Ribadeo: roteiro literario e presentación de A novela do Bravú, de Xurxo Souto
Compostela: actividades do 2 de outubro na SELIC 2026
Boiro: presentación de Quen conduce o Estado. Arte, ideas, artistas e movementos que deron forma á vitoria do Estatuto de Galicia de 1936, de Iria-Friné Rivera Vázquez, o 3 de outubro
Compostela: Galiza con Palestina. Resistencia, Liberdade e Paz. Manifestación nacional o 4 de outubro
Chamamento de organizacións e entidades galegas á Manifestación Nacional
Tres anos despois do inicio do xenocidio do pobo palestino en Gaza, a un ano do falso Plan de Paz anunciado o 10 de outubro de 2025, e cando se cumpren 78 anos de ocupación da Palestina coa complicidade dos aliados do sionismo e a pasividade da chamada comunidade internacional, as entidades asinantes:
- Denunciamos que, malia o anuncio dun Plan de Paz en outubro de 2025, os ataques de Israel contra a poboación civil de Gaza non cesaron: segundo Nacións Unidas, máis de 1.300 persoas palestinas foron asasinadas e máis de 4.400 feridas desde a entrada en vigor do acordo. Denunciamos igualmente a intensificación da violencia colona e as expulsións forzadas na Cisxordania ocupada.
- Exiximos un alto o fogo real: cesamento total dos ataques, abertura plena e permanente de todos os pasos fronteirizos, fin do bloqueo e entrada masiva e sen trabas de axuda humanitaria, auga, combustíbel e material sanitario e educativo.
- Exiximos unha investigación exhaustiva e independente do xenocidio e dos crimes contra a humanidade cometidos por Israel, en liña coas conclusións da Comisión de Investigación da ONU, que en 2025 xa cualificou os feitos como xenocidio, e apoiamos sen reservas o proceso aberto ante a Corte Internacional de Xustiza.
- Condenamos a complicidade da Unión Europea e dos seus estados membros cos intereses do sionismo. Malia as declaracións públicas e os anuncios de “plans de paz” impulsados por terceiros Estados, a UE mantén practicamente inalteradas as súas relacións comerciais e diplomáticas coa entidade sionista.
- Exiximos da Unión Europea a suspensión inmediata e efectiva do Acordo de Asociación e de todas as relacións preferentes con Israel, mentres non cesen as violacións do dereito internacional.
- Denunciamos o incremento do gasto militar e os plans para favorecer a chamada “economía de guerra”, que implica o desvío de fondos sociais para armamento e en última instancia só serve para nos empobrecer.
- Exiximos do Estado español que, alén de conferencias internacionais e palabras de recoñecemento formal do Estado, faga efectiva a ruptura das relacións comerciais e militares coa entidade xenocida —incluída a venda e tránsito de armamento— e que impulse activamente medidas de rendición de contas a nivel internacional.
- Exiximos o fin da lei mordaza e das medidas de represión do Estado español contra a solidariedade e a defensa dos dereitos humanos. A denuncia dos crimes do sionismo e do xenocidio do pobo palestino non é antisemitismo!
- Exiximos da Xunta de Galiza que deixe de se pór de perfil e tome postura clara na defensa da legalidade internacional, cancelando calquera relación institucional, comercial ou de cooperación que manteña, directa ou indirectamente, con entidades cómplices da ocupación.
- Exiximos a aplicación plena do dereito internacional, en particular o dereito de autodeterminación do pobo palestino en toda a Palestina, do río Xordán ao mar Mediterráneo, e o dereito ao retorno de todas as persoas refuxiadas. Urxe impedir que o falso cesar-fogo sirva para perpetuar o bloqueo e a fragmentación territorial, permitir novos planos de desprazamento demográfico, e que Israel continúe a roubar terras, colonizar a Cisxordania e manter estruturas de apartheid sobre todo un pobo.
Aquí podes apoiar a manifestación.
Paseos Literarios por Compostela 2026
Destacado
Os Paseos Literarios por Compostela 2026 son unha iniciativa da AELG desenvolvida coa colaboración e patrocinio do Concello de Santiago de Compostela. No marco da Semana do Libro de Compostela (SELIC) 2026, terá lugar unha nova edición deste Ciclo de percorridos literarios por Compostela, procurando outra ollada á historia e xeografía da cidade.
