Lembrade que esta noite tamén é noite de bruxas e se unha, un casual, vos amordica, hai que devolverlle o belisco se non queredes quedar ameigadiños pra o ano.
Antonio Reigosa (Galicia Encantada)
Arquivo da categoría: Sociedade
A Coruña será a sede permanente do Cultur.gal
«[…] A decisión de que A Coruña sexa a sede de Cultur.gal tomouse logo de avaliar como moi positiva a presenza de público na feira, que os organizadores cifran para os catro días da súa celebración en arredor de 37.000 persoas, o que significa case cuadriplicar a asistencia á primeira edición. Segundo os datos manexados polo consello asesor da feira, 2.900 persoas terían participado nas actividades de público xeral, e 5.500, nas dirixidas a público infantil.
Ademais as actividades profesionais relacionadas coa música, o libro, o audiovisual, as novas tecnoloxías, as artes escénicas, a dinamización lingüística e a xestión cultural congregaron a 500 profesionais deses sectores.
Outro dato que fala da importancia da cita para o sector é a participación de 75 entidades expositoras.»
Ourense: roteiro literario “A esmorga”
Mañá venrés día 19 de decembro, a partir das sete da tarde, a Sección de Literatura do Liceo de Ourense convoca unha nova edición do ROTEIRO A ESMORGA. O inicio terá lugar ás 19:00 horas na Avenida de Zamora, para logo irse desprazando ao longo da cidade medieval polos mesmos espazos físicos e emotivos que percorreron os personaxes da inmortal novela de Eduardo Blanco Amor.
Nesta ocasión a lectura dos textos será a cargo dos alumnos do Instituto de Educación Secundaria da Carballeira, coa que pretenden renderlle a súa pequena homenaxe ao seu profesor, verdadeiro impulsor deste roteiro, Marcos Valcárcel. O peche desta nova edición farase diante da estatua do escritor ourensán na Praza do Bispo Cesáreo, rematando cun viño galego na Sala de Tertulia do Liceo. (Liceo de Ourense)
A Coruña: conferencia de Pilar García Negro
O vindouro dia 17 de decembro, na Fundación Caixa Galicia (Cantón Grande) ás 20:00, a professora da Universidade da Coruña Pilar Garcia Negro falará dentro do ciclo “Literatura e naçom” da A. C. O Facho. A sua charla versará sobre “Rosália, a primeira feminista da naçom galega”.
A Coruña: conferencia de Francisco Pillado
«A Agrupaçom Cultural O Facho de A Corunha convida-o assistir aos seus ciclos de palestras públicas do período 2008-9.
Palestra
O vindouro dia 10 de Dezembro, quarta-feira (mércores), o editor e dramaturgo Francisco Pillado Mayor falará dentro do ciclo “Literatura e Naçom”. A sua charla versará sobre “Aspectos da consideraçom da mulher no recorrer da História”.
O 10 de dezembro do 2008 – Hora: 8 do serám
Local: Centro Socio-Cultural Caixa Galiza
Joám Flórez/ – A Corunha» (A. C. O Facho)
A AELG fai o inventario de 94 casas de escritores e escritoras galegos
A súa catalogación posibilitaría a adquisición futura da categoría de Bens de Interese Cultural
A Asociación de Escritores en Lingua Galega, coa colaboración da Dirección Xeral de Patrimonio da Consellaría de Cultura e Deporte, ten elaborado dous inventarios, correspondentes aos anos 2007 e 2008, que recollen un total de 94 casas de escritores e escritoras galegos.
A sociedade galega e as súas institucións son depositarias e debedoras, e polo tanto responsábeis, da divulgación e conservación do legado outorgado polo traballo inxente das escritoras e os escritores que nos precederon na construción da nosa cultura nacional.
Parte fundamental do patrimonio literario herdado son as casas onde naceron ou viviron os nosos escritores e escritoras pola importancia que estes espazos tiveron nas súas biografías e obras e, en consecuencia, para a nosa historia colectiva e tamén para a historia cultural das nosas aldeas, vilas e cidades.
O seu estudo e documentación constitúe, pois, un deber e unha oportunidade de crecemento cultural e mesmo económico, constituíndo un primeiro paso para a súa inclusión no inventario do patrimonio cultural de Galiza. Así mesmo permite que a súa importancia sexa tida en conta nos diversos Plans Xerais de Ordenamento Municipal que están en andamento, converténdoos en ferramentas de defensa da nosa memoria literaria e simbólica.
O inventario feito pola AELG inclúe, alén dun levantamento fotográfico, unha memoria literaria dos lugares onde viviron e sentiron os nosos escritores e escritoras, o cal pode posibilitar a creación de unidades didácticas que axuden na divulgación do noso sistema literario.
