Mañá sábado 23 de maio de 2009 terá lugar en Arteixo a presentación oficial da Asociación “Organización Literario Pluri-Cultural @mencer” (O.L.C.A) nun acto con aforo limitado no Hotel “Las Viñas”. Os asistentes tamén presenciarán un recital poético colectivo e darase a coñecer un libro, escolma colectiva, baixo o título de Latexos-Latidos dos autores-poetas Lucía Vilches, Antón Borrazás, Begoña Picón, Carmen Corral Boch e Óscar de Souto. En breve está previsto outro recital poético, tamén en Arteixo, desta volta a porta aberta. Para máis información, poden contactar co colectivo neste enderezo de correo.
Arquivo da categoría: Recitais
A Coruña: Manuel Rivas presenta a Homenaxe á cidade da liberdade (Vídeo)
Os libros arden mal. Homenaxe á cidade da liberdade é un acto que combina literatura, música e memoria da man de Manuel Rivas (narrador), Marcos Meléndrez (cantante de tangos), Gastón Rodríguez (guitarra) e Pulpiño Viascón (voz, gaita e serrucho). Está prevista a participación doutros músicos convidados. Será o sábado a partir das 20:30 no Teatro Rosalía de Castro da Coruña, con entrada libre e de balde.
Vigo: presentación do libro Deter o día cunha flor
Mañá mércores 20 de maio ás 19:30 horas na Casa do Libro de Vigo (R/ Velázquez Moreno, 27) terá lugar a presentación do libro de poemas de Luz Pozo Garza Deter o día cunha flor, ilustrado a toda cor polo gravador betanceiro José Valentín e editado por Baía. No acto, xunto a Luz Pozo e José Valentín, intervirán o profesor, poeta e crítico literario Xosé María Álvarez Cáccamo, a poeta María do Carmo Krukenberg e a directora editorial Belén López Vázquez, quen se encargarán de facer unha aproximación crítica a esta obra que combina a literatura poética e a expresión plástica e que ofrecerán un recital poético.
«”Non existe a arte, só os artistas”. Se así o aceptamos, podería explicarse a afinidade, a irmandade, entre dúas formas de expresión, imaxe e palabra, que se complementan. Antiga é a relación. Xa Simónides de Ceos sostiña que “a poesía é unha pintura falada, e a pintura unha poesía muda”. Luz Pozo e José Valentín seguen unha tradición ben nosa: houbo épocas nas que non se concebía a edición dun libro galego sen as correspondentes ilustracións: de Colmeiro, Seoane, Laxeiro, Xohan Ledo (…).
Relación constantemente renovada, a da pintura e a poesía, que volvemos atopar nesta obra, síntese fecunda de dúas achegas a un todo harmónico. Deter o día cunha flor, este é o título, enunciado-propósito, do libro de Luz Pozo Garza e José Valentín; Luz Pozo, unha das nosas máis grandes poetas; José Valentín, revelación serodia, pero a tempo, dun artista moito máis importante do que a súa modestia lle permite aceptar. Luz e José, dous creadores cun enfoque común de interacción e apoio».
(Do prólogo de Xulio López Valcárcel)
A Coruña: recital poético de Luz Pozo e Manuel Álvarez Torneiro
A Asociación Cultural Alexandre Bóveda informa que mañá martes 12 de maio terá lugar un novo recital do Ciclo Poetas coruñeses con Manuel Álvarez Torneiro e Luz Pozo, presentados por Xavier Seoane. Será ás 20:30 h no salón de actos da asociación (R/ Olmos 16-18, 1º) con entrada libre.
Noia: IV Encontro de Creadores no Barbanza
A Asociación Cultural Barbantia, a Colección Bourel e o Concello de Noia convídanvos á celebración do IV Encontro de Creadores no Barbanza, que terá lugar o xoves 30 de abril no Coliseo Noela de Noia ás 21:00 horas.
PROGRAMA
21:00 horas: Intervención de Antón Riveiro Coello, presidente da Asociación Cultural Barbantia, coa que abrirá o IV Encontro de Creadores no Barbanza.
21:05 horas: Intervención de Antonio Piñeiro, director da Colección Bourel, responsable da edición artesá d´As voces da Musa.
