que se abre o próximo venres 5 de outubro coa estrea de O Profesional de Dusan Kovacevic baixo a dirección de Manuel Guede Oliva e con Ernesto Chao, Miguel Pernas, Rebeca Montero e Rodrigo Roel nos catro papeis do reparto. De feito, na mesma ficha que se utiliza para optar ao Premio Roberto Vidal Bolaño, os espectadores poderán emitir tamén a súa propia valoración concreta deste ou de calquera outro espectáculo dos programados, estimando nunha escala do 1 ao 5 aspectos como Valoración global, Son, Iluminación, Posta en escena, Elenco e Orixinalidade.”
