Suíza: conferencias de Esperanza Mariño sobre Uxío Novoneyra
«Durante a primeira semana do vindeiro mes de xuño, a escritora e catedrática de Lingua e Literatura galegas no IES de Cacheiras (Teo), Esperanza Mariño Davila, impartirá un ciclo de conferencias sobre a vida e a obra de Uxío Novoneyra (Letras Galegas, 2010), a varias asociacións galegas en Suíza, por iniciativa da Federación de Sociedades Galegas en Suíza, dirixida por Pedro Hombre (presidente) e Cristina Pena (secretaria).
O programa a desenvolver é o seguinte:
-Día 3 de xuño: Centro Galego de Zug e Promoción da Cultura de Zürich.
-Día 4: Asociación Lucerna.
-Día 5: Centro Galego de Lucerna.
-Día 6: Centro Galicia de Olten e Irmandade Galega de Xenebra.
En todos estes actos a profesora Esperanza Mariño vailles entregar para as bibliotecas destas sociedades de emigrantes Galegos en Suíza exemplares do “Dicionario”Uxío Novoneyra, editado por tresCtres Editores, 3C3, do que é autora. Esta será a segunda ocasión na que esta escritora se desprazará a Suíza para impartir un ciclo de conferencias sobre o personaxe homenaxeado no Día das Letras Galegas. En 2007 faloulles a diversas sociedades de emigrantes galegos no país helvético sobre a figura María Mariño, deixando alá exemplares doutra obra da súa autoría: o “Dicionario”María Mariño, tamén editado por 3C3.»
Eslovenia: linguas pequenas e linguas xigantes nun obradoiro de tradución poética
«Un ano máis, está a ter lugar en Eslovenia un obradoiro de tradución poética que reune –dende o pasado sábado 29 e durante unha semana- a 7 poetas chegados de linguas e tradicións literarias ben diferentes co obxectivo de compartir un traballo presencial e conxunto de tradución das súas obras ás linguas representadas. Organizado polo “Centro para a Literatura Eslovena” e coa colaboración doutras entidades do país, cada ano un fío conductor agrupa aos convidados, que nesta ocasión reunirán linguas dun elevadísimo número de falantes xunta outras minorizadas. Así, traducirán os textos do resto de compañeiros os poetas Antoine Cassar para o maltés, Xi Chuan para o chinés, a india Mamta Sagar para a lingua canaresa, Stanislav Lvovsky para o ruso, Veronika Dintinjana para o esloveno, para o xaponés Yasuhiro Yotsumoto e para o galego Yolanda Castaño.
A experiencia de traballaren os propios poetas cóbado con cóbado, traducíndose os uns aos outros para cadansúa lingua e a través do idioma vehicular do inglés, rematará coa intervención dos 7 participantes no Festival Internacional de Poesía Živa književnost (“Literatura en Vivo”), un evento anual que chega xa á súa 17 edición. Será en Ljubliana o venres 4 e o sábado 5.
É a primeira vez que a literatura galega está representada neste obradoiro internacional de tradución poética en Eslovenia capaz de fomentar o intercambio entre tradicións literarias de todo tipo. Ao seu remate e de volta nos seus países de orixe, os autores tratarán de amosar os resultados acadados despóis desta experiencia de convivencia, intercambio e tradución.»
Máis info: Center for Slovenian Literature.
Máis info: Festival de Poesía.
Ourense: acto de entrega do IX Premio Carlos Casares de microrrelato
O venres 28 de maio na Aula de Cultura Liceo de Ourense tivo lugar a «entrega do IX PREMIO CARLOS CASARES 2010 DE MICRORRELATO, convocado polo Liceo de Ourense. 550 traballos chegados dende todas as partes do mundo, se presentaron a esta novena edición do Premio CARLOS CASARES” , de todos eles resultor gañador para o xurado o presentado co lema “NON CHOVÍA EN PARÍS”, aberta a plica correspondente resultou ser a súa autor Don XERARDO MÉNDEZ, con enderezo na Cidade de Ourense. O título definitivo da obra é: “NON HAI REGRESO” .»
IV Agasallo a Luís Seoane
Será o luns 1, ás 20:00, na Biblioteca Pública da Coruña Miguel González Garcés.
«Na Biblioteca Miguel González Garcés da Coruña celebramos o IV AGASALLO A LUIS SEOANE no día do seu CENTENARIO (1910 – 2010) . Luís Seoane naceu en Bos Aires o 1 de xuño de 1910 e morreu na Coruña en 1979.
Farémolo coa presentación do libro Poemas alumeados de figurandorecuerdo(s)edicions. Trátase dunha escolma de poesías de Luís Seoane, cada unha delas ilustrada por artistas plásticos contemporáneos amigos do artista, así como polos que se senten identificados ou influídos pola súa obra e polo seu pensamento. Catorce poemas elexidos dos seus diferentes libros, Fardel de eisilado , ediciós Anxel Casal, Bos Aires, 1952; Na brétema, Sant-Iago , ediciones Botella al mar, Bos Aires, 1956; As cicatrices , editorial Citania, Bos Aires, 1959; A maior abondamento , ediciones Cuco-Rei, Bos Aires-A Coruña, 1972; Luís Seoane. Obra poética , ediciós do Castro, Sada, 1977.
