Santiago: actividades da fin de semana na Feira do Libro

Publicado o por

Chega ao seu fin a Feira do Libro de Santiago (no Paseo Central da Alameda) con horarios de 11:30 a 14:30 h. e de 17:30 a 21:30 h.
As actividades do sábado 7 son as seguintes:
– 18:30 h. Actividade infantil. Contacontos. Actuación de Fátima.
– 19:00 h. Presentación do libro infantil ¿Qué me pasa, Ntumba? cuentos sobre enfermedades olvidadas, de Feli Ibáñez, publicado por Médicos Sin Fronteras.
– 19:00 h. Enrique Reyes asinará exemplares do seu libro La princesa que emigró, publicado por Éride Ediciones.
– 19:30 h. Sinatura do libro Caja negra, de Francisco Narla.
– 20:00 h. Charla coloquio de Javier Akerman: Terapias naturais, medicina alternativa. Ao remate do acto, o Dr. Akerman asinará exemplares dos seus libros.
– 21:15 h. Sorteo dun lote de libros.

O domingo 8 finaliza a Feira, coas seguintes actividades:
– 18:00 h. Actividade para nenos. Obradoiro de marcapáxinas, impartido por Brétema Animación.
– 19:00 h. Presentación de Poemas no faiado, de varios autores. Colección de poemas lusófonos pensados especificamente para nenos, publicado por Imperdível. Participarán no acto Xosé Antón Serén e Xemma Fernández.
– 20:00 h. Presentación do libro de poesía As Nosas Sombras no Xardín de Serralves, de Xoán Abeleira, publicado por Franouren Edicións. Xunto co autor, participará no acto Dolores Vilavedra.
– 21:15 h. Sorteo dun lote de libros.
– 21:30 h. Peche da Feira do Libro.

Gondomar: presentación de O meu gato é un poeta, de Fran Alonso

Publicado o por

O sábado 7 de maio, ás 12:00 horas, na Librería Libraida (Rúa Rosalía de Castro, 13) de Gondomar, o escritor Fran Alonso e o músico Xurxo Souto presentan o espectáculo poético musical O meu gato é un poeta, dirixido a nenos e nenas a partir de 5 anos e tamén, por suposto, a adultos. Durante a sesión, a poesía converterase en maxia, música e xogo e soará o acordeón.

Certame Choven letras de Lois Pereiro, convocado pola Fundación Caixa Galicia

Publicado o por

“A Fundación Caixa Galicia presenta a novidade Choven letras de Lois Pereiro, un concurso para os centros de Primaria. Con este certame pon en marcha un novo plan de promoción das Letras Galegas que busca ademais a participación dos centros educativos para que amosen os seus programas de actividades en torno á efeméride, non necesariamente relacionados con Lois Pereiro:

BASES

A Fundación Caixa Galicia convoca o Certame Choven letras de Lois Pereiro destinado a apoiar a promoción das Letras Galegas, en recoñecemento ao esforzo realizado polos centros de Educación Primaria na difusión desta efeméride.

– Quen pode participar?
Poderán participar os centros de Educación Primaria que teñan desenvolvido un proxecto ou algunha actividade en concreto con motivo das Letras Galegas 2011.
– Proxectos
Os centros que desexen participar neste certame deberán enviar por correo electrónico á dirección boletinculturalinformacion@caixagalicia.es o proxecto ou actividade deseñados con motivo da celebración do día das Letras Galegas 2011, que poderán acompañar de vídeos, fotos, ou calquera outro material que sirva de apoio do mesmo. Esta documentación deberá vir acompañada da folla de inscrición que se xunta como Anexo [Inscrición Certame Choven Letras de Lois Pereiro 2011] e deberá ser remitida preferentemente en formato PDF.
– Prazo de presentación dos proxectos
O prazo de presentación dos proxectos iníciase no momento da publicación destas bases e concluirá o 26 de maio de 2011 ás 17:00 horas.
– Proceso de selección
A selección dos proxectos gañadores levarase a cabo por un Xurado da Fundación Caixa Galicia. O xurado realizará a selección baseándose no seu interese, orixinalidade e calidade, así como na súa capacidade para transmitir o espírito desta efeméride. Os premios poderanse declarar desertos se o Xurado así o valorase. A decisión do xurado será inapelable. O fallo emitirase na semana seguinte ao peche do certame e comunicarase a través da web da Fundación.
– Premios
Establécense dúas categorías de premios destinados ás Bibliotecas dos Centros gañadores:
* Primeiro premio: un ordenador sobremesa HP Pavilion p6600es-m AMD Athlon II X2 220 + Monitor 20″.
* Segundo premio: un lote de libros.
– Dereitos de explotación
No caso dos proxectos que resulten premiados, entenderanse cedidos á Fundación Caixa Galicia, sen limitación espacial nin temporal ningunha, os dereitos de explotación sobre ditos traballos, incluíndose entre os mesmos os dereitos de reprodución, distribución, comunicación pública e transformación.
– Aceptación das Bases
A participación neste certame supón a aceptación das súas bases.
– Información
Para calquera información adicional ou dúbida poderase enviar un correo electrónico a boletinculturalinformacion@caixagalicia.es. As bases do certame pódense consultar aquí ou descargar neste arquivo: Bases Choven Letras de Lois Pereiro 2011.”