A inscrición, gratuíta, realizarase, indicando nome e apelidos, enviando un correo electrónico a oficina@aelg.org. O punto de saída en todos eles será a propia SELIC, na Praza da Quintana.
O programa de Paseos Literarios é o seguinte:
– A Conferencia Ambulante de Serafín Andante.
Carlos Labraña
Data: sábado 3 de outubro, ás 12:00 h.
– A cidade e os milagres
Daniel Asorey
Data: quinta feira/xoves 8 de outubro, ás 17:00 h.
– A Conferencia Ambulante de Serafín Andante.
Carlos Labraña
Data: sábado 10 de outubro, ás 12:00 h.
Información sobre protección de datos
A responsábel do tratamento é a Asociación de Escritoras e Escritores en Lingua Galega. A finalidade do tratamento é a prestación do servizo que se detalla na solicitude ou actividade organizada. A base legal do tratamento é o cumprimento dunha obriga contractual na prestación dun servizo. Os seus datos conservaranse unicamente durante os prazos de prescrición legalmente aplicábeis. Pódense comunicar os seus datos a terceiras/os organizadoras/es ou colaboradoras/es da actividade. No caso de solicitar certificado de asistencia, os seus datos comunicaranse ao/á impartidor/a da actividade. Pode acceder, rectificar, suprimir os seus datos e nos casos determinados opoñerse ao tratamento, limitar o seu uso ou portar a outra/o responsábel. Tamén pode solicitar a tutela da Axencia Española de Protección de Datos ou presentar unha reclamación ante a mesma.
Vigo: Poéticas Diversas. Corpo a Corpo coa Palabra, a Música e a Danza, o 3 de outubro
Negreira: presentación de Pozo Garza: A Luz máis alá da Poesía, de Cristina Negreira Barcia
Crónica videográfica da homenaxe A Escritora na súa Terra – Letra E 2026, dedicada a Eva Veiga (III)
A Homenaxe O/A Escritor/a na súa Terra, impulsada pola Asociación de Escritoras e Escritores en Lingua Galega (AELG), chegou á súa XXXII edición, recaendo na figura da poeta Eva Veiga, de quen se destaca, dentro da súa importante traxectoria vital, a súa amplamente recoñecida obra literaria. Foi homenaxeada en Pontedeume o 13 de xuño de 2026.
Esta iniciativa anual conforma xa unha tradición na traxectoria da Asociación, e tense constituído ao longo de máis de dúas décadas como unha celebración na que a terra de acollida do homenaxeado ten unha presenza fundamental. É vontade da AELG honrar escritoras/es procurando o contacto directo coa autora e a súa implicación persoal na xornada de homenaxe.
Unha celebración múltiple e popular en que se vén recoñecendo a entidade literaria de insignes figuras das nosas letras, a través dunha serie de eventos como a entrega do galardón Letra E de escritora (unha peza escultórica), a plantación dunha árbore simbólica elixida pola propia autora, e a colocación dun monólito conmemorativo.
Esta actividade contou co apoio do Concello de Pontedeume, CEDRO, Deputación da Coruña e Xunta de Galicia.
Aquí pode verse a crónica videográfica, da que publicamos hoxe a terceira parte dos vídeos:
– Intervención de Cesáreo Sánchez Iglesias, presidente da AELG, no acto de entrega da Letra E:
– Laudatio, por Teresa Seara:
A Coruña: presentación de O Son das Sirtes, de Ricardo Seixo
A AELG apoia o chamamento da AGPTI á folga simbólica de tradutoras e intérpretes, no Día Internacional da Tradución
Desde a AGPTI:
“Este 2026, a AGPTI sumámonos á mobilización que promoven, por segundo ano consecutivo, os colectivos franceses de profesionais da tradución En chair et en os e IA-lerte Générale, así como o sindicato STEF, co apoio doutras entidades e organizacións, co fin de convocar unha «folga» de tradutoras/es no Día Internacional da Tradución (30 de setembro). Unha folga simbólica, porque ese dereito non está garantido na nosa profesión por sermos a gran maioría traballadoras/es autónomas/os, pero que testifica a nosa determinación por defender as nosas condicións de traballo, por rexeitar a IA e as súas nefastas consecuencias, así como por esixir o recoñecemento da nosa profesión.