Neste fermoso libro co que agasallamos a Luís Seoane fai a presentación Xosé Luís Méndez Ferrín , escritor e presidente da Real Academia Galega ; e os artistas que participan son o pintor Xaquín Chaves ; o pintor e gravador Jesús Núñez ; o pintor e publicista Lipa Burd ; Xoán Piñón fotógrafo; a deseñadora Lía Santana ; o pintor Felipe Criado ; o deseñador Xosé Salgado ; o pintor Xabier Correa Corredoira ; o deseñador Pepe Barro ; o fotógrafo Luis López “Gabú” ; o artista multidisciplinar Tiago Guedes Madeira ; a artista plástica Pilar Turbón ; o pintor e debuxante Detlef Kappeler ; o pintor e acuarelista Reiner Schiestl e o ilustrador gráfico Hermenegildo Sábat .
Con motivo da celebración poderá verse unha mostra dos orixinais que alumean este libro. Contaremos coa presenza dalgúns dos artistas e de Luis José Eguiburu Seoane, fillo da irmá do artista homenaxeado, Estela Seoane López, representando á vez aos fillos de Rafael Seoane López, Rafael e Ana Seoane , que viven en Bos Aires. Son os tres únicos sobriños de Luis Seoane.
Deseguido asistiremos a un concerto do grupo musical DOA que se suma ao homenaxe a Luis Seoane coa presentación de varios temas do seu último traballo “A Fronda dos Cervos” (2006), de próxima edición. Coas cantigas de Alfonso X, Martín Codax, Códice Calixtino e os textos dos trobeiros galaico-portugueses, a música galega estará presente no acto. […]
Para rematar, acercarémonos á Praza Luis Seoane (Monelos, Novos Ministerios) para plantar, por cuarto ano consecutivo, tres plantas de ruda e un allo verde, ao pé do busto do artista, en memoria do libro de Luis Seoane “ Tres hojas de ruda y un ajo verde” publicado en Bos Aires en 1948.»
Os Premios Xerais 2010 coñeceranse o sábado 12 de xuño na Illa de San Simón
«Trinta e oito obras compiten no Premio Xerais de Novela, e trinta e dúas polo Premio Merlín de Literatura Infantil. Os xurados declararán as obras finalistas na súa primeira reunión, que se celebrará o venres, 4 de xuño. Os premios serán fallados o sábado 12 de xuño na illa de San Simón.Edicións Xerais de Galicia, unha vez pechado o prazo de admisión de orixinais dos seus premios literarios 2010, nomeou aos membros dos dous xurados.
O xurado da XXVII edición do Premio Xerais de Novela, dotado con 25.000 euros e no que concorren trinta e oito obras, está formado por: Comba Campoy (actriz), Manuel Ángel Candelas Colodrón (profesor da Universidade de Vigo e blogueiro), Roberto Pérez Pardo (profesional do libro), Belén Regueira (xornalista), Antón Sobral (pintor) e Fran Alonso (secretario do xurado), en representación de Xerais, con voz e sen voto.
Con motivo da celebración do XXV aniversario do Premio Merlín de Literatura infantil, Xerais acordou formar o xurado con escritores e escritoras gañadores de edicións anteriores.
O Premio Merlín de literatura infantil , dotado con 10.000 euros e no que concorren trinta e dúas obras, está formado por: An Alfaya (Premio Merlín, 1997), Jacobo Fernández Serrano (Premio Merlín, 2009), Antonio García Teijeiro (Premio Merlín, 1996), Mar Guerra (Premio Merlín, 2008), Gloria Sánchez (Premio Merlín, 1990), e Helena Pérez Fernández (secretaria do xurado), en representación de Xerais, con voz e sen voto.
Os dous xurados determinarán as obras finalistas na súa primeira reunión, o venres 4 de xuño, e as gañadoras, na segunda, a celebrar o sábado 12 de xuño. A festa de fallo dos premios terá lugar ese mesmo día na illa de San Simón.»
Edicións Xerais de Galicia
Marica Campo gaña o VI Premio a artigos xornalísticos normalizadores Concello de Carballo
O VI Premio a artigos xornalísticos normalizadores Concello de Carballo 2010, dotado con 1.200 euros e a publicación nos once medios de comunicación colaboradores, foi para o artigo «A procura do tesouro», da escritora lucense Marica Campo. O xurado tamén lle concedeu un accésit ao artigo «Por unha Galiza neofalante», de Marcos Abalde Covelo.
Ao certame presentáronse 39 traballos que, segundo o xurado, no seu conxunto «supoñen unha extraordinaria radiografía da visión sociolingüística do noso país».
Servizo de Normalización Lingüística
Concello de Carballo
A Coruña: nova colección de Estaleiro Editora e Proxecto Derriba
O próximo venres día 28 de abril, ás 20:30 hh., Estaleiro Editora e Proxecto Derriba presentarán, no Centro Social Gomes Gaioso da Coruña (Rúa Marconi, 9) as dúas primeiras monografías da súa colección de pensamento contemporáneo. Para falar deste proxecto de coedición e presentar os seus primeiros resultados participarán no acto Abraham Rubín e Brais Arribas, autores das monografías e membros de Proxecto Derriba, e Iria Sobrino, integrante de Estaleiro editora.
Compostela: presentación de Prisciliano na cultura galega, de Victorino Pérez Prieto
Alberto Gómez Aneiros gaña o XII Premio Ánxel Fole
«O primeiro premio foi para Encontros e desencontros, de Alberto Gómez Aneiros, veciño de Santiago e nado no Ferrol. O xurado resaltou a súa técnica, «que partindo dun blog crea un relato cunha atractiva tensión narrativa». En segundo lugar quedou a obra O sangue que tinxe as rúas de Gottan, de Alberto Rodríguez, de Ourense. O xurado gabou a súa «impecable calidade literaria».
O xurado de galego decidiu conceder un accésit a un relato que sorprendeu polo seu léxico e «as riquezas metafóricas». Trátase de A pleitesía do sorriso nas gamelas, de Rocío Leira Castro, de Cee.» (La Voz de Galicia)