21:10 horas: Recital cos poemas que aparecen no libro As voces da Musa, froito do Encontro, cuxos autores son: Eva Veiga, Ana Romaní, Antonio Piñeiro, Xabier L. Marqués, Xesús Rábade Paredes, Íria Gestoso, María do Cebreiro, Anxo Angueira e Helena Villar Janeiro.
*Durante o recital, iranse intercalando as actuacións de Xosé Luís Miranda, PePe Romero e Sonia Lebedynski, coas súas respectivas aportacións musicais, elaboradas ex profeso para o Encontro.
22:00 horas: Inauguración da exposición dos gravados que forman parte do proxecto, realizados polos seguintes pintores vinculados coa comarca: Alfonso Costa, Xoán Fernández, Manuel Ayaso, Paola García, Nacho C. Beiro, Baldo Ramos, Julio Catalán, Fran Blanco Alcaide e Manolo Figueiras.
22:15 horas: Peche institucional a cargo do alcalde de Noia, Rafael García Guerrero.
Barcelona: actividades de Estaleiro Editora
Entre o días 22 e 25 de abril Estaleiro Editora desenvolverá unha axenda de actividades en Barcelona para dar a coñecer o seu proxecto de edición alternativa e independente a través do poemario Máquina de guerra, primeiro libro da autora galega e residente en Barcelona Raida Rodríguez. O 22 de abril ás 16:30 o portavoz da editora Carlos G. Figueiras compartirá mesa con Raida Rodríguez Mosquera na Facultat de Lletres da Universitat Autònoma, nun acto organizado polo Lectorado de Galego da devandita universidade. Dous días despois, o 24 de abril, Estaleiro levará o seu proxecto ao Espai Social Magdalenes, onde trala presentación de Máquina de guerra ás 19:30 comezará un recital galego–catalán aberto ás persoas interesadas. Este segundo acto está organizado polo Espai Gallec dels Països Catalans. O último evento desta intensa axenda terá lugar ao día seguinte, 25 de abril, ás 18:00 no Centro Galego de Barcelona .
Máquina de guerra dá continuidade a unha enérxica actividade literaria desenvolvida por Raida Rodríguez en revistas, en recitais e na rede, espazo en que a autora mantén o blogue Punto de fuga. Máquina de guerra pretende dar conta das ameazas que atinxen a condición humana na contemporaneidade e desenvolve, neste sentido, unha acción reflexiva e rebelde que aspira a cuestionar e repensar as grandes categorías do pensamento e da acción política, sexa o xénero, a nación, a lingua, o poder ou a memoria. Como o resto de obras lanzadas por Estaleiro poderá ser descargada libremente na páxina web da editorial.
A Coruña: recital de Eva Veiga e Francisco Fernández Naval
Mañá xoves 16 de abril terá lugar unha nova xornada do ciclo Poetas coruñeses, a palabra na voz de quen a crea. Nesta ocasión participarán Francisco Fernández Naval e Eva Veiga, apresentados por Xoán Abeleira. Será ás 20:30 h no salón de actos da Asociación Alexandre Bóveda (R/ Olmos 16-18, 1º). A entrada é libre.
A Coruña: recital de Lucía Aldao e María Lado
Lucía Aldao e María Lado ofrecen mañá sábado 27 de marzo un recital no local A nena Pepita (r/ San Xosé, 2, Monte Alto) para presentar o libro Nove, publicado por Edicións Fervenza. Será a partir das 19 horas, con entrada libre.
Ourense: homenaxe a Víctor Campio
Hoxe 23 de marzo ás 20:15 na Aula de Cultura da Sociedade do Liceo de Ourense a Sección de Literatura homenaxea ao poeta ourensán Victor Campio, cun coloquio arredor da súa obra na que participará ademais do autor Marcos Valcárcel e Manuel Outeiriño. O recital correrá a cargo de Teresa Devesa e Loly Conde.
Ourense: recital para celebrar o Día Mundial da Poesía
Hoxe luns 23 de marzo ás 17:30 da tarde na Sala de Tertulia da Sociedade a Sección de Literatura do Liceo de Ourense celebra o “Día Mundial da Poesía” cun acto dedicado ao poeta Antón Tovar, no que participarán alumnos e alumnas dos Institutos Otero Pedrayo, Celanova, Blanco Amor, Lagoas e E.P.A., que farán un recital con poemas do escritor ourensán. O acto será introducido por Delfín Caseiro.