O 30 de setembro será un día de loita colectiva nacional e internacional contra o illamento e a resignación. Aproveitemos a ocasión para encontrarnos, reunirnos, debater e organizarnos.
As enquisas demostran unha crecente precariedade no sector da tradución profesional: as nosas condicións socioeconómicas seguen a degradarse en todos os eidos (tradución editorial, audiovisual, pragmática, científica…). Carecemos de dereitos, págannos menos do que nos corresponde e non dispomos de protección social completa.
Seguimos sen ter:
– Subsidio por desemprego
– Medicina do traballo
– Vacacións pagadas
– Tarifas mínimas
– Tempo de traballo máximo semanal
– Días festivos
– Posibilidade de rexeitar eficazmente que as nosas obras sexan manipuladas pola tecnoloxía co beneplácito do Estado
En resumo, para unha gran parte de nós non existen unhas condicións de «traballo decente» (segundo a denominación da Organización Internacional do Traballo).
Durante este tempo:
– Seguen a impoñernos traballo de balde e mal remunerado como se as nosas competencias fosen unha afección, solicitando probas de tradución gratuítas ou o acompañamento tras a interpretación.
– Case nunca se cobra por urxencia, como tampouco o traballo de noite ou durante as fins de semana.
– As axencias subcontratantes seguen a impoñernos tarifas e algoritmos de IA que adoitan empregar sen que o saiba a súa clientela.
– Os ingresos complementarios, como poden ser bolsas ou axudas, convértense nun recurso fundamental para paliar os escasos ingresos do noso traballo.
– Compañeiras/os de profesión abandonan o sector pola falta de encomendas.
– Cada vez somos máis as persoas que non chegamos ao ingreso mínimo vital.
– As persoas egresadas que se inician na profesión non conseguen facerse un oco no mercado laboral.
A ideoloxía predadora e os intereses económicos que promoven a IA en detrimento do planeta e da xente traballadora seguen avanzando. Nos diferentes ámbitos da tradución, imponse a postedición por riba das condicións de traballo e da remuneración.
No sector do libro, algunhas editoriais pretenden aforrar recorrendo a axencias de tradución con IA; no audiovisual, algunhas cadeas prescinden de profesionais para a subtitulación; no teatro, estase a desenvolver a automatización dos sobretítulos ao amparo de sociedades privadas; na investigación, redúcese o número de contratos coas revistas de humanidades e ciencias sociais… No colectivo de profesionais autónomas/os, non ter clientela directa supón traballar arreo a golpe de clic coa obriga de revisar textos xerados por IA para axencias de subcontratación.
A tradución non é un problema que deba resolverse.
Defender o noso traballo é defender unha sociedade humana.
Queremos:
– Traballar sen depender da intelixencia artificial xenerativa, que non é máis ca unha nova etapa na automatización do traballo e unha carreira en prol da produtividade, en detrimento das linguas, da seguridade das persoas, do saber facer humano, dun pensamento e unha cultura libres, diversos e abertos.
– Unha continuidade nos ingresos e, máis amplamente, unha cobertura social máis ampla, equiparable ás traballadoras/es por conta allea.
– Unhas condicións de traballo dignas, con remuneracións e contratos decentes que teñan en conta a precariedade inherente á nosa profesión, marcada pola baixada de prezos e o traballo de balde en múltiples tarefas esenciais.
Este mércores 30 de setembro de 2026, animamos a toda aquela persoa tradutora, sexa autónoma ou asalariada, traballe de xeito independente ou para axencias, a que pare de todo!
Ese día, non traducimos, deixamos os teclados a un lado, non facemos entregas e organizámonos co resto de compañeiras/os para dedicar a xornada a consolidar a nosa solidariedade, a reflexionar e a actuar para mellorar as nosas condicións de traballo e existencia.
Con tal motivo, dende a AGPTI propomos unha xornada de xuntanza e mobilización en Vigo, cunha concentración pacífica diante do museo MARCO, o 30 de setembro ás 12:00 h, co obxectivo de manifestar publicamente a degradación da nosa profesión e reivindicar unhas condicións de traballo dignas.”