Santiago: actividades do venres 6 na Feira do Libro

Publicado o por

Continúa a Feira do Libro de Santiago (no Paseo Central da Alameda) até o vindeiro domingo 8 de maio, con horarios de 11:30 a 14:00 h. e de 17:30 a 21:30 h., salvo no fin de semana, en que estará aberta de 11:30 a 14:30 h. e de 17:30 a 21:30 h.
As actividades do venres 6 son as seguintes:
– 17:30 h. A maxia na Feira do Libro. Sorprendente actuación do Mago Toño.
– 18:00 h. Presentación e firma do libro Águeda e o misterio dos calcetíns, de Paula Señarís, publicado na colección Árbore, de Editorial Galaxia. Participan o editor Francisco Castro e a autora do libro.
– 19:00 h. Presentación do libro Vivir, unha aventura irrepetíbel. Biografía de María do Carme Kruckenberg, da escritora Mercedes Queizas, publicado por Galaxia. Participan no acto Francisco Castro, editor, María do Carme Kruckenberg e a autora do libro.
– 19:30 h. O escritor Enrique Reyes asinará exemplares do seu libro La princesa que emigró, de Érice Ediciones.
– 20:00 h. Presentación do libro ‘Dicionario’ Lois Pereiro, de María Xesús Nogueira, publicado por 3C3 Editores. Xunto coa autora, intervirán no acto Xosé Manuel Pereiro e Antonio Puentes Chao. Tamén haberá a actuación musical de Modesto Refojo, Pipo.
– 21:15 h. Sorteo dun lote de libros.

Vigo: presentación de Mary Wollstonecraft Shelley e a súa criatura artificial, de María Xosé Queizán

Publicado o por

O venres 6 de maio, ás 20:00 h., na Casa do Libro (Rúa Velázquez Moreno, 27) de Vigo, preséntase o ensaio Mary Wollstonecraft Shelley e a súa criatura artificial, de María Xosé Queizán. No acto participan, acompañando á autora, Iolanda Veloso, Mónica Bar e Fran Alonso.

Cambados: presentación de Svea Kött (Carne Sueca), de Domingo Tabuyo

Publicado o por

O venres 6 de maio, ás 20:00 h., nas Adegas Martin Códax (Burgáns, 91, Vilariño) en Cambados, preséntase a novela Svea Kött (Carne Sueca), de Domingo Tabuyo, publicada en Xerais. No acto participan, acompañando ao autor, Xosé Luís Méndez Ferrín e Manuel Bragado.

A Coruña: maratón de lectura e charla de Xosé Neira Vilas

Publicado o por

O venres Xosé Neira Vilas6 de maio, no local da A. C. Alexandre Bóveda (Rúa Olmos, 16-18, 1º) da Coruña, terá lugar un Maratón de lectura en conmemoración do 50 aniversario da publicación do libro Memorias dun neno labrego, de Xosé Neira Vilas, entre as 17:00 e as 20:00 h. Posteriormente, o autor dará unha charla sobre a súa actividade literaria.

Agustín Fernández Paz: “A miña xeración ten unha sensación de estafa polo tempo que nos tocou vivir”

Publicado o por

Entrevista de Santiago Jaureguizar a Agustín Fernández Paz en El Progreso (a través de Xerais):
“- El Progreso (EP): Resístese a falar de si mesmo, pero non da súa xeración. Faino en Non hai noite tan longa.
– Agustín Fernández Paz (AFP): Esta novela é dalgún xeito un retrato da miña xeración. Chega unha idade na que tes a necesidade de botar a vista atrás e ver como foron as cousas, como te foi levando a vida a facer determinadas cousas. Cando morreu Franco eu tiña 28 anos. 28 anos da miña vida marcounos o franquismo, pero máis que o réxime político, foi o modo de vida e a ausencia de pautas culturais que nos tocou vivir. Canda falaba iso cos meus alumnos custáballes entendelo. Moitos dos autores aos que facíamos referencia na clase son autores que eu debera ter lido na mocidade, pero non puiden: Camus, Beckett, Neruda, Alberti ou Castelao. No cine pasoume igual, eu sabía de memoria a filmografía de Godard polas revistas de cine que lía, pero hai películas que aínda estou vendo agora por vez primeira. Para os que viviron o franquismo con pracidez era normal, pero para os que tiñamos sede de cultura era unha estafa tremenda. A miseria moral e o atraso son vivencias xeracionais. O drama en materia de relacions afectivas marcou a toda unha xeración. (…)
– EP:  Escribiu Non hai noite tan longa pensando nos adultos?
– AFP: Non, escribína coa mesma dedicación cas outras. O editor leuna e falamos de metela nunha colección sen adscricións. Eu véxoa tan de adultos coma outras novelas miñas, como Aire negro. Daquela, no 92, preferín metela nunha colección para rapaces porque pensei en chegar a máis lectores. (…)
– EP: A que ámbitos debería acceder a Literatura Infantil e Xuvenil (LIX) para a súa normalización?
– AFP: Xa se fixo madura, aínda que en España tardou máis en chegar. Hai xente adulta que le este tipo de literatura e non lle caen os aneis. Saben que hai cousas boas, malas e regulares, como nos outros. Os escritores de LIX son máis visibles… se seguimos así, os editores non mirarán se publican nunha colección ou noutra.
– EP: A entrada na RAG dalgún autor sería o paso definitivo?
– AFP: Esa polémica anda por aí, pero paréceme máis importante a entrada das mulleres.”