Persegue tamén o inventario a inserción do patrimonio inmobiliario dentro doutro inmaterial: os roteiros literarios, rutas urbanas ou rurais que permitirían coñecer outros lugares importantes na vida do escritor, converténdose en museos ao aire libre. Deste modo sería tamén factíbel a adquisición futura da categoría de Bens de Interese Cultural.
Esta posta en valor pode atender igualmente a crecente demanda de turismo alternativo e de calidade que convén ao noso país, complementando a oferta cultural que nas vilas, e particularmente no rural, tanto necesita o noso tecido hostaleiro, que se está convertendo nunha vía de emprego e de fixación de habitantes nas zonas con declive poboacional.
Desde a AELG contémplase como imprescindíbel achegar á sociedade os contidos xerados a través das novas ferramentas da información, nomeadamente internet, coa posta a disposición dos mesmos a través de mapas interactivos e visitas virtuais que conviden a unha visita ao espazo físico, real. Contidos que estarán proximamente na web da asociación a disposición dos visitantes.
Premios Barbantia da Cultura 2008
O sábado 29 de novembro, ás 12 h:00 no Auditorio Municipal de Ribeira, A Asociación Cultural Barbantia entrega os seus premios Anuais da Cultura e mais presenta o seu Anuario de Estudos correspondente ao 2008. Desta volta, a votación dos socios decidiu os seguintes galardóns:
*Premio Barbantia da Cultura Galega: Alfonso Costa Beiro.
*Premio Barbantia á Traxectoria Cultural no Barbanza: Manuel Dourado Deira.
*Premio Barbantia á Iniciativa Cultural no Barbanza: Museo Etnográfico de Artes.
O premio consiste nun sireno de bronce feito polo escultor barbancés, Manuel Teira, e inspirado no gravado do artista Fran Blanco Alcaide.
Ferrol: presentación do Foro Social Galego
O Venres día 28 de Novembro, ás 20:00 horas no Salón de Actos do Ateneo Ferrolán, terá lugar unha presentación do
FSG (Foro Social Galego). A inauguración do Foro Social Galego será o venres 5 de decembro ás 18:30 horas no Auditorio de Galiza (Sala Mozart).
Ferrol: conferencia de Elsa Oesterhed, membro das Nais da Praza de Maio da Arxentina
O luns 24 de novembro, ás 20:00 na Galería Sargadelos Ferrol, terá lugar a conferencia de Elsa Oesterhed, membro das Nais da Praza de Maio da Arxentina. (Galería Sargadelos de Ferrol)
A Coruña: próximas actividades da A. C. Alexandre Bóveda
NOVEMBRO
* Venres 21: XII edición do Memorial de teatro Ibán Toxeiro, ás 20:30h, no Teatro Rosalía de Castro coa actuación de Teatro Proscrito representando A velada de Jenaro Marinhas del Valle a quen se lle adica este ano o memorial.
Entrada de balde.
* Mércores 26: XII edición do Memorial de teatro Ibán Toxeiro, ás 20:30h, no Forum Metropolitano do Parque Europa, coa actuación do Grupo de Teatro Alexandre Bóveda representando A serpe e o Grupo de teatro da Fundación
Wenceslao Fdez. Flórez Fas-que-Fas representando O bosque ambas obras de Jenaro Marinhas del Valle. Entrada de balde.
A AC Alexandre Bóveda participa na organización da Homenaxe popular da Terra das Mariñas a Isaac Díaz Pardo, os actos desta homenaxe son os seguintes:
Luns 24: Conversas con Felipè Senén e Pancho Pillado, ás 20:30 h na Terraza de Sada.
Martes 25: Proxección da biofilmografía sobre Isaac D. Pardo no IES Díaz Pardo de Sada.
Mércores 26: Conversas con Xosé Neira Vilas, Xosé Luis Axeitos e Avelino Pousa Antelo na Terraza de Sada, ás 20:30h.
Xoves 27: Proxección da película Isaac de Xosé Abad, ás 20:30 h. Na Casa da Cultura de Sada.
Venres 28: Actuación do Coro Cántigas da Terra, ás 20:30 h. Na Casa da Cultura de Sada.
Sábado 29: Foliada no Campo da Festa do Castro (Sada) a partir das 13:30 h, con xantar popular, xogos tradicionais e actuacións musicais.
A nosa entidade sumase máis un ano, ós actos da Marcha Mundial das Mulleres polo 25 de novembro:
Martes 25: Concentración no Obelisco da Coruña, ás 20:30 h.
Venres 28: Clausura da exposición sobre as mulleres caboverdianas de Burela na Casa da Cultura de Carballo ás 20:30 h.
DECEMBRO
* Xoves 4: Inauguración da exposición de fotografía do Colectivo Ollo de Vidro da nosa entidade, ás 20:30 h no salón de actos da asociación. Aberta até o 31 de decembro.
* Sábado 13: Cea de socios e socias da Asociación Cultural Alexandre Bóveda. Aberto o prazo de inscripción.
